Yohané 14

Ndà Tà. Tà mba Mén. Ngafitentù

1Kà ntù tsin mvètte, bin bam Nsi, mbèn mbam mba me. 2Dù'ntswe num ntùm ndà Tàa yàme; a lo mbe ndù a ke' be, mba me lo tshob bin, nummbe me tshwèt nèn nenabte dù' bin. 3Ngelaṅ ze me nsi nène, kà nabte dù' là, me nsi bèn se' lo' zine, ndù dù' ze me be bwe là, mba bin be zin bwe. 4Dù' ze me tshwèt nèn nà bin lèn manze. 5Tomas tshob yi ndù: Tshùaben, bag ke' lèn dù' z'o tshwèt nèn nà, bag nsi lèn manz'a ndùke? 6Yésu tshob yi ndù: Tu wul àm me b'a manze mba nenùne, mba yôg. Sàm mèn ke' be kum mbaṅ Tà ke be ndù a tshùa num àm. 7A lo mbe ndù bin lèn àm, mba bin lèn mba Tàa, fe ndonni bin lèn i, bin à yen i. 8Filibo tshob yi ndù: Tshùaben, la'te Tà bag, yen nà ku' num bag.

9Yésu tshob yi ndù: Me tswe bag à bin ngelaṅ yàme, o ke' lèn àm ké Filibo? Mèn z'a yen àm nà yen Tà. O tshob ndù la'te Tà bag à ndùke? 10O ke' bam ndù me num Tà, Tà be num àm ké? Ntshob mi me tshwèt ntshob bin nà, me ke ke ntshob à num yàm tu; là Tà z'a be ntswe num àm nà bèn nke mfa' mfa' mi. 11Bin bam me ndù me num num Tà, Tà be num àm; ntag ndùlala, bin bam nda' num mfa'! 12Kua' nenùne, kua' nenùne, me tshob bin ndù: Mèn z'a bam àm nà nsi fa' mfa' mi me tshwèt mfa' là; a nsi fa' mfa' ndùb ntshùa men ni, nummbe me tshwèt nèn tèt Tà. 13Mba ke lo ze bin nsi bètt'a num lén sàm nà, me nsi ghù yen nà, ndùlala ndù nkuni Nsi tswite wul i num Mén. 14A be ze bin bètte ju num lén sàm nà, mba me nsi ghù.

15A be ze bin kô àm nà, mba bin nsi lé' ntshù' màm, 16mba tu wul àm me nsi le'te Tàa; a nsi fà mo' ngafitentù bin, ndùlala ndù a be bin à bo yoṅ ntshù'. 17Ywèt nenùn ze njù ke' ku'ni nekwé là, nummbe a num ntswe bin à bo, mbe ndù a nsi be bin à bo. 18Me ke nsi faṅ zin mba bontse là, me nsi se' bin. 19Num mo' ngelaṅ njù ke bèn neyen àm; là bin, bin nke njen àm, nummbe me tshwèt njôge, mba bin zin nsi yôge. 20Num sen lé'njù là, bin nsi lèn ndù me b'a num Tàa, bin be num àm, me be num bin. 21Mèn z'a ghù ntshù' màm mbèn nke ndé' là, yen ni b'a mèn me nsi kô i, bèn tswite wul àm yi. 22Yuda, ke b'a ze Iskariot, tshob yi ndù: Tshùaben, ke z'a ghù o kô netswite wul o bag ke b'a njù à? 23Yésu bùnte ntshob yi ndù: A be ze mèn kô àm nà, mb'a nsi lé' ntshob màm, mba Tàa nsi kô i, mba bag nsi se' yi, mba bag nsi ghù dù' ntswe mbaṅ i. 24Mèn z'a ke' kô àm nà ke' lé' ntshob màm. Ntshob mi bin tshwèt nju' là ke' b'a màm, là mi Tà z'a tum àm nà. 25Me lo tshob tshen tshu li bin ngelaṅ me tswe mbaṅ bin nà. 26Là ngafitentù, Ywèt Nelàn tse Tà nsi tum num lén sàm nà, yen nà nsi tswite zin njoṅ tshu fa, bèn nkwimte njoṅ tshu fa tse me tshob bin nà bin.

27Me faṅ fite bin, me fà yàm fite bin, ke fà bin à mba njù num mfà là. Kà ntù tsin vètte, ke bèn mbwôge. 28Bin lo ju' mba me tshob bin ndù: Me tshwèt nène, bèn se' bin nà. A be ze bin kô àm nà, mba bin nsi tsiaṅte mba me tshwèt nèn tèt Tà là, nummbe Tà b'a mèn ndùb ntshùa àm. 29Me tshob bin ndonni kà yen nu là se'e, ndùlala ndù ngelaṅ z'a nsi se' là, bin bam. 30Me ke nsi bèn tshobte bag à bin yàme; nummbe mfen yen njù li tshwèt nse'e, a ke' ghù sàm ju num àm. 31A bwô ndù njù lèn ndù me num nkô Tà, mbèn nke ngù à be ndaṅndaṅ mba Tà na' ntshob me là; bin lo tù bag bin tum nsen ni.

હાલમાં પસંદ કરેલ:

Yohané 14: BMa

Highlight

શેર કરો

નકલ કરો