Yohané 15

Tù mba nkaṅ mi

1Tu wul àm, me b'a tù se nenùne, Tàa b'a ngadù'nà. 2Mba sit kaṅtù lo s'a be num àm ke be yam ntàm nà, a num nkeb i; mba sit lo s'a num njam ntàm nà, a num mfét'é, ndùlala ndù a yam ntàm ntshùate. 3Bin à làne, num ntshob mi me tshob bin nà.

4Bin ghô num àm mba me yàm ghô num bin. Ndaṅndaṅ mba be kaṅtù ke ku'ni neyam ntàm ze tu, a be z'a ke' ghô num tù là, be ndaṅndaṅ bin ke' ku'ni, a be bin ke' ghô num àm nà. 5Tu wul àm, me b'a tù, bin be nkaṅtù: Mèn z'a ghô num àm mba me yàm ghô num i là, yen mèn nà num njam ntàm yàme, nummbe a be ke b'a me bin ke ku'ni neghù sàm ju. 6A be ze mèn ke' ghô num àm nà, mba bo ma' i njù mba kaṅtù là, a jum; bo tse'te men nà, ma' mbwôge, bo kù. 7A be ze bin ghô num àm, ntshob màm ghô num bin nà, bin bètte mba ke lo bin kô là, mba bin nsi kwé. 8Yen ni b'a nkuni Tàa, ndù bin yam ntàm yàme, ndùlala bin nsi tù' ghazi'te nu àm. 9Ndaṅndaṅ mba Tà be nkô àm nà, mba me yàm be nkô zine. Bin ghô num nkôni àm. 10A be ze bin lé' ntshù' màm nà, mba bin nsi ghô num nkôni àm, be ndaṅndaṅ, mba me lo lé' ntshù' Tàa, me ghô num nkôni i; 11me lo tshob tshen tshu li bin, ndùlala ndù yàm tsiaṅte be num bin, mba ndù zin tsiaṅte dune.

12Yen #Yoha. 13.34; 15.17; 1 Yoha. 3.23; 2 Yoha. 5ni b'a ntshù' àm, ndù bin ke nkôni bin bin, mba me be nkô zin nà. 13Sàm mèn ke' bèn ngù mo' nkôni ze ndùb ntshùa z'a be mb'a be mèn fà yôg se num tu shun tse là. 14Bin b'a shun tshàm, a be ze bin be ngù ju ze me tshob bin nà. 15Me ke bèn netsiaṅ zin kuan, nummbe nkuan ke' be lèn ju ze tàab be ngù là; là me lo tsiaṅ zin shun tshàm, nummbe me lo ghù bin lèn njoṅ tshu fa tse me na' nju' Tàa là. 16A ke b'a bin na' mbèn ntsho' àm, là, a b'a me na' mbèn ntsho' zine, mbèn njab zine, ndù bin nène, mba ndù bin yam ntàme, mba ndù ntàm min bèn ntswe, ndùlala ndù mba ke lo ze bin nsi bètte Tà num lén sàm nà, a fà bin. 17Me tshob tshen tshu li bin à ndù bin ke nkôni bin bin.

Kebàn njù num ghazi'te nu Yésu

(Mat. 10.22-33)

18A be ze njù bàn zin nà, bin lèn ndù a lo bwôgmbwe mbàn àm bin. 19A lo mbe ndù bin b'a ba ntùm njù, mb'a be njù kô ju z'a be ze là. Là mba bin ke' b'a ba ntùm njù, là mbe ndù me lo à tsho' zine, nsô zin ntùm njù là, a num ndùlala ze njù tshwèt mbàn zin nà. 20Bin #Mat. 10.24; Luk. 6.40; Yoha. 13.16kwimte ntshob mi me na' ntshob bin nà ndù: Ngafa' ke' b'a mèn ndùb ntshùa Tshùaben i. A be ze bo tsho' nku màm kebàn nà, mba bo nsi tsho' mba min nku kebàn, a be ze bo lé' ntshob màm nà, mba bo nsi lé' mba mine.

21Là njoṅ tshen tshu li fa, bo nsi ghù bin num nu lén sàm, nummbe bo ke' lèn mèn z'a tum àm nà. 22A lo mbe ndù me lo ke se', mbe ndù me lo ke tshob bo, mb'a be bo ke ghù nukebwô num bo, là ndonni latnta ke' be num nukebwô tshobe. 23Mèn z'a bàn àm nà bàn mba Tàa. 24A lo mbe ndù me ke' fa' mfa' mi mo' sàm mèn ke' to' fa' là netèt bo, mb'a be bo ke ghù nukebwô num bo, là ndonni bo yen, mba me, mba Tàa, mbàn yage. 25Ndùlala #Yobk. 35.19; 69.4ndù ntshob mi bo na' nkite ntùm ntshù' yub là bumte ndù: Bo lo bàn àm banban.

26Ngelaṅ ze ngafitentù nsi se'e, yen nà ze me nsi tum bin num ze tu Tà, Ywèt nenùne, ts'a tum num Tà là, a yi z'a nsi kwé nta num àm nà. 27Mba bin zin nsi kwé nta, nummbe fe neto'te bag à bin bèn mbe.

હાલમાં પસંદ કરેલ:

Yohané 15: BMa

Highlight

શેર કરો

નકલ કરો