Yohané 16

Ngafitentù

1Me lo tshob tshen tshu li bin, ndùlala ndù kà bin vù ntùm ywi'. 2Bo nsi sô zin ntùm ba sinagogue; mba ngelaṅ tshwèt nku'u, ze mba we lo z'a nsi zwi zin nsi kwate ndù a fa' Nsi là. 3Bo nsi ghù tshen tshu là, nummbe bo lo ke lèn Tà, ke lèn mba me. 4Là me lo tshob tshen tshu li bin, ndùlala ndù ngelaṅ ze yub ngelaṅ nsi ku' là, bin kwimte ndù me lo à tshob tshu là bin. Là me lo ke tshob tshen tshu là bin fe neto'te, nummbe me lo be bag à bin, 5là ndonni, me tshwèt nèn tèt mèn z'a tum àm nà, là sàm mèn netèt bin ke bètt'àm ndù: O nèn à yà?

6Là mba me na' ntshob tshen tshu là bin nà, ntù tsin dun zwe. 7Là me tshob à nenùn bin: A b'a fu' bin ndù me nène, nummbe a be ze me ke' nèn nà, mba ngafitentù ke nsi se' bin. Là, a be ze me nèn nà, mba me nsi tum i bin. 8Ngelaṅ z'a nsi se' là, a nsi la'te njù mba nukebwô be là, mba nunetsin be là, mba nu netsho'te ntsha be là. 9Nukebwô: Nummbe bo ke' bam àm; 10Nunetsine: Nummbe me tshwèt nèn tèt tà mbe ndù bin ke bèn neyen àm; 11nu netsho'te ntsha: Nummbe bo à tsho'te ntsha mfen yen njù li.

12Me bèn ngù tshu yàm netshob bin, là bin ke' ku'ni neket ndonni. 13Là ngelaṅ a nsi se'e, yi Ywèt nunenùn nà, a nsi tshagte zin ntùm nenùn fa; nummbe a ke nsi tshob à num ze tu, a nsi tshob njoṅ tshu fa ts'a ju' là, bèn tshob tshu ts'a nsi se' là bin. 14A nsi kuni àm, nummbe a nsi lo' ju ntùm z'a be yàm nà tshob bin. 15Njoṅ tshu fa ts'a be Tà là b'a tshàm; a num ndùlala ze me tshob ndù a nsi lo' ju ntùm z'a be yàm nà tshob bin nà.

Ntage mba nka'ni

16Num mo' mén ngelaṅ, bin ke nsi bèn yen àm, num mo' mén ngelaṅ, bin nsi bèn yen àm, nummbe me tshwèt nèn tèt Tà. 17Ndùlala tsemo' ben netèt ghazi'te nu i tshob bo bo ndù: Yen ju li z'a tshob be ndù: Num mo' mén ngelaṅ bin ke nsi bèn yen àm, num mo' mén ngelaṅ bin nsi bèn yen àm, mba ndù, nummbe me tshwèt nèn tèt Tà là, b'a ndùke? 18Ndùlala bo nke ntshob ndù: Yen ju z'a tshob ndù: Num mo' mén ngelaṅ nà b'a ndùke? Bag ke' lèn ju z'a tshwèt ntshob là. 19Yésu lèn ndù bo tshwèt nkwate nebètt'é nu, ntshob bo ndù: Bin tshwèt ndiag netèt bin nelèn ju ze me tshob ndù: Num mo' mén ngelaṅ, bin ke nsi bèn yen àm, num mo' mén ngelaṅ, bin nsi bèn yen àm nà. 20Kua' nenùne, kua' nenùne, me tshob bin ndù: Bin nsi kua', làne, là njù nsi tsiaṅte; bin nsi tswe zwe, là sin zwe nsi kaṅ tù' tsiaṅte. 21Mènnzwi num mb'a ntùm zwe ngelaṅ z'a tshwèt mbwe là, nummbe ze ngelaṅ ku'u. Là ngelaṅ z'a bwe là, a ke bèn nekwimte nge', num tsiaṅte mba mènntùn se' ntùm njù là. 22Ndùlala mba bin zin b'a ntùm zwe ndonni, là me nsi bèn yen zine, ntù tsin tsiaṅte, sàm mèn ke nsi kwé tsiaṅte zin bin. 23Num sen lé'njù là bin ke nsi bètt'àm sàm nu. Kua' nenùne, kua' nenùne, me tshob bin ndù: A be ze bin bètte ju Tà là, mb'a nsi fà bin num lén sàm. 24Tà nkum ndonni bin ke' yoṅ nto' bètte ju num lén sàm; bin bètte bin nsi kwé ndù tsiaṅte zin dune. 25Me lo tshob tshen tshu là bin à ngùme; ngelaṅ tshwèt nku'u, ze me ke nsi bèn tshob nu bin à ngùm nà, là ze me nsi soṅ zin nu num Tà be ndaṅndaṅ nà.

26Num sen lé'njù là bin nsi bètte ju num lén sàm; là, me ke' tshob bin ndù me nsi le'te Tà num zin tu. 27Nummbe tu wut Tà be nkô zine, mba bin be nkô àm, mba ndù bin lo bam ndù me tum à num Tà là. 28Me lo tum num Tà, nse' ntùm njù, me tshwèt mbèn mfaṅ njù nèn tèt Tà.

29Ghazi'te nu i tshob ndù: Tshù, ndonni o tshwèt ntshob à ndaṅndaṅ ke bèn ntshob à ngùme. 30Ndonni bag lèn ndù o lèn njoṅ tshu fa, mba ndù o ke' diag ndù sàm mèn bètt'o nu; a num ndùlala ze bag bam ndù o fe à Nsi là.

31Yésu bùnte bo ndù: Ndonni bin bam ké? 32Tshù, ngelaṅ tshwèt nku'u, ndù à ku'u, ze bin nsi sate, mba we lo nèn ze bag, là bin faṅ àm tù' me là. Là, me ke' b'a tù' me, nummbe bag Tà bèn mbe. 33Me lo tshob tshen tshu là bin, ndùlala ndù bin ghù fite num àm. Bin à yen nge' ntùm njù, là bin fèn ntù, nummbe m'a tshùa njù.

હાલમાં પસંદ કરેલ:

Yohané 16: BMa

Highlight

શેર કરો

નકલ કરો