Yohané 12

Neyo' Yésu mà Bètania

(Mat. 26.6-12; Mark. 14.3-9)

1Ndùlala lé'njù ntôg kà Pasa ku'u, Yésu nèn Bètania dù' ze Lazaro z'a bam i num vù be bwe là. 2Ndùlala bo nabte jujù yi bwe, Marta nke mfa'a, Lazaro b'a mo' mèn netèt ben tse bo tswe téblé là. 3Maria #Luk. 7.37-38lo' labinda mebwô ze tanjoṅ, njo' nku Yésu yi, mbèn ndo' nyiaṅtu tse ntshwétte nku mi yi. Ywèt labinda dun ntùm ndà. 4Yuda Iskariot mo' mèn netèt ghazi'te nu i, mèn z'a swèn i là tshob ndù:

5Numke bo ke swèn yen labinda li denario nkù tat, mfà nkàb bwoṅbwoṅ à? 6Là, a tshob ndùlala ke b'a ndù a tshwèt nywin num bwoṅbwoṅ, là nummbe a na' mb'a ntshô, mbe ndù a na' mbèn nke ndé' mfe', nke njé ju ze bo yab ntùm bwe là. 7Ndùlala Yésu tshob ndù: Faṅ i là ndù a lé' yen labinda là mum lé'njù netshoṅ àm. 8Nummbe #Neb. 15.11bin à bwoṅbwoṅ nke mbe njoṅ ngelaṅ fa; là mba me là, bag à bin ke ke mbe njoṅ ngelaṅ fa.

9Ndùlala mà bwoṅ ba Yuda be lèn ndù a tswe bwe, bo se', ke b'a nda' num Yésu, là ndù bo yen mba Lazaro z'a bam num vù là. 10Là ghale'te Nsi tse ndùbndùb nabte ndù bo zwi Lazaro. 11Nummbe a lo tshùa num i ben yàm nke ntum netèt ba Yuda mbam Yésu.

Mba Yésu tsho Yérusalém nà

(Mat. 21.1-11; Mark. 11.1-11; Luk. 19.28-40)

12Njù be làne, mà bwoṅ benntùn z'a na' nse' mum lé'njù jùa là, be ju' ndù Yésu tshwèt nse' Yérusalém, 13ndo' #Yobk. 118.25-26ba tshatene, ntum mbumte bo à bo, nke nkua' ndù: Hôsanna, mbotni be mfen ba Israél! 14Là Yésu fon mo' metsit kekwène, ntswe num i ndaṅndaṅ mba bo na' nkite ndù: 15Kà #Sak. 9.9bwôg me ngon Sion! Tshù, mfen o tshwèt nse' ndù a tswe num mén kekwène. 16Ghazi'te nu i ke yoṅ nju' tshen tshu là; là ngelaṅ Yésu tsho ntùm nkuni mi là, bo kwimte ndù tshen tshu là b'a mba bo na' nkite num i là, mba ndù bo lo ghù be ndaṅndaṅ. 17Ndùlala bwoṅ benntùn ze bo be bo à bo ngelaṅ z'a tsiaṅ Lazaro ntùm fi, mbam i num vù là, kwé nta mi. 18A num ndùlala ze bwoṅ benntùn nèn nebumte bo à bo là, nummbe bo lo ju' ndù a ghù yen nsà là. 19Ndùlala ba Férésia tshob bo bo ndù: Bin yen ndù bin ke tshwèt njù bin; tshù, njoṅ njù fa à nèn mbaṅ i.

Mba Yésu soṅ vù se mba nkuni mi là

(Mat. 16.24-27)

20Là tsemo' ba Grikia lo be netèt ben tse bo na' nko' nse' neghamte Nsi mum lé'njù jùa là. 21Ndùlala bo se' mbaṅ Filibo z'a be ze Bètania mà Galiléa là, nde't'é, ntshob ndù: Tshùaben, bag kô neyen Yésu. 22Filibo nèn ntshob Andréa, Andréa mba Filibo nèn ntshob Yésu. 23Là Yésu bùnte bo ndù: Ngelaṅ ku' z'a bwô ndù Mén mèn tsho ntùm nkuni mi là. 24Kua' nenùne, kua' nenùne, me tshob bin ndù: A be lag ngefet s'a vù ntùm tsha' ke' kwù là, mb'a' ghô tù' i. Là, a be z'a kwù là, mb'a' yam ntàm yàme. 25Mèn #Mat. 10.39; 16.25; Mark. 8.35; Luk. 9.24; 17.33z'a kô yôg se là mb'a neghua' i. Là mèn z'a bàn yôg se ntùm yen njù li là, mb'a lem i num yôg matmat. 26A be ze mèn tshwèt mfa' me là, a tam njam àm; dù' ze me be bwe là, mba ngafa' àm nsi be ze bwe. A be ze mèn tshwèt mfa' me là, mba Tà nsi nyàmt'é.

27Ndonni ntù àm tshwèt mvètte, m'a' tshob à ke? Me nsi tshob à ndù: Tà, yôg àm num ju z'a tshwèt nse' num yen nyam ni là ké? A b'a be kua' num bwe ze me se' num yen ngelaṅ nge' li là. 28Tà, ghù ndù ghamte be num lén so. Yen ngelaṅ nà, nze mèn tshob mfe kamànyam ndù: Me na' yà ghamt'é mbe ndù m'a' bèn ngamt'é mo' yoṅ i. 29Ndùlala bwoṅ benntùn bo tsin bwe, nju' là, nke ntshob ndù a b'a fambaṅ bèn ntshu'u. Tsemo' nke ntshob ndù: Angél tshob nu yi. 30Yésu bùnte ntshob ndù: Yen nze là ke' se' à num yàm tu, là num zin tu. 31Ndonni bo tshwèt ntsho'te ntsha yen njù li; ndonni bo tshwèt ma' mfen yen njù li njù. 32Tu wul àm, ngelaṅ bo nsi bù' àm tù num tsha' là, me nsi soṅte njoṅ benntùn fa mbaṅ àm. 33A ke ntshob ndùlal'a nelo' nda'te lèn vù s'a nsi kwù là yi. 34Ndùlala #Yobk. 110.4; Es. 9.6; Ez. 37.25; Dan. 7.14bwoṅ benntùn bùnte yi ndù: Bag lo ju' ntùm ntshù' ndù Kristô tswe yoṅ ntshù'. O ke ntshob ndù a bwô bo bù' Mén mèn tù à ndùke? Yen Mén mèn nà b'a we?

35Ndùlala Yésu tshob bo ndù: Nka' ke' netèt bin num mo' mén ngelaṅ; bin zin ngelaṅ ze nka' be bin nà, mbwôg ndù kà njam tshùb zine. Mèn z'a ke nzin ntùm njam nà ke' be lèn dù' z'a tshwèt nèn nà. 36Ngelaṅ ze nka' be bin nà, bin bam nka', ndùlala ndù bin tù' bon nka'. Yésu tshob tshen tshu là, ntum netèt bo, ndem num miag mube.

Nebe ke bam ba Yuda

(Luk. 9.26)

37Mba mb'a na' ngù ba nsà yàm mbwe bo là, bo ke bam i. 38Ndùlala #Es. 53.1ndù ntshob ngatshob ntshob Nsi Esaya mi a na' ntshob là bumte ndù: Tshùaben, we z'a bam ntshob mag à? Bu Tshùaben ke ntswite wul i à we? 39Ndùlala bo lo ke ku'ni nebame, nummbe Esaya lo bèn ntshob ndù:

40A #Es. 6.10ma' fù num miag mube, nkag segntù ntù bo, ndùlala ndù kà bo yen miag mube, ke ju' tshobe, ndù kà bo kaṅ ntù yube, ndù kà me yate yube. 41Esaya tshob tshen tshu là, nummbe a lo yen nkuni mi, kà ntshob nu num i. 42Mba ndùlala mba netèt ghakwé mbwe ben yàm bam i, là ke bam i ndaṅndaṅ num ba Férésia, mbwôg ndù kà bo sô yub ntùm sinagogue. 43Nummbe bo lo kô ghamte z'a fe à benntùn nà ntshùa ghamte z'a fe Nsi là.

44Yésu kua' ntshob ndù: Mèn z'a bam àm nà, mb'a ke' bam à me, là mèn z'a tum àm nà. 45Mèn z'a yen àm nà, yen mèn z'a tum àm nà. 46Me se' ntùm njù à mba nka' là, ndù mba we lo z'a bam àm nà k'a ghô ntùm njame. 47A be ze mèn ju' ntshob màm nà, mba me ke tsho't'é; nummbe me lo ke se' à ndù me tsho'te njù, là ndù njù yôge. 48Mèn z'a ghua' àm, ke kwé ntshob màm nà, ghù mèn z'a tsho't'é là, ntshob mi me tshob là, a yi nsi bèn tsho't'é num miagte lé'njù. 49Nummbe tu wul àm, me ke ke ntshob ntshob à num yàm tu, là Tà z'a tum àm nà lo tshob me ze tu, ju ze me nsi tshob là, mba mba me nsi tshob là. 50Me lèn ndù ntshù' mi b'a yôg matmat, ndùlala tshu tse me tshwèt ntshob là, me ke ntshob à ndaṅndaṅ mba tà na' ntshob me là.

હાલમાં પસંદ કરેલ:

Yohané 12: BMa

Highlight

શેર કરો

નકલ કરો