Yohané 11

Mba Yésu bam Lazaro num vù là

(Mark. 5.35-43; Luk. 10.38-42; Yoha. 5.21,26-29; Mfa' Gha. 9.36-42)

1Mo' #Luk. 10.38-39ngangokèt lo be bwe, Lazaro ze Bètania, ngô Maria mba Marta ngon màab. 2A #Yoha. 12.3b'a Maria yen nà z'a na' njo' Tshùaben mfèt labinda, ntshwétte nku mi nyiaṅtu tse, ze mfèl i Lazaro ke ngon nà. 3Ndùlala tshen fèt tse bènnzwi li tum bo tshob Yésu ndù: Tshùaben, tshù, mèn z'o num nkô i là tshwèt ngone.

4Yésu be ju' ntshob ndù: Yen ngokèt là ke b'a ze vù, là, a b'a num nkuni Nsi, ndùlala ndù nkuni Mén Nsi tswite wul i num i. 5Yésu lo ke nkô Marta mba ngon màab, mba Lazaro. 6Ndùlala ngelaṅ a ju' ndù Lazaro tshwèt ngon nà, a ghô dù' z'a be là lé'njù bàa. 7Yen nà lo be tshùa, a tshob ghazi'te nu i ndù: Be bèn nèn mà Yudéa. 8Ghazi'te nu i tshob yi ndù: Rabbi, a b'a lé'mo' ze ba Yuda ke ndiag netamt'o ndoṅ nà, o tshwèt mbèn nke nèn bwe ké? 9Yésu bùnte ndù: Mbwôgtshù ke' ghù nyam ntshob bàa gham ké? A be ze mèn tshwèt nzin mbwôgtshù là, mb'a ke tsham ku i; nummbe a tshwèt njen nka' yen njù li. 10Là, a be ze mèn tshwèt nzin tèttswe' là, mb'a' tsham ku i, nummbe nka' ke' be num i.

11A tshob yen nà bo, mbèn ntshob ndù: Lazaro nshun be zi: M'a' nèn mbam i. 12Ndùlala ghazi'te nu i ntshob yi ndù: Tshùaben, a be z'a zi là, mb'a nsi yôge. 13Là Yésu ke ntshob à vù se, là bo kwate ndù a tshob à nezi miaglo. 14A ndùlala Yésu tshob bo ndaṅndaṅ ndù: Lazaro kwù. 15Me tsiaṅte num bin, ndù bin bame, mba me na' mbe ke be bwe là. Là be nèn mbam i. 16Ndùlala Tomas ze bo ke ntsiaṅ Didime là tshob ghazi'te nu Yésu ndù: Mba be ze be nène, ndù be kwù bag à bin bo.

17Ndùlala Yésu be kume, ntèt ndù a be lé'njù kuà mb'a be ntùm fi là. 18Bètania lo ghebte Yérusalém nguan mfi' ntshob tàn gham. 19Ben yàm netèt ba Yuda lo se' mbaṅ Marta mba Maria ndù bo fite ntù tshob num nu mfèt yub. 20Ngelaṅ Marta ju' ndù Yésu tshwèt nse' là, a nèn mbumte bo yi, là Maria lo be ndà ndù a tswe nsi. 21Ndùlala Marta tshob Yésu ndù: Tshùaben, o na' mbe nsen ni mba mfèl àm lo ke kwù. 22Mba ndonni me lèn ndù njoṅ tshu fa ts'o bètte Nsi là, Nsi nsi fà wù. 23Yésu tshob yi ndù: Mfèl o nsi lo num vù. 24Marta tshob yi ndù: Me lèn ndù a nsi lo num vù ngelaṅ nelo num vù ntùm miagte lé'njù. 25Yésu tshob yi ndù: Tu wul àm me b'a nelo num vù mba yôg. Mèn z'a bam àm nà, a be z'a kwù mba nekwù là, mb'a nsi yôge. 26Mba we lo z'a tshwèt njôge, mbam àm nà ke nsi kwù yoṅ ntshù', o bam yen nà ké? 27A tshob yi ndù: Ṅ, me Tshùaben, me bam ndù o b'a Kristô Mén Nsi z'a se' ntùm njù là.

28A tshob yen nà, nèn ntsiaṅ Maria ngon màab njam tsham, ntshob ndù: Ngatswite b'a nsen ni, a tshwèt ntsiaṅ o. 29Yen ni yoṅ mbe ju'u, ndo nsi ndende nèn mbaṅ i. 30Yésu lo ke yoṅ ntsho ntùm ngô, là, a na' nke' à dù' ze Marta bumte bo yi là. 31Ndùlala ba Yuda tse bo be boa Maria ntùm ndà, tse bo ke mfite ntù i là, be yen mb'a lo nsi ndende ntum nà, ntam njam i, nke nkwate ndù a nèn à tufi num nelàn bwe. 32Ndùlala Maria kum dù' ze Yésu be là, mbe yen i, ngwù num nku mi ntshob yi ndù: Tshùaben, o na' mbe nsen ni mba mfèl àm lo ke kwù. 33Ndùlala Yésu be yen mb'a tshwèt ndàne, mba ba Yuda tse bo se' bo à bo bèn nke ndàn yub là, wul i fét, tu i tshu'. 34A tshob ndù: Bin yab i à yà? Bo tshob yi ndù: Tshùaben se' njene. 35Yésu fètte ntsenyà. 36Ndùlala ba Yuda nke ntshob ndù: Tshù mb'a ke nkô i njene! 37Là tsemo' netèt bo tshob ndù: Yi z'a na' nga' miag mfùmiag là, lo ke ku'ni neghù ndù kà yen mèn ni kwù ké?

38Ndùlala wut Yésu bèn mféle, a nèn mbaṅ tufi. A na' mb'a ngabloṅ ndù bo kabte mo' loṅ ntshu bwe. 39Yésu tshob ndù: Bin ket loṅ! Marta ngonmà mfe tshob yi ndù: Tshùaben a ke ndame, nummbe a b'a lé'njù kuà mb'a be bwe là. 40Yésu tshob yi ndù: Me lo ke tshob wù ndù a be z'o bam nà, mb'o a' yen nkuni Nsi ké? 41Ndùlala bo ket loṅ. Là Yésu bù' miag mi tù ntshob ndù: Tà, me labt'o mb'o ju' àm nà. 42Mba me là, me lo lèn ndù o num nju' àm njoṅ ndù fa, là me tshob yen ni à num bwoṅ benntùn z'a diaṅ àm mbum nà ndù bo bam ndù a b'a wù bèn ntum àm. 43A tshob yen nà, nkua' nze neta ndù: Lazaro, tume, se' li! 44Mfe tum, ndù bo kut nku mi mba mbu mi nzwe, se i ndù bo lam kam nzwe. Yésu tshob ndù: Bin kiagt'é, mfaṅ i a nène.

Mba ghakwé mbwe ba Yuda diag nezwi Yésu là

(Mat. 26.1-5; Mark. 14.1-2; Luk. 22.1-2)

45Ndùlala ben yàm netèt ba Yuda tse bo se' mbaṅ Maria, njen ju ze Yésu ghù là bam i. 46Là tsemo' netèt bo nèn mbaṅ ba Férésia, ntshob ju ze Yésu ghù là bo. 47Ndùlala ghale'te Nsi tse ndùbndùb mba ba Férésia tsiaṅ ntse'te ghatsho'te ntsha, ntshob ndù: Be ghù ndùke? Nummbe yen mèn nà tshwèt ngù nsà yàme. 48A be ze be faṅ i ndùlala là, mba njoṅ benntùn fa nsi bam i, mba ba Roma nsi se' bagte mba dù' be, mba ngô be.

49Là mo' mèn netèt bo, Kaïfa z'a na' mbe ngale'te Nsi ze ndùb yen ngu'njù là là tshob bo ndù: Bin ke' lèn sàm ju, 50bin ke' yen ndù a b'a bin zin mb'a be ta' mèn kwù num tu njoṅ benntùn fa, ndù kà njoṅ ngô fa bi là. 51A lo ke tshob yen nu l'a ze tu, là mb'a be ngale'te Nsi ze ndùb yen ngu'njù là là, a tshob mba ngatshob ntshob Nsi là ndù Yésu nsi kwù num tu ngô i. 52Ke b'a nda' num tu ngô i, là mba ndù a tse'te bon Nsi tse bo sate là, bo tù' ntshù'. 53Ndùlala fe num sen lé'njù là, bo nabte ndù bo zwi i.

54A ndùlala Yésu ke bèn nezinte netèt ba Yuda ndaṅndaṅ, là, a tum yen dù' là, nèn bag ngô z'a be mbaṅ kônkwa, ntùm mo' ngô lén se Efraim nà; a tswe bwe boa ghazi'te nu i. 55Là Pasa ba Yuda lo ghebte. Benntùn yàm nke ndo ntùm bag ngô, nko' nèn Yérusalém num nelànte wut tshob kà Pasa ku'u. 56Ndùlala bo nke ndiag Yésu, nke ntshob bo bo ndù bo tsinte ntùm ndà Nsi ndù: Bin kwate ndùke? Ndù a ke se' mum lé'njù jùa ké?

57Là ghale'te Nsi tse ndùbndùb mba ba Férésia lo tshob ndù a be ze mèn lèn dù' z'a be bwe là, a la'te, ndù bo tshùb i.

હાલમાં પસંદ કરેલ:

Yohané 11: BMa

Highlight

શેર કરો

નકલ કરો