Yohané 10

Ngabéb mbwe ze mebwô

(Yoha. 9.24-38)

1Kua' nenùne, kua' nenùne, me tshob bin ndù: Mén z'a ke' tshùa à nzendà kà ntsho kin mbwe, là ndul à dù' ghua kà ntsho bwe là, b'a ntshô mba fimntshu. 2Là mèn z'a be ntshùa nzendà kà ntsho bwe là b'a ngabéb njùmbwe. 3Ngabéb nzendà num nga' nzendà yi, njùmbwe ju' nz'é; a num ntsiaṅ njùmbwe tse lén sube, ntum bo njù. 4A num mbe ngelaṅ z'a tum njoṅ tse njùmbwe fa njù là, a zin mbwe bo, njùmbwe tam njam i, nummbe bo lèn nz'é. 5Là be bo ke tam njam ngùn, là be bo kù i à nekù, nummbe bo ke' lèn nze ghùn. 6Yésu tshob men ntshob ngùm ni bo, là bo ke lèn nu z'a ke ntshob bo là.

7Ndùlala Yésu bèn ntshob mo' yoṅ i ndù: Kua' nenùne, kua' nenùne, me tshob bin ndù: Tu wul àm, me b'a nzendà njùmbwe. 8Njoṅ ben fa tse bo bwôg se' me là b'a tshô mba ba fimntshu, là ba njùmbwe lo ke ju' yube. 9Tu wul àm, me b'a nzendà. A be ze mèn tshùa num àm kà ntsho là, mb'a nsi yôge, mb'a nsi tsho, bèn tume, fon dù' nenà. 10Ntshô ke nse' à be nda' num neyi, num nezwi, mba num nebagte. Tu wul àm, me se' à ndù bo ghù yôg, mbèn ngù ntshùate.

11Tu wul àm, me b'a ngabéb mbwe ze mebwô. Ngabéb mbwe ze mebwô num mfà yôg se num njùmbwe. 12Ngafa' z'a ke' b'a ngabéb mbwe, ze njùmbwe ke' b'a ko' tse là, num njen mba nzwimàntô se' là, mfaṅ ba njùmbwe, nkù tse, nzwimàntô ghom tsemo'o, nsate tsemo'o. 13Nummbe a b'a ngafa', mbe ndù a ke' be nywin tse num njùmbwe. 14Tu wul àm, me b'a ngabéb mbwe ze mebwô, me lèn njùmbwe tshàm, njùmbwe tshàm bèn ndèn àm. 15Be #Mat. 11.27; Luk. 10.22ndaṅndaṅ mba Tà lèn àm, mba me yàm bèn ndèn Tà là, me fà yôg sàm num njùmbwe. 16Me ghù tsemo' njùmbwe tse bo ke' be ntùm sen kin ni là. A bwô ndù me tshagte mba bo yub; bo nsi ju' nz'àm; bwoṅ njùmbwe nsi b'a ntshù'; ngabéb mbwe be ntshù'. 17A num ndùlala Tà num nkô àm, nummbe me fà yôg sàm kà bèn kwé mo' yoṅ i. 18Sàm mèn ke' kwé i me, là me bèn mfà i tu wul àm. Me ghù ngù' nefà i, me bèn ngù ngù' nekwé i mo' yoṅ i, yen ni b'a ntshù' me na' nkwé Tà là.

19Fagte bèn ngwù netèt ba Yuda mo' yoṅ i num men ntshob là. 20Benntùn yàm netèt bo nke ntshob ndù: A ghù ywètkebwô, a b'a mbabune; bin ke nju' i numke? 21Tsemo' bèn nke ntshob ndù: Men ntshob là ke b'a mi mèn z'a ghù ywètkebwô là. A be ywètkebwô ku'ni negha' miag ba mfùmiag ké?

22Lé'njù nekwimte nelànte ndà Nsi mà Yérusalém se'; a na' mb'a ndùsàne. 23Yésu nke nzinte ntùm ndà Nsi, ntùm bam ntshundà Salomon. 24Ndùlala ba Yuda diaṅ i mbume, nke ntshob yi ndù: O a' ghù ntù tshag tswe ke nemagt'a ndùke? A be z'o b'a Kristô là, o tshob bag ndaṅndaṅ.

25Yésu bùnte bo ndù: Me lo tshob bin, bin ke bam, mfa' mi me tshwèt mfa' num lén Tàa là, a men mfa' là bèn nke nkwé nta màm. 26Là bin ke bam, nummbe bin ke b'a njùmbwe tshàm. 27Njùmbwe ts'a b'a tshàm nà num ndèn nz'àm, me lèn yube, bo num ntam njam àm. 28Me num mfà yôg matmat bo, bo ke nsi bi yoṅ ntshù', sàm mèn ke nsi sô yub bu àm. 29Ju ze Tàa fà me là b'a ze ndùb ntshùa njoṅ i fa, sàm mèn ke' ku'ni nesô i ntùm bu Tà. 30Me mba Tà, bag b'a ntshù'.

31Ba Yuda lo' ndoṅ mo' yoṅ i netamt'é yi, 32Yésu bùnte bo ndù: Me lo la'te mfa' yàm mi mebwô, mi a fe Tà là bin, bin tamt'àm ndoṅ à num sit fa' netèt men mfa' l'à? 33Ba #Lev. 24.16Yuda bùnte yi ndù: Bag ke' tamt'o ndoṅ à num fa' mebwô, là num tshabte: Nummbe o b'a mènntùn, nke ndo' tu wul o ngù Nsi yi.

34Yésu #Yobk. 82.6bùnte bo ndù: Bo ke' kite ntùm ntshù' zin ndù: Me lo tshob ndù: Bin b'a ba nsi ké? 35Ṅ, Nsi tshob ndù ben ts'a tshob ntshob mi bo là b'a ba nsi, (be mèn ke ku'ni nebagte ṅwa'ni Nsi); 36là bin tshwèt ntshob mèn ze Nsi lànt'é ntùm njù là ndù: O tshwèt ntshabte. Nummbe me lo tshob ndù: Me b'a Mén Nsi; 37a be ze me ke tshwèt mfa' mfa' Tàa là, kà bin bam àm. 38Là, a be ze me tshwèt mfa' là, bin ke bam àm nà, bin bam men mfa' là, ndùlala ndù bin lène, mbèn mbam ndù Tà num num àm, me be num Tà. 39Ndùlala bo bèn nke ndiag mo' yoṅ i netshùb i, là Yésu tum ntùm mbu mube.

Mba Yésu nèn mo' yoṅ Yordan nà

(Yoha. 11.53,54)

40A #Yoha. 1.28bèn nèn mo' yoṅ Yordan dù' ze Yohané nyu' benntùn bwe ntse là, ntswe bwe. 41Benntùn yàm se' mbaṅ i, nke ntshob ndù: Yohané lo ke ghù sàm nsà, là njoṅ tshu fa tse Yohané tshob num yen mèn ni là b'a nenùne. 42Benntùn yàm bam i yen dù' là.

હાલમાં પસંદ કરેલ:

Yohané 10: BMa

Highlight

શેર કરો

નકલ કરો