Yohané 9

Neyate mèn ze bo bwe i mfùmiag là

(Mark. 8.22-25; Yoha. 8.12)

1Yésu be tshùa njen mo' mèn bo na' mbwe i mfùmiag là. 2Ghazi'te nu i bètt'é ntshob ndù: Rabbi, we z'a ghù nukebwô à, yi ke tàab mba màab ndù bo bwe i mfùmiag à? 3Yésu bùnte ndù: Ke yi, ke tàab, ke màab lo ke' ghù nukebwô, là, a b'a ndù mfa' Nsi tswite wul i num i. 4Mb'a ke' à mbwôgtshù là, a bwô ndù be fa' mfa' mèn z'a tum àm nà; tèttswe' tshwèt nse'e, ngelaṅ ze sàm mèn ke' ku'ni nefa' là. 5Mba #Mat. 5.14; Yoha. 8.12me ke' à ntùm njù là, me b'a nka' njù. 6A tshob ndùlala ntôg ntsi num tsha'a, ntébte netob ntsi mi, njab netob num miag mfùmiag, 7ntshob yi ndù: Nèn nsôg wul o ntùm dù' ntse Siloé (yen nà bagt'a ndù: Ngantum). A nèn nsôg wul i, mbe bèn njam, nke njene.

8Ba ndùla' mba ben tse bo ke njen i njoṅ ndù fa, nummbe a na' mb'a ngalon ndone là, nke ntshob ndù: A ke mèn z'a ke ntswe nsi, nke ndon ndon ni ké? 9Tsemo' ben tshob ndù: A b'a yi, tsemo' bèn ntshob ndù: Nga, là, a nefut'é. Tu wul i tshob ndù: A b'a kua' me. 10Ndùlala bo tshob yi ndù: Miag mu ghù à ndùke kà nké't'à? 11A bùnte ndù: A b'a mèn ze bo ke ntsiaṅ i Yésu là bèn ntébte netob njo' miag màm yi, ntshob me ndù: Nèn Siloé nsôg wul o, ndùlala me nèn nsôg wul àm kà njene. 12Bo tshob yi ndù: A b'a yà? A tshob ndù: Me ke' lèn.

13Bo lo' mèn z'a na' mbe mfùmiag là nèn yi mbwe ba Férésia. 14Là, a na' mb'a lé'njù Sabbat ze Yésu tébte netob, nga' miag mi yi là. 15Ndùlala ba Férésia bètt'é yub yoṅ i mb'a ghù kà njen nà. Là, a tshob bo ndù: A lo njab netob num miag màm, me sôg wul àm kà nke njene. 16Ndùlala tsemo' ba Férésia nke ntshob ndù: Yen mèn nà ke fe à Nsi nummbe a ke tshwèt nze Sabbat. Là tsemo' bèn nke ntshob ndù: A be ngaghù nukebwô ku'ni neghù lèn tshen nsà l'a ndùke? Là fagte lo vù netèt bo. 17Ndùlala bo bèn ntshob mfùmiag mo' yoṅ i ndù: Tu wul o, o tshob yu ndù ke num i mb'a gha' miag mu à? A tshob ndù: A b'a mo' ngatshob ntshob Nsi. 18Là ba Yuda ke bam ndù a lo be mfùmiag kà mbèn njene, kà nkum ngelaṅ bo tsiaṅ tà mba mà mfùmiag z'a yen nà. 19Bo bètte yub ntshob ndù: Yen mén ni b'a mén zin ze bin num ntshob ndù bin lo bwe i mfùmiag là ké? A b'a ndùke k'a nke njen ndonni à?

20Là tàab mba màab bùnte ntshob ndù: Bag lèn ndù a b'a kua' mén yag, mba ndù bag lo bwe i mfùmiag. 21Là, mbe se' mba mb'a tshwèt njen ndonni là, bag ke' lèn; mbèn mbe se' mba mèn z'a gha' miag mi là, bag ke' lèn. Bin bètt'é, à be mènntùn, a nsi tshob nu num tu wul i. 22Tàab mba màab tshob ndùlal'a nummbe bo lo ke mbwôg ba Yuda; nummbe a lo be be ndù ba Yuda à nabte ndù mba we lo z'a nsi tshob ndaṅndaṅ ndù Yésu b'a Kristô là mba bo a' sô i ntùm sinagogue. 23A num ndùlala ze Tàab mba màab na' ntshob ndù: A be mènntùn, bin bètt'é là.

24Num mbatte yoṅ bàa, bo tsiaṅ mèn z'a na' mbe mfùmiag là, ntshob yi ndù: Fà ghamte Nsi! Bag lèn ndù yen mèn nà b'a ngaghù nukebwô. 25Ndùlala yen mèn ni bùnte ndù: A be z'a b'a ngaghù nukebwô là mba me ke' lèn; me lèn nda' nu ntshù' ndù: Me lo be mfùmiag, ndonni me tshwèt njene. 26Ndùlala bo tshob yi ndù: Ke z'a lo ngù wù à? A ghù à ndùke kà nga' miag mu à? 27A bùnte bo ndù: M'a tshob bin, bin ke ju'. Bin bèn nke nkô neju' à ke? Mo' ndù mba bin zin tshwèt nkô netù' ghazi'te nu i. 28Bo so ndon tu i, ntshob ndù: O bèn mbe ngazi'te nu yen mèn nà, là bag b'a ghazi'te nu Mosé. 29Bag lèn ndù Nsi lo tshob nu Mosé, mbe se' mba yen mèn nà là, bag ke' lèn dù' z'a be mèn bwe là.

30Mèn nà bùnte ntshob bo ndù: A yen nà bèn mbe nu netshàme, bin ke' lèn dù' z'a be mèn bwe là, là mbe ndù a gha' miag màm! 31Be lèn ndù Nsi ke' be ju' ghaghù nukebwô, là, a be ze mèn ghamte Nsi là, mba Nsi a' ju' i. 32Fe ndù ke lo bo ke' to' yoṅ nju' ndù mèn gha' miag mèn ze bo bwe i mfùmiag là! 33A lo mbe ndù yen mèn ni ke' fe à Nsi, mb'a ke' ku'ni neghù sàm ju. 34Bo bùnte ntshob yi ndù: Njoṅ wul o fa bo bwe i à ntùm nukebwô, o tshwèt ntswite yag ké? Bo ma' i njù.

35Yésu ju' ndù bo ma' i njù, mbe yen i, ntshob yi ndù: O bam Mén mèn ké? 36Yen mèn nà bùnte ntshob ndù: Tshùaben, a b'a we, ndù me bam i à? 37Yésu tshob yi ndù: O yen i, mèn ze bin yi tshwèt ntshobte là, a b'a be kua' yi. 38A tshob ndù: Tshùaben, me bam. A vù nsi kabkab mbwe i, ngamt'é.

39Yésu tshob ndù: Me se' ntùm yen njù li à num netsho'te ntsha, ndù ben tse bo ke tshwèt njen nà yene; ben tse bo tshwèt njen nà tù' mfùmiag. 40Tsemo' ba Férésia tse bo à bo be là be ju' men ntshob là, ntshob yi ndù: Mba bag yag b'a ba mfùmiag ké? 41Yésu tshob bo ndù: A lo mbe ndù bin b'a ba mfùmiag mba bin ke' ghù nukebwô num bin; là ndonni bin tshwèt ntshob ndù: Bag tshwèt njene. Nukebwô zin ghô num bin.

હાલમાં પસંદ કરેલ:

Yohané 9: BMa

Highlight

શેર કરો

નકલ કરો