Yohané 8

Mènnzwi ngaghù màndà

1Là Yésu nèn num mbat ntene. 2Njù yoṅ mbe làne, a bèn njam ntùm ndà Nsi, njoṅ benntùn fa se' ntèl i; a tswe nsi, nke ntswite yube. 3Ghalèn ṅwa'ni Nsi mba ba Férésia lo' mo' mènnzwi ze bo na' ntshùb i num nu màndà là nse' yi, nte i netèt, 4ntshob Yésu ndù: Ngatswite, bag lo tèt yen mènnzwi li a nke ngù màndà kà bag ntshùb i. 5Là #Lev. 20.10; Neb. 22.22-24ntùm ntshù', Mosé lo tshob ndù bo tamte lèn tshen bènnzwi li ndoṅ. Ndùlala, tu wul o, o tshob yu ndùke?

6Bo ke ntshob ndùlal'a num nelo' ndaṅt'é yi ghù nu ze bo tshùa bwe kà bot'é là. Là Yésu ben wul i nsi, nke nkite ju num tsha' ntubu i. 7Là mba bo ke nke' mbètt'é là, a bù' wul i ntshob bo ndù: Mèn z'a netèt bin ndù a ke' ghù nukebwô num i là, a bwôgmbwe ma' loṅ num i; 8a bèn mben wul i nsi, nke nkite ju num tsha'a. 9Là bo be ju' men ntshob li, nke ntum ntshù' ntshù', nto' num ywèn benntùn; Yésu tù' ndà tù' i bo mènnzwi ndù a tsin bwe, netèt. 10Là Yésu bèn mbù' wul i ntshob yi ndù: Mènnzwi, bo yà? Sàm mèn ke' naṅ ntsha tu o ké?

11A tshob ndù: Sàm mèn me Tshùaben. Yésu tshob ndù: Mba tu wul àm me ke' naṅ ntsha tu o. Nène, fe ndonni kà bèn neghù nukebwô.]

Kwénta Yésu num tu wul i

12Ndùlala #Mat. 5.14; Yoha. 9.5Yésu bèn ntshob bo mo' yoṅ i ndù: Tu wul àm, me b'a nka' njù, mèn z'a tam njam àm nà ke nsi zin ntùm njame, là, a nsi ghù nka' yôg. 13Ndùlala #Yoha. 5.31ba Férésia tshob yi ndù: O tshwèt nkwé nta tu wul o yu tu, yu kwénta ke b'a nenùne. 14Yésu bùnte ntshob bo ndù: A be ze me kwé mba nta tu wul àm yam tu là, mba yàm kwénta b'a nenùne; nummbe me lèn dù' ze me fe bwe là, mba dù' ze me nèn nà, là bin ke' lèn dù' ze me fe bwe là ke dù' ze me nèn bwe là lo. 15Bin ke ntsho't'a num ze mat mènntùn, là tu wul àm, me ke tshwèt ntsho'te sàm mèn. 16Là, a be ze me tsho'te là, mba yàm netsho'te ntsha b'a ze nenùne; nummbe me ke' b'a tù' me, là me num bwe, mba Tà z'a tum àm nà. 17Là bo lo kite ntùm ntshù' mi a b'a min nà ndù: Kwénta ben bàa b'a nenùne. 18A b'a me bèn nkwé nta tu wul àm yàm tu, mba Tà z'a tum àm nà tshwèt nkwé nta màm. 19Ndùlala bo tshob yi ndù: Tàan b'a yà? Yésu bùnte ndù: Bin ke' lèn, ke me, ke Tàa lo, a lo mbe ndù bin lèn àm, mba bin nsi lèn mba Tàa. 20Yésu ke ntshob men ntshob li à dù' ze koṅ nkàb be là, ngelaṅ a ke ntswite ntùm ndà Nsi là. Sàm mèn ke tshùb i nummbe ze ngelaṅ lo ke yoṅ nku'u.

21Ndùlala a bèn ntshob bo ndù: Me tshwèt nène, bin nsi diag àm, bin nsi kwù ntùm nukebwô zin. Dù' ze me tshwèt nèn nà, bin ke' ku'ni nese' bwe. 22Ndùlala ba Yuda nke ntshob ndù: A nsi zwi wul i ze tu ké? K'a nke ntshob ndù: Dù' ze me tshwèt nèn nà, bin ke' ku'ni nese' bwe à? 23A tshob bo ndù: Bin, bin b'a ba mànsi, tu wul àm, me b'a mfe tù. Bin b'a ba ntùm yen njù li; me ke' b'a ze ntùm yen njù li. 24Ndùlala me lo tshob bin ndù bin nsi kwù ntùm nukebwô tsine; nummbe, a be ze bin ke' bam ndù me num bwe là, mba bin nsi kwù ntùm nukebwô tsine.

25Bo nke ntshob yi ndù: O b'a we? Yésu tshob bo ndù: Me b'a ze me na' ntshob bin fe neto'te là. 26Me ghù nu netshob mba netsho'te num bin yàme, là mèn z'a tum àm nà b'a mèn nenùne; tshu tse me ju' yi là, a b'a tshen nà tse me tshwèt ntshob ntùm njù là.

27Bo ke lèn ndù a ke ntshob nu boa num Tàab. 28Ndùlala Yésu tshob ndù: Ngelaṅ ze bin nsi bù' Mèn mèn tù là, yen ngelaṅ nà, bin nsi lèn ndù me num bwe, mba ndù me ke' be ghù sàm ju num yàm tu, là ndù me ke ntshob tshen tshu l'a ndaṅndaṅ mba Tàa na' ntswit'àm nà. 29Bag mèn z'a tum àm nà bèn mbe, a ke' faṅ àm tù' me, nummbe me ke ngù à be tshu ts'a bwô i là njoṅ ngelaṅ fa. 30Mb'a ke ntshob ndùlili là, benntùn yàm bam i.

31Ndùlala Yésu nke ntshob ba Yuda tse bo bam i là ndù: A be ze bin ghô num ntshob màm nà, mba bin b'a kua' tshàm ghazi'te nu. 32Mba bin nsi lèn nunenùne, mba nunenùn nsi ghù bin tswe zin tu. 33Bo #Mat. 3.9; Luk. 3.8bùnte yi ndù: Bag b'a nzwit Abraham, bag lo ke to' yoṅ mbe kuan sàm mèn. Be o tshob ndù: Bin nsi tù' zin tu à ndùke?

34Yésu bùnte bo ndù: Mba we lo z'a ghù nukebwô là, b'a nkuan nukebwô. 35Là nkuan ke' be ghô ntùm ndà yoṅ ntshù', mén num ngô bwe yoṅ ntshù'. 36A ndùlala, a be ze Mén ghù bin tù' zin tu là, mba bin nsi tswe kua' zin tu. 37Me lèn ndù bin b'a nzwit Abraham, là bin tshwèt ndiag nezwi àm, nummbe ntshob màm ke' tshote zine. 38Ju ze me yen mbaṅ Tàa là, me tshwèt ntshobe; mba bin zin, ju ze bin ju' tà zin nà, bin nke ngù.

39Bo bùnte ntshob yi ndù: Tà yag b'a Abraham. Yésu tshob bo ndù: A be ze bin b'a bon Abraham nà, bin fa' mfa' Abraham. 40Là ndonni bin tshwèt ndiag nezwi àm, me ze me tshob nunenùn ze me ju' mbaṅ Tà bin nà; Abraham lo ke ghù yen nà. 41Bin ke mfa' à mfa' tà zin. Bo tshob yi ndù: Bo ke' bwe yag à ntùm ghàne: Bag ghù tà yag nda' ntshù', Nsi.

42Ndùlala Yésu tshob bo ndù: Nsi lo mb'a Tà zin mba bin kô àm; nummbe me tum à num Nsi kà nse'e. Nummbe me ke' se' à num yàm tu, là, a yi bèn ntum àm. 43Numke bin be ke lèn nu me tshob l'à? Nummbe bin ke' ku'ni neju' ntshob màm. 44Bin ghù tà zin z'a b'a Satan nà, a tse nekô tà zin nà tse bin tshwèt nkô neghù a bumte là. Yen mèn nà b'a ngazwimèn fe neto'te, a lo ke to' tsin ntùm nenùne. Nummbe nenùn ke' be num i. A num mbe ngelaṅ z'a tshob tatte là, a tshob à be kua' ju z'a be yi là, nummbe a b'a ngatatte, mba tà tatte. 45Là tu wul àm, mba me tshob nenùn nà bin ke' bam àm. 46We z'a netèt bin z'a nsi la'te yàm nukebwô à? A be ze me tshob nunenùn nà, numke bin ke bam à? 47Mèn z'a fe à Nsi là num nju' ntshob Nsi; a num ndùlala bin ke' ju', nummbe bin ke' fe à Nsi.

48Ba Yuda bùnte ntshob yi ndù: Bag ke tshob à nenùne, a be ze bag tshob ndù o b'a ze Samaria mba ndù o ghù ywètkebwô là ké? 49Yésu bùnte ndù: Me ke' ghù ywètkebwô, là me ke ngamt'a Tàa, là bin nke ngwag àm. 50Là tu wul àm, me ke ke ndiag à yàm ghamte, mèn num bwe z'a be ntsho'te mbèn nkeb ntsha là. 51Kua' nenùne, kua' nenùne, me tshob bin ndù: A be ze mèn lé' ntshob màm nà, mb'a ke nsi kwù yoṅ ntshù'.

52Ba Yuda tshob yi ndù: Ndonni bag lèn ndù o ghù ywètkebwô, Abraham lo kwù mba ghatshob ntshob Nsi bèn nkwù, là wù, o tshwèt ntshob ndù: A be ze mèn lé' ntshob màm nà, mb'a ke nsi kwù yoṅ ntshù'. 53O b'a mèn ndùb ntshùa tà yag Abraham z'a na' nkwù là ké? Mba ghatshob ntshob Nsi lo kwù, o ke ndiag neba we?

54Yésu bùnte ndù: A be ze me ke nkuni à tu wul àm nà, mba màm nkuni ke sàm ju; a b'a Tàa bèn nke nkuni àm, yi ze bin tshwèt ntshob ndù: A b'a tà yag là. 55Bin ke' lèn i, là tu wul am me lèn i, me lo nke ntshob ndù: Me ke' lèn i mba me nsi tù' ngatatte mba bin nà. Là me lèn i mbèn nke ndé' ntshob mi. 56Abraham tà zin lo tsiaṅte mb'a nsi yen lé'njù sàm nà, ne njene, mbèn ntsiaṅte.

57Ndùlala ba Yuda tshob yi ndù: O ke' ghù ngu'njù ṅam ntàn, mbe ndù o yen Abraham. 58Yésu tshob bo ndù: Kua' nenùne, kua' nenùne, me tshob bin ndù: Abraham lo be be, ndù m'a be. 59Ndùlala bo tswitte ndoṅ num netam Yésu yi, là Yésu lemte, ntum ntùm ndà Nsi.

હાલમાં પસંદ કરેલ:

Yohané 8: BMa

Highlight

શેર કરો

નકલ કરો