Lug 19

Yeso tì Zàkiyòs

1Yeso tì inɔ̰ bəd we ne yaya yḛ̀ abɔ̀ʼ məd ya ghò pè a Jèrikò se chè. 2Wə̀d mɔ̀ʼɔ ya yaʼ angu ne ikum məd ya Zàkiyòs. Məd ya yaʼ atog wə̀d abə bəd ne nìŋə tag. Wì ya bèrì ighi nɔʼ nɔʼ. 3Wì yaya kə̀bə̀ ni bàd Yeso, si ya gha, chəyi tì wì ya təm inga ìsàn bəd bàd aməd imbə̀ʼ icheg ne wì ya tumbə. 4Ane, wì ya nòrò ghò imbìghè aba ze ne Yeso yaya ghò chè angu, pè kɔʼ ikaŋ azed mɔ̀ʼɔ ne mbe kàrà ane Sikamò. 5Anyumə̀ ne Yeso ya pe ìtḭ azed ze, wì nɔ̀ atog ikaŋ ghà abə Zàkiyòs gha, “Zàkiyòs, swiʼi yeʼe kwàʼ amad anìŋ. Mə biri neg ine inga nəb tèchɔ̀ŋ.”

6Zàkiyòs ya swiʼi kwàʼ ati bə̀ niŋ Yeso ghò ibo inga nəb kwàʼ ane igyendi. 7Bəd məjìm ya bàd anug azo̰, se zḭ̀ʼḛ̀ gha, “Wè ghò ni neg inga nəb abə wə̀d ne ghìyə̀ inug tibɔ̀ŋ.”

8Zàkiyòs ya təm titighe, si ghà abə Anɔŋisəg gha, “Anɔŋisəg! Nḛ, mə biri ghàpì ìmbum ighi iba ibe si nàʼ aba afibì abə bəd ne chəyi àzɔb. Wə̀d ne mə̀ ya ghi iji, niŋ ighi məd, mə biri ywì ibo achug akwè.”

9Yeso ya gha, “Anug ni pum fə yeʼe inga nəb aŋa tèchɔ̀ŋ imbə̀ʼ icheg ne wə̀d gho̰ ya bə̀ aghaŋ inga inəbi Abràham. 10Ŋwan Wə̀d yeʼe ni kə̀b bəd mbe ne nimi bə̀ pumnə awɔb.”

Ngam məgri imbə̀ʼ ikab gol

(Mat 25:14-30)

11Bəd mbe yaya zwère anug ne Yeso we ghà, wì si chè imbìghè ni ghàm ìngam məgri inɔb. Wì ya ghàm ìngam məgri gho̰ imbə̀ʼ icheg ne wì yaya si iban Jèrusalèm, fɔrɔ imbə̀ʼ icheg ne bəd yaya kɔ̀ndɔ gha anug ìfɔ̀n Ŋwiye ze se yeʼe kwàʼ ati. 12Wì ya gha, “Wə̀d kyen mɔ̀ʼɔ ya ghò inga aben ndəŋ ne agha sa. Wì ya ghò ni gha mbe zɔʼ aməd ane ifɔn, wì ywirì bə̀ndì ghò ibo inga aben. 13Bɔŋ wì ya se ghò, wì ya kàrì ìmbi bəd àfàʼì ìghum, ghàpì ikab gol#19:13 Ikab gol gho̰ imɔʼ ya icheg ikab àfàʼì ane aməg atad ìghum inɔb. Wì ya ghàpì ane, si ghà inɔb gha, ‹Mbə̀ niŋ ikab gho̰ ghò ghì iywin angu pè ane aneg ne mə̀ biri kurə›.

14Wì ya jiʼì ghì ane, si ya gha, chəyi bəd aben məd ya kɔ̀ŋɔ aməd. Mbi ya tɔm bəd ibo anjìm gha mbe gho ghà gha, ‹Chəyi tì kə̀bi gha wə̀d gho̰ yaʼ ifɔn igun ina.›

15Mbi ya ghà ane, si ya gha, mbi ya bə̀ kiri zɔʼ aməd ane ìfɔ̀n. Wì ya bə̀ndì ghò achan. Anyumə̀ ne wì ya pè, wì tɔ̀ŋɔ ìmbi bəd àfàʼì mbe ne wì ya nàʼi ikab gol inɔb. Wì yaya kə̀bə̀ ni kyeri chùd ne nyi igun ikab we. 16Wə̀d àfàʼì mbègtog ya pè ghà ibo gha, ‹Masà, chùd ne nyi igun ìwe ikab ya achug ìghum.›

17Mbaʼ àfàʼì məd ya ywìtì ibo gha, ‹Ìmə wə̀d àfàʼì chɔ̀m! Àghò fàʼ icheg chɔm. Icheg ne àghò fàʼi tì iki ikab kwa kwa ane ìze fìŋ ijìm, àghò biri se saʼa iben ìghum.› 18Wə̀d àfàʼì ndəŋ ya bə̀ yeʼe pè ghà ibo gha, ‹Masà, chùd ne nyi igun ìwe ikab ya achug ata̰.›

19Mbaʼ àfàʼì məd ya ywìtì ibo gha, ‹Àghò biri se saʼa iben ita̰.›

20Wə̀d àfàʼì ndəŋ ya ywìrì yeʼe pè ghà ibo gha, ‹Masà, Kò ìwe ikab. Mə ya kɔd ìwe ikab inga aba ndwi kə̀b asiŋi nɔ̀ŋì. 21Mə ya kə̀ bɔ awe imbə̀ʼ icheg ne ìwe ikuchèg kà. Àghò ya nìŋə ighi ane asiŋi ne chəyi àghò nɔŋi bə̀ fòʼò ighi a mben ne kayi àghò fàʼi.›

22Mbaʼ àfàʼì məd ya ywìtì ibo gha, ‹Àghò ya kwàʼ wə̀d àfàʼì tibɔ̀ŋ. Mə biri niŋ ìwe ìngam saʼa awe angu. Àghò ya kyèri àze aghi gha mo ya wə̀d ne ikuchèg məd ka, ne bə̀ nìŋə ighi ane asiŋi ne chəyi mə̀ nɔŋi, bə̀ fòʼò ighi a mben ne kayi mo fàʼi, 23aton ne chəyi àghò ya nɔŋi ìmə ikab inga nəb ne mbe nɔ̀ŋì ikab, ni gha mə biri bə̀ndì si niŋ fɔrɔ chùd àkə gha?›

24Wì ya si ghà abə bəd mbe ne ya yaʼi iban angu itəmi gha, ‹Mbə̀ niŋ ikab gol we imɔʼ abə wə̀d gho̰ nàʼ abə wə̀d we ne beri ikab gol ìghum.›

25Mbi ya ywìtì ibo gha, ‹Masà, məd fə bèrì ikab gol ìghum.›

26Masà we ya ywìtì gha, ‹Mə gha tesiʼ inən, bəd mbe ne beri ighi, mbi biri yètì ighi inɔb. Àsi wə̀d we ne chəyi wì beri ighi, ka bèyi iki piʼì we ne wì bèri, mbi biri niŋ ibo. 27Ìmbum bəd ìpàb mbe ne chəyi mbi kə̀bi gha mə yaʼ ifɔn igun inɔb, mbe niŋ awɔb yèʼe zwèti inum imbìghè.›”

Yeso nyi inga Jèrusalèm kwàʼ icheg Ifɔn

(Mat 21:1-11; Mag 11:1-11; Jɔn 12:12-19)

28Anyumə̀ ne Yeso ya màni ni ghà inug mbo̰, wì ya chè imbìghè ni kɔʼ ghò a Jèrusalèm. 29Anyumə̀ ne wì ya pè iban Betanì tì Bedfèg, ikaŋ iwum mə̀Olìf, wì ya kàrì mə̀mə̀nənùg məd məbe mə̀tì inɔb gha, 30“Mbə̀ ghò inga aben ze ne imbìghè. Kwàʼ anyumə̀ ne mbə̀ nyi nyi, mbə biri bàd ŋwan jàkas#19:30 Jàkas ya nyam ze ne icheg nyam mə̀kara ni mbe kàrà ane donkey ichug mə̀kara. ne mbi tiŋə. À ya ŋwan jàkas ne chəyi wə̀d mɔ̀ʼɔ kweʼì kɔʼ igun. Mbə̀ za niŋ yèʼe. 31Wə̀d mɔ̀ʼɔ mə biri gha, ‹Aton ne mbə zà àkə gha?› Mbə̀ ghà abə tengàŋ gha, ‹À ya Anɔŋisəg cha awa gha tì yeʼe zà ghò nàʼ ibo.›”

32Mbɔb ya ghò pè bàd inug ijìm kwàʼ icheg ne Yeso ya gha inɔb. 33Anyumə̀ ne mbi yaya zà ŋwan jàkas we, bəd ne beri ŋwan nyàm we ya biri inɔb gha, “Aton ne mbə zà àkə gha?”

34Mbi ywìtì gha, “À ya Anɔŋisəg cha awa gha tì yeʼe zà ghò nàʼ ibo.” 35Mbi ya bə̀ niŋ ŋwan nyam jàkas we ghò nàʼ abə Yeso. Mbi ya zèg ìtɔb ndwi igun nyam ze, nyimi, Yeso si kɔʼ igun. 36Icheg ne Yeso yaya yḛ̀ igun nyam ze, bəd yaya se chìyè ìtɔb ndwi zèghè igun inɔnjì. 37Anyumə̀ ne wì ya se pè a Jèrusalèm, ane ìza̰ inɔnjì we ne swìʼe ikaŋ iwum mə̀Olìf, mə̀mə̀nənùg ya ko se nàʼà məyakà abə Ŋwiye bə̀ se ghùmnə aməd ane gì ka ka, imbə̀ʼ iyeti inug ne mbɔb ya bàri. 38Mbi yaya ghùmnə aməd gha, “Ŋwiye ziye àbɔrɔ̀bɔd igun ifɔn we ne yeʼe ane ikum ìwe Anɔŋisəg. Àbɔrɔ̀bɔd yaʼ ikaŋ àbɔ̀ŋɔ, bəd ghùmnə Ŋwiye.”

39Mə̀farìsi mɔ̀ʼɔ ne ya yaʼi inga inɔ̰̀ we ya ghà abə Yeso gha, “Gha abə ìmbe mə̀mə̀nənùg mbo̰ mbe chim tizi.”

40Yeso gha ywìtì inɔb gha, “Mə gha tesiʼ inən. Mbi mə̀ chim tizi, Ŋwiye biri nɔ̀ ateg, ze se kyḛ ghùmnə Ŋwiye.”

Yeso dèg imbə̀ʼ Jèrusalèm

41Yeso ya ghò anene se tìnde iban Jèrusalèm. Anyumə̀ ne wì ya bàri ikye aben we, wì dèg gha, 42“Àkə aghi ne mbə̀ kyeri aghi ne biri ghì mbə chùghi ane àbɔrɔ̀bɔd tèchɔ̀ŋ, nji ze bɔ̀ŋ. Si ya gha, mbe nə̀m inən. 43Ineg mbe yeʼe ne ìmbən bəd ìpàb biri yeʼe ni zɔ̀ŋ awən. Mbi biri kɔd akam chè kad awən chuʼ, nyə̀m awən ane tìba̰ tijìm. 44Mbi biri mèʼì awən aseg fɔrɔ ìmbən bɔn məjìm mbe ne yaʼi inga aben. Chəyi ìmbən bəd ìpàb biri sàŋì iteg mɔ̀ʼɔ imɔʼ igun ìywin. Ze biri yaʼ ane imbə̀ʼ icheg ne chəyi mbə̀ kyeri nyùmə̀ ne Ŋwiye we yèʼe pumni awən.”

Yeso nyi inga mbàn Ŋwiye

(Mat 21:12-17; Mag 11:15-19; Jɔn 2:13-22)

45Anyumə̀ ne Yeso ya nyi inga ikam mbàn Ŋwiye, wì ya ko se kàmna bəd ne yaya fḛ ighi inga angu. 46Wì ya ghà inɔb gha, “Àŋwàʼrì Ŋwiye gha, ‹Nəb Ŋwiye ya asiŋi ni chàʼra Ŋwiye.› Mbə̰ fə bə̀ŋì ane asiŋi ne məji mbe nə̀mbə̀ angu.”

47Wì yaya chwìte inug inga mbàn Ŋwiye ineg ijìm. Si ya gha, itog bəd mbàn Ŋwiye, tì mə̀chwitì mə̀nɔ̀ʼɔ̀, fɔrɔ itog bəd inga aben mə̀Ju yaya kə̀bə̀ ni zweti aməd. 48Si ya gha, chəyi mbɔb ya beri anug ne nyimi si chè igun zwèti aməd imbə̀ʼ icheg ne wə̀d ijìm yaya kɔ̀ŋɔ̀ ni zweri anug ne Yeso yaya chwìte.

હાલમાં પસંદ કરેલ:

Lug 19: MBTP

Highlight

શેર કરો

નકલ કરો