Lug 18
18
Ngam məgri imbə̀ʼ anug ne ya chàʼrà Ŋwiye mà nyumə̀ ijìm
1Yeso ya ghàm ìngam məgri abə mə̀mə̀nənùg ni chwiti gha, mbe kòʼ ni ya chàʼrà Ŋwiye mà nyumə̀ ijìm ywìtì mbi bɔd. 2Wì ya gha, “Wə̀d ne saʼa tisaʼi ya yaʼ inga aben mɔ̀ʼɔ. Chəyi wì yaya bɔ Ŋwiye kə̀ bə̀ bɔ anug ne bəd biri ghà. 3Iku-àyi mɔ̀ʼɔ ya bə̀ yaʼ inga aben ze. Wì yaya yeʼe abə wə̀d we ghà ibo gha, ‹Àghò saʼ ìmə wə̀d ìpàb ane icheg ne koʼi.›
4Wə̀d we ya to̰ yi . Si ya gha, ane nyùmə̀ mɔ̀ʼɔ ya che, wì ya ywìrì nɔ̀ʼ kɔ̀ndi gha, ‹Ka chəyi mə̀ jiʼè bɔ Ŋwiye kə̀ bə̀ bɔ anug ne bəd biri gha, 5mə biri saʼ isaʼi we àyi gho̰ ane icheg ne koʼi imbə̀ʼ icheg ne məd we nḛ ni nàʼ ngəʼ inum. Chəyi mə̀ kə̀b gha wì ya dùwə̀ yeʼe aŋa, chə amə.›”
6Anɔŋisəg ya si gha, “Mbə̀ zug anug ne wə̀d inug tibɔ̀ŋ ne saʼa tisaʼi ya gha. 7Mbə̀ kɔ̀ndi gha chəyi Ŋwiye biri ghì anug ne koʼi abə bəd mbe ne wì chɔʼi? Mbɔb ya dèghè inug ibo ineg ijìm, tisi fɔrɔ tizimi. Mbə̀ kɔ̀ndi gha wì biri chìkì nyumə̀? 8Mə gha tesiʼ inən gha, Ŋwiye biri ghì anug ne koʼi inɔb amad amad. Si ya gha, anyumə̀ ne Ŋwan Wə̀d biri yeʼe, wì biri bàd bəd ne beri ibḛfiŋ igun isəg?”
Farìsi tì wə̀dtag
9Yeso ya ghàm ìngam məgri abə bəd ne yaya nɔ̀ nyɔd gha mbɔb təm kòʼ bə̀ se wèghè mə̀mbin. 10Wì ya gha, “Mbaŋà mɔ̀ʼɔ tìbe ya ghò inga mbàn Ŋwiye ni chàʼra Ŋwiye. Ìwi mɔ̀ʼɔ ya yaʼ Farìsi, ìywin ya yaʼ wə̀dtag. 11Icheg ne mbi ya gho ane, Farìsi we ya nɔ̀ʼ təm chàʼra Ŋwiye imbə̀ʼ ìwi nyɔd gha, ‹Ŋwiye mə nàʼ məyakà ine gha chəyi mə̀ yaʼi icheg mbaŋà tin. Mbaŋà tin ya məji, tì bəd ne ghìyə̀ inug tibɔ̀ŋ, tì bəd ne nɔ̀kɔ̀ mə̀yi bəd. Chəyi mə̀ bə̀ yaʼ icheg wə̀dtag gho̰. 12Mə ya chùghə njèg chàʼrà Ŋwiye aghəm abe inga ìkàb. Mə ya nàʼà aba aghi amɔʼ inga iba ìghum.›
13Icheg ne wì yaya chàʼrà Ŋwiye ane, wə̀dtag ya təm agha se, ne chəyi wì ya bi nɔ̀ atog ikaŋ. Wì ya feti ibo nɔ̀ŋì igun atog se chàʼrà Ŋwiye gha, ‹Mə ya wə̀d inug tibɔ̀ŋ, Ŋwiye beri àsɔ̀mnəfiŋ igun inum.›
14Mə gha tesiʼ inən gha, wə̀dtag gho̰ ya təm kòʼ imbìghè abə Ŋwiye chè Farìsi we bɔŋ mbi ya se bə̀ndə̀ ghò a achan. Mbə̀ kyeri gha, wə̀d ne nɔ̀ nyɔd, Ŋwiye biri swi aməd. Wə̀d ne swi ìwi nyɔd, Ŋwiye biri nɔ̀ aməd.”
Yeso tì bɔn kwa kwa
(Mat 19:13-15; Mag 10:13-16)
15Bəd yaya nìŋə bɔn yeʼe abə Yeso gha wì bète awɔb. Si ya gha, anyumə̀ ne mə̀mə̀nənùg Yeso ya bàri icheg ne mbe nìŋə bɔn yeʼe, mbi kyen bəd mbe. 16Yeso ya kàrì bɔn mbe ibo imbìghè, si ghà abə mə̀mə̀nənùg məd gha, “Mbə̀ saŋa bɔn kwa kwa mbo̰ mbe yeʼe inum. Imbə̀ʼ mbə̰ kə̰ awən awɔb imbə̀ʼ icheg ne anug ìfɔ̀n Ŋwiye ya abə bəd ne yaʼi icheg inɔb.” 17Mə ghà kwàʼ tesiʼ inən gha, “Wə̀d ne chəyi wì nɔŋi ìzi fìŋ ane anug ìfɔ̀n Ŋwiye icheg ŋwan kwa kwa, chəyi tengàŋ biri nyi inga anug ìfɔ̀n ze.”
Anug imbə̀ʼ Wə̀d ikab
(Mat 19:16-30; Mag 10:17-31)
18Wə̀d mɔ̀ʼɔ abɔ̀ʼ bəd mbe ne yaya saʼa aben mə̀Ju ya biri abə Yeso gha, “Àchwitìnùg chɔm, Aghi ne mə mənyìʼ ghì bɔŋ jəg ìtḛ̀ ighə̀m imɔʼ àkə aghə?”
19Yeso ya ywìtì gha, “Aton ne àghò kàri amə ane wə̀d chɔ̀m àkə gha? Chəyi wə̀d mɔ̀ʼɔ yaʼi wə̀d chɔ̀m. À ya məyi Ŋwiye məd imɔʼ yaʼi wə̀d chɔ̀m. 20Àghò kyeri tikə te ne gha: Imbə̀ʼ àghò nɔ̀kì awe iweg wə̀d ndəŋ kə̀ inɔm wə̀d ndəŋ, imbə̀ʼ àghò zwètì awe wə̀d, imbə̀ʼ àghò jìye we, imbə̀ʼ àghò bḛ awe anug ako igun wə̀d, fɔrɔ ni gha àghò ghumni ìwe mbaʼ tì ìwe ngɔb.”
21Wə̀d we ya ywìtì gha, “Mə ya fə ko ni nɔ̀ŋì tikə ìto̰ tijìm anyumə̀ ne mə̀ yaya kiri ŋwan kwa.” 22Yeso ya zug ane si ghà ibo gha, “Aghi amɔʼ ze angu ne chəyi àghò kiri fàʼi. Àghò fḛ ighi ijìm ne àghò bèrì nàʼ ikab abə bəd ne chəyi àzɔb. Àghò biri si bèrì ighi ne àghò taŋ kɔ̀ŋ yaʼ ikaŋ àbɔ̀ŋɔ. Àghò mə ghì ane, si yeʼe beni abɔ̀ʼ inum.” 23Anyumə̀ ne wə̀d we ya zughi anug azo̰, wì ya taŋ sɔ̀mnɔ̀. Anug ze ya nàʼ ngəʼ ibo imbə̀ʼ icheg ne wì ya taŋ bèrì ighi nɔʼ nɔʼ.
24Yeso ya nḛ məd, si gha, “Ze biri ka abə wə̀d ikab ni nyi inga anug ìfɔ̀n Ŋwiye. 25Kwàʼ tesiʼ, ze biri bɔti abə kàme ni chè inga ibighi ìsaʼ chè icheg ne ze biri yaʼ abə wə̀d ikab ni nyi inga anug ìfɔ̀n Ŋwiye.”
26Wə̀d ijìm ne ya zughi ìngam gho̰ ya biri gha, “Àmə yaʼ ane, àkə we biri pum?”
27Yeso ya ywìtì inɔb gha, “Anug ne chəyi tì wə̀d fàʼ à ya abɔti anug abə Ŋwiye ni fàʼ.”
28Pità ya si ghà ibo gha, “Tè sàŋì ighi ijìm ne tì beri yeʼe abɔ̀ʼ ine.”
29Yeso ya ywìtì inɔb gha, “Mə gha tesiʼ inən, chəyi wə̀d ne sàŋi achan məd, kə̀ iweg məd, kə̀ məfi məd, kə̀ mə̀mbaʼ məd, kə̀ bɔn məd, imbə̀ʼ anug ìfɔ̀n Ŋwiye wì biri nim. 30Tengàŋ biri bèrì ighi ne nɔ̀ʼi chè mbe ne wì sàŋi, achug ndan ndàn aŋa igun isəg. Àsi inga nyùmə̀ isəg feg we ne yèʼe, wì biri jəg ìtḛ̀ ighə̀m imɔʼ.”
Yeso ywìrì ghàm ane ighəm ne pè ane itad imbə̀ʼ iwu məd
(Mat 20:17-19; Mag 10:32-34)
31Yeso ya kàrì bədtɔm məd mbe ìghum chɔ̀b ibe ghò iban, si ghà inɔb gha, “Tì ya anìŋ kɔ̀ʼɔ ghò a Jèrusalèm. Inug ijìm mbe ne bədkə̀n Ŋwiye ya ŋwàʼrì imbə̀ʼ Ŋwan Wə̀d biri dù. 32Mbi biri nàʼ aməd abə bəd ne kayi mə̀Ju. Mbi biri chəʼ aməd, zɔ̀mbɔ aməd, ched timad igun məd, te aməd bə̀ zwète aməd. 33Si ya gha, wì biri zwemne ane iwu ane ineg pè ane itad.”
34Mə̀mə̀nənùg məd ya jiʼì zug anug azo̰, si ya gha chəyi ìmbɔb itog ya zḛ. Ŋwiye ya nə̀m aton ane anug azo̰ inɔb. Chəyi mbɔb ya kyeri anug ze ne wì yaya ghà.
Yeso ghù ifəg
(Mat 20:29-34; Mag 10:46-52)
35Anyumə̀ ne Yeso tì mə̀mə̀nənùg məd ya se pè a Jèrikò, ifəg mɔ̀ʼɔ ya yaʼ iban inɔnjì, nɔ̰ ighi. 36Anyumə̀ ne ifəg we ya zughi icheg ne inɔ̰ bəd we chè, wì ya biri gha, “Àkə anug ye?”
37Mbi ywìtì ibo gha, “À ya Yeso we a Nazarèd we chè.”
38Ifəg we ya zug ane si kyen kàrà Yeso gha, “Yeso, Ŋwan ifɔn Dèvid, àghò bere àsɔ̀mnəfiŋ igun inum!”
39Bəd ne yaya yḛ̀ nè fìʼè inɔnjì imbìghè abə Yeso ya kyen ifəg we gha wì zuyə tizi. Icheg ne mbi yaya kyḛ aməd gha wì zu tizi, wì ya ywìrì taŋ kyen gha, “Ŋwan ifɔn Dèvid, àghò bere àsɔ̀mnəfiŋ igun inum!”
40Yeso ya zug, təm, si ghà gha mbe niŋ aməd yeʼe ibo. Anyumə̀ ne wì ya yeʼe si iban Yeso, Yeso ya biri ibo gha, 41“Àkə aghə ne àghò we kə̀bə̀ gha mə ghì ine?” Wì ya ywìtì gha, “Anɔŋisəg, mə kə̀b ni ya bàrà isiŋi.”
42Yeso ya ghà ibo gha, “Àghò bàd isiŋi. Ìwe ibḛfiŋ fə ghì àze aghɔn mèg.”
43Kwàʼ ati, wì ko se bàrà isiŋi. Wì ya si bène abɔ̀ʼ Yeso se yḛ̀ nè ghùmnə Ŋwiye. Ane, bəd məjìm ni ya bàri anug azo̰ ya bə̀ ghùmnə Ŋwiye.
હાલમાં પસંદ કરેલ:
Lug 18: MBTP
Highlight
શેર કરો
નકલ કરો
Want to have your highlights saved across all your devices? Sign up or sign in
© 2019 CABTAL
