Lug 17
17
Anug ni waʼ inug tibɔ̀ŋ abə ìwe ifi
(Mat 18:6-7,21-22; Mag 9:42)
1Yeso ya ghà abə mə̀mə̀nənùg məd gha, “Inug mbe ne ghìyə̀ gha bəd mbe ghì inug tibɔ̀ŋ mənyìʼ yèʼe, si ya gha, ngəʼ kyen biri yaʼ igun wə̀d we ne kwàʼrà bəd. 2Ze biri bɔ̀ŋ gha mbe tiŋə iteg kyen ane aməg məd màʼ aməd inga igyi tìbà sɔ̀mɔ ane wì ghì gha ŋwan mɔ̀ʼɔ abɔ̀ʼ ìmbi kwa kwa mbo̰ wì ghìyə̀ anug tibɔ̀ŋ. 3Ane, mbə̀ pata awən.
Ìwe ifi mə gùg anug ine, àghò gaŋ aməd. Wì mə bə̀ŋì ìzi fìŋ yèʼe, àghò waʼ inug tibɔ̀ŋ məd. 4Wə̀d mə gùg anug ine aghəm ìsàmbe igun aneg bə̀ bə̀ndì yèʼe ine aghəm ìsàmbe gha, ‹Mə fə bə̀ŋì ìmə fìŋ, àghò waʼ ìmbum inug tibɔ̀ŋ›, àghò mənyìʼ waʼ inug tibɔ̀ŋ məd.”
Inug imbə̀ʼ ibḛfiŋ
5Bədtɔm Kristo ya ghà abə Anɔŋisəg gha, “Ghi ìwa ibḛfiŋ we ka.”
6Anɔŋisəg ya ywìtì inɔb gha, “Mbə̰ mə̀ bèrì ibḛfiŋ ka wi ya məyi icheg titam mostàd, mbə̰ mbe tì mbə̰ ghà abə azed icheg ìtḭ ikwebì gha, ‹Chɔʼ ìwe nyɔd kwàʼ ane ighaŋ ghò si kwè inga igyi tìbà,› ze zugrə awən.”
Atog àfàʼì ze wə̀d àfàʼì
7Yeso ya gha, “Tì niŋ gha, wə̀d mɔ̀ʼɔ abɔ̀ʼ inən bèrì wə̀d àfàʼì ne ghùyə̀ ibon kə̀ wə̀d àfàʼì ne kyèʼrè njə̀g. Tì wì gha ibo anyumə̀ ne wì bə̀ndi a mben gha, ‹Yeʼe amad amad chùghi aseg jəg›. 8Chəyi wì biri ghà ane, wì biri ghà ibo gha, ‹Tangi ìtum tijəg chùʼri ìwe nyɔd yèʼe nàʼ mə̀ jəg bə̀ no bɔ̀ŋ àghò bə̀ se jə̀ghə no.› 9Chəyi wì biri nàʼ məyakà abə wə̀d àfàʼì we imbə̀ʼ icheg ne wì ya fàʼà yaʼ àzi àfàʼì. 10Ane, mbə̰ inən mə̀ fàʼ ìmbən ìfàʼì mbe ne mbi nàʼi inən, mbə̀ si ghà gha, ‹Mba ya bəd àfàʼì. Tì ya fàʼà yaʼ àza àfàʼì.›”
Yeso ghù bəd àwàrikə̀m ìghum
11Icheg ne Yeso yaya ghò a Jèrusalèm, wì yaya yḛ̀ igun inɔnjì we ne ghàpi Sàmarìyà tì Galìli. 12Anyumə̀ ne wì nyi inga asiŋi mɔ̀ʼɔ, bəd àwàrikə̀m ìghum ya bàd aməd. 13Mbi ya təm agha se kyen gha, “Yeso, Àchwitìnùg, àghò bere àsɔ̀mnəfiŋ igun ina.”
14Anyumə̀ ne Yeso ya bàri awɔb, wì ya ghà inɔb gha, “Mbə̀ gho chwi ìwən nyɔd abə bəd mbàn Ŋwiye.” Mbi ya nɔ̀ʼ ko ghò, àzɔb aghɔn mèg yi. 15Wə̀d ifibì abɔ̀ʼ inɔb ya bàd gha àze aghɔn fə mèg yi, wì bə̀ndì se yḛ̀ ne kyḛ ghùmnə Ŋwiye ane gì ka ka. 16Wì ya pè gùg imbìghè abə Yeso se nàʼà məyakà ibo. Wə̀d we ya yaʼ wə̀d a Sàmarìyà. 17Yeso ya biri gha, “À ya bəd ìghum ne aghɔn kə mèghi igun inɔb, mə̀mbin àbɔg mbeg? 18Aton ne məyi wə̀d imɔʼ abɔ̀ʼ inɔb ne yaʼi wə̀d tìsɔ̀ʼ gho̰ yèʼe ni nàʼ məyakà abə Ŋwiye àkə gha?” 19Yeso ya si ghà ibo gha, “Nɔ̀ʼɔ titighe, ghò awe. Ìwe ibḛfiŋ fə ghì àze aghɔn mèg.”
Anug ìfɔ̀n Ŋwiye kə ghum yeʼe anyumə̀ weg?
(Mat 24:23-28,37-41)
20Mə̀farìsi mɔ̀ʼɔ ya biri abə Yeso gha, “Anug ìfɔ̀n Ŋwiye kə ghum yeʼe anyumə̀ weg?” Yeso ya ywìtì gha, “Anug ìfɔ̀n Ŋwiye kayi anug ne biri yeʼe tì ineni ne bəd biri bàd. 21Chəyi bəd biri gha, ‹Nḛ azo̰› kə̀ ‹Nḛ azin yeʼe› imbə̀ʼ icheg ne anug ìfɔ̀n Ŋwiye fə se yi abɔ̀ʼ inən.”
22Yeso ya si ghà abə ìmbi mə̀mə̀nənùg gha, “Nyùmə̀ we yèʼe ne mbə̀ biri kə̀b ni bàd aneg mɔ̀ʼɔ amɔʼ inga ineg Ŋwan Wə̀d, si ya gha, chəyi mbə̀ biri bèrì apan ze. 23Bəd mɔ̀ʼɔ biri ghà inən gha ‹Nḛ, məd gho̰› kə̀ ‹Nḛ, məd ywḭyè.› Imbə̀ʼ mbə̰ bene awən inɔb anjìm. 24Aneg ne Ŋwan Wə̀d biri ywiri yeʼe ze biri yaʼ kwàʼ icheg ne àŋwàŋwaŋ ze wàrà ikaʼì ikaŋ àbɔ̀ŋɔ aba afibì isiŋi zḛ du aba azin. 25Si ya gha, məd mənyìʼ zə̰ ngəʼ ane inug nɔʼ nɔʼ, iwaŋ bəd gho̰ tèchɔ̀ŋ bə̀ to̰ awɔb məd.
26Kwàʼ icheg ne ze ya yaʼi inga nyùmə̀ ìwi Nwa̰, à ya icheg ne ze biri bə yaʼ inga ineg mbe ne Ŋwan Wə̀d biri yeʼe. 27Bəd yaya jə̀ghə bə̀ no, mbi yaya nàma bə̀ nàʼà bɔn ane inam ghò pè ane aneg ne Nwa̰ ya nyi inga abaŋ igyi. Mbə̀ŋ ya no, mənib sweg zwètì bəd mbe məjìm.
28À ya icheg ne ze ya bə yaʼ inga nyùmə̀ ìwi Lɔd. Bəd yaya jə̀ghə bə̀ no, mbi yaya zo̰ ighi bə̀ fḛ ighi. Mbi yaya nyɔ̀ʼɔ̀ ighi ngwèd bə̀ kɔ̀rɔ nəb. 29Si ya gha, aneg ze ne Lɔd ya du inga Sodòm, iywid tì sɔfɔ̀ ya swiʼi tikaŋ àbɔ̀ŋɔ tɔ̀n bəd məjìm fɔrɔ ighi ijìm inga aben ze. 30À ya kwàʼ icheg ne ze biri bə yaʼ ane aneg ne Ŋwan Wə̀d biri ywirì yeʼe.
31Igun aneg ze, wə̀d ne ikaŋ nəb imbə̀ʼ wì swiʼi yi ni nyi niŋ aghi mɔ̀ʼɔ inga nəb. Wə̀d ne yaʼi a mben imbə̀ʼ wì bə̀ndì yi ghò a achan. 32Mbə̀ wendi anug ne ya du abə iweg Lɔd 33Wə̀d ne kyèmbe ìwi ìtḛ̀ biri sam ìtḛ̀ we. Àsi wə̀d ne sami ìwi ìtḛ̀ imbə̀ʼ amə, tengàŋ biri jəg ìtḛ̀ we. 34Mə gha tesiʼ inən, izimi we, bəd mə̀be biri yaʼ igun abaʼ afibì, Ŋwiye niŋ wə̀d ifibì sàŋì ìywin. 35Mə̀yi məbe biri ya fɔrɔ ghɔ̀ʼɔ̀ kyì, Ŋwiye niŋ àyi ifibì sàŋì ìywin. 36Mbaŋà tìbe biri yaʼ a mben, Ŋwiye niŋ mbaŋà ifibì sàŋì ìzin.”
37Mə̀mə̀nənùg məd ya biri ibo gha, “Anɔŋisəg, anug azo̰ kə ghum du aya?”
Wì ya ywìtì inɔb gha, “Asiŋi ne nyam ku yaʼ angu, à ya angu ne izam biri fete.”
હાલમાં પસંદ કરેલ:
Lug 17: MBTP
Highlight
શેર કરો
નકલ કરો
Want to have your highlights saved across all your devices? Sign up or sign in
© 2019 CABTAL
