Lug 16
16
Ngam məgri imbə̀ʼ wə̀d ne beri iwe-iji
1Yeso ya ghàm ìngam məgri abə mə̀mə̀nənùg məd gha, “Wə̀d ikab mɔ̀ʼɔ ya nɔŋi wə̀d gha we nḛ ìmbi ighi. Mbi ya ghà abə wə̀d ikab we gha wə̀d àfàʼì məd we iwe nyìme ighi məd icheg ako bə̀ chìkə̀ ikab məd abu abu. 2Wə̀d ikab we ya kàrì wə̀d àfàʼì məd biri ibo gha, ‹Àkə anug ye ne mə zùghə anìŋ imbə̀ʼ awe? Niŋ ìmbe ìŋwàʼrì àfàʼì yeʼe chwi inum imbə̀ʼ icheg ne chəyi àghò biri ywiri fàʼ àfàʼì azo̰.› 3Wə̀d àfàʼì we ya kɔndi ibo inga fìŋ gha, ‹Mə kə anìŋ ghì iye? Ìmə mbaʼ àfàʼì ya anìŋ gho chì amə ane àfàʼì. Chəyi mə̀ bə bèrì ika ni tɔŋ isiŋi. Atog ze bə̀ nìrè inum ni ŋa nɔ̰. 4E! Mə kyèri aghi ne mə̀ biri ghì, ni gha àfàʼì mə bə̀ yi inum, chəyi bəd biri kamni mə inga ìtɔb nəb.› 5Icheg ne wì ya ghàmi ane, wì ya kàrì bəd ne yaya nyìme njo abə mbaʼ àfàʼì məd. Wì ya biri abə wə̀d njo mbègtog gha, ‹Àghò kə nyimi aghə abə ìmə mbaʼ àfàʼì?› 6Wì ya ywìtì gha ikaʼ məwud iki ifibì. Wə̀d àfàʼì we ya ghà ibo gha, ‹Niŋ àze àŋwàʼrì ŋwàʼrì inga kwàʼ amad amad gha ikaʼ məwud ìghum ita̰.› 7Wì ya bə̀ ywìrì bìri abə wə̀d njo ndəŋ gha, ‹Àghò kə nyìme aghə?› Wì ya ywìtì gha, ‹Mə nyìmi iban kyì aki atad.› Wə̀d àfàʼì we ghà ibo gha, ‹Niŋ àŋwàʼrì ŋwàʼrì inga kwàʼ amad amad gha iban kyì aki abe.›
8Mbaʼ àfàʼì we ya chɔ̀tɔ̀ wə̀d àfàʼì məd we imbə̀ʼ icheg ne wì ya chi tiwe iji. Wì ya chɔ̀tɔ̀ aməd ane imbə̀ʼ icheg ne bəd inga isəg gho̰ ya chìyè tiwe fàʼà ìmbɔb inug tì bəd ne yaʼi icheg inɔb chè bəd mbe ne yaʼi inga ìzḛzḛ ne kyeri Ŋwiye.
9Mə ghà kwàʼ tesiʼ inən gha, aton ane ìngam gho̰ ya gha, mbə̀ niŋ ighi ikab mbo̰ inga isəg ghì mə̀sə̀ʼ angu. Ze yaʼ ane imbə̀ʼ icheg ne, anyumə̀ ne ighi ikab mbe biri mèg, mbə biri si bèrì asiŋi ni chughi ane ìtḛ̀ ighə̀m imɔʼ. 10Wə̀d ne niŋi aghi kwa kwa nyìmi icheg chɔm biri bə nyimi ighi nɔʼ nɔʼ icheg chɔm. Wə̀d ne chəyi wì nyìmi ighi kwa kwa icheg chɔm, chəyi tengàŋ biri bə nyimi ighi nɔʼ nɔʼ icheg chɔm. 11Ane, Àkə mə̀ chəyi mbə̀ nyimi ighi ikab mbe igun isəg aŋa icheg chɔm, wə̀d ne biri si nàʼ ijiʼi ighi ikab inən àkə we? 12Àkə mə̀ chəyi mbə̀ taŋ nɔ̀ŋì ighi bəd ndəŋ icheg chɔm, wə̀d ne biri si nàʼ ighi mbe ne yaʼi ìmbən inən àkə we?
13Chəyi wə̀d mɔ̀ʼɔ ne tì wì fàʼ abə mə̀mbaʼ àfàʼì məbe. Tengàŋ biri kɔ̀ŋ ifibì wàʼri ìywin. Chəyi tì wə̀d zi fìŋ ni fàʼ abə Ŋwiye bə̀ zì fìŋ ni fàʼ ikab.”
Inug ndəŋ ne Yeso gha
(Mat 11:12-13; 5:31-32; Mag 10:11-12)
14Mə̀farìsi ya kɔ̀ŋ ikab ako. Mbɔb ya zug inug mbo̰ se zḭ̀ʼḛ̀ Yeso. 15Wì ya ghà inɔb gha, “À ya mbə̰ ne chwìte abə bəd gha mbə̰ təm kòʼ. Ighi ne bəd igun isəg mbe nìŋə gha à ya ijiʼi ighi ya ighi ne yaʼi ati ako abə Ŋwiye. Ŋwiye kyèri ìtən fìŋ.
16Mbi ya chwìte mə̀nɔ̀ʼɔ̀ Muse tì inug mbe ne bədkə̀n Ŋwiye ya gha bɔŋ Jɔn we ne yaya nàʼà mənib se pè. Nɔ̀ʼ ane nyùmə̀ we, bəd mbe mə̀tə̀ ikən chɔm imbə̀ʼ anug ìfɔ̀n Ŋwiye. Bəd məjìm mbe se kìrə ika ni nyi inga anug ìfɔ̀n ze. 17Ze zàm abə ikaŋ àbɔ̀ŋɔ fɔrɔ abə isəg ni chè nim chè icheg ne iki fikəʼi mɔ̀ʼɔ ane mə̀nɔ̀ʼɔ̀ Ŋwiye biri nim.”
18Yeso ya ywìrì gha, “Mbaŋà ne chìki inam tì iweg məd nam àyi ndəŋ, wè fànà. Mbaŋà ne nami àyi ne du inam abə wə̀d ndəŋ, wè bə̀ fànà.
Ìmùghì imbə̀ʼ wə̀d ikab tì Lazaròs
19Wə̀d ikab mɔ̀ʼɔ ya yaʼ angu. Wì yaya zìyè ndwi àka inun ne mbi tangi ane linèn bə̀ kɔ̀ŋɔ inga ikab ineg ijìm. 20Wə̀d ifum mɔ̀ʼɔ ne ìfìʼì ya jəg nyɔd məd yaya bə̀ inuʼ ikam angu. Ikum məd ya Lazaròs. 21Wì yaya ghɔ̀mɔ̀ ni jəg ighi ne fendi ikye nəb abə wə̀d ikab we anyumə̀ ne mbe jə̀ghə. Bog yaya yèʼe nère ìfìʼì məd. 22Nyùmə̀ ya kòʼ, Lazaròs, wə̀d ifum we, wì ku. Mbè angirə̀ ya yeʼe bèʼì aməd ghò a asiŋi chɔm iban Abràham. Wə̀d ikab we ya bə̀ ku, mbi twəŋi aməd. 23Wì ya nyi inga asiŋi ichə#16:23 Ìŋwàʼrì anun mɔ̀ʼɔ kàrì ane, aben iwu bəd. se zə̰ ngəʼ. Icheg ne wì ya yaʼi inga angu, wì ya nɔ̀rì atog nèn bàd Lazaròs iban Abràham kwàʼ agha se. 24Wì ya kàrì Abràham gha, ‹Àta Abràham, Àghò bere àsɔ̀mnəfiŋ igun inum. Mə boʼ ibo ine, àghò cha Lazaròs wè chubə àze atog ifeg inga mənib yèʼe chə̀mbi inum igun inemi.› 25Abràham ya ywìtì gha, ‹Ŋwan, wendi gha, anyumə̀ ne àghò ya yaʼi igun isəg, àghò ya yaʼ inga ìchɔ̀mì, Lazaròs ya yaʼ inga ngəʼ. Àsi amad anìŋ, məd we inga ìchɔ̀mì aŋa àghò si inga ngəʼ aghɔ. 26Tesiʼ ya gha, səm kyen ghàpì awa tì ine. Chəyi tì wə̀d bàni aŋa yeʼe aba ze. Chəyi tì wə̀d bə̀ bàni aba ze yeʼe aŋa.› 27Wə̀d we ya ywìtì gha, ‹Àmə yaʼ ane, mə boʼ ibo ine, cha Lazaròs inga achan ìmə mbaʼ 28imbə̀ʼ icheg ne mə beri ìmbum məfi məta̰. Tɔm aməd wì gho pàtì awɔb imbə̀ʼ mbi ghum nɔ̀ʼ yèʼe inga asiŋi ichə aŋa.› 29Abràham ya ywìtì gha, ‹Mbɔb beri Muse tì bədkə̀n Ŋwiye ne pàta awɔb, mbɔb zug anug ne mbɔb ya ghà.› 30Wə̀d ikab we ya ywìtì gha, ‹Abràham ìwa Mbaʼ, wə̀d mɔ̀ʼɔ inga aben iwu mə ghò ghàm inɔb, mbi biri zug bə̀ŋì fìŋ kɔ̀pi ìtɔb tìghinùg.› 31Abràham ya ywìtì gha, ‹Àmə chəyi mbi zug anug ne Muse tì bədkə̀n Ŋwiye mbe ghà, chəyi mbi biri bə zug ka wə̀d bə̀ zwème ane iwu ghò ghàm inɔb.›”
હાલમાં પસંદ કરેલ:
Lug 16: MBTP
Highlight
શેર કરો
નકલ કરો
Want to have your highlights saved across all your devices? Sign up or sign in
© 2019 CABTAL
