Lug 15

Tìngam məgri imbə̀ʼ njə̀g ne nimi

(Mat 18:12-14)

1Aneg mɔ̀ʼɔ, bədtag tì bəd ne ghìyə̀ inug tibɔ̀ŋ yaya fète iban Yeso ni zug anug ne we ghà. 2Ane, mə̀Farìsi tì mə̀chwitì mə̀nɔ̀ʼɔ̀ yaya zḭ̀ʼḛ̀ aməd gha, “Wə̀d gho̰ ya nìŋə bəd ne ghìyə̀ inug tibɔ̀ŋ, jə̀ghə tì inɔb.”

3Yeso ya si ghàm ìngam məgri inɔb gha, 4“Mbə̀ niŋ gha, wə̀d mɔ̀ʼɔ abɔ̀ʼ inən bèrì njə̀g iki ifibì. Njə̀g mɔ̀ʼɔ imɔʼ chè nim. Imbə̀ʼ tengàŋ biri nɔ̀ŋì ìtin ìwum àbɔg chɔ̀b àbɔg inga mben, ghò kə̀b njə̀g ze ne nimi anene wì bad? 5Anyumə̀ ne wì bàri, wì biri se taŋ gyènde. Wì biri ba njə̀g ze ibo kàmbə̀ʼ ghò inuʼ nəb. 6Anyumə̀ ne wì pe inuʼ nəb, wì biri kàri ìmbi mə̀sə̀ʼ tì bəd iban achan, mbi fete aseg. Wì biri ghà inɔb gha, ‹Mbə̀ yeʼe tì gyendi imbə̀ʼ icheg ne mə bàd ìmə njə̀g ze ne kə̀ nìmi.› 7Mə gha tesiʼ inən gha, À ya bə̀ ane ne igyendi kyen biri yaʼ ikaŋ àbɔ̀ŋɔ anyumə̀ ne wə̀d imɔʼ ne ghìyə̀ inug tibɔ̀ŋ bə̀ŋi ìzi fìŋ. Mbi biri gyendi chè icheg ne mbe gyènde imbə̀ʼ bəd ìghum àbɔg chɔ̀b àbɔg ne təmi kòʼ ne chəyi ze chwi gha mbe ywirì bə̀ŋì ìtɔb fìŋ.”

Ngam məgri imbə̀ʼ ikab ne nimi

8Yeso ya ywìrì gha, “Mbə̀ bə ywìrì niŋ gha, Àyi mɔ̀ʼɔ bèrì ikab sibà ìghum. Ikab mɔ̀ʼɔ imɔʼ chè nim. Imbə̀ʼ wì biri che anam, zə̀ nəb ijìm ni kə̀b ikab we anene wì bad? 9Anyumə̀ ne wì bàri, wì biri kàrì mə̀sə̀ʼ məd tì bəd iban achan mbi fete aseg. Wì biri ghà inɔb gha, ‹Mbə̀ gyendi tì inum imbə̀ʼ icheg ne mə bàd ìmə ikab we ne kə nìmi.› 10Mə gha tesiʼ inən gha, à ya bə̀ ane ne mbè angirə̀ Ŋwiye biri ya gyènde anyumə̀ ne wə̀d imɔʼ ne kə̀ ghìyə̀ inug tibɔ̀ŋ bə̀ŋi ìzi fìŋ.”

Ngam məgri imbə̀ʼ ŋwan ne nimi

11Yeso ya chè imbìghè gha, “Wə̀d mɔ̀ʼɔ ya bèrì ìmbi bɔn mbaŋà məbe. 12Ŋwan mbaŋà njìm ya ghà abə ìwɔb mbaʼ gha, ‹Àghò ghàpa ighi nàʼ ìmbum.› Wì ya ghàpì ìmbi ighi abə bɔn məd mbe məbe. 13Chəyi agha ya sa, ìwi njìm we feti ìmbi məd tì ighi ijìm ghò yi a aben mɔ̀ʼɔ ne agha sa. Wì ya pè angu kud ìmbi tì ighi ane icheg ne bə anene mbi mèg. 14Anyumə̀ ne wì ya fə kuri ighi mbe ijìm, njèg ka ka ya nyi inga aba aben ze ajìm. Ŋwan we ya se kə̀bə̀ aghi ni jəg tèkan. 15Ane, wì ya si ghò kə̀b àfàʼì ni fàʼ abə wə̀d mɔ̀ʼɔ inga aben ze. Wə̀d we ya niŋ aməd gha wì se jə ìkuŋə. 16Ŋwan we ya kə̀b ni jəg inga ighijəg ìkuŋə, si ya gha, chəyi mbi ya bi nàʼ ibo. 17Anyumə̀ ne atog məd ya fìʼe, wì ya kɔ̀ndi ibo inga fìŋ gha, ‹Àkə bəd àfàʼì məsə̀ʼə ne ìmə mbaʼ beri ne mbe jə̀ghə wàʼa àbùʼì ighijəg? Mo gho̰ aŋa kùyə njə̀g. 18Mə biri bə̀ndì ghò abə ìmə mbaʼ. Mə biri pe ghà ibo gha, Ìmə mbaʼ, mə fə gùg anug ine fɔrɔ abə Ŋwiye. 19Chəyi mə̀ ywirì kòʼ ni yaʼ ìwe ŋwan. Àghò niŋ amə yaʼ ane ìwe wə̀d àfàʼì abɔ̀ʼ mə̀mbin.› 20Ane, wì ya gàd nɔ̀ʼ ko ghò abɔ̀ʼ mbaʼ məd.

Anyumə̀ ne wì ya kiri biri agha se, mbaʼ məd ya bàd aməd. Wì ya bèrì àsɔ̀mnəfiŋ igun ìwi ŋwan we, si nòrò ghò kɔ̀ti aməd, nyìmbi aməd, nìpì njìm məd. 21Ŋwan we ya ghà ibo gha ‹Ìmə mbaʼ, mə gùg anug ine fɔrɔ abə Ŋwiye. Chəyi mə̀ ywirì kòʼ ni yaʼ ìwe ŋwan.› 22Mbaʼ məd ya ghà abə ìmbi bəd àfàʼì gha mbe zamba nyɔd niŋ ndwi àka inun yèʼe zì igun ŋwan we. Wì ya bə̀ gha, mbe ziye kàrà ibo ane ifeg bə̀ zì itami ibo. 23Wì ya bə̀ gha, mbe niŋ azaʼ pɔ̀ŋ ze ne taŋ faŋ yèʼe zwèti mbe ghiyə iteri gyèndi. 24Mbaʼ ŋwan we ya gha, ‹Tì gyendi imbə̀ʼ icheg ne ìmə ŋwan gho̰ ya ku, wè ywìrì zwème iwu. Wì ya nim, wè ywìrì yèʼe.› Ane, mbi ya ko se jə̀ghə gyènde.

25Icheg ne mbi yaya jə̀ghə gyènde ane, ŋwan mbèg ya yaʼ a mben. Anyumə̀ ne wì ya yeʼe se iban achan, wì ya zug gì ikyeg fɔrɔ abin. 26Wì ya kàrì ŋwan àfàʼì mɔ̀ʼɔ bìri ibo gha, ‹Àkə anug ye yaʼi inga achan?› 27Ŋwan àfàʼì we ya ywìtì gha, ‹Ìwe ifi fə yeʼe. Ìwe mbaʼ fə zweti azaʼ pɔ̀ŋ ibo imbə̀ʼ icheg ne wì bə̀ndi izɔm.› 28Ŋwan mbèg we ya zug ane se gàŋa. Wì ya bə̀ to̰ yi ni nyi inga nəb. Mbaʼ məd ya dù ghò iseg pè boʼ ibo ibo. 29Si ya gha, wì ya ywìtì abə mbaʼ məd gha, ‹Nḛ, tituʼ ìto̰ tijìm ne mə̀ faʼi ine, chəyi mə̀ kweʼì ghì tìzughə̀ ine. Chəyi àghò kə̀ kweʼì nàʼ ŋwan gwi gha mə tighe jəg tì ìmbum mə̀sə̀ʼ. 30Àsi anyumə̀ ne ìwe ŋwan gho̰ ne kuri ìmbe ighi ijìm tì mə̀yi wì yèʼe, àghò zwèti azaʼ pɔ̀ŋ ibo.› 31Mbaʼ məd ya ywìtì ibo gha, ‹Ìmə ŋwan, ighi ijìm ne mə̀ beri ya ìmbe imbə̀ʼ icheg ne àghò ya awe tì inum mà nyumə̀ ijìm. 32Aton ne tì beri ni jəg gyèndi ya gha, ìwe ifi gho̰ ya ku, we ywìrì zwème. Wì ya nim, tè ywìrì bàd aməd.›”

હાલમાં પસંદ કરેલ:

Lug 15: MBTP

Highlight

શેર કરો

નકલ કરો