Lug 14
14
Yeso ghù wə̀d ne ighog fɔrɔ ibo yaya se
1Yeso ya ghò inga nəb wə̀d mɔ̀ʼɔ ne ya yaʼi atog wə̀d abə mə̀Farìsi igun aneg àzwètì mə̀Ju. Wì ya ghò ni jəg. Bəd yaya nḛ̀ àfàʼì ne Yeso biri fàʼ imbə̀ʼ icheg ne 2wə̀d mɔ̀ʼɔ ya yaʼ angu ne ighog fɔrɔ ibo yaya se bə̀ mòtì. 3Yeso ya biri abə mə̀Farìsi tì mə̀chwitì mə̀nɔ̀ʼɔ̀ gha, “Mə̀nɔ̀ʼɔ̀ Muse bḛ gha tì ghù wə̀d igun aneg àzwètì kə̀ chəyi?”
4Bəd ya chim tizi. Yeso ya niŋ wə̀d we, ghù aməd, ghà ibo gha wì gho yi. 5Yeso ya si ghàbri bìri abə bəd mbe gha, “Wə̀d abɔ̀ʼ inən ne, Ŋwan məd, kə̀ nyam məd, mə̀ fen inga ibighi mənib igun aneg àzwètì, wì saŋì angu, àkə we? Imbə̀ʼ wì biri ki chì ati ati?”
6Chəyi tì mbi ya bèrì anug ni gha.
Anug ni swi nyɔd tì anug ni nɔ̀ nyɔd
7Yeso ya bàd icheg ne bəd yaya zɔ̀ŋɔ̀ ni niŋ ìti ne mbi nɔŋi abə bəd kyen, ni chughi jəg, wì si ghàm ìngam məgri inɔb gha, 8“Mbi mə̀ kàʼ awe ane inam, imbə̀ʼ àghò pè niŋ awe ati ne mbi nɔŋi abə wə̀d kyen. Kyeri gha wə̀d ane anug ze we tì wì bə̀ kàʼ wə̀d ndəŋ ne beri ati ighumni chè awe. 9Mbaʼ ane anug ne kàʼi awən mbə̰ məjìm mə ghà ine gha, ‹Nɔ̀ʼɔ nàʼ asiŋi abə wə̀d gho̰.› Atog biri nìd awe anyumə̀ ne àghò si nɔ̀ʼ ghò niŋ ati kwa kwa. 10Mbi mə̀ kàʼ awe ane anug, pe chùghi ati wə̀d kwa. Anyumə̀ ne mbaʼ ane anug si pè ghà ine gha, ‹Ìmə ìsə̀ʼ, yeʼe.› Àghò biri si bèrì ighumni imbìghè abə bəd məjìm ne yaʼi ane anug ze. 11Ŋwiye biri swi wə̀d ijìm ne nɔ̀ nyɔd, aseg, bə̀ si nɔ̀ wə̀d ijìm ne swi ìwi nyɔd, ikaŋ.”
12Yeso ya ghabri ghà abə mbaʼ ane anug gha, “Àghò mə kàʼ anug tisi kə̀ ikwikwiri, imbə̀ʼ àghò kàʼa awe məyi ìmbe mə̀sə̀ʼ, kə̀ məyi ìmbe məfi tì ìmbe ifud tì bədkab ne yaʼi iban ine. Imbə̀ʼ àghò kàʼa awe məyi bəd ne àghò kɔ̀ndɔ gha mbi biri ghum kàʼ awe bə, ane ywì ighi ne àghò ya ghum nàʼ inɔb. 13Àghò mə̀ ya kàʼà iteri, kàʼ bəd ne chəyi àzɔb tì bəd ne buʼrə tì məfəg fɔrɔ bəd ikwiri ibo. 14Ŋwiye biri si nàʼ chùd ine anyumə̀ ne wì biri zwemni bəd ne təmi kòʼ. Wì biri zì àbɔrɔ̀bɔd igun ine imbə̀ʼ icheg ne chəyi tì bəd mbe ywì ìmbe ighi.”
Ngam məgri imbə̀ʼ Iteri kyen
(Mat 22:1-10)
15Wə̀d mɔ̀ʼɔ abɔ̀ʼ bəd mbe ne yaya jə̀ghə tì Yeso ya zug anug ne Yeso gha, si gha, “Ŋwiye biri zì àbɔrɔ̀bɔd igun bəd mbe ne biri jəg iteri inga anug ìfɔ̀n Məd.”
16Yeso ya ywìtì ibo gha, “Wə̀d mɔ̀ʼɔ ya ghùm ghì iteri kyen, kàʼ bəd kwàʼ mbi nɔʼ nɔʼ. 17Nyùmə̀ ya kòʼ ane iteri we, wì cha wə̀d àfàʼì məd gha wì kàri bəd mbe ne məd ya kàʼi gha, ‹Mbə̀ yeʼe. Ighi ijìm fə se aseg.› 18Bəd mbe məjìm ya to̰ awɔb, ko se dèghè ìmbɔb inug ndəŋ awən. Wə̀d mbègtog ya dèg ibo gha, ‹Mə chere zo̰ mben. Mə kə̀b ni ghò nèn. Chəyi mə̀ biri yeʼe ane iteri.› 19Wə̀d ndəŋ ya gha, ‹Mə chere zo̰ pɔ̀ŋ ni ghù ibon. Mə kə̀b ni gho zweʼri. Chəyi mə̀ biri yeʼe ane iteri.› 20Wə̀d ndəŋ gha, ‹Mə chere nàma. Chəyi mə̀ biri yeʼe ane iteri.›
21Wə̀d àfàʼì we ya bə̀ndì ghò mə̀tì inug mbo̰ ijìm abə mbaʼ àfàʼì məd. Mbaʼ àfàʼì məd ya gaŋ, si ghà abə wə̀d àfàʼì məd we gha, ‹Ndò amad amad igun inɔnjì, nyi inga tìfad aben, kàrì aku bəd ajìm. Bəd ne chəyi àzɔb, tì bəd ne ibo sweʼe, tì bəd ne buʼrə tì məfəg gha mbe yeʼe ane iteri.› 22Wə̀d àfàʼì we ya ywìtì gha, ‹Masà, mə fə ghì icheg ne àghò gha. Asiŋi bə̀ kiri biri yi.› 23Mbaʼ àfàʼì we ya ywìrì ghà abə wə̀d àfàʼì we gha, ‹Ndò igun tinɔnjì kyen kyen fɔrɔ igun tinɔnjì kwa kwa tijìm, ghò ghà abə bəd ywìrì kɔ̀mbì gha mbe yeʼe, ìmə nəb sweg. 24Mə ghà inən gha, chəyi wə̀d mɔ̀ʼɔ abɔ̀ʼ mbe ne mə̀ ya bì kàʼ biri zweʼi aghi mɔ̀ʼɔ ane ìmə iteri.›”
Wə̀d chuʼri ìwi nyɔd bɔŋ beni abɔ̀ʼ Yeso
(Mat 10:37-38)
25Aneg mɔ̀ʼɔ, inɔ̰ bəd yaya yḛ̀ abɔ̀ʼ Yeso. Wì ya ywìrì ghà inɔb gha, 26“Wə̀d ne chəyi wì kɔ̀ŋi amə chè icheg ne wì kɔ̀ŋi ìwi mbaʼ, kə̀ ìwi ngɔb, kə̀ ìwi iweg, kə̀ bèyi ìwi ŋwan fɔrɔ ìwi ifi kə̀ ìzi njàbi, kə̀ bèyi fɔrɔ ìwi ìtḛ̀, à ya wə̀d ne chəyi wì kòʼi ni yaʼ àmə àmə̀nənùg. 27Wə̀d ne chəyi wì bèʼi àze azed abaʼri beni abɔ̀ʼ inum, chəyi wì koʼi ni yaʼ àmə àmə̀nənùg.
28Àkə we abɔ̀ʼ inən ne biri ko ni kɔd nəb sèsè ikaŋ ne chəyi wì kiri chughi aseg chuʼri inṵ ikab ni kɔd nəb ze ghò mànì? 29Àmə chəyi wì taŋ chuʼri nyɔd, wì biri zèg ati nəb, ikab mèg yi ne chəyi tì wì màni nəb kɔd. Bəd biri se chə̀ʼə aməd. 30Mbi biri se gha, ‹Mbə̀ nḛ mbe gho̰. Wì ya ko ni kɔd nəb, ikab mèg yi. Wì sàŋì akwiri.› 31Kə̀, ifɔn ne beri mə̀sogyì chuʼ ìghum mə̀ kə̀b ni ghò ane ibid, wì mənyìʼ niŋ nyumə̀ ni chuʼri nyɔd nèn gha tì wì màʼ ibid tì ifɔn ndəŋ ne beri mə̀sogyì chuʼ ìghum ibe chè aməd? 32Ifɔn ne kyeri gha, chəyi zìye biri màʼ ibid chè, wì biri tɔm bəd abə ifɔn ìywin ne wì kiri biri agha se gha mbe màni anug ze ane àbɔrɔ̀bɔd. 33À ya bə̀ ane ne wə̀d ne chəyi wì sàŋi ighi ijìm ni beni abɔ̀ʼ inum, chəyi tengàŋ kòʼi ni yaʼ àmə àmə̀nənùg.
Fìngwaŋ ne tu
(Mat 5:13; Mag 9:50)
34Fìngwaŋ jiʼì bɔ̀ŋ, si ya gha, fi mə̀ yaʼ fe ne fə tu, tì fi ywìrì nə̀m? 35Chəyi tì fi bì bɔ̀ŋ inga ìseg, kə̀ bɔ̀ŋ ane inyɔrì ighi. Fìngwaŋ ne fə tu ya ni waʼ. Wə̀d ne beri àtɔ̀ŋi wì zug.”
હાલમાં પસંદ કરેલ:
Lug 14: MBTP
Highlight
શેર કરો
નકલ કરો
Want to have your highlights saved across all your devices? Sign up or sign in
© 2019 CABTAL
