Lug 13
13
Mbə̀ bəŋə ìtən fìŋ nji mbə biri ku
1Anyumə̀ we ne Yeso yaya ghàmà abə inɔ̰ bəd we, bəd mɔ̀ʼɔ ya yaʼ angu ne ya ghà abə ibo gha, “MəGalìli mɔ̀ʼɔ yaya nàʼà ighi àfàtì abə Ŋwiye, Payilèd zwèti awɔb.” 2Yeso ya ywìtì inɔb gha, “Mbə kə kɔ̀ndɔ gha məGalìli mbe ya zən iku ngəʼ we ane imbə̀ʼ icheg ne ìmbɔb inug tibɔ̀ŋ ya nɔ̀ʼi chè ìmbi məGalìli mbin məjìm? 3Indèʼ! Mə gha tesiʼ inən gha, mbə̰ mə̀ chəyi mbə̀ bəŋi ìtən fìŋ, mbə̰ inən biri bə ku icheg inɔb. 4Kə̀, mbə kə kɔ̀ndɔ gha bəd ìghum chɔ̀b ìfàmi mbe ne nəb sèsè ikaŋ ze a Silòm ya buʼə zwèti awɔb ya bəd ne ìmbɔb inug tibɔ̀ŋ ya nɔ̀ʼi chè ìmbi bəd məjìm ne yaya chùghə a Jèrusalèm? 5Indèʼ! Mə gha tesiʼ inən gha, mbə̰ mə̀ chəyi mbə̀ bəŋi ìtən fìŋ, mbə̰ inən biri ku icheg inɔb.”
Ngam məgri imbə̀ʼ ìtḭ azed fig ne chəyi we ko
6Yeso ya ghàm ìngam məgri inɔb gha, “Wə̀d mɔ̀ʼɔ ya bèrì ìtḭ azed fig mɔ̀ʼɔ inga mben mə̀fig məd. Wì ya ghò ni nèn gha ìtḭ fig we, we ko. Wì ya si pè angu bàd gha chəyi wi ko. 7Wì ghàbri ghà abə wə̀d àfàʼì we ne wì ya zi a mben gha, ‹Nḛ, aŋa ya tituʼ titad ne mə yèʼe ni nèn gha ìtḭ fig gho̰ we ko, ne chəyi mə̀ pè bàrà fig ikaŋ. Àghò sɔb mèʼì aseg. Wì kə chùghə anìŋ jəghi ìseg gha.› 8Wə̀d àfàʼì we ya ywìtì gha, ‹Masà, te saŋa fituʼ fo̰, fe che. Mə biri tàʼrì ìtḭ zì ighi bɔbi. 9Wi mə ko fituʼ, ze bɔ̀ŋ. Àmə chəyi wi ko, àghò si ghà mə sɔb.›”
Yeso ghù àyi ni gumnə igun aneg àzwètì mə̀Ju
10Yeso yaya chwiti inug inga ichamì Ŋwiye mɔ̀ʼɔ igun aneg àzwètì mə̀Ju. 11Àyi mɔ̀ʼɔ ya yaʼ angu ne azwighi tibɔ̀ŋ ya ghi wì gumnə ane tituʼ ìghum chɔ̀b ìfàmi. Chəyi wì yaya bè tə̀mə titighe. 12Anyumə̀ ne Yeso ya bàri aməd, wì ya kàrì aməd, wì yèʼe imbìghè. Yeso si ghà ibo gha, “Àyi gho̰, àze aghɔn fə mèg.” 13Anyumə̀ ne wì ya gha ane, wì ya nɔ̀ŋì ìmbi ibo igun məd. Kwàʼ anyumə̀ we, nyɔd məd sèmbè. Wì se ghùmnə Ŋwiye. 14Atog wə̀d inga ichamì Ŋwiye ya gaŋ imbə̀ʼ icheg ne Yeso ya ghù àyi we igun aneg àzwètì, wì si ghà abə bəd gha, “Ineg àfàʼì mbe tìfughə, mbə̀ yeʼe igun ineg àfàʼì, mbe ghuyə awən. Kayi igun ineg àzwètì.”
15Anɔŋisəg ya ywìtì ibo gha, “Mbə̰ ya kwàʼ bəd ne bèmnè inug! Àkə chəyi wə̀d imɔʼ imɔʼ abɔ̀ʼ inən ya niŋi ìti nyam inga ikam ghò chà ti no mənib igun aneg àzwètì. 16Àsi gho̰ ne ya ŋwan inga inəbi ìwi Abràham ne Sàtàn kɔd aməd ane tituʼ ìghum chɔ̀b ìfàmi, chəyi ze bɔŋi ni ghù aməd igun aneg àzwètì?” 17Iywiti ichug Yeso ya ghì atog nìd abə bəd ìpàb məd. Bəd məjìm ne ya yaʼi angu ya se gyènde ane tiyeti inug ne Yeso yaya ghìyə̀.
Ngam məgri imbə̀ʼ fitam mostàd
(Mat 13:31-32; Mag 4:30-32)
18Yeso ya biri gha, “Anug ìfɔ̀n Ŋwiye kə icheg aghə? Mə kə anìŋ mə̀grì ane aghə? 19Anug ìfɔ̀n Ŋwiye ya icheg fitam mostàd#13:19 Fitam mostàd ya kwàʼ isighì isighì se gwère kwèghe bə̀ŋə̀ ane azed. ne wə̀d mɔ̀ʼɔ nwḭ̀, fi kweg, se azed ne tìnən te se kɔ̀rɔ ìtɔb kàn ane tìtab.”
Tìngam məgri imbə̀ʼ àfòrì
(Mat 13:33)
20Yeso ya ywìrì bìri gha, “Mə kə ghi mə̀grì anug ìfɔ̀n Ŋwiye ane aghə? 21Anug ìfɔ̀n Ŋwiye ya icheg àfòrì ne àyi ya nyàmbi inga aburi ngə̀ŋ mə̀kara, zì kɔʼ sweg mbe akwiye kyen kyen.”
Inuʼ akɔŋi kwa kwa
(Mat 7:13-14,21-23)
22Yeso ya nɔ̀ʼ ni ghò a Jèrusalèm, yḛ̀ nè chwìte inug chè inga isiŋi kwa kwa fɔrɔ isiŋi kyen kyen. 23Wə̀d mɔ̀ʼɔ ya biri ibo gha, “Anɔŋisəg, bəd ne biri ghum pum kə məyi iki piʼì?”
Wì ya ghà ibo gha, 24“Mbə̀ kirə ika ni nyi ane inuʼ ikam kwa. Si ya gha, mə gha tesiʼ inən gha, bəd ndan ndàn biri ghum kə̀b ni nyi, si ya gha, chəyi tì mbi nyi. 25Wə̀d ne beri nəb, mə̀ fə nɔ̀ʼ fèni ìzi nəb, mbə biri si təm isəg se gɔ̀ngɔ inuʼ akɔŋi gha, ‹Masà, fìʼe nəb ina.› Wì biri si ywìtì gha, ‹Chəyi mə̀ kyeri awən. Chəyi mə̀ bə kyèri asiŋi ne mbə̀ nɔ̀ʼi angu.›
26Mbə̰ biri ko se gha, ‹Tì ya jəg bə̀ no tì ine. Àghò yaya chwìte inug ina inga àza aben.› 27Məd biri ywìtì inən gha, ‹Mbə̰ bəd inug tibɔ̀ŋ, mbə̀ nɔʼɔ iban inum. Chəyi mə̀ kyeri asiŋi ne mbə̀ nɔʼi angu.› 28Mbə̰ biri dèg se kùrə asɔŋ anyumə̀ ne mbə̀ biri bàd Abràham tì Azìg tì Jàkɔb fɔrɔ bədkə̀n Ŋwiye məjìm inga anug ìfɔ̀n Ŋwiye, ne mbi waʼi awən isəg. 29Bəd biri ghum nɔ̀ʼ ane iba isəg ijìm, niŋ ìmbɔb isiŋi ni jəg iteri inga anug ìfɔ̀n Ŋwiye. 30Kwàʼ tesiʼ tesiʼ, bəd mbe ne yaʼi imbìghè biri se anjìm. Mbe ne anjìm biri si yaʼ imbìghè.”
Yeso sɔ̀mnɔ̀ igun Jèrusalèm
(Mat 23:37-39)
31Anyumə̀ we, Mə̀farìsi mɔ̀ʼɔ ya yeʼe pè ghà abə Yeso gha, “Àghò nɔʼɔ aŋa, ghò a asiŋi ndəŋ imbə̀ʼ icheg ne Erɔ̀d we kə̀bə̀ ni zweti awe.”
32Yeso ya ywìtì inɔb gha, “Mbə̀ gho ghà abə àchɔb ze gha, ‹Mə ya chìyè izwighi tibɔ̀ŋ inga bəd bə̀ ghùyə̀ ighɔn ane bəd tèchɔ̀ŋ fɔrɔ isu. Ane ineg itad, mə mànì àmə àfàʼì.› 33Ka ze bə̀ yaʼ iye, mə mənyìʼ ya yḛ̀ ghò imbìghè tèchɔ̀ŋ, isu fɔrɔ isu ìywin. Chəyi ze koʼi gha, mbe zweti wə̀dkə̀n Ŋwiye asiŋi ndəŋ ne kayi inga Jèrusalèm. 34Wəyì! Jèrusalèm, Jèrusalèm, àghò ni zweti bədkə̀n Ŋwiye bə̀ tùmbi bəd mbe ne Ŋwiye cha ine ane ateg, zwèti. Mə fə kirə ika aghəm ndan ndàn ni feti ìmbe bəd icheg ne ngɔb ngub we fète ìmbi bɔn aton ìti tibabrì, chəyi àghò bḛ. 35Nḛ̀! Mbi biri waʼ ìze nəb. Chəyi àghò biri ywiri bàd amə anene pè ane aneg ne àghò biri se ghà gha, ‹Ŋwiye zì àbɔrɔ̀bɔd igun wə̀d we ne yeʼe ane ikum we Anɔŋisəg.›”
હાલમાં પસંદ કરેલ:
Lug 13: MBTP
Highlight
શેર કરો
નકલ કરો
Want to have your highlights saved across all your devices? Sign up or sign in
© 2019 CABTAL
