Lug 20
20
Ibiri imbə̀ʼ asiŋi ne Yeso niŋi ìwi ika angu
(Mat 21:23-27; Mag 11:27-33)
1Aneg mɔ̀ʼɔ, icheg ne Yeso yaya chwìte inug abə bəd inga ikam mbàn Ŋwiye, bə̀ chètì ikən chɔm, itog bəd mbàn Ŋwiye tì mə̀chwitì mə̀nɔ̀ʼɔ̀ fɔrɔ itog bəd inga aben mə̀Ju ya ghò ibo. 2Mbi ya biri ibo gha, “Àghò gha ina! Àkə we nàʼi ika ine ni ghì inug mbo̰? Àkə we nàʼi ika gho̰ ine?”
3Yeso ya ywìtì gha, “Mə biri bə biri anug mɔ̀ʼɔ inən. Mbə̀ gha inum. 4Anug ze ne Jɔn yaya nàʼà mənib, àkə Ŋwiye ya nàʼi ika ibo kə̀ àkə bəd ya nàʼi ika ibo?”
5Wì ya biri ane mbi si chùm mbɔb mbɔb gha, “Tì mə gha, à ya Ŋwiye, wì biri biri ina gha aton ne chəyi tì ya si bḛ aməd àkə gha?” 6Àsi ane tì gha, à ya bəd, bəd biri tumbi awa ane ateg, zwèti imbə̀ʼ icheg ne bəd kyèri gha Jɔn yaya wə̀dkə̀n Ŋwiye.
7Ane, mbi si ywìtì abə Yeso gha, “Chəyi tì kyeri asiŋi ne ika məd ya nɔ̀ʼi angu.”
8Yeso ya ywìtì gha, “Chəyi mo inum biri bə gha wə̀d ne nàʼi ika inum ni ghì inug mbo̰.”
Ngam məgri imbə̀ʼ bəd ne nyimi mben
(Mat 21:33-46; Mag 12:1-12)
9Yeso ya chè imbìghè ghàm ìngam məgri gho̰ inɔb gha, “Wə̀d mɔ̀ʼɔ ya kon mben vayìn#20:9 Vayìn ya iku azed mɔ̀ʼɔ ne mbe kàba titam mə tangi mənoʼ. Wì ya zì bəd ne nyimi mben ze, si nɔ̀ʼ ghò chughi yi asiŋi ne agha sa. 10Nyùmə̀ ya kòʼ ni fòʼ ighi a mben ze, mbaʼ àfàʼì we chà ŋwan àfàʼì gha wì gho ghà abə bəd mbe ne nyimi mben ze gha mbe naʼa mə̀vayìn mɔ̀ʼɔ a mben ze ibo. Bəd mbe ya gwì ŋwan àfàʼì we sɔm, kamni aməd wì bə̀ndì ghò ibo zɔbi. 11Mbaʼ mben ze ya chà ŋwan àfàʼì ndəŋ, bəd mbe bə̀ kiri sɔm aməd, ghì tìnìrètog gwi aməd. Mbi bə̀ kamni aməd wì bə̀ndì ibo zɔbi. 12Wì ya ywìrì chà wə̀d àfàʼì ndəŋ, mbi bə̀ gwì aməd sɔm zì ina igun məd, chì inga mben ze màʼ asaŋ. 13Mbaʼ mben vayìn we ya si gha, ‹Ze kə anìŋ mə ghì iye? Mə biri tɔm ìmə ŋwan mbaŋà we ne mə̀ taŋ kɔ̀ŋ, ighəm mɔ̀ʼɔ mbi biri zugri aməd.›
14Anyumə̀ ne bəd mbe ya bàd gha à ya ŋwan ìwi mbaʼ mben, mbi ya ghàm mbɔb mbɔb gha, ‹À ya kwàʼ àjəgnəb məd gho̰, tì zwèti aməd, jəg mben› 15Mbi ya ghàm ane, gwì ŋwan we niŋ dù inga mben ze, ghò zwèti waʼ.
Mbaʼ mben vayìn we kə si ghì iye tì bəd mbe? 16Wì biri ghò zwètì bəd mbe ne yaya nyìme mben vayìn ze, si nàʼ mben ze abə bəd ndəŋ.”
Anyumə̀ ne bəd ya zughi ìngam məgri we, mbi ya si gha, “Imbə̀ʼ Ŋwiye nɔ̀ʼ bḛ!”
17Yeso ya nèn awɔb kwàʼ igun ife, si bìri inɔb gha, “Ane, aton ane Ìngam Ŋwiye we ne gha,
‹Iteg we ne bəd ne kɔ̀rɔ nəb ya to̰ awɔb,
wi fə bə̀ŋə̀ ane iteg ibog nəb›, àkə gha?”
18Wə̀d ijìm ne gùg igun iteg we, wi biri sàkì məd iba iba. Àsi wə̀d ne iteg we fḛ igun, wi ya fə ghɔ̀ʼɔ̀ məd ghɔʼi.
Ibiri imbə̀ʼ anug ne nàʼ tag
(Mat 22:15-22; Mag 12:13-17)
19Mə̀chwitì mə̀nɔ̀ʼɔ̀ tì itog bəd mbàn Ŋwiye ya kyeri gha Yeso ghàm ìngam məgri we imbə̀ʼ awɔb. Ane, mbi ya se kə̀bə̀ anug ne chè igun gwì aməd kwàʼ ati. Si ya gha, mbi yaya bɔ bəd. 20Icheg ne mbi yaya kə̀bə̀ anug ne chè igun gwì Yeso, mbi ya chà bəd mɔ̀ʼɔ gha mbe gho ghi kyèʼrì aməd. Mbi ya bèrì ni gho ghì icheg bəd ne yeʼe ane tesiʼ. Mbi ya nɔ̀ŋì ikɔndi gha mbi biri gwìye Yeso inga ìngam məd, si nàʼ aməd abə gɔbnà ni beri ika igun inɔb mbɔb məjìm gha wì saʼ aməd. 21Bəd mbe ne mbi ya cha awɔb ya pè biri abə Yeso gha, “Àchwitìnùg, tè kyèri gha àghò ya ghàmà bə̀ chwìte anug ne koʼi. Tè bə̀ kyèri gha chəyi àghò ya ghì icha, àghò ya chwìte tesiʼ imbə̀ʼ ikuchèg ne Ŋwiye kə̀bi gha bəd chughi angu. 22Ìmba mə̀nɔ̀ʼɔ̀ wa chwi gha tè naʼa tag abə Kayisà kə chəyi? Gha ina.”
23Yeso ya kyeri gha mbɔb ya bèmnè inug. Wì si ghà inɔb gha 24“Mbə̀ chwi ikab atə̰ mɔ̀ʼɔ inum”. Wì ya niŋ ikab we bìri gha, “Ife ne yaʼi igun ikab gho̰ àkə ìwi we? Ikum ne yaʼi igun ikab gho̰ àkə bə̀ ìwi we?”
Mbi ya ywìtì gha, “À ya ìfe ìwi Kayisà fɔrɔ ikum məd.”
25Yeso ya si ghà inɔb gha, “Mbə̀ naʼa ighi Kayisà abə Kayisà bə̀ nàʼ ighi Ŋwiye abə Ŋwiye.”
26Anug ya chè awɔb imbə̀ʼ ikuchèg ne Yeso ya niŋi ni ywìtì ìwɔb ibiri inga bəd. Ane, mbi ya chim tizi, chəyi tì mbi ya gwì aməd ane ìngam məd.
Ibiri imbə̀ʼ anug ni zweme ane iwu tì anug ni nam
(Mat 22:23-33; Mag 12:18-27)
27Mə̀Sadùsi yaya gha chəyi bəd biri zweme ane iwu. Ìmbi mɔ̀ʼɔ abɔ̀ʼ inɔb ya yeʼe ni biri anug mɔ̀ʼɔ abə Yeso. 28Mbi ya biri ibo gha, “Àchwitìnùg, Muse ya ŋwàʼrì inga mə̀nɔ̀ʼɔ̀ nàʼ ina gha, ifi wə̀d mə ku sàŋì iweg məd ne chəyi mbi gwi, tengàŋ bèrì ni nam iku-àyi we si gwì bɔn inga ikum ìwi ifi məd. 29Icheg gho̰ ne məfi mɔ̀ʼɔ yaya mbɔb ìsàmbe, ìwi mbègtog ya nam àyi, ku waʼ ne chəyi wì gwi. 30We ne pè ane ibe bə̀ nam iku-àyi we ku waʼ ne chəyi wì gwi. 31We ne pè ane itad bə̀ nam iku-àyi we bə̀ ku waʼ chəyi wì bə̀ gwi. Ze ya yaʼ anìŋ anene məfi mbe məjìm nam iku-àyi we bə̀ ku waʼ ne chəyi ìwi mɔ̀ʼɔ ne gwi ŋwan tè àyi we. 32Iku àyi we ya bə̀ si nwḭ̀yḛ̀ ku. 33Amad anìŋ ne məfi mbe ìsàmbe ya nam àyi we imɔʼ, wì kə ghum yaʼ iweg we anyumə̀ ne bəd biri zweme ane iwu?”
34Yeso ya ywìtì gha, “Bəd inga nyùmə̀ isəg gho̰ ya nàma bə̀ nàmna bɔn.” 35Àsi bəd ne biri kòʼ ni zweme bə̀ nyi inga nyùmə̀ isəg feg, chəyi mbi biri ya nàma kə̀ nàmna bɔn. 36Chəyi bəd mbe biri ywìrì ku imbə̀ʼ icheg ne mbi ya icheg mbè angirə̀. Icheg ne à ya bəd ne zweme ane iwu, mbɔb ya bɔn Ŋwiye. 37Muse ya fə chwi inga anug imbə̀ʼ ajuŋi azed ze ne wì ya bàri tì iywid ne chəyi ze se bère gha, bəd biri ghum zweme ane iwu. Wì ya chwi ane wì ya kàrì Anɔŋisəg gha Ŋwiye we abə Abràham, bə̀ yaʼ Ŋwiye we abə Azìg, bə̀ yaʼ Ŋwiye we abə Jàkɔb. 38Məd ya kayi Ŋwiye abə bəd ku. Məd ya Ŋwiye abə bəd ne yaʼi izɔm imbə̀ʼ icheg ne Ŋwiye bəd mbo̰ məjìm ya we ne yaʼ ìwi izɔm.
39Mə̀chwitì mə̀nɔ̀ʼɔ̀ mɔ̀ʼɔ ya ywìtì gha, “Àchwitìnùg, àghò ywìtì kwàʼ icheg chɔm!” 40Ane, chəyi wə̀d mɔ̀ʼɔ ne ya ywirì bèrì fìŋ ni biri anug mɔ̀ʼɔ ibo.
Ibiri imbə̀ʼ Wə̀d we ne Ŋwiye zɔ̀ʼi
(Mat 22:41-46; Mag 12:35-37)
41Yeso ya biri abə mə̀Farìsi mbe gha, “Ze kə chè iye gha mbə̰ mbe gha Wə̀d we ne Ŋwiye zɔ̀ʼi ya aghaŋ inga inəbi ifɔn Dèvid? 42Ifɔn Dèvid ya ghà məd məd inga àŋwàʼrì Tikyeg gha,
‹Anɔŋisəg ya ghà abə àmə Anɔŋisəg gha,
Chughi inum aba abo jəghi
43pè ane anyumə̀ ne mə̀ biri ghì àghò chughi nɔ̀ŋì ìmbe ighog igun ìmbe bəd ìpàb.› 44Ifɔn Dèvid ya kàrì aməd ane ‹Anɔŋisəg›, məd kə ywìri yaʼ ŋwan məd iye?
45Icheg ne bəd məjìm yaya zwère, Yeso ya ghà abə mə̀mə̀nənùg məd gha, 46Mbə̀ niŋə nyùmə̀ imbə̀ʼ mə̀chwitì mə̀nɔ̀ʼɔ̀. Mbi ya kɔ̀ŋɔ̀ anug ni zì ndwi ifɔn ŋa yḛ̀. Mbi ya bə̀ kɔ̀ŋɔ̀ anug ne gha bəd ya chàʼrà awɔb ane ighumni inga isiŋi iywin. Mbi ya bə̀ kɔ̀ŋɔ̀ anug ni chughi igun itən bəd kyen inga məchamì Ŋwiye fɔrɔ anug ne niŋ ìtən ighumni ane isiŋi inug jəghi. 47Mbɔb ya nyə̀ʼə̀ məku àyi jə̀ghə mbɔb ichan bə̀ se chàʼrà Ŋwiye tà̰ məyi ni chwi nyɔd. Ŋwiye biri ghum sɔb isaʼi tiku bəd te ane icheg ne ka.”
હાલમાં પસંદ કરેલ:
Lug 20: MBTP
Highlight
શેર કરો
નકલ કરો
Want to have your highlights saved across all your devices? Sign up or sign in
© 2019 CABTAL
