Toango 26
26
Yisaka alembʼokolo la Abimeleke
1Ko eto ea nzala eokwela ese eko: eko nteki eto ea nzala eki ndʼembile beki Abalayama. Ko Yisaka aocwa nda Ngelala, eka Abimeleke, roi ea Ba-Pelesete. 2Ko Yawe aolenya elʼende, aolokela, “Tokitelake ndʼEjipeto; yalaka ndʼese eʼemʼokosangela. 3Yalaka ndʼokili bone, ko emi njifoamana la we, ko njifokosakela bokako wa swa: elʼemi njifokoka we lʼana bake bokili bone bouma, ko njifieza nsimbi ikiʼmʼosimbelaka Abalayama, ise eke. 4Njifofuza banaʼake ngole tooci ta loola, ko njifokayʼana bake bise bine biuma. Ko banto ba benanga beuma biʼokili bifosakema lʼokako wa swa la bana bakawe, 5la ncinʼeki Abalayama imezaka lolaka lokami ko afongaki lilako likami la besise bekami, la ntomo ikami, ko la bisekyelo bikami.”
6Ko Yisaka aoyala nda Ngelala. 7Aki baende ba wiji boko uolaka ndʼeloko ea waji okae, aokela, “Ende ale nkana ekami”; elʼende aangaki fokela, “Ale waji okami,” lolo akelaki, “Nyango baende bʼese ene bafombomʼemi ndʼewelʼea Lebeka;” ekiʼndʼolekolaka lituka. 8Ko akiʼndʼomongakʼeko elingi fele, Abimeleke, roi ea Ba-Pelesete, aolenda lima ninisi ko aolena Yisaka ayolinge waji okae Lebeka ekofi. 9Ko Abimeleke aoleta Yisaka, ko aolokela, “Bala, ende ale waji oke nsosolo. Na okelake, Ale nkana ekami, ngamo?” Yisaka aolamba, “La ncina ekiʼmʼokanelaka, Nyango mpowa la ncina ekande!” 10Ko Abimeleke aokela, “Joi line like wʼotokeelaka na? Nga bontʼomo okiso etamaki la waji oke, siki otoatelaki ekwa ea likambo!” 11Ko Abimeleke aekezaki banto bakae bauma boeko wete, “Bontʼoso ofomwa bontʼone, nkina waji okae, ifoomama ci.”
12Nkako Yisaka aolona toma ndʼese eko, ko mbulʼeko aomuka emukelo nga bonkamʼonkama. Ko Yawe aolosakela bokako wa swa. 13Ko bontʼone aoyala boaci, ko aokongofula la liaci elaka nko aokita boaci mongo. 14Aki lʼetonga bia mpate ko lʼetonga bia ngombo, ko lʼasali bauke. Ko elengʼeko Ba-Pelesete baolooka inkunya. 15Ba-Pelesete baosakeza bitoko biuma biki basali bʼise ekae ocimaka ndʼembile beki Abalayama ise ekae. 16Ko Abimeleke aokela Yisaka, “Imana elʼiso, ele we otolekola la mpamba o ndekola mongo.”
17Ko Yisaka aolimana limʼeko, ko aolemya ilombe ikae ya bito ndʼofoku wa Ngelala, ko aofetsʼeko. 18Ko Yisaka aocimola lenkina bitoko biʼasi bieimamaki ndʼembile beki Abalayama ise ekae, eki Ba-Pelesete osakezaka bikondʼafeka bʼiwa ya Abalayama; ko aotanga biko baina baki ise ekae otangaka biko. 19Ko basali ba Yisaka bacimaki ndʼofoku, ko batanaki etoko eʼasi bandola wo-wo. 20Ko baesanyi ba nyama ba Ngelala baseki lisa la baesanyi ba Yisaka, baokela, “Basi bane bale bakiso.” Ko aotanga lina ja etoko eko Eseke, la ncinʼekʼiyʼoswelaka lʼende. 21Nkako baocimʼetoko emo, ko baseki ndʼewela eʼeko ngoko; ko aolilʼeko lina Sitena. 22Ko aosekwa limʼeko, ko aocima etoko enkina, ko ntabaswela ndʼewela ea etoko eko; ko aotanga lina jʼeko Leoboto, aokela, “Aeyoko Yawe aotoka jole, ko tifofula ndʼesʼene o mpafula.”
23Ko limʼeko aounda nda Bela-Seba. 24Ko Yawe aolenyʼelʼende lʼotsʼoko, aokela, “Emi nde Nzakomba ea Abalayama ise eke. Toangake elʼemi nde la we, ko njifokosakela bokako wa swa, ko njifofuza bana bake ndʼeloko ea bosali okami Abalayama.” 25Ko aotonga nkinda ea mbeka eko, ko aoleta lina ja Yawe ndʼoondo. Ko aolemya ilombe ikae ya bito eko, Ko basali ba Yisaka bacimaki etoko eko.
26Nkako Abimeleke aoya ekaʼnde lima Ngelala, ende la Auzata elombe emo ekande, ko la Fikola, commandant ea boloi bokae wa soldats. 27Yisaka aolakela, “Inyʼanjinʼemi ko lonjimolaki limʼelʼinyo, ko loya elʼemi lae?” 28Baokela, “Iso tena fole mongo wae Yawe ale la we, ko toyokele, Kelʼiso tosimbelane nsimbi, iso la we, ko kelʼiso la we tolembʼokolo, 29wete ofaotokeelʼiso bobe, ngokʼiso ntatokeela we bobe, lolo tokokeelaki bolotsi kika, ko tokokenzaki la kuci. Aeyoko ole wete bonto osakema lʼokako wa swa wa Yawe.” 30Ko aolalambela elambo, ko baleki ko bamelaki. 31Baoetswa la nkesa, ko baosimbelana nsimbi, Yisaka aolaeindeza nda mboka, ko baolimana limʼelʼende la kuci. 32Mbil’ eko mongo basali ba Yisaka baoyʼosangelʼende nsango eʼetoko ekʼiyʼocimaka, ko baolokela, “Totanʼasi.” 33Ko aotangʼeko Seba; ndʼewelʼeko bonangʼoko botangema Bela-Seba elaka nko mbilʼene. 34Aki Esau okitaka mbula ntukʼinei aolenga Yudita, bona owa Beli, Bo-Ete, ko la Basemata, bona owa Elona, Bo-Ete. 35Iyo baatelaki Yisaka la Lebeka lokeseli mongo ndʼotema.
હાલમાં પસંદ કરેલ:
Toango 26: LOL87
Highlight
શેર કરો
નકલ કરો
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987