Toango 27
27
Yakoba aosakema bokako wa swa la ise ekae Yisaka
1Aki Yisaka okitaka mpaka mongo, ko baiso baowa, ko ntakuseya jena, aoleta Esau, bona okae owa nsomi, ko aolokela, “Bonʼokami”; ko ende aolamba, “Emʼone.” 2Yisaka aolokela, “Bala, njokita mpaka mongo; mpea mbile eʼemʼowa. 3Ndʼewelʼeko, kola bifeko bike, wete bakula la bongango, ko kenda ndʼesobe, ko onjasele nyama. 4Ko onkeele toma ta jete elenge elangʼemi, ko onjele wae nde, kela nkosakele bokako wa swa atafʼemʼowa.” 5Lebeka okaki aki Yisaka otefelaka la bona okae Esau. Ko Esau aocwa ndʼesobe wae ase nyama wae ayelʼeko. 6Ko Lebeka aotefeela Yakoba bona okae, “Bala, ndokaki ise eke ayotefele la Esau, botomolo oke, aolokela, 7‘Onjele nyama yʼokonda, ko ondambele toma ta jete wae nde, ko nkosakele bokako wa swa nda joso ja Nzakomba atafemi owa,’ 8Ndʼewelʼeko, bonʼokami, fonga lokela baoyi bʼomwa bokami elenge ekotomʼemi lotomo. 9Kenda aeyoko ndʼotonga, ko onkoele bana ba nta bafe bale lʼauta, kela nkateza ise eke toma ta jete limʼako elenge elangʼende. 10Mpanga otombele ise eke toma toko, wete ale, kela akosakele we bokako wa swa atafʼendʼowa.” 11Lolo Yakoba aokela Lebeka nyango ekande, “Bala, Esau, botomolo okami afe bonto owa wuku, ko emi mpa la wuku nye. 12Nkina ise ekami ifommama la likata, ko njifoyalema nga bonto ondolengola, ko njifoyaatelʼemi mongo wambo wa tu, afa bokako wa swa.” 13Nyango ekae aolokela, “Bona okami, kela wambo wa tu bonkwelʼemi; lolo imeza bomwa bokami kika, ko nco, onjelʼiko.” 14Ko ende aocwʼokolʼiko, ko aoyelʼiko ele nyango ekae, Ko nyango ekae aolamba toma ta jete, elengʼeki ise ekae olangaka. 15Nkako Lebeka aokola benkoto bekoleki bolotsi bia Esau, nsomi ekande, beki lʼende ndʼilombe, ko aolotsa Yakoba, bonʼokae owʼakuka beko. 16Ko aolila bikoto bia bana bako ba nta ndʼakata bakande la nda nkingo ekande. 17Ko aolokitsa toma toko ta jete, ko la mampa ekiʼndʼezaka.
18Ko ende aolotswʼele ise ekande, aokela, “Fafa ekami.” Ende aolamba, “Emʼone, bona okami. We ole na?” 19Yakoba aokelʼise ekande, “Emi nde Esau, bona okawe owa nsomi; njokela ngoki wʼontomaka. Aeyoko kitase, ko leka nyama ekami kela onsakele bokako wa swa.” 20Yisaka aokela bona okae, “Mo! Bona okami, otanʼeko lʼikao ngoe ngamo?” Ende aolamba, “O ndʼewelʼeki Yawe, Nzakomba eke, olekyakʼeko nda joso likami.” 21Yisaka aokela Yakoba, “Bona okami, tutama kela nkomame, wae njea nkina ole nsomi ekami Esau nsosolo.” 22Ko Yakoba aotutamʼele Yisaka ise ekae. Ende aolomama, ko aokela, “Lolaka lole lolaka ja Yakoba, lolo bakata bale bakata bʼEsau.” 23Ko ntoea bolotsi, eki bakata bakae la wuku ngole bakata ba botomolʼokae Esau. Ko aolosakela bokako wa swa. 24Aolokela; “Na wʼole bona okami Esau la nsosolo?” Aolamba, “Onde, nde nkʼende.” 25Ko aokela, “Onjele nyama, kela nde toma ta bona okami, ko nkosakele bokako swa.” Ko aololekeza toma toko, ko aleki; ko aoloyela vina, ko aomelʼeko. 26Nkako ise ekande Yisaka aolokela, “Bona okami, tutamʼaeyoko, ko onsambele la baiser.” 27Yakoba aotutama, ko aolosambela la baiser. Yisaka aolombela lofe ja benkoto bekae, ko aolosakela bokako wa swa, aokela,
“Bala lofe jʼona okami
Lole ngole lofe jʼesobe eki Yawe osakelaka lʼokako.
28Kela Nzakomba akokaya eongi ea loola,
Ko la bauta bʼokili, ko lʼofula wa blé la vina.
29Kela beloi biʼanto bakosaele,
Ko beoci bakusama nda joso like.
Yalema nkolo ea bioto bike,
Ko kela bana ba nyango eke baosame ele we;
Wengiʼonto okamba we wambo wa tu, ambeme la wambo wa tu;
Ko wengiʼonto okosakelʼokako, asakeme lʼokako wa swa.”
30Yisaka mpangʼasizaka losakeia Yakoba bokako, ko Yakoba ntimanʼolotsi limʼelʼende, bala Esau, botomolo okae, aolundola lima boengʼokae. 31Ende ngoko, aoleza toma ta jete, ko aoyela toko ele ise ekande, ko aokela ise ekae, “Kela fafa ekami aetswa, ko ale nyama ea bona okande, kela ansakele bokako wa swa.” 32Yisaka ise ekae aolokela, “We ole na?” Aokela, “Emi nde bona oke owa nsomi, Esau.” 33Nkako Yisaka aolenga lolengi mongo, ko aokela, “Na! osʼondaselaki nyama yʼesobe, ko anjelaki eko na? Ko ndeki eko atafa we oya, ko ndosakelaki bokako wa swa – ko nsosolo ende ifosakema lʼokako wa swa!” 34Aki Esau okaka baoyiʼane bʼise ekae, aobeleza la lofoso ja nkele mongo, ko aokela ise ekae, “O Fafa ekami, onsakelʼemi ngoko bokako wa swa, nkʼemi oyei!” 35Lolo aolokela, “Bokune oke aoya la jongo, ko aokola bokako boke wa swa.” 36Esau aokela, “Ende afotangema Yakoba la ncina mongo nde? ekiʼnde onsulunganaka la jongo besulungana befe. Aomponola mpifo ekami ea nsomi, ko bala aeyoko aonjiyela bokako bokami wa swa.” Ko aokela, “Ntompongelʼemi bokako wa swa, nde?” 37yisaka aolamba, ko aokela Esau, “Bala, njoloilʼende nkolo eke, ko njolokaya bioto bikae biuma, wae bayale basali bakae; ko njoloatela biofo la vina. La ngoko, joi liʼemʼokokeela we na, bona okami?” 38Esau aokela ise ekande, “Fafa ekami! Fafa ekami! kamba ole la bokako wa swa nko bonʼomoko kika nde? Onsakelʼemi, fafa ekami, nkʼemi mongo, bokako wa swa!” Ko Esau aosangya lolaka lokae, ko aolela lilelo mongo.
39Yisaka ise ekae aolamba, aolokela,
“Bala, boyalo boke wifotangwa la lobwo jʼokili.
Ko wifoyala esi ngoko, lʼeongi ea loola limʼaliko.
40Wifoika lʼifaka ike yʼetumba, ko wifosaela bokune oke.
Lolo ae wʼolembwa bonyoko,
Wifotena efoke ekae lima nkingo eke.”
41Ko Esau aolina Yakoba jino ndʼewelʼea bokako wa swa boki ise ekae osakelakʼende. Ko Esau aokela ndʼotemaʼokae, “Bembile bia lilelo ndʼewelʼea ise ekami beotutama, mpanga mbome bokune okami ci.” 42Ko baosangela Lebeka baoyiʼane bʼEsau, bona okande owa nsomi; ko aotoma jeta Yakoba, bona okae owʼakuka, ko aolokela, “Bala, Esau, botomolo oke, acicimya botema la wango wae akoome. 43Ndʼewelʼeko, bona okami, okoza bomwaʼokami; emala, lota eka Labana, nkana ekami nda Alana. 44Ko yalaka ekaʼnde elingi fele, elaka nko angala ea nkele ea botomolomolo oke ecicima, 45wae elaka nko nkele ea botomolo oke esile, ko ende ofela joi liki wʼokeelakʼende, mpanga nkete limʼeko; ndele lilelo ndʼewelʼekinyʼafe nda mbilʼemoko lae?”
46Ko Lebeka aokela Yisaka, “Njowa lʼompele mongo ndʼewelʼea banʼane bʼamato ba Ba-Ete. Nkina Yakoba akole waji limʼele bana ba Ba-Ete elengʼele bane, loiko lokami loonga lenkina ngamo?”
હાલમાં પસંદ કરેલ:
Toango 27: LOL87
Highlight
શેર કરો
નકલ કરો
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987