Toango 24
24
Lebeka aoyalema waji owa Yisaka
1Ko Abalayama aokita mbula iuke, wae aokita elimo mongo, ko Yawe aosakela Abalayama bokako wa swa ndʼelemo bekae beuma. 2Ko Abalayama aokela bosali okoleki engambi ndʼasali bʼilombe ikae, ko ondesanyaki belemo la toma tokae touma, aolokela, “Nkoonda, ila likata like ndʼase bʼefelo ekami, 3ko njifokosimbya nsimbi la Yawe, ole Nzakomba ea loola lʼokili, wae ofaokoela bona okami waji limʼele bana ba Kanana efetsʼemi; 4lolonde wifocwa ndʼese ekami, ele ilongo ikami, ko okoela bona okami Yisaka, waji limʼeko.” 5Ko bosali aokela, “Nkina bomoto afolange wae ankime ndʼesʼene mo! Mpanga ntombe bona oke lenkina ndʼese limʼeki wʼoyaka?” 6Abalayama aolokela, “O nye! Fonga loala wae ofotombe bona okami eko nye. 7Yawe Nzakomba, onjimolaki lima bola wʼise ekami, ko limʼese ea eotswelo ekami, atefelaki lʼemi, ko ansimbelakʼemi nsimbi, aokela, Njifokaya banʼakawe esʼene. Ende mongo ifotoma ekima ekande nda joso like, mpanga okoele bona okami waji limʼeko. 8Lolo nga bomoto afolange lokokima, nkako wifotungwa lima nsimbi eki wʼonsimbelaka; lolo totombake lenkina bona okami eko.” 9Nkako bosali aolila likata likae ndʼase bʼefelo ea Abalayama, nkolo ekande, ko aolosimbela nsimbi nda joi line.
10Ko bosali aokola ngamela jom lima ngamela ya nkolo ekae, ko aokenda. Ko aotomba nganji iuke ya losimo limʼele nkolo ekande, ko aolemala, ko aokenda nda Mesopotamia, ndʼonanga wa Naola. 11Ko aokela wae ngamela ikusʼaongo ndʼanza bʼonanga, ntutama lʼetoko eʼasi, o lʼokolo, ndʼekeke eewʼamato otokolʼasi. 12Ko aokela, “O Yawe, Nzakomba ea nkolo ekami Abalayama, onkambya bolotsi mbilʼene, ko eneya nkolo ekami Abalayama liota. 13Bala, ndemi ntutama lʼetoko eʼasi, ko bana bʼamato bʼanto bʼonanga baoya otokolʼasi: 14ko bomoto oʼemʼokela, ‘Nkoonda, kitezʼekucu eke, wae mmelʼasi,’ ko ende anjamba, ‘Wʼambomele, ko njifomeza ngamela ike basi o ngoko,’ – kelʼende ayale bomoto oki wʼosonelaka bosali oke Yisaka. La joi liko njifea wae oleneya nkolo ekami liota.”
15Nkʼatafende osiza lotefela, bala Lebeka, ootswʼele Betwele, bonʼowa jende owa Mileka, waji oki Naola, bokune owa Abalayama, aolola, ayotombʼekucu nda lisoko likande. 16Ende aki lituka mongo, lifoku otafoalana la jende. Aokitela ndʼetoko, aoyoza ekucu ekande, ko aosafwa. 17Ko bosali oko aolikumwa okumana lʼende, ko aolokela, “Nkoonda, onkaya isisi yʼasi lima ekucu eke, mmele.” 18Ende aolamba, “Nkolo ekami, wambomele.” Ko aokitezʼekucu nkaola nda likata likae, ko aolokaya wae amele. 19Akiʼndʼosizʼokaya basi, aokela, “Njifotokoela ngamela ike ngoko, elaka nko iko yosiza lomela.” 20Ko aobongola basi nkaola nda wato bomela nyama basi, nkako aolikumwa ndʼetoko otokola basi bamo; ko aotokoela ngamela ikae iuma. 21Ko bontʼoko aoloala te, ko aoyala wai, wete ene nkina Yawe aoongya lokendo lokae nkina nye.
22Ko aki ngamela osizaka lomela basi, bontʼoko aokomola anneau ea wolo, bolito wʼeko boki ete i ea sekele, ko la bakonga bafe ba lo, bolito wa bako boki sekele ya wolo jom; 23ko aokela, “We bona owa na? Nkoonda onsangele! La etamelo elʼeko ndʼilombe yʼise eke wae tetame eko?” 24Ende aolokela, “Emi nde bona owa Betwele, ole bona owa jende owa Mileka, okiʼndʼootelaka Naola.” 25Ko aokongosangela wete, “Iso tole la bailo baengi Ia toma tokoka la nyama, ko la itenela iʼinyʼetama.” 26Bontʼoko aosunyʼotsaʼokande, ko aomemya Yawe. 27Aokela, “Imemya ele Yawe, Nzakomba ea nkolo ekami Abalayama, elʼende ntambya joka nkolo ekami isei ya nsosolo. Yawe aondongya nda mboka, aonkitsa ndʼilombe ya llongo ya nkolo ekami.”
28Ko lifoku liko aolikumwa, ko aosangela ilongo ya nyango ekande baoyiʼako. 29Ko Lebeka aki la nkana, lina likae Labana, ko ende aolikumwa ndʼanza ele bontʼoko ndʼetoko. 30Akiʼndʼenaka anneau eko, ko la bakonga nda mbo ya nkana ekande, ko akiʼndʼokaka baoyi ba nkana ekae Lebeka, wae, “Bontʼoko atefelaki elengʼene,” ende aocwʼele bontʼoko, ko bala, akemi ntutama la ngamela ndʼetoko. 31Ko aokela, “We, bontʼosakema la Yawe lʼokako wa swa, otswaka, Wemala ndʼanza lae? Njokeleza ilombe, ko lʼitenela ya ngamela.” 32Ko bontʼoko aolotswa ndʼilombe. Ko Labana aolembola bensenge bia ngamela ikae, ko aolokaya bailo la toma ta ngamela, ko la basi wae asole bakaka bakae, lʼende lʼanto bayaki lʼende. 33Ko baololekeza toma wae ale; lolo ende aokela, “Mpaola toma elaka nko nsange ncina ekiʼmʼoyaka.” Aokela, “Wambosange.”
34Ende aokela, “Emi nde bosali owa Abalayama. 35Yawe aosakela nkolo ekami bokako wa swa mongo, ko aoyala bonto owa ka mongo, aolokaya betonga lʼeloi bia nyama, ko la argent la wolo, lʼasali bʼaende la bʼamato, ko la ngamela la mpunda. 36Ko Sala, waji owa nkolo ekami, aotelaki nkolo ekami bona owa jende akiʼndʼokitakʼekota; ko Abalayama aokaya bonʼoko okae toma toatʼende touma. 37Ko nkolo ekami aonsimbya nsimbi, aokela, ‘Ofaokoela bona okami waji limʼele bana ba Kanana, ba bokili bone bofetsʼemi, 38lolonde wifocwa ele ilongo yʼise ekami, ele bioto bikami, ko yokoele bona okami waji limʼeko.’ 39Ko njokela nkolo ekami, ‘Nkina bomotʼoko afaolanga lonkima mo!’ 40Aonkela, Yawe ondesana lʼemi, ifotoma ekima ekande la we bolongo, ko ifoongya lokendo loke, ko wifokoela bona okami waji limʼele bioto bikami, limʼilongo yʼise ekami. 41Ko wifotungwa lima nsimbi ekami nga okitʼele bioto bikami, ko bafokokayʼende, mpangʼotungwa lima nsimbi ekami.’
42“Ko mbilʼene, akiʼmʼokitaka ndʼetoko eʼasi, njokela, ‘O Yawe, Nzakomba ea nkolo ekami Abalayama, ngʼolangʼoongya lokendo lokami, 43bala, ndemi ndʼetoko eʼasi; kela lifoku liʼemʼokela, ayʼende otokolʼasi, Onkaya isisi yʼasi limʼekucu eke mmele; 44ko ende anjamba, We mongo, wambomele, ko njifotokoela ngamela ike basi ngoko; kelʼende ayaleme bomoto oki Yawe osonelaka bona owa nkolo ekami.’
45“Nkʼataf emi losiza otefela ndʼotema okami, Lebeka aoya lʼekucu ekae nda lisoko; ko aokitela ndʼetoko, ko aotokolʼasi. Ko ndokelʼende, ‘Nkoonda, ondayʼasi, mmele.’ 46Ko aokiteza ekucu ekande lima lisoko likae nkaola, aokela, ‘Melaka, ko njifomeza ngamela ike ngoko.’ Ko emi njomela, ko aomeza ngamela basi ngoko. 47Nkako njolouola, ‘We ole bona owa na?’ Ende aokela, ‘Emi bona owa Betwele, bona owa Naola oki Mileka ootelakʼende.’ Ko ndilaki anneau nda jolo likae, ko la bakonga nda mbo ikae. 48Nkako njosunya botsa, ko njomemya Yawe, ko njosima Yawe Nzakomba ea nkolo ekami Abalayama, ondongyaki nda mboka ea ci, wae nkoele bona owa nkolo ekami waji, wete bona owʼokune owa nkolo ekami. 49Ko aeyoko nga lolanga lokeela nkolo ekami baoyi bʼoya nsosolo, lonsangele; ko nkina lofolange, lonsangele; kela ndete nkina wiji wʼelome, nkina wiji wʼeso.”
50Nkako Labana la Betwele baolamba, “Joi line joya limʼele Yawe. Iso tofokusʼokotefeela joi limo, la jʼolotsi nkina jʼobe. 51Bala Lebeka ale nda joso like; wʼokole ko kendaka, kelʼende ayale waji owa bona owa nkolo eke ngoki Yawe otefelaka.”
52Aki bosali owa Abalayama okakabaoyiʼakiyo, aokusama ndʼamoci ko aomemya Yawe. 53Ko aokomola belotswaka bia argent la bia wolo, ko lʼenkoto, ko aokaya Lebeka; ko aokaya nkana la nyango ekande nganji yʼolotsi. 54Ko ende lʼanto baki lʼende baleki toma ko bamelaki, ko bakeci botsʼoko. Akʼiyʼoetswaka la nkesa, bosali oko aokela, “Onjuteya ele nkolo ekami.” 55Lolo nkana la nyango ea Lebeka baokela, “Kela lifoku acikale lʼiso fele, nkina bembile jom, ko ndʼafeka, mpangʼakende.” 56Lolo ende aolakela, “Talontemyake, ele Yawe aoongya lokendo lokami. Lonkenza, kela njute ele nkolo ekami.” 57Iyo baolokela, “Tete lifoku ko touole joi lilangʼende.” 58Ko baoleta Lebeka, ko baolokela, “La olanga loewa la bontʼone?” Ende aokela, “Njifokenda.” 59Ko baotoma Lebeka, nkana ekiyo, ko la bosali okae owʼomoto ondoesanyaki akiʼnde bolelaki, ko la bosali owa Abalayama lʼanto bakande. 60Ko baosakela Lebeka bokako wa swa, ko baokela, “Nkana ekiso, yalema nyango ea bana nkoto ya kese, ko kela banaʼake baate wiso wʼainiʼakiyo.” 61Nkako Lebeka aolemala, ende lʼasali bakae bʼamato, baolafema nda ngamela, ko baokenda lʼontʼoko. Nkʼeleng’ eko bosali owa Abalayama aokola Lebeka ko aokenda.
62Ko Yisaka aolimana lima etoko ea Bela-lai-loi, ko aofetsa nda wiji wa sud. 63Ko Yisaka aocwʼokakaza baoyi nda folefole lʼokolo. Ko aounza baiso bakae, ko aolena ngamela yoya. 64Ko Lebeka aounza baiso, ko akiʼndʼenaka Yisaka, aokitela lima ngamela. 65Ko aokela bosali oko, “Bontʼoko mpiko oyʼokumana lʼiso nda folefole ale na?” Ko bosali oko aokela, “Ale nkolo ekami.” Nkako Lebeka aokola eto, ko aokuka jonge likae. 66Ko bosali oko aosangela Yisaka baoyi bauma bakiʼndʼokelaka. 67Nkako Yisaka aoloyela ndʼilombe ya bito iki nyango ekae Sala, ko aolokola, ko aoyalema waji okae, ko aololanga. La ngoko Yisaka aolombwa lokeseli lokiʼndʼokaka lʼiwa ya nyango ekande.
હાલમાં પસંદ કરેલ:
Toango 24: LOL87
Highlight
શેર કરો
નકલ કરો
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987