YOHANES 10
10
Yesus Ara Nara Perob Pam Beilinanya Hyok Yuba
1”Nara ugunuk dib lebsin, Nimi ben hnon, domba pama pik yokaʾ ak weknaʾ loboka yok pik gelelenga meknewoka weklelanya bera, alda hokaʾ donanya ulumla. 2Anasa wera, domba pam pik yokaʾ ak uboka weklelanya bera, pama beilinanya yokaʾ nongnya bera alan. 3Pam lekaʾ ak sam welelanya bedya dara, pama beiyek yibinokaʾ aboka pika bakna dara, pam ara damnya bedya yuba keboka, nidyaʾ ellaʾ gigiro si yok-yok silisin dara, beiyik goboka mengelesil pika balamak. 4Domba pama gong dara, nidyaʾ seleb beiyik sam bo goubsin dara, domba damnya bera mengewoka balamna dara, sikda alja yub orowek ella ulumakaʾ adya, keboka eimik diriga balamak. 5Bok yok salyaʾanya bek dara, alja yuba sanaʾ elgom adya, yoknya bedya youbol yabasuso dara, alak kenaʾ loboka yeiri biniseng,” hyok. 6Dara, Yesus adya ban yuba sunuwoka lebsuk bok, sikja dara, damok ara anasa lemla senewoka ella danggumek.
7Dara, onoʾ hnon saaboka lebokaʾ ara, ”Nara ugunuk dib lebsin, Na nong anyek domba pam amba pik dibaʾ ulumna. 8Na pam damnya anam yanggunabok, yok nim enyek men yalameknya nera, hokaʾ donaʾ nang ek yalameekanya, sikja yuba sanaʾ yok anasa, domba adya sikja yuba kenggulumek. 9Nara pik nong dibaʾ ulumna e. Heknedya pik dibaʾ ak uboka weklelanya bera alak blebnamla. Dara, pik dibaʾ pik bini yeini uboka perob denaʾ deregoka ulumnamla. 10Hokaʾ donaʾ nimi yalamak dara, hokaʾ dobnun, nim obnun, malya uboka soldob menegonunaʾ aboka yalamak bok, nak dara, embengaʾ unaʾ dibaʾ elegoka, hyak nauba pe ulunokaʾ aboka yeilimsa,” hyok.
11”Nara domba pama pe beilinanya dibaʾ ulumna e. Domba pama pe beilinanya dibnya bera, alja nong enyek pam amba somogamnyaʾ anaba senelamla. 12Bok, salyaʾanya rupiah deknenjabaʾ anasa, pama geregoka bo ululom ananya bera bo ulunabok, bei gama yangganaʾ eibna dara, nadya pam gomaʾ senewoka, lok anasa pama loboka yeiri balamla. Dara, bei gam adya domba pama nidyaʾ ara doluwoka ob menegoka yaklamla. 13Salyaʾanya bera alda deknaʾ amba ganya hwiboka welemlakanya, domba pam ak ganya goluwoka bo unggulumlaʾ adya, bei gam adya domba obnunaʾ aboka yanggan dara, alda lok anasa yeiri balamla.
14-15 #
Mat. 11:27; Luk. 10:22 Nara pe domba pama beilinaʾ yokaʾ nongnya ulumna e. Neyung bedya nak ella ulunelekanya, nababya alak ella ulumna sok, anasonya neikik nababya nadya domba ak ella ulusin dara, sikda nak onoʾ ella ulunyak. Anasa, nara siksamba somogonun senelamna. 16Dara onoʾ nadya domba pam gong dara, yok lekaʾ ak sam hnon ulumak. Sikbabya hnon anyagan bo yanasin. Dara, sikda hnon nadya yuba pe keboka, anyagan orowek men ulumak pam eb neikaʾ ak hibnya dara, nadya yokaʾ pama hnonok, nak pama beilinanya hnonok danamla. 17Nadya nong anyek, saaboka dobnanabok, nim amba somoganesin senelamnaʾ anasa, nadyaʾ neyung nak wanaʾ nauba ulunel. 18Na nong ak dara, nadya ganya doboka or obnulum anaʾ orok bok dara, wera obnenggununeseng bok, nadya ganya doboka or ubnulum henesinya. Anasa, nara ganya doboka eleklesinya uboka, onoʾ saaboka onsok donaʾanya ulumna. Ban wa nera Neyung bedya nak unu welelulaʾ aboka elegenyok,” hyok.
19Yesus adya ban wenyaboka lebgiga balamok dara, Yahudi nang edya onoʾ nauba ganya bokdangoka ulumek. 20Nimi nauba wenyalamekaʾ ara, ”Ban wenyalalanya nera bisaʾ gologoka serema salalamlaʾ anasa, hekasa ugunda alak kelelum do?” aboka lelemek. 21Bok onoʾ yok nang edya hnon lelemekaʾ ara, ”Bisaʾ gologanggumna nang era yuba salamlaʾ anasa, bisaʾ gologosonya bera henga lum nang ek henga gwelegoka hwebnamso de?” aboka lelemek.
Yahudi Nang Edya Yesus Ak Lek Aboka Lobek Yuba
22Ban salek enyek, Yerusalem heikek Imik Neyung e meewoka pika bakamekaʾ beknaʾ sum dangamok. An salek era saragenaʾ li ulumok. 23Dara, Yesus ara Imik Neyung ek Salomo bedya makoka somok e sindamak wekoka kemero yabalamok. 24Ban sum enyek, Yahudi nang era Yesus ak aknel ganagal yeiniboka, ”Anda nuk lobaʾ nenelesilimaʾ ara hek sum lobnesilim do?” aboka heibek. ”Anasa wera, anda aldib Kristus nimi blebsinaʾ dubnya ulumen bok dara, nara alan aldib ulumna aboka or laga poboka leblom,” hyek.
25Dara, Yesus adya sikenek lebsukaʾ ara, ”Nara ugunuk seleb lebsisa bok, nak dib senenggulunulum. Nadyaʾ neyung be si sibuka yokaʾ-yokaʾ lok soʾ unulamnaʾ anadya, nak okoka beknaʾ laga lelesil. 26Ugunda nadya pam unggululumaʾ adya, nak dib senenggulunulum. 27Nadya pama yokaʾ ak dara, nara sikenek ella ulusinekanya, sikda nadya yuba keboka nak diriga yalanyak. 28Nara sikenek sobaʾ ulmorulunokaʾ aboka embengaʾ unaʾ eleganesin dara, sikda hyak somoganggunumak. Nimi yok nim edya nadya soruk ak ab hyak bleboka dobnenggunusak. 29Nadyaʾ neyung bedya, sik nonga nak doboka elegenyoknya bera, yokaʾ-yokaʾ nidyaʾ ara mek so bok, alda hyak senenggomaʾ imiknya ulumlaʾ anasa, alja bo ulusilaʾ anasa, alja soruk ak ab yoknya bedya bleboka dobnenggunusil. 30Nab Neyung beb dara, hnonok ok ulunam,” hyok.
31Dara onoʾ saaboka Yahudi nang edya, Yesus ak girik adya doboka obnobaʾ aboka ulumek. 32Bok onoʾ Yesus adya sikenek lebsukaʾ ara, ”Nadyaʾ neyung bek ab lanalamla unaʾ enyek ugun hogung ak nauba unulusinaʾ anasa, har nenyek malya unulamnaʾ anasa girik adya obnenobaʾ aboka ulunulum do?” hyok. 33#Im. 24:16Dara, Yahudi nang edya Yesus ak, ”Anja pe unululam wa nenesa gom, alda an nong anyek nimi sirikaʾ bok, nara Imik Neyung me aboka Imik Neyung ak malya nenelelamaʾ anasa, girik adya obgenobaʾ aboka ulunjab,” hyek.
34 #
Mzm. 82:6
Dara, Yesus adya sikenek, ”Ugunja unuwanalum an yuba momnya dobokaʾ ara, Imik Neyung adya, ugunda im nang ululum amok, aboka momnya dobok. 35-36Anasa, Imik Neyung yuba doboka unulumek nim ek, im nang aboka si sisukaʾ anasa, wera nadya Imik Neyung bedya me nera, nara an alamna dara, ugunda hekasa nak malya lelemla aboka, yana kilinulum do? Nera Imik Neyung adya orowek munaʾ geboka sokok an bokol yeilinyoknya ulunabok unulunulum. 37Nadyaʾ neyung bedya nak welelom aboka elegenyok wa nenyek unuwoka wenaʾ orok dara, wera ugunda nak dib senenenggom mem. 38Bok nadya dara, unuwoka welenabok, ugunja danyek nak dib senenaʾ orok bok, nadya welemna wa nenyek keeboka dib senewolulum. Anadya wera, Neyung bera nadya nong lomok ulunelekanya, nara alja nong lomok ulumnaʾ ara, ugunda ella danalum bar,” hyok. 39Dara, onoʾ saaboka Yahudi nang edya, Yesus ak salawoka heng goubnobaʾ aboka ul yabek bok, alda sikenek ab loboka yokok byuk.
Yesus Ara Yordan Mek Gem Err Sam Byuk Yuba
40 #
Yoh. 1:28
Dara Yesus ara, Yohanes Pembaptis bedya nimi youmaʾ meka dalasukaʾ ak, Yordan mek gemek eer sam biniboka ulumok. 41Dara, nimi nauba Yesus ak yalamek. Wera onoʾ sikja dara, ”Yohanes Pembaptis bera alja dara, yokaʾ-yokaʾ hnon lok so beknaʾ dibaʾ ununaʾ orok bok, alda yub adya ok benesemba nekoka unuwanamla alamokaʾ ara aldib lelemok,” alamek. 42Dara, anyagan ara nimi nauba Yesus ak dib senewoka dolomek.
હાલમાં પસંદ કરેલ:
YOHANES 10: LAINLC
Highlight
શેર કરો
નકલ કરો
Want to have your highlights saved across all your devices? Sign up or sign in
@ LAI 2000
