Lúù 15
15
Ƃáá gíniìa zɛ̀
(Máfìù 18.12-14)
1Lúó dò káa, ɓo‐pɛ̀ ɓo‐mìà wà kɛ‐wɔ̃̀ yɔɔ kɛ‐mìà búnùzɛ̀ o nu ó o tóó dɔ Zízɛ̀ mɔ̀. 2Fálásíì‐mìà wà Wálà kii‐dɔ‐mìàa o gbɛ̃̀ gbaa, wáà wɔ̃́ gèè Zízɛ̀ gbĩ mɔ̀ weeá kélɛ̀, “Gɔ̃́ e kéa lɛ́ɛ̀ kɛ‐wɔ̃̀ yɔɔ kɛ‐mìà sɛ́nɛ́ ɓo, ɛ̃́ɛ̃́ tó wà ye nì wáà pɛ ɓèlè e kíe là.” 3Lɛ̀ e kɛ kília, Zízɛ̀ e pĩ̀ã̀ e kéa vɔ o lɛ̀ɛ kélɛ̀,
4“Yé míá ka kéa ɓáá wũ doó aà kɛ ka dò kɛ̀lɛ̀, lɛ́ à doó aà gínia, lɛ́ɛ̀ lo à kɛɛ̀ kpɛ? Lɛ́ɛ̀ lo à vũ̀ sɛ́lɛ́ìsɛ wɛ́lɛ́ sɛ́lɛ́ìsɛ e tóa o tóò sùu ɓèlèpìà, tó e ló à doó lɛ́ e gínia nàá sí, é tóá kíli á gɛ̃̀. 5Yé aà gɛ̃̀ɛ, à gé lɛ́ɛ̀ lo liì, tó a kpɔ́ e gbã là, 6tó áà lòá e mɛ̀ĩ́. Tó e nu e píé kɛ́ì, e e ɓɛ́ĩ̀ nì wà e yà‐sɔ́nɔ́‐mìà nì o súo kɛ e kíe là, áà gèè o lɛ̀ɛ, ‘Kà nu kɔ́á géli kɛ, ɓii maà m̀ ɓáá lɛ́ à gíniì e kɛáa gɛ̃̀.’ 7Zi nɔ́ doóa káa, ḿm̀ gèe ka lɛ̀ɛ, kɛ‐wɔ̃̀ yɔɔ kɛ‐mì doó lɛ́ è e sɔ̃̀ɔ̃ yɔɔ mɛ́ vɔ̀ɔ, géli gbùò lɛ́ɛ̀ lo kɛɛ̀ Wálà‐pà à mɔ́ɔ̀ wɔ̃̀ mɔ̀, é dieá mia kpeĩ vũ̀ sɛ́lɛ́ìsɛ wɛ́lɛ́ sɛ́lɛ́ìsɛ, lɛ́ sɔ̃̀ɔ̃ yɔɔ wá o mɔ̀ kɛ ó mɛ́ vɔ̀ɔ là.
Pɛlèe gbá lɛ́ à gíniì e kɛ à káa
8“Ɛ́ɛ̃́ zeĩ́, yé pɛlèe lɛ́ à kɛɛ̀ lɛ sévà káa, gbá vũ̀ doó aà kɛ lee doó kɛ̀lɛ̀, lɛ́ aà doó gínia, lɛ́ɛ̀ lo à kɛɛ̀ kpɛ? Lɛ́ɛ̀ lo là nábò dɔɔ̀, tó e káa wì gòlò, tó áà lɛ̀ nàà e yiè ká déĩ́ le, é tóá kíli é à gɛ̃̀. 9Yé aà gɛ̃̀ɛ, lɛ́ɛ̀ lo e ɓɛ́ĩ̀ nì wà e yà‐sɔ́nɔ́‐mìà nì o súo kɛɛ̀ e kíe là, áà gèè o lɛ̀ɛ, ‘Kà nu kɔ́á géli kɛ. Ƃii maà m̀ pɛlèe lɛ́ à gíniì e kɛáa gɛ̃̀.’ 10Zi nɔ́ doóa káa, ḿm̀ gèe ka lɛ̀ɛ, Wálà là vɔ‐mìà óò géli kɛ̀ kɛ‐wɔ̃̀ yɔɔ kɛ‐mì doó lɛ́ è e sɔ̃̀ɔ̃ yɔɔ mɛ́ vɔ̀ɔ là.”
Nɛ́ gíniìa zɛ̀
11Zízɛ̀ a gèe zeĩ́ kélɛ̀, “E kɛ gɔ̃ doó lɛ́ à gbe nì o kɛ pèèlɛɛ ká. 12À gbe nyɔ̀nɔ́‐mìa a gèe e dàa lɛ̀ɛ, ‘M dàa, ì m zì pɔɔ̀ lɛ́ è lo tóò m kɛ̀lɛ̀ɛ nɔ.’ Lɛ̀ e kɛ kília, gɔ̃́ɛɛ e pɔɔ̀ɔ yí gìnì e gbe nì pèèlɛɛ mɔ̀. 13Lɛ̀ à lɛ̀ e ɓo pèèlɛɛ, nɛ́fúa e e zì pɔɔ̀ɔ séĩ́ pá e kíe mɔ̀. E gbɛ̃̀ gbaa à ká zuú, áà lò sɛ́lɛ́ gbèkèni dò yí. Lɛ̀ e ló yia, e kɛ gbaa e kɛ̀lɛ̀‐pɛ̀lèe yí sìèpìà wɔ̃́ kɛ‐zì yɔɔ̀ yɔɔ̀ ɛ̃́ɛ̃́ yí gíniìa zɛ̀ ká. 14Pɛ séĩ́ lɛ́ e kɛ à kɛ̀lɛ̀ɛ, e à séĩ́ gó. Lɛ̀ e kɛ kília, lɔ̀ɔ kpó‐kpó e dà gbaa sɛ́lɛ́ e kília yí. E kɛ gbaa yí, tó pɛ gbɛɛ wá à kɛ̀lɛ̀. 15Lɛ̀ e kɛ kília, e ló gbaa, kɛ é kɛ sɛ́lɛ́ e kília yí‐mìà doó‐mì píé. Mí e kília e à vɔ e píé nyɛ́nɛ̀ĩ̀, kɛ é e nyìɛ kɛ là ɓɔ̀ vɔ̀ mɔ̀. 16A naa é ze‐kèlè lɛ́ o kɛ ɓɔ̀ lé gbapìà à káa, á dò ɓèlè kɛ à gí é dɔ. Kɛɛ mi dò lɛ̀ɛ́ gbaa pɛ gbɛɛ nɔ à lɛ̀ɛ kɛ á ɓèlè. 17Lɛ̀ e kɛ gbaa kília, e nu gbaa e dìè píé, áà gèè kélɛ̀, ‘M dàa là yɛɓo‐kɛ‐mìà séĩ́, óò léɓèlè sɔ̀lɔ̀ ɓo gbùò, wáà ɓèlè, tó wáà kɔ̃́ nì ɓò à mɔ̀. Ye gɛ̃̀, m lɛ̀ e kéa mɔ̀, tó lɔ̀ɔ áà ɓùò m zɛɛ̀ɛ ké. 18Ḿm̀ lo wɛ̀lɛ̀, m ló m dàa píé, ḿ gèe à lɛ̀ɛ, “M dàa, maà kɛ‐wɔ̃̀ yɔɔ kɛ Wálà ká, ɛ̃́ɛ̃́ i ká. 19Ma wá bɛ̃̀ɛ̃ gbaa mí ì bɛ̀i à mɔ̀ í à sí i gbea ká. Ì wɔ̃́ kɛ m ká, lɛ̀ pɛ lɛ́ m ɓà yɛɓo‐kɛ‐mìàa doó‐mì ká.” ’ 20Lɛ̀ e kɛ kília, e wɛ̀lɛ̀, e gbɛ̃̀ gbaa zuú, áà lò e dàa píé.
“E kɛ tĩã́ o píé ká là ká gbèĩ lɛ̀ lɛ́ à dàa a gɛ̃̀ɛ ká. À yéĩ́ a dàa kɛ nyɔ́ɔ̀ɔ. E bàlà sí, e ló, e káá e gbe mɔ̀, áà e bè gbɛ̃̀ à kpéĩ́ mɔ̀. 21À gbe a gèe à lɛ̀ɛ, ‘M dàa, maà kɛ‐wɔ̃̀ yɔɔ kɛ Wálà ká, ɛ̃́ɛ̃́ i ká. Ma wá bɛ̃̀ɛ̃ gbaa mí ì bɛ̀i à mɔ̀ í à sí i gbea ká.’ 22Kɛɛ à dàa e à gèe là yɛɓo‐kɛ‐mìà lɛ̀ɛ, ‘Kà nu gbàà‐wíì yiè kpó‐kpó ká, ká dà à mɔ̀ zá le. Kà ɓɔ́ɔ́ wàà à kɔ̀ mɔ̀, ɛ̃́ɛ̃́ zeĩ́ ká bàá wàà à gã̀ mɔ̀, 23e bɛ̀i, ká ló ká dìì nyɔ̀nɔ́ ɓó máàa zɛ̀ kṹ, ká à zɛ, ɛ̃́ɛ̃́ kɔ́á géli kɛ kpílì kɛɛ̀ ká. 24Ƃii m gbé e kéa, à gaà e kɛá. Kɛɛ lɛ gbaa ɓéèe. Ɛ́ɛ̃́ zeĩ́, à gíniì e kɛá. Kɛɛ maà à gɛ̃̀.’ O gbɛ̃̀ gbaa, wáà kpílìa kɛ̀.
25“Kɛɛ nɛ́fúa lìi dìè e kɛ nyɛ́nɛ̀ĩ̀a mɔ̀. Lɛ̀ e kɛ yɛ́pìà e zí, lɛ́ e ɓɔ o píé ká nɔ́ũ̀ kɔ̀ɛ́ɛ, e tã́‐ɓo wè wà tã́‐kɛ vĩ̀ o ma. 26E yɛɓo‐kɛ‐mìàa doó‐mì súo kɛ, áà à wɛ̃́ĩ́‐lɔ̀ɔ kɛ̀ kélɛ̀, ‘Mɛ́ e kɛ?’ 27Míáa a gèe à lɛ̀ɛ, ‘I lekè aà nu e mɛ̀ĩ́. Ɛ́ɛ̃́ i dàa aà dìì nyɔ̀nɔ́ ɓó máàa zɛ̀ɛ zɛ ɓii à gɛ̃̀ a ɓo zeĩ́, lɛ́ pɛ gbɛɛ kɛɛ̀ wá à mɔ̀ɔ mɔ́ɔ̀ wɔ̃̀ mɔ̀.’ 28Wɔ̃́ e nɛ́fúa lìi dìè wàa nyɔ́ɔ̀ɔ. Lɛ̀ɛ́ gbaa naa é ló káa wì. Lɛ̀ e kɛ kília, à dàa e gó kɛ́ì, áà kpé kã̀ à lɛ̀ɛ kɛ é wàà kɛ́ì. 29Kɛɛ nɛ́fúa a gèe e dàa lɛ̀ɛ, ‘Lɛ̀ gɛ̃̀, maà yɛɓo kɛ i mɔ̀ kɛ̀ɛ̀ búnùzɛ̀ píé. M̀ḿ i wéè tó do. Kɛɛ à kɛ́ m̀ ɓo kília, ìí ɓò nyɔ̀nɔ́ fèle nɔ do m lɛ̀ɛ, kɛ kò m ɓɛ́ĩ̀ kó kpílì kɛ à ká. 30Tó i gbe yé e ké, lɛ́ e ɓà pɔɔ̀ séĩ́ yí sìè nɛ́ĩ̀‐zɛ‐lòà mɔ̀ɔ, lɛ̀ e nua, tó ɓáà dìì nyɔ̀nɔ́ ɓó máàa zɛ̀ zɛ̀ à lɛ̀ɛ.’ 31À dàa a gèe à lɛ̀ɛ, ‘M gbe, i m píé zèe teele. Ɛ́ɛ̃́ pɛ séĩ́ lɛ́ lɛ m kɛ̀lɛ̀ɛ, lɛ ɓà pɛ ká. 32Kɛɛ lɛ ko mɔ̀ kó kpílì kɛ, tó ko gé áà lì. Ƃii i lekè e kéa gaà e kɛá. Kɛɛ lɛ ɓéèe gbaa. À gíniì e kɛá. Kɛɛ maà à gɛ̃̀ gbaa.’ ”
હાલમાં પસંદ કરેલ:
Lúù 15: MNT
Highlight
શેર કરો
નકલ કરો
Want to have your highlights saved across all your devices? Sign up or sign in
Mann New Testament © Bible Society in Liberia, 1978.
