Lúù 14
14
Zízɛ̀ e gɔ̃ kɔ̃́ṹ‐kɔ̃̀ũ̀ la
1Fĩ́ĩ́‐dɔ‐lùò doó káa, Zízɛ̀ e ló pɛ ɓèlè Fálásíì‐mìà kpànazɛ̀ dò píé kɛ́ì. Mia o kɛ o nyìɛ kɛpìà Zízɛ̀ mɔ̀. 2Lɛ̀ e kɛ kília, gɔ̃ lɛ́ à gã̀ wà à kɔ̀ nì fɔ̀ɔɔ̀ e kɛáa, e kɛ dɔ̀á Zízɛ̀ wɛlɛ mɔ̀. 3Zízɛ̀ e wɔ̃́ gèe, áà wɛ̃́ĩ́‐lɔ̀ɔ kɛ̀ Wálà là lɔ́ɔ̀ɔ dɔ‐mìà wà Fálásíì‐mìà kɛ̀lɛ̀ kélɛ̀, “Káà yí dɔ lɛ sɛ̀ kɛ ó mi la fĩ́ĩ́‐dɔ‐lùò ká, ɛ̃́ɛ̃́ ye wá sɛ̀?”
4Kɛɛ òó gbaa wɔ̃́ nɔ́ɔ fé dò gèe. Zízɛ̀ e gɔ̃́ɛɛ kṹ, e à la, e à vɔ gbaa. Gɔ̃́ɔ e là ló ɓo. 5Lɛ̀ e kɛ kília, a gèe o lɛ̀ɛ, “Yé míá ka kéa nɛ́ wà dìì aà kɛ ka kɛ̀lɛ̀, lɛ́ pɔɔ̀ e kéa dò aà dùò yíí‐gùlù yí fĩ́ĩ́‐dɔ‐lùò káa, ḿ gɔ̃̀, káà lo à ɓeíì nɔ́ zá le gùlù e kília yí fĩ́ĩ́‐dɔ‐lùò ká?”
6Kɛɛ bɛ̀i lɛ̀ɛ́ gbaa kɛ o mɔ̀ kɛ ó à wéè yí zṹ.
Zí mia wáá wɔ̃́ kɛɛ̀ à ká yé waà ló kpílì làa
7Zízɛ̀ e zi lɛ́ mia lɛ́ o o súo kɛ léɓèlè mɔ̀ɔ, o kɛ yàlà‐pìà yiè naapìà à káa gɛ̃̀. E à mɔ́ɔ̀ pĩ̀ã̀ e kéa vɔ ɓo o lɛ̀ɛ. Ye lɛ́ e kélɛ̀, 8“Yé mi dò aà i súo kɛ lee‐sí‐kpílì làa, yékɛ̀ í yà yàlà‐pìà yiè lɛ́ e yía mɔ̀. Lúó dò káa, mi dò lɛ́ lɛ kpànazɛ̀ é dieá i làa, o à súo kɛ nɔ́ kíli. 9Yé aà kɛ kília, mi lɛ́ e ka pèèlɛɛ ka súo kɛɛ, lɛ́ɛ̀ lo nuù, a gèe i lɛ̀ɛ, ‘Ì yàlà nɔ gɔ̃́ e kéa lɛ̀ɛ.’ Yé aà kɛ kília, yɛ́lɛ̀ lɛ́ɛ̀ lo kpɔ́ɔ̀ i là, tó ɓáà lò yàà mia mɛ̀ĩ́. 10À mɔ́ɔ̀ wɔ̃̀ mɔ̀ɔ, yé waà i súo kɛ kpílì làa, ì lo í yà mia mɛ̀ĩ́, kɛɛ mí e i súo kɛɛ é nu i píé, áà gèè, ‘M ɓɛ́ɛ, nu í ló yàà lɛ̀ kpànazɛ̀ mɔ̀.’ Wɔ̃́ e kéa lɛ́ɛ̀ lo nuù ɓɛ̀lɛyà ká i mɔ̀ mia lɛ́ kà ye nì ka yàá téɓò mɔ̀ɔ, o séĩ́ o wɛlɛ mɔ̀. 11Ƃii mia séĩ́ lɛ́ ò o dìè si lɛ̀ía, óò lo nuù o ká tã́ã̀. Ɛ́ɛ̃́ mia yé ò lo o dìè ká tã́ã̀a, óò lo o síì lɛ̀í.”
12Lɛ̀ e kɛ kília, Zízɛ̀ a gèe gɔ̃ lɛ́ e à súo kɛɛ lɛ̀ɛ, “Yé ɓaà mia súo kɛ làapíé léɓèlè wà nyɛ́ŋɛ̀ĩpíé léɓèlè mɔ̀ɔ, yékɛ̀ í i ɓɛ́ĩ̀, i lèe‐gé vɔ̀, i kɔ̀‐píé‐mìà ɛ̃́ɛ̃́ i yà‐sɔ́nɔ́‐mìà kpànazɛ̀ súo kɛ. Ƃii óò lo ɓi bɛ̃̀ɛ̃ i súo kɛɛ̀, tó wáà wɔ̃́ lɛ́ ɓa kɛ o lɛ̀ɛ, sɔ̃̀ɔ̃́ nɔ̀ i lɛ̀ɛ. 13Í kpílì kɛ̀áa, ì mia lɛ́ pɛ wá o kɛ̀lɛ̀, mia zùaàa zɛ̀, mia kpɔ́lɔ̀ɔ zɛ̀ ɛ̃́ɛ̃́ mia nyìɛ káàa zɛ̀ súo kɛ à là. 14Yé aà kɛ kília, lúà lɛ́ɛ̀ lo kpɔ́ɔ̀ i mɔ̀. Ƃii bɛ̀i wá o mɔ̀ kɛ ó wɔ̃́ ɓa kɛ o lɛ̀ɛ, sɔ̃̀ɔ̃́ nɔ. Wálà lɛ́ɛ̀ lo i fɔ́nɔ́ nɔɔ̀ yé mia kpeĩ waà wɛ̀lɛ̀ ga kɛ̀lɛ̀ɛ ká.”
Pĩ̀ã̀ lɛ́ à gbɛ̃̀ɛ̃̀ lɛ kpílì gbùò mɔ̀ɔ
(Máfìù 22.1-10)
15Gɔ̃à lɛ́ o kɛ yàá téɓòa mɔ̀ɔ, o doó‐mì e wɔ̃́ e kéa ma, áà gèè Zízɛ̀ lɛ̀ɛ, “Mia lɛ́ ò lo yàà téɓò mɔ̀ lɛ̀ lɛ́ Wálà tóò lɛ mia là yia mɔ̀ɔ, zò géli lɛ o kɛ̀lɛ̀.”
16Zízɛ̀ a gèe à lɛ̀ɛ, “E kɛ gɔ̃ doó lɛ́ e kɛ kpílì gbùò kɛpìàa ká. E mia búnùzɛ̀ súo kɛ kpílìa là. 17Lɛ̀ kpílìa káá‐lùò e ɓɔɔ, e nɛ́ vɔ mia lɛ́ aà o súo kɛɛ píé kélɛ̀, ‘Kà nu. Pɔɔ̀ séĩ́ pɛ̀ kɛɛ̀ lɛ à ká.’ 18Kɛɛ o séĩ́‐séĩ́ o gbɛ̃̀ gbaa, wáà o wúú ɓò yíí bà doó doó. O bèĩzɛ̀ a gèe vɔ‐mìa lɛ̀ɛ, ‘M nyɛ́nɛ̀ĩ̀ dò lɔ́. Lɛ m mɔ̀ ḿ ló à gɛ̃̀ɛ̃̀. Ƃà kpé lɛ sɛ̀, lúó wá m kɛ̀lɛ̀ kɛ ḿ nu yí.’ 19O dò bɛ̃̀ɛ̃ a gèe kélɛ̀, ‘Maà dìì vũ̀ doó lɔ́. M lópìà gbaa dɛɛ káa mɔ̀ o yí dã́pìà. Ƃà kpé lɛ sɛ̀, lúó wá m kɛ̀lɛ̀ kɛ ḿ nu yí.’ 20O dò bɛ̃̀ɛ̃ a gèe kélɛ̀, ‘M gó nɔ́ lee sípìà dɛɛ ká. Wɔ̃́ e kéa mɔ́ɔ̀ wɔ̃̀ mɔ̀ɔ, m̀ḿ bɛ̀i nuù yi.’ 21Lɛ̀ e kɛ kília, yɛɓo‐kɛ‐mìa e ló e mɛ̀ĩ́, e wɔ̃́ e kéa séĩ́ gèe e dàa‐mì lɛ̀ɛ. Lɛ̀ e kɛ kília, wɔ̃́ e ká e kília dàa‐mì wàa kpó‐kpó ɓo, áà gèè là yɛɓo‐kɛ‐mìa lɛ̀ɛ, ‘Ì lo bàlà ká zi ɓɛ̀lɛ̀ĩ̀‐fĩ̀ã̀, wà ká fĩ̀ã̀ píé pɛ́lɛɛ yí, í nu mia lɛ́ pɛ wá o kɛ̀lɛ̀, mia zùaàa zɛ̀, e bɛ̀i, mia nyìɛ káàa zɛ̀, ɛ̃́ɛ̃́ mia kpɔ́lɔ̀ɔ zɛ̀ nì ká.’ 22Lɛ̀ e kɛ kília, yɛɓo‐kɛ‐mìa a gèe kélɛ̀, ‘M dàa‐mì, wɔ̃́ ɓa gèe ḿ kɛɛ, à kɛɛ̀ lɛ. Kɛɛ yà‐pìà lɛ tĩã́ zèe.’ 23Lɛ̀ e kɛ kília, ká dàa‐mìa a gèe yɛɓo‐kɛ‐mìa lɛ̀ɛ, ‘Ì gó pɛ́lɛɛ yí, í ló zi gbùò ɛ̃́ɛ̃́ nyɛ́nɛ̀ĩ̀ zì nì píé, í à kɛ mia ó nu kɛ́ì zèe, kɛɛ m píé kɛ́ì é pa. 24Kà tó ḿ gèe ka lɛ̀ɛ, mia lɛ́ m o súo kɛ bèĩzɛ̀ kpílìa làa, o dò nɔ́ɔ fé lɛ̀ɛ́ ló m̀ léɓèlèa yíí dã́ã̀.’ ”
Zí ɓáá wɔ̃́ kɛɛ̀á kɛ í tó Zízɛ̀ píéa
(Máfìù 10.37-38)
25Zízɛ̀ wà mia kù gbùò zɛ̀ o kɛ lópìà. Zízɛ̀ e nìɛ̀ o píé, áà gèè o lɛ̀ɛ, 26“Mi lɛ́ è nu m píéa, lɛ̀ɛ́ bɛ̀i kɛɛ̀ tò‐m‐píé‐mì ká, yé à dàa wà à lòóò, ɛ̃́ɛ̃́ à na, e bɛ̀i là nɔ́ɔ̀, à lèe‐gé gɔ̃à zɛ̀ ɛ̃́ɛ̃́ à loà zɛ̀, é dàá e dìè‐tĩ́ bàa, yé o lɔ̀ lɛ̀ɛ́ nyɛ à mɔ̀ɔ ká. 27Mi lɛ́ lɛ̀ɛ́ e zì kɔ́lɔ́sì vũ, áà tòá m píéa, lɛ̀ɛ́ bɛ̀i kɛɛ̀ tò‐m‐píé‐mì ká. 28Yé ka dò aà naa é ká gbèkèni dò dɔɔ, lɛ́ɛ̀ yà tã́ã̀ nɛ́, tó e pɛlèe lɛ́ è lo lóò káa mɔ̀ɔ, yí gɔ̃́ nɛ́, kɛɛ é kɛ̀á pɛlèe a kɛ̀lɛ̀ɛ lɛ kpã́‐kpã̀ kɛ é káa nyɛɛ, kɛ á yí dɔ. 29É gɔ̃̀á kɛɛ̀ kília, yé aà nyɛ ká e kília gã̀‐gbɛ̃̀à‐là kpɔ́ɔ́ kṹũ̀ mɔ̀, tó bɛ̀i wá gbaa à mɔ̀ kɛ é nyɛ káa dìè dɔɔ̀ mɔ̀ɔ, mia séĩ́ lɛ́ waà wɔ̃́ e kéa kɛpìà gɛ̃̀ɛ, óò lo yéí síì à mɔ̀. 30Óò lo à gèeè kélɛ̀, ‘Gɔ̃́ e kéa e gbɛ̃̀ áà ká dɔ̀, kɛɛ lɛ̀ɛ́ bɛ̀i gbaa à líé nyɛɛ̀.’ 31Yé sɛ́lɛ́ líé‐sí‐mì dò aà ló mia wáá vũ̀ doó ká, kɛ ó gèlè gɔ̃ sɛ́lɛ́ líé‐sí‐mì, yé lɛ́ mia wáá vũ̀ pèèlɛ lɛ à kɛ̀lɛ̀ɛ ká, tó áà nù gèlè gbinìá mia yé o tóa mɔ̀ɔ, yé aà kɛ kília, sɛ́lɛ́ líé‐sí‐mì bèĩzɛ̀ɛ, lɛ́ɛ̀ lo yàà tã́ã̀, tó e e yɛ́lɛ́ táá é kɛ̀á o mɛ́ lɛ gágàa kɛ ó tĩã́ gèlè gɔ̃ɔ̃̀. 32Yé aà gɛ̃̀ lɛ́ à mɛ́ wá gágàa, lɛ́ɛ̀ lo nɛ́ vɔɔ̀ sɛ́lɛ́ líé‐sí‐mì yéa píé lɛ̀ lɛ tĩã́ gbèĩ à káa ká, kɛ ó à wɛ̃́ĩ́‐lɔ̀ɔ kɛ wɔ̃́ lɛ́ è lo nuù zò‐yà‐gé ká o fĩ̀ã̀a, kɛ á gèe o lɛ̀ɛ wà ye nì ó kɛ. 33À mɔ́ɔ̀ wɔ̃̀ mɔ̀ɔ, míá ka kéa, ka dò nɔ́ɔ fé lɛ̀ɛ́ bɛ̀i kɛɛ̀ tò‐m‐píé‐mì ká, yé lɛ̀ɛ́ e wè dà pɛ séĩ́ lɛ́ lɛ à kɛ̀lɛ̀ɛ lɛ̀ɛ ká.
Wèĩ lɛ́ à wèĩpìà wá à mɔ̀ɔ
(Máfìù 5.13; Máà 9.50)
34“Wèĩ lɛ sɛ̀. Kɛɛ yé aà e zì kɛ̀ nɛ́ĩ́‐nɛ̀ĩ̀‐kɔ̀ gínia, zi sùu kpɛɛ̀ lɛ́ è bɛ̀i à mɔ̀ é kɛá nɛ́ĩ́‐nɛ̀ĩ̀ zeĩ́? 35Ye wá bɛ̃̀ɛ̃ sɛ̀ sɛ́lɛ́ wɛ̃́ĩ̀, ɛ̃́ɛ̃́ ye wá bɛ̃̀ɛ̃ sɛ̀ à kɛ̀ dṹṹ ká wɛ̃́ĩ̀. Óò lo à dùò luú. Mi lɛ́ à tóó è wɔ̃́ maa, è e tóó dɔ.”
હાલમાં પસંદ કરેલ:
Lúù 14: MNT
Highlight
શેર કરો
નકલ કરો
Want to have your highlights saved across all your devices? Sign up or sign in
Mann New Testament © Bible Society in Liberia, 1978.
