Lúù 16
16
Gɔ̃ lɛ́ o wɔ̃́ kpɔ́ à kɔ̀ làa
1Zízɛ̀ a gèe là tòà‐píé‐mìà lɛ̀ɛ, “Gɔ̃ kpànazɛ̀ doó e kɛ ɓe. Gɔ̃́ e kília e là pɔɔ̀ séĩ́ kpɔ́ là yɛɓo‐kɛ‐mì doó kɔ̀ là. Mia dò o nu, wa gèe gɔ̃ kpànazɛ̀ɛ lɛ̀ɛ kélɛ̀, ‘Gɔ̃́ i ɓà pɔɔ̀ nɔ à lɛ̀ɛ, lɛ à yí sìèpìà.’ 2E à súo kɛ, áà gèè à lɛ̀ɛ, ‘Wɔ̃́ lɛ́ m̀ ma i gbĩ mɔ̀ɔ, à kɛ‐kɔ̀ lɛ kpɛ? Pɔɔ̀ lɛ́ maà à nɔ i lɛ̀ɛ, ì nu wɔ̃́ lɛ́ ɓaà kɛ à káa gèe. Ƃii m̀ḿ bɛ̀i à mɔ̀ gbaa kɛ ḿ m̀ wɔ̃́ nɔ́ɔ fé dò kpɔ́ gbaa i kɔ̀ là.’ 3Gɔ̃́ɛɛ a gèe e dìè píé kélɛ̀, M dàa‐mì lɛ lópìà m̀ yɛɓo ɓoò m kɛ̀lɛ̀. Ḿm̀ lo à kɛɛ̀ kpɛ? M mɛ́ wá gágà kɛ ḿ gùlù fòo. Ɛ́ɛ̃́ yɛ́lɛ̀ lɛ́ɛ̀ m kɛ̀ kɛ ḿ pɛ pɛ̃́. 4Ɛ̀ɛ̀. Wɔ̃́ m̀ lo à kɛɛ̀ɛ, ḿm̀ à dɔ. Yé aà kɛ kíli, lɛ́ m̀ yɛɓo aà gó m kɛ̀lɛ̀ɛ, míáa óò lo o kɔ̀ yàà m wì o píé kɛ́ì.’ 5Lɛ̀ e kɛ kília, e mia séĩ́ lɛ́ à dàa‐mì là kèle e kɛ o mɔ̀ɔ súo kɛ. A gèe à bèĩzɛ̀ɛ lɛ̀ɛ, ‘M dàa‐mì là wɛ̀ɛɛ̀ lɛ́ à kèlè lɛ i mɔ̀?’ 6Gɔ̃́ɛɛ a gèe kélɛ̀, ‘Là pɛ́ à kèlè lɛ m mɔ̀ɔ, lɛ́ e nyɔ́nɔ́ kòó wũ doó káa.’ Yɛɓo‐kɛ‐mìa a gèe à lɛ̀ɛ, ‘Kèle lɛ́ lɛ i mɔ̀ɔ, à kii gɛ̃̀ e ké. Ì yà tã́ã̀ dɛɛ ká, í kii bɛ̃̀ɛ̃ kélɛ̀ kòó vũ̀ sɔ́ɔ́li.’ 7A gèe zeĩ́ mi dò bɛ̃̀ɛ̃ lɛ̀ɛ kélɛ̀, ‘Ƃi bɛ̃̀ɛ̃, m dàa‐mì là mɛ́ à kèlè lɛ i mɔ̀?’ Gɔ̃́ɛɛ a gèe kélɛ̀, ‘I dàa‐mì là ɓu ɓɔ̀ɔ́ wáá doó lɛ́ à kèlè lɛ m mɔ̀ɔ.’ Yɛɓo‐kɛ‐mìa a gèe à lɛ̀ɛ, ‘Kèle lɛ́ lɛ i mɔ̀ɔ, à kii gɛ̃̀ e ké. Ì à bɛ̃̀ɛ̃ à yí kélɛ̀, ɓɔ̀ɔ́ wũ sálàka.’ 8Yɛɓo‐kɛ‐mì lɛ́ e ké, lɛ́ lɛ̀ɛ́ gbaa wɔ̃́ kɛ kpeĩa, à dàa‐mì a tɛ̀nɛ gíkã́‐wɔ̃̀ yé a kɛɛ mɔ́ɔ̀ wɔ̃̀ mɔ̀. Ƃii mia lɛ́ o kpóṹ là zèea, óò wɔ̃́ kɛ̀ gíkã́ ká o ɓɛ́ĩ̀ nì lɛ̀ɛ, é dieá mia lɛ́ o lɛ̀ fɔ̀nɔɔ̀ɔ yía là.
9“À mɔ́ɔ̀ wɔ̃̀ mɔ̀ɔ, ḿm̀ gèe ka lɛ̀ɛ, kà kpóṹ là zèe dɔ‐pɔ̀ɔ̀ sí, ká ɓɛ́ɛ là kṹ à ká ka dìè lɛ̀ɛ, kɛɛ yé kaà kɔ̃́ gbaa pɛ́ e kília káa, kɛɛ ó o kɔ̀ yà ka wì lɛ̀ lɛ́ e mia kɛpìà ká tòá kíli káa mɔ̀. 10Mi lɛ́ lɛ zò‐dɔ̀à‐mɔ̀ zɛ̀ mɛ́ĩ́ nyɔ̀nɔ́ ɓoò yía, lɛ́ɛ̀ lo kɛɛ̀ zò‐dɔ̀à‐mɔ̀ zɛ̀ à gbùò bɛ̃̀ɛ̃ yí nɔ́ kíli. Mi lɛ́ lɛ̀ɛ́ wɔ̃́ nyɔ̀nɔ́ kɛ kpeĩa, lɛ̀ɛ́ ló à gbùò bɛ̃̀ɛ̃ kɛɛ̀ kpeĩ nɔ́ kíli. 11Yé mɔṹ ìí kɛ do zò‐dɔ̀à‐mɔ̀ zɛ̀ kpóṹ là zèe dɔ‐pɔ̀ɔ̀ mɔ́ɔ̀ wɔ̃̀ mɔ̀ɔ, zi sùu kpɛɛ̀ lɛ́ ò bɛ̀i à mɔ̀ ó o zò dɔ̀á i mɔ̀ dɔ‐pɔ̀ɔ̀ wánà zɛ̀ mɔ́ɔ̀ wɔ̃̀ ká? 12Ɛ́ɛ̃́ yé ìí kɛ do zò‐dɔ̀à‐mɔ̀ zɛ̀ mi gbɛɛ là pɛ mɔ́ɔ̀ wɔ̃̀ mɔ̀ɔ, dé è lo pɛ́ e ɓà pɛ káa, nɔɔ̀ i lɛ̀ɛ?
13“Yɛɓo‐kɛ‐mì nɔ́ɔ fé lɛ̀ɛ́ bɛ̀i kɛɛ̀ lùò ká mia wũ‐là‐mìà pèèlɛ lɛ̀ɛ e kíe ká. É kɛ̀á kília, mi doó‐mì lɔ̀ lɛ́ɛ̀ lo nyɛɛ̀ à mɔ̀, tó mi doó‐mì lɔ̀ áà kpɔ̀ à mɔ̀. Lɛ́ɛ̀ lo kɛɛ̀ wánà zɛ̀ mi doó lɛ̀ɛ, tó à nyìɛ e fɔ̃́ mi yé e tóa yí. Ìí bɛ̀i kɛɛ̀ Wálà là lùò ká, tó ɓáà kɛ̀ zeĩ́ pɛlèe là lùò ká.”
Wɔ̃́ dò lɛ́ Zízɛ̀ a gèea
(Máfìù 11.12-13; 5.31-32; Máà 10.11-12)
14Fálásíì‐mìà o wɔ̃́ e kéa séĩ́ ma. O gbɛ̃̀, wáà yéí sì Zízɛ̀ mɔ̀, ɓii pɛlèe lɔ̀ kpɔ́ɔ̀ e kɛá o mɔ̀. 15Zízɛ̀ a gèe o lɛ̀ɛ, “Ka lɛ́ ka mia lɛ́ ò o dìè kɛ̀ kpeĩ mia nyìɛ mɔ̀ɔ káa. Kɛɛ Wálà lɛ́ɛ̀ ka zò píé gɛ̃̀. Ƃii pɛ lɛ́ mia ò gɛ̃̀ pɛ kpànazɛ̀ káa, lɛ pɛ yɔɔ ká Wálà lɛ̀ɛ.
16“Móózè là Lɔ́ɔ̀ɔ ɛ̃́ɛ̃́ dɔ̀‐Wálà‐lé‐là‐mìà nì wà kíía, o kɛ tĩã́ yɛɓo kɛpìà lɛ̀ lɛ́ Zɔ̃̀ɔ̃́ e nua ká. É kã́ lúó e kília mɔ̀ɔ, o wɔ̃́ làṹ yiè, lɛ́ à gbɛ̃̀ɛ̃̀ lɛ Wálà zì tò‐mia‐là mɔ̀ɔ, o à gèepìà. Ɛ́ɛ̃́ mia séĩ́ óò à kɛ‐zì nàà mɛ́ gágà zɛ̀, tó wáà ɓɔ̀ yi. 17Kɛɛ Lɔ́ɔ̀ɔ pɛ̃́ɛ̃́ ɓéĩ́ kɛ̀ wɔ̃́ dà tã́ã̀ zɛ̀ ká lɛ gágà, é dieá lɛ̀í wà kpóṹ là zèe o die‐wɔ̃̀ là.
18“Gɔ̃ nɔ́ɔ fé lɛ́ è e na ɓo luú, tó áà lee gbɛɛ sìa, é kɛ̀á kília, kɛɛ aà sɔ̃̀ɔ̃ yɔɔ kɛ. Ɛ́ɛ̃́ gɔ̃ lɛ́ è lee ɓò luú zɛ̀ɛ sia, kɛɛ aà kɛ sɔ̃̀ɔ̃ yɔɔ kɛ‐mì ká nɔ́ kíli.
Gɔ̃ kpànazɛ̀ wà Lázàlɛ̀
19“E kɛ gɔ̃ kpànazɛ̀ dò ká. E kɛ e mɛ́ sípìà sɔ sɔ̃̀ɔ̃́ gbùò zɛ̀ ká. E kɛ kpílì kɛpìà lúó séĩ́ ká. 20Ɛ́ɛ̃́ zeĩ́, gɔ̃ yéĩ̀zɛ̀ dò e kɛ yí, wáà sì Lázàlɛ̀. Ƃa‐yàà e kɛ gɔ̃́ e kília kɛpìà. O kɛ nupìà à ká, tó wáà à wɔ̀ɔ̀ gɔ̃ kpànazɛ̀ɛ là ká lé mɔ̀. 21E kɛ à naapìà kɛ é léɓèlè pɔ̀nɔ́, lɛ́ è go gɔ̃ kpànazɛ̀ɛ là téɓòa làa, á ɓèlè, kɛ à gí é dɔ. Ɛ́ɛ̃́ gbã́ vɔ̀ o kɛ nupìà, wáà là ɓáa yíà pàà. 22Gɔ̃ yéĩ̀zɛ̀ e kília e ga. Wálà là vɔ‐mìà o à sí, o ló à ká Éɓɔ́lɔ́hã́ã̀ sɔ́nɔ́. Gɔ̃ kpànazɛ̀ɛ e ga, wa bĩ̀ĩ̀. 23Gɔ̃́ e kília, lɛ̀ wàa e kɛ à mɔ̀ lɛ̀ lɛ́ ò si Hédìa mɔ̀. E lɛ̀ gɛ̃̀ lɛ̀í, é Éɓɔ́lɔ́hã́ã̀ gɛ̃̀ yàá lɛ̀í gbèkèni. Lázàlɛ̀ e kɛ yàá à sɔ́nɔ́. 24Lɛ̀ e kɛ kília, gɔ̃́ɔ e gbɛ́ɛ́ weeá kélɛ̀, ‘M dàa Éɓɔ́lɔ́hã́ã̀, m yéĩ́ è i kɛ, í Lázàlɛ̀ vɔ, é e kɔ̀ wɛ́nɛ́ doó yɛ́ yíí bà, é nu á gbɛ̃̀ m nanà là, kɛ é lìè‐lie. Ƃii m lɛ̀ wàa kpó‐kpó yí tíé e kéa yí.’ 25Kɛɛ Éɓɔ́lɔ́hã́ã̀ a gèe à lɛ̀ɛ, ‘M̀ nɛ́, ì à yí dɔ kélɛ̀ i zì kɛ̀ɓe làa, i kɛ pɔɔ̀ yiè yiè sɔ̀lɔ̀ ɓopìà, lɛ̀ lɛ́ Lázàlɛ̀ e kɛ wɔ̃́ nyɔ́ɔ̀ɔ nyɔ́ɔ̀ɔ gɛ̃̀pìàa ká. Kɛɛ dɛɛ káa, à zò dàà lɛ gbaa lɛ̀ e kéa mɔ̀, lɛ̀ i kóló lɛ ɓopìàa ká. 26É kã́ wɔ̃́ nì e kília mɔ̀ɔ, gùlù gbèkèni dò lɛ kɔ̀à ɓi nì kɔa fĩ̀ã̀, kɛ mia lɛ́ ò nàà ó gó zèe, kɛ ó nu ka píéa, kɛ é o tèá. Ɛ́ɛ̃́ zeĩ́, mi dò bɛ̃̀ɛ̃ lɛ̀ɛ́ bɛ̀i góò ka bɛ̃̀ɛ̃ ka píé, kɛ é nu ko píé.’ 27Gɔ̃ kpànazɛ̀ɛ a gèe kélɛ̀, ‘Yé lɛ kília, m dàa, ɓà kpé lɛ sɛ̀, ì Lázàlɛ̀ vɔ m dàa píé kɛ́ì. 28M lèe‐gé gɔ̃à zɛ̀ sɔ́ɔ́li o yí. È lo, é lìè‐wè dɔ o lɛ̀ɛ, yékɛ̀ o bɛ̃̀ɛ̃ ó nu lɛ̀ lɛ́ mia kóló è ɓo yí e kéa mɔ̀.’ 29Éɓɔ́lɔ́hã́ã̀ a gèe à lɛ̀ɛ, ‘Móózè wà dɔ̀‐Wálà‐lé‐là‐mìà o o píé yi. Tó i lèe‐gé vɔ̀ɔ ó o tóó dɔ wɔ̃́ lɛ́ ò gèea mɔ̀.’ 30Gɔ̃́ɛɛ a gèe kélɛ̀, ‘M dàa Éɓɔ́lɔ́hã́ã̀, gbàaò. È kɛ̀á mi dò e wɛ̀lɛ̀ ga kɛ̀lɛ̀, lɛ́ e ló o píéa, lɛ́ wáá o sɔ̃̀ɔ̃ yɔɔ mɛ́ vɔ̀ɔɔ̀ɔ.’ 31Kɛɛ Éɓɔ́lɔ́hã́ã̀ a gèe, ‘Yé òó o tóó dɔ Móózè wà dɔ̀‐Wálà‐lé‐là‐mìàa o mɔ̀ɔ, òó ló wéè mi wéè mɔ̀, yé bɛ̃̀ɛ̃ mi é wɛ̀lɛ̀ ga kɛ̀lɛ̀ɛ ká.’ ”
હાલમાં પસંદ કરેલ:
Lúù 16: MNT
Highlight
શેર કરો
નકલ કરો
Want to have your highlights saved across all your devices? Sign up or sign in
Mann New Testament © Bible Society in Liberia, 1978.
