Lúù 11
11
Zízɛ̀ e pɛ zɔ̃̀ɔ̃̀ é gbɛ̃̀á sɛ̀nɛ‐ɓo wɔ̃̀ mɔ̀
(Máfìù 6.9-13; 7.7-11)
1Lúó doó káa, Zízɛ̀ e kɛ sɛ̀nɛ ɓopìà lɛ̀ dò mɔ̀. Lɛ̀ e nyɛɛ, là tòà‐píé‐mìàa doó‐mì a gèe à lɛ̀ɛ, “Ko Dàa‐mì, zí ò sɛ̀nɛ ɓo à káa, ì à zɔ̃̀ɔ̃̀ ko lɛ̀ɛ, zí nɔ́ Zɔ̃̀ɔ̃́ e à zɔ̃̀ɔ̃̀ à ká e zì tòà‐píé‐mìà lɛ̀ɛ ká.”
2Zízɛ̀ a gèe o lɛ̀ɛ, “Wɔ̃́ lɛ́ lɛ ka mɔ̀ ká gèe yé kaà kɛ sɛ̀nɛ ɓopìàa káa, gɛ̃̀ e ké.
‘Ko Dàa, i tɔ́ è kɛ tɔ́ lɛ́ lɛ mia séĩ́ lɛ̀ɛ tɔ́ yiè káa ká.
I zì tò‐mia‐là è nu.
3Ì léɓèlè lɛ́ lɛ ko mɔ̀ kó sɔ̀lɔ̀ ɓo lúó doó doó káa, nɔ ko lɛ̀ɛ.
4Ì kã́ ko kɛ‐wɔ̃̀ yɔɔ mɔ̀ ɓá káá tã́ã̀.
Ƃii kóò kã mia séĩ́ lɛ́ ò wɔ̃́ yɔɔ kɛ̀ ko káa, kɛ‐wɔ̃̀ mɔ̀, kɔ́áà kàà tã́ã̀.
Yékɛ̀ í nu ko ká lɛ̀ lɛ́ mia yí‐dã́‐wɔ̃̀ lɛ yía mɔ̀.’ ”
5Zízɛ̀ a gèe là tòà‐píé‐mìà lɛ̀ɛ, “Lúó dò káa, ka dò lɛ́ɛ̀ lo lóò e ɓɛ́ɛ‐mì píé kɛ́ì bĩ́míà zèí, áà gèè e ɓɛ́ɛ lɛ̀ɛ, ‘M ɓɛ́ɛ, belè‐kpo yààka kèlè dɔ m mɔ̀èé. 6M ɓɛ́ɛ lɛ́ lɛ táá mɔ̀ɔ, e nu nɔ́ m píé kɛ́ì dɛɛ ká. Ɛ́ɛ̃́ pɛ gbɛɛ wá ma bɛ̃̀ɛ̃ m kɛ̀lɛ̀ kɛ ḿ lé naa à ká.’ 7I ɓɛ́ɛ lɛ́ɛ̀ lo tóò kɛ́ì, e i wéè yí zṹ kélɛ̀, ‘Yékɛ̀ í m yí gíni. Káa lé taà lɛ. Ɛ́ɛ̃́ kò m̀ nɔ́ɔ̀ nì kɔaà wɔɔ gbaa tã́ã̀. M̀ḿ bɛ̀i wɛ̀lɛ̀ kɛ ḿ pɛ nɔ́ɔ fé dò nɔ i lɛ̀ɛ.’ 8Ḿm̀ à gèe ka lɛ̀ɛ, yé bɛ̃̀ɛ̃ lɛ̀ɛ́ ló wɛ̀lɛ̀ kɛ é i gba belè ká à kɛ̀ i ɓɛ́ɛ ká mɔ́ɔ̀ wɔ̃̀ mɔ̀ɔ, é kɛ bɛ̃̀ɛ̃ kília, lɛ́ɛ̀ lo wɛ̀lɛ̀ tó e pɛ séĩ́ lɛ́ ɓà pɛ̃ɛ nɔ i lɛ̀ɛ, ɓii yɛ́lɛ̀ lɛ̀ɛ́ i kɛ lò i líé pɛ́ɛ pɛ̃́ɛ̃̀ káa mɔ́ɔ̀ wɔ̃̀ mɔ̀. 9À mɔ́ɔ̀ wɔ̃̀ mɔ̀ɔ, ḿm̀ à gèe ka lɛ̀ɛ, kà pɛ pɛ̃́. Ká kɛ̀á kília, káà lo à sɔ̀lɔ̀ ɓoò. Kà pɛ naa, káà lo pɛ gɛ̃̀ɛ̃̀ yé kaà kɛ kília ká. Kà ká lé mɛ̀. Ká kɛ̀á kília, à lé lɛ́ɛ̀ lo ɓoò ka lɛ̀ɛ. 10Ƃii mi nɔ́ɔ fé lɛ́ è pɛ pɛ̃ɛ, lɛ́ɛ̀ lo pɛ sɔ̀lɔ̀ ɓoò. Ɛ́ɛ̃́ mí è pɛ nààa, lɛ́ɛ̀ lo pɛ gɛ̃̀ɛ̃̀. Ɛ́ɛ̃́ ká lé lɛ́ɛ̀ lo ɓoò mí à lé mɛ̀ɛ lɛ̀ɛ. 11Mia lɛ́ ka nɛ́ dàa nì káa, ka dò lɛ́ɛ̀ lo mɛ̀nɛ nɔɔ̀ là nɛ́ lɛ̀ɛ, yé là nɛ́ aà kpã̀ã́ pɛ̃́ à mɔ̀ɔ ká? 12Ɛ́ɛ̃́ lɛ́ɛ̀ lo zɛ̃̀ĩ̀yɛ̀lɛ̀ nɔɔ̀ là nɛ́ lɛ̀ɛ, yé aà tɔ̀ɔ̀ nyàà pɛ̃́ɛ ká? 13Lɛ̀ zí bɛ̃̀ɛ̃ ka kɛ‐pɛ̀ lɛ à ká yɔɔ, káà pɛ yiè nɔ̀ kà nɔ́ɔ̀ lɛ̀ɛ zì dɔ. Zi sùu kpɛɛ̀ lɛ́ mia Dàa lɛ́ lɛ lɛ̀ía, è lo Gɛ̀ɛ̀ Púlú nɔɔ̀ à ká mia lɛ́ ò à pɛ̃ à mɔ̀ɔ lɛ̀ɛ ké?”
Zízɛ̀ wà Bìɔ́sébà
(Máfìù 12.22-30; Máà 3.20-27)
14Zízɛ̀ e kɛ pɛ yɔɔ lɛ́ lɛ̀ɛ́ wééa, ɓopìà mi dò píé. Lɛ̀ pɛ yɔɔ e gó gɔ̃́ɛɛ píéa, gɔ̃́ɛɛ e gbɛ̃̀ gbaa, áà wèè. Mia gbũ lɛ́ e kɛ yía, o lé e pa. 15Kɛɛ o dò bɛ̃̀ɛ̃ wa gèe, “Bìɔ́sébà, lɛ́ e pɛ yɔɔ vɔ̀ zì dɔ‐mì káa, lɛ́ e yíkɛ̀ gáàa nɔ à lɛ̀ɛ, kɛ é pɛ yɔɔ ɓoá mia píéa.”
16Kɛɛ o dò bɛ̃̀ɛ̃ wa naa ó à yí dã́. À mɔ́ɔ̀ wɔ̃̀ mɔ̀ɔ, wa gèe à lɛ̀ɛ é lé‐pa‐wɔ̃̀ kɛ, kɛ á zɔ̃̀ɔ̃̀ kélɛ̀ à zì yíkɛ̀ gáàa lɛ́ɛ̀ go Wálà kɛ̀lɛ̀ lɛ̀í. 17Kɛɛ Zízɛ̀ e o zì yɛ́lɛ́‐tàà‐yí‐wɔ̃̀ dɔ, áà gèè o lɛ̀ɛ, “Sɛ́lɛ́ nɔ́ɔ fé lɛ́ è e dìè yí gìnì, tó wáà gèlè gɔ̃̀ o kíe káa, à yí lɛ́ɛ̀ lo sìè pɛ́lɛ̀. Ɛ́ɛ̃́ yé ká doó wì‐mìà waà gó o kíe nì píé, wáà gèlè gɔ̃̀ o kíe nì káa, ká e kília lɛ́ɛ̀ lo wíì tã́ã̀. 18À mɔ́ɔ̀ wɔ̃̀ mɔ̀ɔ, yé Sétɔ̃̀ là mia nì yí gìniì aà kɛá, tó wáà gèlè gɔ̃̀ o kíe nì káa, zi sùu kpɛɛ̀ lɛ́ à zì tò‐mia‐là è bɛ̀i à mɔ̀ é kɛá ɓe fɛ̃̀ɛ̃̀? Káà à gèe kélɛ̀ ḿm̀ pɛ yɔɔ ɓo mia píé, ɓii Bìɔ́sébà e yíkɛ̀ gáàa nɔ m lɛ̀ɛ mɔ́ɔ̀ wɔ̃̀ mɔ̀. 19É kɛ̀á zí m̀ pɛ yɔɔ ɓoá mia píéa lɛ́ɛ, ka bɛ̃̀ɛ̃, ka mìà nì óò ɓo mia píé kpɛ? O lɛ́ nɔ́ ò lo mɛ́ĩ́ káà ka wĩĩ́a. 20Kɛɛ é kɛ̀á lɛ Wálà zì yíkɛ̀ gáàa ká lɛ́ m̀ pɛ yɔɔ ɓoá mia píéa, kɛɛ Wálà zì tò‐mia‐là aà nu ka là.
21“Yé gɔ̃ yí gágà zɛ̀ aà là gèlè‐gɔ̃‐pɔ̀ɔ̀ séĩ́ pɛ̀ kɛ, áà e nyìɛ kɛ̀á e dìè là ká mɔ̀ɔ, à píé kɛ́ì pɔ̀ɔ̀ séĩ́ dò nɔ́ɔ fé lɛ̀ɛ́ ló ɓoò à píé. 22Kɛɛ yé gɔ̃ lɛ́ à mɛ́ lɛ gágà, é dieá làa, aà gèlè gbini à mɔ̀, lɛ́ à kɔ̀ aà die à làa, lɛ́ɛ̀ lo lóò gɔ̃́ɔ là gèlè‐gɔ̃‐pɔ̀ɔ̀ lɛ́ à zò e kɛ à mɔ̀ɔ ká, tó e pɔɔ̀ lɛ́ a kã̀ã ɓoa, yí gìnì mia mɔ̀.
23“Mi lɛ́ ye wá m̀ mi káa, lɛ gèlè‐gɔ̃̀‐m‐ká mì ká. Ɛ́ɛ̃́ mi lɛ́ lɛ̀ɛ́ gbũ m mɔ̀ pɛ pà‐kíe‐mɔ̀ pìàa, lɛ pɛ kã̀‐e‐kíe‐mɔ̀ mì ká.
Pɛ yɔɔ e yɛ́ e zí
(Máfìù 12.43-45)
24“Yé pɛ yɔɔ aà gó mi píéa, lɛ́ɛ̀ lo dìèá sí sɛ́lɛ́ lɛ́ yíí wá à yía là, áà lɛ̀ nàà é e fĩ́ĩ́ dɔ yí. Yé lɛ̀ɛ́ e fĩ́ĩ́‐dɔ‐pìà gɛ̃̀ɛ, láà gèe e dìè lɛ̀ɛ, ‘Ḿm̀ lo lóò m mɛ̀ĩ́ m̀ ká lɛ́ m gó à wìa wì.’ 25Yé aà kɛ kília, lɛ́ɛ̀ yɛ e zí, tó e ló ká lɛ́ e kɛ à wìa gɛ̃̀ɛ̃̀ e wì gòloòo zɛ̀ wà e wì pɛ̀ kɛɛ̀ɛ zɛ̀ ká. 26Tó zeĩ́, e ɓɔ pɛlɛí, e ló, tó e nu pɛ yɔɔ vɔ̀ sálápèèlɛ, lɛ́ o yɔɔ ó dieá à làa ká. Tó o nu, ó kɛ à lɛ̀ mɔ̀. Yé aà kɛ kília, zi lɛ́ gɔ̃́ e kília lɛ à ká gbaa, lɛ dóo yɔɔ, é dieá zí e kɛá bèĩzɛ̀ɛ là.”
Géli wánà zɛ̀
27Lɛ̀ Zízɛ̀ e nyɛ wɔ̃́ e kéa gèeè mɔ̀ɔ, lee dò lɛ́ e kɛ míá o kília o bàa, e e wè wɛ̀lɛ̀ lɛ̀í, áà gèè Zízɛ̀ lɛ̀ɛ, “Lee lɛ́ e i ye, lɛ́ e nyɔ́ dɔ i léa, zò géli lɛ à kɛ̀lɛ̀.”
28Kɛɛ Zízɛ̀ a gèe kélɛ̀, “Wɔ̃́ ɓáá gèeèa, ye lɛ́ e kélɛ̀, mia lɛ́ ò Wálà lé‐wè ma, wáà à kɛ̀ɛ, zò géli lɛ o kɛ̀lɛ̀.”
Mia wa naa ó lé‐pa‐wɔ̃̀ gɛ̃̀
(Máfìù 12.38-42)
29Lɛ̀ mia o o gbũ dɔ gbaa Zízɛ̀ mɔ̀ɔ, Zízɛ̀ e kɛ nɔ́ tĩã́ à gèepìà kélɛ̀, “Mia lɛ́ o ɓe yà kɔa ɓoa yía, o sɔ̃̀ɔ̃ wá sɛ̀. Óò nàà ó lé‐pa‐wɔ̃̀ gɛ̃̀, kɛɛ lé‐pa‐wɔ̃̀ gbɛɛ lɛ̀ɛ́ ló kɛɛ̀ ɓe o lɛ̀ɛ, é kã́ Zónà zìa mɔ̀ɔ ká. 30Zi nɔ́ doó lɛ́ Zónà e kɛá wɔ̃́ gɔ̃̀á ká Nínívɛ̀‐mìà lɛ̀ɛ, lɛ́ Mi Gbe è lo kɛɛ̀á wɔ̃́ gɔ̃̀á ká mia lɛ́ o ɓe yà kɔa ɓoa yía lɛ̀ɛ. 31Lúó lɛ́ ò lo mɛ̀ĩ́‐sà dɔɔ̀á mia mɔ̀ɔ, sɛ́lɛ́ líé‐sí‐lèè lɛ́ e gó mɔ́ sɛ́lɛ́ lɛ́ e sɛ́lɛ́ e kéa gã̀ bèía yía, lɛ́ɛ̀ lo dɔɔ̀ e gã̀ mɔ̀, tó áà mɛ̀ĩ́‐sà kàà míá o ɓe yà kɔa ɓoa yía wĩĩ́. Ƃii à góò e kɛá sɛ́lɛ́ yí gbèkèni, kɛ é e tóó dɔ Sɔ́lómɔ̀ zì gíkã́‐wèa mɔ̀. À mɛ̀nɛ̀ kè, pɛ dò lɛ́ lɛ dóo kpànazɛ̀, é dieá Sɔ́lómɔ̀ làa, lɛ zèe. 32Lúó lɛ́ ò lo mɛ̀ĩ́‐sà dɔɔ̀á mia mɔ̀ɔ, mia lɛ́ ò go Nínívɛ̀ɛ, óò lo dɔɔ̀ o gã̀ mɔ̀, tó wáà mɛ̀ĩ́‐sà kàà ka wĩĩ́. Ƃii lɛ̀ lɛ́ Zónà e Wálà lé‐wè gèe o lɛ̀ɛ, o o sɔ̃̀ɔ̃ yɔɔ mɛ́ vɔ̀ɔ. À mɛ̀nɛ̀ kè, pɛ dò lɛ́ lɛ dóo kpànazɛ̀, é dieá Zónà làa, lɛ zèe.
Lɛ̀‐fɔ̀nɔ‐kɔ̀ lɛ́ lɛ gbĩ‐kpàla wɛ̃́ĩ̀a
(Máfìù 5.15; 6.22-23)
33“Mi gbɛɛ lɛ̀ɛ́ nábò dɔ, kɛ é à bĩ̀ĩ̀, ɛ̃́ɛ̃́ kɛ bɛ̃̀ɛ̃ é páni gbini à là. Kɛɛ lɛ́ɛ̀ à yà nábò yàà‐là‐pɛ̀ là, kɛ mia ó wàá kɛ́ìa, kɛɛ ó wàà lɛ̀‐fɔ̀nɔɔ̀ɔ bà. 34I nyìɛ lɛ nábò ká i gbĩ‐kpàla mɔ́ɔ̀ wɔ̃̀ mɔ̀. Yé i nyìɛ lɛ zéĩ́‐zèĩ̀a, i gbĩ‐kpàla lɛ̀ séĩ́ paà lɛ lɛ̀‐fɔ̀nɔɔ̀ɔ ká. Kɛɛ yé i nyìɛ lɛ ɓílí‐ɓìlìa, i gbĩ‐kpàla lɛ̀ séĩ́ lɛ bĩ́ bà. 35À mɔ́ɔ̀ wɔ̃̀ mɔ̀ɔ, ì i yɛ́lɛ́ kɛ i dìè píé, yékɛ̀ lɛ̀‐fɔ̀nɔ‐kɔ̀ lɛ́ e i yía, é kɛ tii. 36Yé lɛ̀ aà fɔ̀nɔ i gbĩ‐kpàla lɛ̀ séĩ́ bà, tó à lɛ̀ gbɛɛ wá e bĩ́ bàa, à lɛ̀ séĩ́ lɛ́ɛ̀ lo kɛɛ̀ e fɔ̀nɔɔ̀ɔ zɛ̀ ká, lɛ̀ zí nábò è lɛ̀ fɔ̀nɔ à ká mi bàa lɛ́ ɓe.”
Zízɛ̀ e wɔ̃́ gèe Fálásíì‐mìà ɛ̃́ɛ̃́ Wálà là lɔ́ɔ̀ɔ dɔ‐mìà gbĩ mɔ̀
(Máfìù 23.1-36; Máà 12.38-40)
37Lɛ̀ Zízɛ̀ e nyɛ wɔ̃́ e kéa gèeè mɔ̀ɔ, Fálásíì mi doó e à súo kɛ léɓèlè mɔ̀. Zízɛ̀ e wàà gbaa kɛ́ì, e yà tã́ã̀ kɛ ó pɛ ɓèlè. 38Fálásíì mia lé paà e kɛá lɛ̀ lɛ́ a gɛ̃̀, lɛ́ Zízɛ̀ lɛ̀ɛ́ gbaa e kɔ̀ pɛ́lɛ́ kɛ é tĩã́ pɛ ɓèlèa ká. 39Yé e kɛ kília, ko Dàa‐mì a gèe à lɛ̀ɛ, “Míá ka Fálásíì‐mìà ká ɓɛ. Káà kɔ́pò wà páni o gbĩ mɛ́ pɛ̀lɛ̀. Kɛɛ ka yee, ka yí zàá paà lɛ wɔ̃́ gana zɛ̀ wà wɔ̃́ yɔɔ kɛɛ̀ ká. 40Ka mia yí gíniìa zɛ̀ ká. Ḿ gɔ̃̀, Wálà nɔ́ e pɛ gbĩ mɔ̀ kɛɛ, lɛ́ e à yí kɛɛ? 41Kɛɛ kà pɛ lɛ́ e kà kɔ́pò wà páni nìa o yía, nɔ mia yéĩ̀zɛ̀ lɛ̀ɛ. Ká kɛ̀á kília, pɛ séĩ́ mɛ́ lɛ́ɛ̀ lo kɛɛ̀ e ɓɔɔ̀ɔ zɛ̀ ká ka lɛ̀ɛ.
42“Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká Fálásíì‐mìà ka ká ké. Káà kà ɓòo‐yíí‐ɓɔ pɔ̀ɔ̀, lɛ́ e kélɛ̀ ɓèlè‐wèĩ̀ wà zɛ̃́ɛ̃́‐wɛ́lɛ́, é dàá à yé e tóa séĩ́ bàa, káà o vũ̀‐lé‐ɓɔ a mɔ̀ɔ nɔ Wálà lɛ̀ɛ. Kɛɛ ka zò lɛ́ɛ̀ kpàà wɔ̃́ kpeĩ kɛɛ̀, wà Wálà lɔ̀ lɛ́ áá kpɔ́ɔ̀ ka mɔ̀ɔ là. Kɛɛ lɛ ka mɔ̀ ká wɔ̃́ nì e kéa kɛ, kɛɛ à kɛɛ̀ yía, yékɛ̀ ka zò é kpaa à yé e tóa kɛ‐wɔ̃̀ là.
43“Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká Fálásíì‐mìà ka ká ké. Káà nàà yàlà‐pìè kpànazɛ̀ lɛ́ e ka zì Wálà‐kà wìa ká. Ɛ́ɛ̃́ káà nàà mia ó wéé ka píé ɓɛ̀lɛyà ká lɔ́ɔ́ kpánà píé. 44Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká ka ká ké. Ka kélɛ̀ ɓɔ́à lɛ́ pɛ gbɛɛ wá à là, lɛ́ mia òó à dɔ ɓɔ́à káa lɛ́ ɓe. Mia ɓéèe óò tàà à là, tó òó à yí dɔ.”
45Wálà là lɔ́ɔ̀ɔ dɔ‐mìà doó‐mì a gèe à lɛ̀ɛ, “Tísɛ̀, yé ɓaà wɔ̃́ e kéa gèe kília, kɛ i i wè sípìà ko mɔ̀ nɔ́ kíli.”
46Zízɛ̀ a gèe, “Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká Wálà là lɔ́ɔ̀ɔ dɔ‐mìà ka bɛ̃̀ɛ̃ ka ká ké. Káà vũ gbííni lɛ́ à diè lɛ mi làa, yà mia wĩĩ́. Kɛɛ ka dìè kàá ka kɔ̀‐wɛ́nɛ́ doó fèle dà o píé, kɛ kà ye nì ká vũ. 47Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká ka ká ké. Káà dɔ̀‐Wálà‐lé‐là‐mìà ɓɔ́à pɛ̀ kɛ̀ e yiè ká. Ɛ́ɛ̃́ o lɛ́ mɔṹ o mia lɛ́ ka dàa ye dàà nì o o zɛɛ káa. 48À mɔ́ɔ̀ wɔ̃̀ mɔ̀ɔ, káà à zɔ̃̀ɔ̃̀ mia lɛ̀ɛ pɛ́nɛɛ kélɛ̀ ka mia lɛ́ kà wèè wɔ̃́ lɛ́ ka dàa ye dàà nì wa kɛ mɔ́ɔ mɔ̀ɔ káa. Ƃii o lɛ́ o dɔ̀‐Wálà‐lé‐là‐mìàa zɛ, tó ka ɓɛ̃̀ɛ̃ káà o ɓɔ́à pɛ̀ kɛ̀ɛ. 49À mɔ́ɔ̀ wɔ̃̀ mɔ̀ɔ, Wálà là Gíkã́ a gèe kéèé, ‘Ḿm̀ lo dɔ̀‐m‐lé‐là‐mìà wà àpɔ́sɔ̀lɔ̀ vɔ̀ o vɔɔ̀ o píé. Óò lo vɔ‐mìà o kília o dò zɛɛ̀, tó wáà o dò bɛ̃̀ɛ̃ sã̀ dɔ̀.’ 50À mɔ́ɔ̀ wɔ̃̀ mɔ̀ɔ, dɔ̀‐Wálà‐lé‐là‐mìà séĩ́ lɛ́ waà o zɛ, é kã́ lúó lɛ́ o kpóṹ là zèe kɛáa mɔ̀, é ɓɔá pɛ́nɛɛ mɔ̀ɔ, o léà‐wɔ̃̀ lɛ́ɛ̀ lo kɛɛ̀ mia lɛ́ o ɓe yà kɔa ɓoa yía o wĩĩ́. 51É kã́ Ébɛ̀ zɛ́ wa ɓoa mɔ̀, é ló é ɓɔá Zɛkèláyà, lɛ́ wa zɛ sálà‐ɓòà‐là‐pɛ̀ wà sálà‐ɓò‐Wálà‐lɛ̀ɛ‐kàa o fĩ̀ã̀a mɔ̀ɔ, lɛ wánà‐wɔ̃̀ ká lɛ́ m̀ gèe ka lɛ̀ɛ kélɛ̀ o léà‐wɔ̃̀ lɛ́ɛ̀ lo kɛɛ̀ míá o ɓe yà kɔa ɓoa yía o wĩĩ́a.
52“Zi sùu kpɛɛ̀ lɛ́ wɔ̃́ yéĩ̀zɛ̀ kɛɛ̀ lɛ à ká Wálà là lɔ́ɔ̀ɔ dɔ‐mìà ka ká ké. Ƃii kíì lɛ́ ò wɔ̃́ yí‐dɔ‐kɔ̀ mɔ́ɔ̀ ká lé ɓoáa, kaà kɛ kùnù‐à‐mɔ̀‐mìà ká. Kàá gbaa ka dìè wàà ká e kília wì, ɛ̃́ɛ̃́ ka mia lɛ́ ò à kɛ‐zì nàà ó wàà à wìa, ka o tèá wàà à wì mɔ̀.”
53Lɛ̀ Zízɛ̀ e gó lɛ̀ e kília mɔ̀ɔ, Wálà kii‐dɔ‐mìà wà Fálásíì‐mìàa, o gbɛ̃̀ gbaa wáà wɔ̃́ gèè Zízɛ̀ gbĩ mɔ̀, ɛ̃́ɛ̃́ wáà wɛ̃́ĩ́‐lɔ̀ɔ lɛ́ à gbɛ̃̀ɛ̃̀ lɛ wɔ̃́ búnù‐búnùzɛ̀ mɔ̀ɔ kɛ̀ à kɛ̀lɛ̀. 54O kɛ pɛ́lɛ́ yàpìà à gɛ̀nɛ̀, wáà à kɛ‐zì nàà ó à kṹ à ká wɔ̃́ dò lɛ́ è lo à gèeèa kolo là zàá.
હાલમાં પસંદ કરેલ:
Lúù 11: MNT
Highlight
શેર કરો
નકલ કરો
Want to have your highlights saved across all your devices? Sign up or sign in
Mann New Testament © Bible Society in Liberia, 1978.
