Lúù 12
12
Zízɛ̀ e lìè‐wè lɛ́ à gbɛ̃̀ɛ̃̀ lɛ mia dìè‐wɛlɛ‐li wɔ̃̀ mɔ̀ɔ dɔ
(Máfìù 10.26-27)
1Mia wáá búnù‐búnùzɛ̀ o nuù e kɛá o kíe là, wáà o kíe nì dìli‐dìlì. Lɛ̀ e kɛ kília, Zízɛ̀ a gèe là tòà‐píé‐mìà lɛ̀ɛ bèĩzɛ̀ kélɛ̀, “Kà ka yɛ́lɛ́ kɛ ka dìè píé Fálásíì‐mìà zì belè‐fɔ̀ɔ‐pɛ̀ɛ mɔ́ɔ̀ wɔ̃̀ mɔ̀. Ye lɛ́ e o dìè wɛlɛ ò lia káa. 2Pɛ lɛ́ pɛ gbinì lɛ à là dɛɛ káa, pɛ lɛ́ɛ̀ lo ɓoò à là. Ɛ́ɛ̃́ bĩ̀ĩ̀‐wɔ̃̀ séĩ́ lɛ́ɛ̀ lo kɛɛ̀ mia séĩ́ yí‐dɔ‐wɔ̃̀ ká. 3À mɔ́ɔ̀ wɔ̃̀ mɔ̀ɔ, pɛ séĩ́ lɛ́ kaà à gèe bĩ́ tii bàa, óò lo à maà lɛ̀‐fɔ̀nɔɔ̀ɔ bà. Ɛ́ɛ̃́ zeĩ́, lùe séĩ́ lɛ́ kaà à ɓo mia tóó yí ká lɛ́ à lé taà lɛɛ wìa, óò lo à gèeè lòũ̀ ká ká to là.
Mí lɛ à mɔ̀ ó túó à lɛ̀ɛ
(Máfìù 10.28-31)
4“M ɓɛ́ĩ̀ nì, ḿm̀ gèe ka lɛ̀ɛ, yékɛ̀ ká túó mia lɛ́ ò gbĩ‐kpàla zɛ, tó yé waà kɛ kília, òó bɛ̀i gbaa wɔ̃́ dò fé kɛɛ̀ɛ lɛ̀ɛ. 5Ḿm̀ lo mi lɛ́ kà bɛ̀i túò à lɛ̀ɛ, zɔ̃̀ɔ̃̀ ka lɛ̀ɛ. Kà túó Wálà lɛ̀ɛ. À ye lɛ́ yíkɛ̀ gáàa lɛ à kɛ̀lɛ̀, tó yé aà mi zɛɛ, áà o dùòá tíé‐pàa. Ɛ̀ɛ̀, ḿm̀ gèe ka lɛ̀ɛ, kà túó à lɛ̀ɛ.
6“Ḿ gɔ̃̀, óò sòlòũ̀ sɔ́ɔ́li lɔ̀ɔ̀ dɔ kápà bɔ́ɔ̀ mɔ̀? É kɛ bɛ̃̀ɛ̃ kília, à doó fèle wɔ̃̀ lɛ̀ɛ́ ni do Wálà ká. 7É kɛ bɛ̃̀ɛ̃ wũ lɛ́ e ka wĩĩ́a káa, o séĩ́ o lóníì lɛ. À mɔ́ɔ̀ wɔ̃̀ mɔ̀ɔ, yékɛ̀ ká túó. Ka wɔ̃̀ lɛ dóo kpànazɛ̀, é dieá sòlòũ̀ búnù‐búnùzɛ̀ wɔ̃̀ là.
O wéé Kɛ́lɛ̀ì wɔ̃̀ mɔ̀ mia nyìɛ mɔ̀
(Máfìù 10.32-33; 12.32; 10.19-20)
8“Ḿm̀ gèe ka lɛ̀ɛ, mí è lo wéè m mɔ́ɔ̀ wɔ̃̀ mɔ̀ mia séĩ́ nyìɛ mɔ̀ɔ, Mi Gbe lɛ́ɛ̀ lo wɔ̃́ nɔ́ doóa kɛɛ̀ à lɛ̀ɛ Wálà là vɔ‐mìà wɛlɛ mɔ̀. 9Kɛɛ mi lɛ́ è lo m mɔ́ɔ̀ wɔ̃̀ tèé ɓoò mia séĩ́ nyìɛ mɔ̀ɔ, Mi Gbe lɛ́ɛ̀ lo à bɛ̃̀ɛ̃ mɔ́ɔ̀ wɔ̃̀ tèé ɓoò Wálà là vɔ‐mìà wɛlɛ mɔ̀.
10“Mi nɔ́ɔ fé lɛ́ è mɛ́ĩ́ yɔɔ ɓo Mi Gbe gbĩ mɔ̀ɔ, à wɔ̃̀ lɛ́ɛ̀ lo ɓoò à wũ mɔ̀. Kɛɛ mi lɛ́ è wɔ̃́ yɔɔ gèe Gɛ̀ɛ̀ Púlú gbĩ mɔ̀ɔ, à wɔ̃̀ wá ɓò‐à‐wũ‐mɔ̀ wɔ̃̀ ká.
11“Yé waà nu ka ká Zúù‐mìà zì Wálà‐kà wì kɛ ó ka mɔ̀ mɛ̀ĩ̀ ɓo, ɛ̃́ɛ̃́ ó nùá bɛ̃̀ɛ̃ ka ká mia líé‐sí‐mìà wà mia wũ‐là‐mìà o wɛlɛ mɔ̀ɔ, yékɛ̀ ká ka zò gɔ̃́ zi lɛ́ kà lo wɔ̃́‐ɓò‐ka‐wũ‐mɔ̀ wè gèeè, ɛ̃́ɛ̃́ wɔ̃́ lɛ́ kà lo à gèeèa mɔ́ɔ̀ wɔ̃̀ ká. 12Ƃii Gɛ̀ɛ̀ Púlú lɛ́ɛ̀ lo wɔ̃́ lɛ́ lɛ ka mɔ̀ ká gèe yía, zɔ̃̀ɔ̃̀ ka lɛ̀ɛ lúó e kília ká.”
Pĩ̀ã̀ lɛ́ à gbɛ̃̀ɛ̃̀ lɛ bè‐mì kpànazɛ̀ mɔ̀ɔ
13Gɔ̃ doó lɛ́ e kɛ mia gbũ fĩ̀ã̀ yia, a gèe à lɛ̀ɛ, “Tísɛ̀, à gèe m lèe‐gé lɛ̀ɛ kò ye kó pɔɔ̀ lɛ́ ko dàa a tóa yí gìnì.”
14Zízɛ̀ a gèe à lɛ̀ɛ, “Gɔ̃, dé e m kɛ mɛ̀ĩ́‐sà ɓo‐mì, ɛ̃́ɛ̃́ pɛ yí‐gìnì‐mì ká ka lɛ̀ɛ?” 15A gèe o séĩ́ o lɛ̀ɛ kélɛ̀, “Kà ka yɛ́lɛ́ kɛ ka dìè píé, ɛ̃́ɛ̃́ kà lɛ̀ gɛ̃̀ ka dìè là pɛ séĩ́ lɔ̀‐kpɔ̀ mi mɔ̀ mɔ́ɔ̀ wɔ̃̀ mɔ̀. Ƃii mi zì kɛ̀ɓe kpó‐kpó kɛɛ̀ wá pɔɔ̀ lɛ́ e i kɛ̀lɛ̀ɛ ká, yé bɛ̃̀ɛ̃ o kù lɛ gbùòa ká.”
16Lɛ̀ e kɛ kília, Zízɛ̀ e pĩ̀ã̀ e kéa vɔ o lɛ̀ɛ. Ye lɛ́ e kélɛ̀, “Gɔ̃ kpànazɛ̀ doó e kɛ ɓe. Nyɛ́nɛ̀ĩ̀ e kɛ à kɛ̀lɛ̀. Nyɛ́nɛ̀ĩ̀ e kília, taa‐pɔ̀ɔ̀ e kɛ lipìà yi nyɔ́ɔ̀ɔ. 17E gbɛ̃̀ gbaa, áà e yɛ́lɛ́ tàà e dìè píé kélɛ̀, ‘Lɛ̀ wá m kɛ̀lɛ̀ kɛ ḿ m̀ pɔɔ̀ɔ yàlà ɓo yí. Ḿm̀ lo à kɛɛ̀ kpɛ?’ 18A gèe kɛ́lɛ̀, ‘Wɔ̃́ m̀ lo à kɛɛ̀ɛ, gɛ̃́ e ké. Ḿm̀ lo m̀ pɔɔ̀‐kàà‐wì‐kàa wíì, tó ma góó‐gòò zɛ̀ dɔ. À lɛ̀ mɔ̀ lɛ́ m̀ lo m̀ ɓúa wà m̀ pɔɔ̀ɔ séĩ́ káà yia. 19Yé aà kɛ kília, ḿm̀ lo à gèeè m dìè píé kélɛ̀, Gɔ̃, pɛ séĩ́ lɛ́ ɓà nàà à ká kɛ̀ɛ̀ búnùzɛ̀ mɔ̀ɔ, lɛ i kɛ̀lɛ̀ gbùò. Ì ɓà yà ɓo gbaa ɓɛ, ì pɛ ɓèlè, ɓáà pɛ mì, ɛ̃́ɛ̃́ ɓáà géli kɛ̀.’ 20Kɛɛ Wálà a gèe à lɛ̀ɛ, ‘Bè‐mì lɛ́ e i ká. Bĩ́míà e kéa káa, lɛ i mɔ̀ í i zì kɛ̀ɓe nɔ. Yé aà kɛ kília, pɔɔ̀ séĩ́ lɛ́ ɓaà yàlà ɓo i dìè mɔ́ɔ̀ wɔ̃̀ mɔ̀ e kéa, dé è lo tóò à kɛ̀lɛ̀?’
21“Zi lɛ́ mia lɛ́ ò dɔ‐pɔ̀ɔ̀ pa e kíe mɔ̀ o dìè mɔ́ɔ̀ wɔ̃̀ mɔ̀, tó o wá kpànazɛ̀ Wálà nyìɛ mɔ̀ɔ, o à káa, lɛ́ ɓɛ.”
Pɛ́ à wɔ̃̀ áá diè i zò káa
(Máfìù 6.25-34)
22Lɛ̀ e kɛ kília, Zízɛ̀ a gèe là tòà‐píé‐mìà lɛ̀ɛ, “À mɔ́ɔ̀ wɔ̃̀ mɔ̀ɔ, ḿm̀ gèe ka lɛ̀ɛ, yékɛ̀ ká kɛ zò‐gɔ̃́ zɛ̀ léɓèlè lɛ́ kà lo à ɓèlè kɛ ká kɛ ɓe, ɛ̃́ɛ̃́ sɔ lɛ́ kà lo à naà ká dà ka gbĩ‐kpàla mɔ̀ɔ, mɔ́ɔ̀ wɔ̃̀ mɔ̀. 23Kɛ̀ɓe lɛ dóo kpànazɛ̀, é dieá léɓèlè là. Ɛ́ɛ̃́ gbĩ‐kpàla bɛ̃̀ɛ̃ lɛ kpànazɛ̀ é dieá sɔ là. 24Gɔ̃̀ã‐gɔ̃̀ã vɔ̀ gɛ̃̀ kà ɓoa, òó ɓu taa bɛ̃̀ɛ̃, kɛ ó gèe óò à kã. Kpàà wà pɔɔ̀‐káá‐kà gbɛɛ wá o kɛ̀lɛ̀. Kɛɛ Wálà lɛ́ɛ̀ léɓèlè nɔ o lɛ̀ɛ. Kɛɛ ka yee, ka dóo kpànazɛ̀, é dieá mɔ̀ɔ̀ vɔ̀ là. 25Kɛɛ yé ka dò aà e zò gɔ̃́ e zì kɛ̀ɓe wɛ̃́ĩ̀a, zò‐gɔ̃́ lɛ́ɛ̀ lo à kɛɛ̀, kɛ é yìì ɓéĩ́ ɓo fɛ̃̀ɛ̃̀? 26Yé bɛ̀i wá ka mɔ̀ mɔṹ, kɛ ká wɔ̃́ nyɔ̀nɔ́ sùu e kília kɛɛ, mɛ́ mɔṹ e kɛ lɛ́ kà bɛ̀i à mɔ̀ ká ka zò gɔ̃́ wɔ̃́ yé e tóa mɔ́ɔ̀ wɔ̃̀ mɔ̀ mɔṹ? 27Sùu nì lɛ́ è kɛ̀, áà e bĩ̀ luúa, zi lɛ́ ò fàa à káa, kà gɛ̃̀. Òó yɛɓo kɛ, ɛ̃́ɛ̃́ òó sɔ kɛ o dìè lɛ̀ɛ. Kà tó ḿ gèe ka lɛ̀ɛ, Sɔ́lómɔ̀ e kɛ mi kpànazɛ̀ kpó‐kpó ká, ɛ̃́ɛ̃́ sɔ yiè yiè e kɛ à kɛ̀lɛ̀. Kɛɛ sɔ nì e kília lɛ̀ɛ́ gbaa kɛ sɛ̀, é dieá sùu bĩ́ e kéa doó fèle là. 28Wálà lɛ́ è sɔ yélè sùu nì mɔ̀ɔ. Sùu e kília lɛ pɛ́nɛɛ ɓe luú. Kɛɛ yé tòò aà kɛɛ, óò lo à káà tíè. Yé mɔṹ lɛ kília, zi sùu kpɛɛ̀ lɛ́ è lo sɔ yèlèá ka yee ka mɔ̀ ké. Ka zì zò‐dɔ̀à‐mɔ̀ lɛ dóo nyɔ̀nɔ́ kpó‐kpó ɓo. 29À mɔ́ɔ̀ wɔ̃̀ mɔ̀ɔ, pɛ́ kà lo à ɓèlè, ɛ̃́ɛ̃́ kà lo à miìa, yékɛ̀ à wɔ̃̀ é die ka zò ká. Yékɛ̀ ka lè é dũ. 30Ƃii mia lɛ́ o kpóṹ là zèe mìà káa, pɔɔ̀ séĩ́ nì e kília wɔ̃̀ diè lɛ o zò ká. Ka Dàa lɛ́ɛ̀ à yí dɔ kélɛ̀ lɛ ka mɔ̀ ká pɛ nì e kília sɔ̀lɔ̀ ɓo. 31Kɛɛ pɛ lɛ́ lɛ à mɔ̀ à wɔ̃̀ é die ka zò káa, lɛ́ e kélɛ̀, Wálà zì tò‐mia‐làa. Yé aà kɛ kília, lɛ́ɛ̀ lo pɔɔ̀ nì e kília nɔɔ̀ ka lɛ̀ɛ.
Dɔ‐pɔ̀ɔ̀ lɛ́ e lɛ̀ía
(Máfìù 6.19-21)
32“Míá ka m̀ ɓáá kù nyɔ̀nɔ́ káa, yékɛ̀ ká túó. Ƃii lɛ́ɛ̀ ka Dàa zò dà kɛ é lɛ̀ dò nɔ ka lɛ̀ɛ mia lɛ́ à tóò lɛ o làa bà. 33Kà pɔɔ̀ séĩ́ lɛ́ e ka kɛ̀lɛ̀ɛ lɔ̀ɔ̀ dɔ, ká à pɛ̀lèe nɔ mia lɛ́ pɛ wá o kɛ̀lɛ̀ɛ lɛ̀ɛ. Kà pɛlèe kàà‐yí‐pɛ̀, lɛ́ sìè là wɔ̃́ wá à mɔ̀ɔ, yàlà ɓo ka dìè lɛ̀ɛ. Kà kà dɔ‐pɔ̀ɔ̀ séĩ́ kpɔ́lɔ̀ bɛ̀i Wálà‐pà. À lɛ̀ mɔ̀ lɛ́ à là lɛ̀ɛ́ ló ɓoò yia. Ƃii kã̀ã‐mì gbɛɛ lɛ̀ɛ́ bɛ̀i ɓɔɔ̀ o mɔ̀, ɛ̃́ɛ̃́ lɛ́ pɛ‐sìè‐pɛ̀ gbɛɛ wá yia. 34Ƃii lɛ̀ lɛ́ kà dɔ‐pɔ̀ɔ̀ lɛ yía, ka zò lɛ̀ɛ́ wɛ̀lɛ̀ à lɛ̀ mɔ̀.
Yɛɓo‐kɛ‐mìà lɛ́ ò o nyìɛ kɛ̀ lɛ̀ mɔ̀ɔ
35“Ka pɛ̀ kɛɛ̀ è kɛá. Kà ɓɛ̀lɛ̀ dɔ kà sɔ là. Ɛ́ɛ̃́ zeĩ́, kà nábò dɔɔ̀ è kɛá. 36Kà kɛ lɛ̀ mia lɛ́ o yàá o dàa‐mì lɛ́ e ló lee‐sí‐kpìlì làa gɛ̀nɛ̀ɛ lɛ́ ɓe. Yé aà nu, lɛ́ aà káa lé mɛ̀ɛ, óò lo à lé ɓoò à lɛ̀ɛ zá le. 37Yɛɓo‐kɛ‐mìà o kíli, lɛ́ o dàa‐mì e o gɛ̃̀ o nyìɛ́ lɛ̀ e nua káa, zò géli lɛ o kɛ̀lɛ̀. Ḿm̀ à gèe ka lɛ̀ɛ, lɛ́ɛ̀ lo là sɔ‐là‐ɓɛ̀lɛ̀ kpo dɔɔ̀, tó a gèe o lɛ̀ɛ ó yà tã́ã̀, tó áà wà léɓèlè wɔ̃̀ wũ kɛ̀ à mɔ̀. 38É nùá bɛ̃̀ɛ̃ bĩ́míà zèí, ɛ̃́ɛ̃́ bɛ̃̀ɛ̃ tɔ̀ɔ̀ wéè bèĩzɛ̀ ká, lɛ́ e o gɛ̃̀ o pɛ̀ kɛɛ̀ɛ zɛ̀ káa, zò géli lɛ o kɛ̀lɛ̀. 39Kà wɔ̃́ e kéa kpɔ́ ka gé. È kɛ̀á ká dàa‐mì lɛ́ɛ̀ kã̀ã‐mì nu‐lùò dɔɔ, lɛ̀ɛ́ gɔ̃̀ à tóò kɛ kã̀ã‐mì é wàà là káa wì. 40Ka bɛ̃̀ɛ̃, ka pɛ̀ kɛɛ̀ è kɛá nɔ́ kíli, ɓii Mi Gbe lɛ́ɛ̀ lo nuù lúó lɛ́ ka yɛ́lɛ́ lɛ̀ɛ́ ló kɛɛ̀á à gɛ̀nɛ̀ɛ ká.”
Yɛɓo‐kɛ‐mì zò‐dɔ̀à‐mɔ̀ zɛ̀ wà à yé mi ìí bɛ̀i i zò dɔɔ̀ à mɔ̀ɔ
(Máfìù 24.45-51)
41Pílɛ̀ a gèe kélɛ̀, “Ko Dàa‐mì, pĩ̀ã̀ e kéa, ɓáà vɔ ko doó ko lɛ̀ɛ, ɛ̃́ɛ̃́ kɛ̀ ɓáà vɔ mia séĩ́ lɛ̀ɛ?”
42Ko Dàa‐mì a gèe kélɛ̀, “Yé lɛ kília, dé e mɔṹ yɛɓo‐kɛ‐mì gíkã́ã̀a zɛ̀, lɛ́ ò bɛ̀i à mɔ̀ ó o zò dɔ à mɔ̀ɔ ká? À ye lɛ́ à dàa‐mì è lo yɛɓo‐kɛ‐mìà séĩ́ lɛ́ o à píé kɛ́ìa, kpɔ́ɔ̀ à kɔ̀ là, tó áà wà léɓèlè nɔ̀ o lɛ̀ɛ à nɔ̀‐o‐lɛ̀ɛ lùò káa. 43Yé yɛɓo‐kɛ‐mì e kília dàa‐mì aà nu à gɛ̃̀ɛ̃̀ à kɛpìà kília, zò géli lɛ yɛɓo‐kɛ‐mì e kília kɛ̀lɛ̀. 44Wánà kpó‐kpó káa, ḿm̀ à gèe ka lɛ̀ɛ, pɛ séĩ́ lɛ́ e o dàa‐mì e kília kɛ̀lɛ̀ɛ, lɛ́ɛ̀ lo à kpɔ́ɔ̀ là yɛɓo‐kɛ‐mì e kília kɔ̀ là. 45Kɛɛ yé yɛɓo‐kɛ‐mì e kília aà gèe e dìè lɛ̀ɛ, ‘M dàa‐mì wá nupìà pɛ́lɛ̀,’ tó áà gbɛ̃̀, áà yɛɓo‐kɛ‐mìà yé o tó, lɛ́ o gɔ̃à wà loà nì káa, áà o mɛ̀, tó áà pɛ ɓèlè, tó áà pɛ mì, ɛ̃́ɛ̃́ tó mi‐pɛ̀ áà à kɛ̀ɛ, 46yé aà kɛ kília, à dàa‐mì lɛ́ɛ̀ lo yɛ́ɛ̀ e zí lúó lɛ́ à nyìɛ wá à ká à gɛ̀nɛ̀, ɛ̃́ɛ̃́ lúó lɛ́ lɛ̀ɛ́ à yí dɔ, lɛ́ɛ̀ lo nuù à káa ká. À dàa‐mì lɛ́ɛ̀ lo à kpuú kã́ã̀ kélé kélé, tó e wɔ̃́ lɛ́ è lo kɛɛ̀ mia lɛ́ òó o dàa‐mì wéè kɛɛ káa, tó e à zì kɛ.
47“Yɛɓo‐kɛ‐mì lɛ́ è wɔ̃́ lɛ́ à dàa‐mì à nàà à kɛɛ dɔ, tó lɛ̀ɛ́ e dìè pɛ̀ kɛ, kɛ é wɔ̃́ lɛ́ à dàa‐mì à nàà à káa, á kɛɛ, óò lo à kṹũ̀ gágà, tó wáà à mɛ̀. 48Kɛɛ yɛɓo‐kɛ‐mì lɛ́ lɛ̀ɛ́ wɔ̃́ lɛ́ à dàa‐mì à nàà á kɛɛ dɔ, tó áà wɔ̃́ lɛ́ aà kɛɛ, ò bɛ̀i à mɔ̀ ó mɛ̀ɛ kɛ̀ɛ, óò lo o kpóló kpɔ́ɔ̀ o mɔ̀, wáà mɛ̀. Mi lɛ́ ò pɛ gbùò nɔ à lɛ̀ɛ, óò lo à gèeè à lɛ̀ɛ é pɛ gbùò nɔ. Ɛ́ɛ̃́ mi lɛ́ ò pɛ gbùò kpó‐kpó kpɔ à kɔ̀ làa, óò lo pɛ gbùò kpó‐kpó naà à kɛ̀lɛ̀.
Zízɛ̀ a kɛ mia fĩ̀ã̀ e ɓo
(Máfìù 10.34-36)
49“M nu kɛ ḿ tíé dà kpóṹ là yí. Áá kɛɛ̀ dóo m lɛ̀ɛ sɛ̀ m̀ à gɛ̃̀á e kɛɛ̀ɛ zɛ̀ káa ká. 50M bàtáì‐kɛ‐wɔ̃̀ lɛ ɓe kɛ ó à kɛ. Zi sùu kpɛɛ̀ lɛ́ m zò dàaà lɛ à ká zízàá, é tóá kíli ó à kɛ à wɔ̃̀ é die ké. 51Káà à gɛ̃̀ kélɛ̀ m nu, kɛ ḿ nu zò‐yà‐gé ká kpóṹ là zèe? Ḿm̀ gée ka lɛ̀ɛ, ye wá zò‐yà‐gé ká. Kɛɛ lɛ mia kã̀ o kíe mɔ̀ ká. 52É kã́ pɛ́nɛɛ mɔ̀, é lóá líéa, mia sɔ́ɔ́li ó kɛ̀á kɛ́ìa, o yí gìniì lɛ́ɛ̀ lo kɛɛ̀ à ká. Mia yààka o dɔɔ̀ lɛ́ɛ̀ lo kɛɛ̀á, tó mia pèèlɛ bɛ̃̀ɛ̃ dɔɔ̀ e kɛá. Tó mia pèèlɛ wáà gèlè gɔ̃̀ mia yààka ká. 53Mia dàa nì óò lo gèlè gɔ̃ɔ̀ o gbe nì ká, tó o gbe nì bɛ̃̀ɛ̃ wáà gèlè gɔ̃̀ o dàa nì ká. Mia lèe nì óò lo gèlè gɔ̃ɔ̀ o lú nì ká, tó o lú nì bɛ̃̀ɛ̃, wáà gèlè gɔ̃̀ o lèe nì ká. Mia lèe nì óò lo gèlè gɔ̃ɔ̀ o gbe na nì ká, tó o gbe na nì bɛ̃̀ɛ̃ wáà gèlè gɔ̃̀ o dɛ̃ lèe nì ká.”
Wɔ̃́ lɛ́ à gbɛ̃̀ɛ̃̀ lɛ lúó e pɛ́nɛɛ mɔ̀ɔ yí‐ma‐kɔ̀
(Máfìù 16.2-3)
54Zízɛ̀ a gèe zeĩ́ míáa lɛ̀ɛ kélɛ̀, “Yé kaà lúé‐lúé gɛ̃̀, áà gò nyɛ́nɛ́ dàpìàa, káà à gèe nɔ́ zá le kélɛ̀, ‘Lɛ̀ɛ lɛ nupìà bãã̀.’ Tó áà kɛ̀ lɛ̀ zí nɔ́ kà à gèe à káa lɛ́ ɓe. 55Yé kaà fã̀ã̀ gɛ̃̀, áà gò sɛ́lɛ́ lɛ́ e sɛ́lɛ́ e kéa gã̀ bèía yía, káà à gèe kélɛ̀, ‘Nyɛ́nɛ́ lɛ nupìà ɓɔɔ̀ wɛlɛ yɔɔ zɛ̀.’ Tó áà kɛ̀ lɛ̀ zí nɔ́ kà à gèe à káa lɛ́ ɓe. 56Mia lɛ́ kà ka dìè wɛlɛ li ɓɛ. Káà bɛ̀i à mɔ̀ ka kpóṹ là wà lɛ̀í o gɛ̃̀, káà wɔ̃́ lɛ́ à gbɛ̃̀ɛ̃̀ lɛ o mɔ̀ɔ gèè. Mɛ́ e kɛ lɛ́ kàá bɛ̀i wɔ̃́ lɛ́ à gbɛ̃̀ɛ̃̀ lɛ lúó yé e pɛ́nɛɛ mɔ̀ɔ gèeè ɓɛ?
Mí è kii tii kã i mɔ̀ɔ, kà ye kà wɔ̃́ gbɛ̃̀ e kíe lé
(Máfìù 5.25-26)
57“Mɛ́ e kɛ lɛ́ kàá ka yɛ́lɛ́ táá ka dìè lɛ̀ɛ wɔ̃́ lɛ́ lɛ kpeĩ ká kɛɛ, kɛ‐wɔ̃̀ ká ɓɛ? 58Yé mi dò aà kii tii kã́ i mɔ̀, tó kà à ye káà lò mɛ̀ĩ́‐sà ɓopìàa, ì à kɛ‐zì naa kà ye ká wɔ̃́ gbɛ̃̀ e kíe lé yé kaà kɛ nupìàa ká, yékɛ̀ é i gã́ã́ tã́ã̀ dɔ‐mì wɛlɛ mɔ̀, ɛ̃́ɛ̃́ zeĩ́, yékɛ̀ dɔ‐mì é i nɔ sóyà vɔ̀ lɛ̀ɛ, ɛ̃́ɛ̃́ yékɛ̀ sóyà vɔ̀ bɛ̀ɛ̃ ó i dùò bĩ́‐kɛ̀ì. 59Ḿm̀ à gèe i lɛ̀ɛ kélɛ̀, ìí ló góò bĩ́‐kà e kília wì, é tóá kíli í pɛlèe lɛ́ e i mɔ̀ɔ séĩ́ nɔ kɔ̀lɔ́‐kɔ̀lɔ́ le.”
હાલમાં પસંદ કરેલ:
Lúù 12: MNT
Highlight
શેર કરો
નકલ કરો
Want to have your highlights saved across all your devices? Sign up or sign in
Mann New Testament © Bible Society in Liberia, 1978.
