Jon 19
19
SOPENA 19.
1Tau na sanu naa Pailat molavi Iesu, movera tema-rasia.
2Ra tahajumu tetalihe na suni taharuma hina lovona, tejuria ta na rena, tevisia hina ruru-heja.
3Teaso, Oimauri paravu, O Moli hira Ju! tevojae hira havera.
4Suria Pailat moruhusivo vahatea maa, moaso mera, Otoroho, alavia numai me amiu sura otopinisi asapasu te sanu oso mea.
5Natuha Iesu momalua me na majaraha, mosusuni na suni taharuma me na ruruheja, Pailat moaso mera, Otoreni na tajua!
6Ihisa ra varese-prist me ra tahamata terenia, teaso pati, Veimeteia me na hau palatusi, veimeteia me na hau palatusi. Pailat moaso mera, Otolavia, otoveimeteia me na hau palatusi: asapasu te sanu oso mea.
7Ra Ju teaso, Na leo hauhaua hija toitoho, na pilaja leo hauhaua moaso mosimate suria motapuna vea na Matui Atua.
8Ihisa Pailat moroho na leo natuha moine jivia.
9Movano vahatea maa me na pea hina ilailahi, moaso me Iesu, Oimaraha veae? Maa Iesu mosatami mea.
10Natuha Pailat moaso mea, Oisaaso meau? Oisapinisi na hauhaua mopilau sura veimeteiho me na hau palatusi, na hauhaua mopilau sura nuniho?
11Iesu moaso liliu, Na semu hauhaua mojoa meau va mosarahu ta meho me na vonae neesahe: suria inie isei morahu nau ta meho moveioso jiviho.
12Tau Pailat momeje na nunia: maa ra Ju teaso pati, teaso, Va oinuni na tajua naa ilaho, oisatuai Siser: te tajua itea isei moveitapuna na Moli mo-sa-tuai Siser.
13Ihisa Pailat moroho na leo natuha molavi Iesu numai, mosihetoho me na pea hina ilailahi me na vonae na hisena Na Rio, maa me na Loe Hipru, Kapata.
14Inie na rani hina vei vavanao suri na Hanihani hina Salehauli, momaso maso vuati: moaso me ra Ju, Otoreni na pilamiu Moli!
15Maa teaso pati, Turea, turea, veimeteia me na hau palatusi. Pailat moaso mera, Aveimete na pilamiu Moli me na hau palatusi? Ra varese-prist teaso liliu, Na pilaja Moli mojoa, maa Siser.
16Tau morahu nie ta mera sura veimeteia me na hau palatusi. Telavi Iesu, tetulia ilaho.
17Mopala ne sena hau palatusi, molaho me na vonae na hisena Na vonae hina Molohi e me na loe Hipru, Kolkota.
18Teveimeteia natuha me na hau palatusi, na tajua morua maa valuia, motea me na matuana havena, motea me na marauna havena, Iesu me na vuati.
19Pailat mouli te sanu motea, mojuria me na hau palatusi. Na uliuli moaso, IESU HI NASARET, NA MOLI Hl RA JU.
20Ra tari hira Ju teevi na hisena naa: suria na vonae veae teveimete Iesu motaroroi me na vanua tahajia: moulia me na loe Hipru, me na loei Kris me na loei Romu.
21Natuha na varese-prist hira Ju teaso me Pailat, Oitena uli, Na Moli hi ra Ju: maa moaso, Inau na Moli hi ra Ju.
22Pailat moaso liliu, Na sanu aulia, aulia sori.
23Ra tahajumu tau teveimete Iesu me na hau palatusi, telavi ra visivisina, teseria tami movate, ra tahajumu tevetenira, telavi na pilana ruru mono. Tisatula na ruru, na motina motea hasa.
24Suria tetapura aso, Moso tovea momajejeri maa tosahasahatiro mopile isei: sura na pepe tapu motaraae moaso, Teseri na visivisiu, tesahasahatiro suria. Ra tahajumu tevera sanu naa suria.
25Na tinai Iesu moturitoho taroroi me na hau palatusi, na mavinai tinana Mere na tupui Kleovas me Mere Maktalene mono.
26Suria ihisa Iesu moreni tinana, na uluo hina momejeia mono moturitohoae, moaso me tinana, Hajai, oireni matumu!
27Tau moaso me na uluo hina, Oireni tinamu! Tau na rani natuha na uluo hina natuha molavia me na sipeana.
28Tau na sanu naa, Iesu mopinisi ra sanu vunuvunu tesori, sura ra pepe tapu motaraae, moaso, Amararou.
29Na huro tetohia tavere hina pei hohoa tomotohoae: tetohi na lumi hina pei hohoa, tejuri hissopu ta mea, teaurahae me na vavana.
30Tau Iesu molavi na pei hohoa moaso, Mosori, motamalihi, momate.
31Ra Ju, suria na rani hina vei vavanao, tesameje na epemate tetitoho ta na hau palatusi me na sapat (suria na sapat natuha na rani tahajia) tetuha Pailat va tetope ra era, sura lavituhera.
32Natuha ra tahajumu temalua, tetope ra ena tajua majihana, ra ena valuna tajua isei teveimeteia me na hau palatusi valuia.
33Maa ihisa tenumai me Iesu terenia momate vunuvunu, tesatope ra ena.
34Maa motea hira tahajumu mojura na pararana hina oleole, vahatea na jae me na pei teraroroae.
35Inie isei morenia movetivetia, na sena vetiveti motaharahu: mopinisi moaso taharahu sura otorohoroho.
36Ra sanu naa tevera sura na pepe tapu motaraae, Tesatope motea hi ra suina.
37Na leo motatea hina pepe tapu moaso, Tereni na tajua tejurae.
38Tau na sanu naa, Josev hi Arimatea, na uluo hi Iesu maa mopunia suria moine ra Ju, motuha Pailat, momeje na lavituhe na epei Iesu. Pailat motami mea. Suria monumai molavituhe na epei Iesu.
39Nikotimus monumai mono isei momalua me Iesu majiha me na pohi, molavi na voro hi murra me aloi, mopupuheti.
40Natuha telavi na epei Iesu, tetalihe na ruru mea valui ra sanu poniponi pala na vuera Ju suri na japovi.
41Me na vonae veae teveimeteia me na hau palatusi, na uma monie: me na uma na malo-ima veae tesajapovi te tajua reji.
42Suria tejuri Iesu natuha suria inie na rani ra Ju tevei vavanao; mono na malo-ima naa motaroroi.
હાલમાં પસંદ કરેલ:
Jon 19: TLM9109
Highlight
શેર કરો
નકલ કરો
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
