Jon 18
18
SOPENA 18.
1Tau Iesu moaso ra leo naa molaho valui ra uluo hina vala pei taiti Ketron, na uma monieae, moruhusahe mea, ra uluo hina mono.
2Jutas mono isei momahui nie mopinisi na vonae: suria Iesu vahatari movanoae valui ra uluo hina.
3Jutas, me ra tahamata me ra malisa hira varese-prist me ra Varisi, momaluaae, tepala ra pula, ra pula hau, ma ra sanu hina jumu.
4Suria, Iesu mopinisi ra sanu vunuvunu temalua mea, movano, moaso mera, Ototiro isei?
5Teaso liliu mea, Iesu hi Nasaret. Iesu moaso mera, Inau inie. Jutas mono, isei momahui nie, tomoturi valuira.
6Ihisa moaso mera, Inau inie, telaho talihuri, tejovi me na tano.
7Vahatea maa motuhara, Ototiro isei? Teaso, Iesu hi Nasaret.
8Iesu moaso liliu, Avarai amiu mine inau inie: suria va ototiroau otojuri ra tajua naa telaho.
9Sura na sena aso motaraae, Ihire oirahu ta meau aisapele tea.
10Natuha Saimon Piter molavi na pilana jimi tahaparavu, molosi na tajua tahavarao hina varese-prist, mopahitusi na matuana jalihana. Na hisena tajua tahavarao Malkus.
11Maa Iesu moaso me Piter, Oijuri na pilam jimi tahaparavu me na taha hina: na tamali Tamau morahu ta meau, asioomia?
12Tau ra tahajumu, na varese hira, me ra malisa hira Ju telavi Iesu, tehajiria.
13Tetulia ilaho me Annas majiha; suria inie na palihana lamane hi Kaiavas na moli-prist me na tauni natuha.
14Kaiavas inie na tajua isei movarai ra Ju motahonai na tajua motea momate suri ra tanoho.
15Saimon Piter molaho me na tahui Iesu, na uluo hina motatea mono. Na uluo hina natuha na moli-prist mopinisia, moruhusahe valui Iesu me na pea tahajia hina moli-prist.
16Maa Piter moturitoho me na majaraha taroroi me na riohauli. Natuha na valuna uluo hina, isei na moliprist mopinisia, movano movarai na hajae tahamata na riohauli molavi Piter moruhusahe.
17Natuha na hajae uluo na tahamata na tilihoro moaso me Piter, Iniho motea hira uluo hina tajua naa? Moaso, Aue.
18Ra tahavarao me ra varese teturitohoae, tevasurahi na hapu: suria mohamariri; tetapura vera tetutunu: Piter toitoho valuira, motapuna vea tutunu.
19Na moli-prist motuha Iesu suri ra uluo hina me na sena lalaa.
20Iesu moaso liliu mea, Aaso majaraha mine me na ulu; tuitui apise me na pea tahajia hina lotu hira Ju, me ra valura pea hina lotu veae ra Ju tehuhurahi; asalalaa punu te sanu.
21Sura sava oituhau? oisituhara terohoau ra sanu aaso mera: tepinisi aaso na sava.
22Tau moaso paletuha motea hira varese isei moturi taitalia, movoja Iesu hina lolona havena, Oiaso liliu paletuha me na moli-prist?
23Iesu moaso liliu mea, Va aaso oso oivetiveti suri na sanu oso: maa va aaso tataholo sura sava oivojau?
24Annas mosulae moauri mine me Kaiavas na moliprist.
25Saimon Piter moturitoho, motapuna vea tutunu. Suria teaso mea, Iniho mono motea hira uluo hina? Moiria, moaso, Aue.
26Motea hi ra tahavarao hina moli-prist, na tavuhiria tajua isei Piter mopahitusi na jalihana, moaso, Areniho me na uma valuia?
27Piter moiria vahatea maa: na toa lamane mo-varihi-tararau.
28Natuha tetuli Iesu ture Kaiavas me na pea hina ilailahi me na malaha pepe vuha: hire tesaruhusahe me na pea hina ilailahi va movera tesavoe: tau tesahani na Hanihani hina Salehauli.
29Pailat moruhusivo mera, moaso, Ototatahi na tajua naa hina sava?
30Teaso liliu mea, Va mo-sa-tahaoso, tosalavia ta meho.
31Natuha Pailat moaso mera, Otolavia, otoilailahi nie pala ra pilamiu leo hauhaua. Ra Ju teaso mea, Mosapilaja sura veimete na tajua.
32Sura na aso hi Iesu motaraae, na leo moaso sura pisera momate paleve.
33Natuha Pailat motaruhusahe me na pea hina ilailahi, moore Iesu, moaso mea, Iniho na Moli hira Ju?
34Iesu moaso liliu mea, Oitapumu aso na sanu naa e valura tajua tevaraia ta meho suriau?
35Pailet moaso liliu, Inau na Ju? Ra pilam tanoho me ra varese-prist telaviho ta meau: oivei na sava mine?
36Iesu moaso liliu, Na vanuau mosanie me na ulu naa: va na vanuau monie me na ulu naa ra sipilau tahavarao tejumu sura ra Ju tesalaviau: maa vanuau mosapaletuha.
37Suria Pailat moaso mea, Iniho na Moli? Iesu moaso liliu? Io, inau na Moli, Amalua majiha suria, suria amalua me na ulu naa sura vetiveti suri na taharahu. Hire vunuvunu temeje na taharahu teroho na rorou.
38Pailat moaso mea, Na taharahu! na sava? Tau moaso na sanu naa, motaruhusivo me ra Ju, moaso mera, Asapasu te sanu oso mea.
39Maa movuemiu anuni na tahahajiriri motea me na Hanihani hina Salehauli: Otomeje anuni me amiu na Moli hira Ju?
40Natuha hire vunuvunu teaso pati, Aue na tajua naa, maa Parapasi. Parapasi inie na tahapapaliho.
હાલમાં પસંદ કરેલ:
Jon 18: TLM9109
Highlight
શેર કરો
નકલ કરો
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
