Jon 17
17
SOPENA 17.
1Ra leo naa Iesu moaso, moriosahe me na tailahi, moaso, Tata, na rani imalua: oihale matumu, sura Matumu mohaleho mono.
2Oirahu mea na hauhaua mosale jivi ra tajua vunuvunu sura morahu na mauri tuitui mera tanoho vunuvunu oirahu ta mea.
3Naano na mauri tuitui, na pinisiho na Atua taharahu hasa me Iesu Kristo isei oisulae.
4Ahaleho mine me na ulu: aivei sori na varao oirahu meau sura aivea. 5Naanoi, O Tata, oihaleau, oihaleho mono me na jehejehe mopilau valuiho mine na ulu movaere.
6Apise mine na hisemu me ra tajua oirahu hire ta meau me na ulu; hire tepilamu mine maa oirahu hire ta meau; teroho me na loemu.
7Naanoi tepinisi ra sanu vunuvunu oirahu hire ta meau tepilamu.
8Suria arahu mera na leo oirahu meau; telavia, tepinisi susuhi amajuri meho, terohoroho oisulau.
9Amatapisi surira: asamatapisi naanoi suri na ulu maa surira oirahu meau: suria hire tepilamu.
10Ra uluo hiu vunuvunu tepilamu; ra pilamu tepilau; tehaleau.
11Naanoi asatoho me na ulu, anumai meho. Tata Tapu, motahonai oivera tetoho tuitui me na pinisiho, hire oirahu ta meau, sura hire telolotea pala amamurua.
12Ihisa atoho valuira me na ulu aivera tetoho me na pinisiho, aimata hire; saitea hire mopele maa motea na tahaveileelee, sura ra pepe tapu tetaraae.
13Naanoi anumai meho: ra sanu naa aaso me na ulu sura na seu ejieji motavere me ra lolora.
14Arahu ta mera na loemu; na ulu movotoa hire mine, suria tesapile na ulu palaiau asapile na
15Asamatapisi oilavituhera me na ulu maa oirahu nonoho hire ture na Tahaoso.
16Hire tesapile na ulu palaiau asapile na ulu.
17Oivera tetapu me na loemu: na loemu inie na taharahu.
18Palahi oisulau me na ulu, asulara me na ulu mono.
19Surira aiveau aitapu sura hire mono tetapu suria na taharahu.
20Asamatapisi surira hasera naanoi; maa surira mono isei terohoroho meau suria na loera.
21Sura hire vunuvunu motea: palahi iniho Atua oitoho meau, inau aitoho meho, hire mono motea pala amamurua; sura na ulu morohoroho oisulau.
22Na hale oirahu ta meau, arahu nie ta mera; sura hire motea pala amamurua motea.
23Inau mera, iniho meau sura tetahonai tohova motea; sura na ulu mopinisi oisulau, oimejeira palahi oimejeau.
24Tata, amejeira mono, hire oirahu ta meau, tetitoho veae aitoho; sura tereni na seu jehejehe oirahu ta meau; suria oimejeau mine na ulu movaere.
25O Tata tataholo, na ulu mosapinisiho mine: maa apinisiho mine, ra tajua naa tepinisi inau na pilamu Varisula.
26Apiseho mera mine, apiseho mera tohoreji: sura na meje oimejeau hina tomotoho mera pala inau aitoho mera.
હાલમાં પસંદ કરેલ:
Jon 17: TLM9109
Highlight
શેર કરો
નકલ કરો
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
