Jon 16
16
SOPENA 16.
1Ra sanu naa avarai amiu sura tisasihoi amiu.
2Tirahutuhe amiu pa me ra pea hina lotu hira Ju, io, na rani imalua ihisa isei moveimete amiu moninima movarao suri Atua.
3Ra sanu naa tevera pa me amiu suria tesapinisi mine na Tata, e inau.
4Maa ra sanu naa avarai amiu sura ihisa na rani imalua otoninima pa avarai amiu. Ra sanu naa asa-varai amiu me na majiha suria aitoho valui amiu.
5Maa naanoi alaho me na tahasulau, saite himiu motuhau, Oilaho veae?
6Maa suria avarai amiu ra sanu naa na jomi mosohoni ra lolomiu.
7Maa avarai amiu na taharahu: Motahonai me amiu alaho; suria va asalaho na Tahauma mosamalua pa me amiu; maa va alaho asulae pa me amiu
8Me na rani momalua movera pa tepinisi suri na veioso, suri na vei tataholo, suri na ilailahi:
9Suri na veioso suria tesarohoroho meau;
10Suri na veitataholo suria alaho me Tamau, otosata-reniau.
11Suri na ilailahi suria tiilailahi na varese hina ulu.
12Ameje na varai amiu ra sanu tari reji maa otosapinisi na rohora naanoi.
13Maa ihisa na Talume Tapu momalua mopise amiu pa na taharahu vunuvunu; suria mosatapuna Jalaa; maa te sanu morohoe pa molalaa nie; mopise amiu pa ra sanu temalua taupa.
14Mohaleau pa; molavi pa ra sipilau sanu, mopisera ta me amiu.
15Ra sanu vunuvunu pile Tata tepilau: suria aaso molavi ra sipilau sanu, mopisera pa me amiu.
16Tohotohosivo otosareniau; vahatea maa tohotohotaiti otoreniau pa suria alaho me, Tata.
17Natuha valura uluo hina teaso, Moaso na sava meja, Tohotohosivo otosareniau; vahatea maa tohotohotaiti otoreniau pa; suria alaho me Tata?
18Suria teaso, Moaso na sava? Tohotohotaiti? tosapinisi na sanu moaso.
19Iesu mopinisi temeje na tuhae, moaso mera, Ototu-hatuha amiu suri na sanu aaso, Tohotohosivo otosareniau; vahatea maa tohotohotaiti otoreniau pa?
20Motaharahu, aaso me amiu, Amiu ototahi pa, otojomi pa, maa na ulu moejieji pa: otojomi pa maa iali na semiu jomi me na ejieji
21Na lolona hajae mosahe me na rani na paule mola-hae suria na rani hina imalua; maa ihisa movatarae mosaninima na hajihaji hina suria moejieji na paule lamane momalua me na ulu.
22Suria naanoi ra lolomiu tesahe: maa atareni amiu, na lolomiu tejovi pa, na semiu ejieji saite tajua moravelujae.
23Me na rani natuha ototuhau pa sanu tipa. Motaharahu aaso me amiu, Te sanu vunu vunu ototuha Tamau me na hiseu morahu nie ta me amiu.
24Mine ototuha sanu tipa me na hiseu; otosituhatuha, otolavia pa sura semiu ejieji motavere.
25Ra sanu naa avarai amiu me na aso liholiho; maa na rani imalua asalalaa me amiu me na aso liholiho maa apise amiu majaraha suri na Tata.
26Me na rani natuha ototuhatuha me na hiseu; aaso me amiu, Amatapisi pa me Tata suri amiu.
27Na Tata momeje amiu suria otomejeau mine, suria otorohoroho mine amajuri me Atua.
28Amajuri me Tata, amalua me na ulu: rotea, ajuri na ulu, alaho me Tata.
29Ra uluo hina teaso mea, Naanoi oiaso majaraha, oisaaso liholiho.
30Naanoi topinisi oipinisi ra sanu vunuvunu, oisameje te tajua motuhaho suria na sanu naa torohoroho oimajuri me Atua.
31Iesu moaso liliu mera, Otorohoroho naanoi?
32Na rani imalua pa, io, imalua naanoi, otovajaja, ra tajua vunuvunu me na sipilana, otojuriau pa aitoho haseu: maa asatoho haseu suria na Tata movaluiau.
33Ra sanu naa varai amiu sura otololotamautu suriau. Me na ulu otolavi ra mamahanu; maa motahonai ra lolomiu tejovi; inau ajani na ulu mine.
હાલમાં પસંદ કરેલ:
Jon 16: TLM9109
Highlight
શેર કરો
નકલ કરો
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
