Jon 15
15
SOPENA 15.
1Inau na sihari-pata-ruru tahonai, Tamau na tahamata hina,
2Na rahana vunuvunu meau mosavae molavituhea; na rahana vunuvunu movae, mopuria, sura movae jivi mine.
3Otovoe suria na seu pisahi me amiu.
4Ototoho meau, inau me amiu. Palahi na rahana hau mosatapuna vae, va mosatoho me na vuna; otosapinisa vae, va otosatoho meau.
5Inau na sihari pata ruru, amiu ra rahana. Isei tomotoho meau, inau aitoho mea, inie movae tavere; suria tureau oto pinisi vei sanu tipa.
6Va te tajua mosatoho meau, tiputuhea pala rahana; mooru: ra tajua tevilehuhurera, tejurira me na hapu, mohanira.
7Va ototoho meau, aitoho me amiu, ototuha pa te sanu otomejeia, arahu nie ta me amiu.
8Paleeno otohale Tamau va otovae tavere; paleeno amiu ra uluo hiu.
9Palahi Tata momejeau, ameje amiu: ototoho me na seu meje.
10Va otorohoroho ra leo hauhaua hiu, ototoho pa me na seu meje: palahi aroho ra leo hauhaua hi Tamau, aitoho me na sena meje.
11Ra sanu naa avarai amiu sura na seu ejieji tomotoho me amiu, sura semiu ejieji motahajia.
12Na leo hauhaua hiu naano, Otosimejemeje amiu pala ameje amiu.
13Saite tajua momeje jivi te tajua isei mojuri na sena mauri suri ra tuana.
14Amiu ra tuau va otovera sanu vunuvunu aaso me amiu.
15Taupa asajuri amiu ra tahavarao: suria na tahavarao mosapinisi na varese hina movei na sava: maa ajuri amiu ra tuau: suria ra sanu vunuvunu arohora me Tamau apisera me amiu mine.
16Amiu otosalaviau, maa inau alavi amiu, asula amiu, sura otolaho, otovae tavere, sura vamiu tomotoho: sura te sanu vunuvunu ototuhai Tata me na hiseu, morahu nie ta me amiu.
17Ra sanu naa aaso hauhaua me amiu, Otomejemeje amiu.
18Va na ulu movotoa amiu, otopinisi movotoa nau mine movotoa amiu.
19Va amiu hina ulu, na ulu momeje ra sipilana: maa suria amiu otosapilana ulu, maa alavi amiu ture na ulu, suria na ulu movotoa amiu.
20Otoninima na leo avarai amiu, Na tahavarao mo-sasale jivi na varese hina. Va teveioso meau mine, teveioso me amiu pa mono; va teroho na loeu mine, teroho pa na loemiu mono.
21Maa ra sanu vunuvunu naa tevera pa me amiu suriau, suria tesapinisi na tahasulau.
22Va asasumai, asalalaa mera, tesaveivasoosoo: maa naanoi na popohina pilara veioso mojoa.
23Isei movotoa nau, movotoa Tamau mono.
24Va asavei ra sanu me na pahora saite valuna tajua movera, tesaveivasoosoo: maa naanoi tereniau me Tamau, tevotoa inau me Tamau.
25Maa na sanu naa imalua sura na leo motaraae tiulia me ra pilara leo hauhaua, Tevotoa nau suri sanu tipa.
26Maa me na rani na Tahauma monumai isei asulae me amiu momajuri me Tata, inie na Talume Taharahu isei monumai me Tata, movetiveti suriau.
27Amiu mono otovetiveti pa suria ototoho valuiau me na majihana.
હાલમાં પસંદ કરેલ:
Jon 15: TLM9109
Highlight
શેર કરો
નકલ કરો
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
