Luk 13
13
1Kơplah ei đei lu bơngai năm tơ noh roi kơ Yêsu tơdrong Pilat pơlôch lu bơngai Galilê kơplah lu sư oei sơmah kơ 'Bok Kei-Dei. 2Na Yêsu khan kơ lu sư: “Iĕm tơchĕng lu bơngai Galilê lôch thoi noh yua kơ lu sư bơngai yoch hloh 'biơ̆ kơ tơduă lu sư bơngai Galilê dah kiơ? 3Ưh kơ trŏ ôh. Mă-lei dah lu iĕm ưh kơ tơbral kơdih tơdrong yoch, lei đĭ-đăng kơ lu iĕm kư̆m lôch lei-lăi thoi lu sư mơ̆n ning-mônh. 4Pơtih gia dơ̆ng, lu mơjĭt-tơhngam 'nu mă lôch kơ hnam kơjung tơgơ̆ sơ̆ jê̆ đak dơnâu Silôm, iĕm tơchĕng lu sư bơngai yoch hloh 'biơ̆ kơ tơduă lu sư bơngai Jêrusalem dah kiơ? 5Ưh kơ trŏ ôh. Mă-lei dah lu iĕm ưh kơ tơbral kơdih tơdrong yoch, lei đĭ-đăng kơ lu iĕm kư̆m lôch lei-lăi thoi lu sư mơ̆n ning-mônh.”
Pơtih gia 'long hơra ưh kơ đei plei
6Yêsu pơma pơtih gia kơ tơdrong 'Bok Kei-Dei wă phak dah bơ̆n ưh kơ tơbral kơdih tơdrong yoch: “Đei minh 'nu bơngai rong minh tơnơm 'long hơra lăm pơgar sư. Na tơ'ngla sư năm chă lăng plei mă-lei 'nhŏ kơ đei. 7Na sư khan kơ bơngai wei-lăng pơgar sư noh thoi âu: ‘Pêng sơnăm kơ 'nâu boih tơm hơra inh âu 'nhŏ kơ mă đei plei 'biơ̆. Dang ei inh wă kơ ih kăl tŭk ăn kơ inh đĕch, pih pang lăp hrăt kơ pơgar đĕch.’ 8Na bơngai wei-lăng pơgar sư noh khan: ‘Ơ 'bok ah, sơnăm âu ba lê̆ kơ tam kăl 'mơ̆i, gô lăng inh sir hơbong tăp dăr wă tuh ĭch rơmo 'mơ̆i. 9Dah sư plei sơnăm anăp, lei lê̆. Dah ưh, ba kăl tŭk đĕch.’ ”
Yêsu pơklaih bơngai kơdŭ grŏn lăm năr pơdơh Sa'bat
10Lăm năr pơdơh Sa'bat ei Yêsu bơtho tơ hnam akŭm đe Juđê. 11Lăm hnam akŭm ei đei minh 'nu drŏ-kăn yang mơ̆t pơm kơ sư jĭ đĭ mơjĭt-tơhngam sơnăm boih, na sư jing kơdŭ grŏn pơm kơ sư pă gơh dơ̆ng tơpăt. 12Lăp Yêsu 'bôh bơngai drŏ-kăn ei, Sư khan: “Ơ yă, Inh pơklaih ih boih.”
13Đơ̆ng noh Yêsu pel hloi akâu sư na kơtă ei 'mrah jing gơh dơ̆ng tơpăt hloi. Na sư hloi pơma pơư pơang 'Bok Kei-Dei.
14Kră wei-lăng hnam akŭm ei 'bôh thoi noh na sư hil dêh yua kơ Yêsu pơklaih đe lăm năr pơdơh Sa'bat wă khan năr giĕng. Na 'bok ei khan kơ lu kon pơlei pơla mă oei akŭm 'bơ̆t ei thoi âu: “Lăm minh 'măng giĕng đei tơdrâu năr bơ̆n gơh jang, iĕm athei năm tơ âu ming akâu iĕm lăm tơdrâu năr ei đĕch. Iĕm ưh kơ gơh ming akâu iĕm lăm năr pơdơh Sa'bat ôh.”
15Kră Yang Yêsu tơl 'bok ei: “Ơ lu bơngai 'bơ̆r đak klak ŭnh, lăm năr pơdơh đĭ-đăng kơ iĕm yaih tơlĕch rơmo aseh iĕ iĕm puh pơnhă sư tơ đak. 16Na bơngai drŏ-kăn âu, sư kư̆m kon sâu Abraham thoi bơ̆n mơ̆n, mă-lei yang Satan dang kron sư ki mơjĭt-tơhngam sơnăm boih. Na Inh wă tơlĕch sư lăm năr pơdơh kư̆m trŏ tơpă.”
17Yêsu tơl thoi noh na lu bơngai mă areh kơ Yêsu mơlâu, mă-lei lu kon pơlei pơla chơt hiôk yua kơ 'bôh Sư pơm lơ tơdrong mơsêh mơyang mơnat kơ lu sư.
Pơtih gia kơ găr sơ'bei
18Klaih kơ noh Yêsu khan: “'Bok Kei-Dei pơgơ̆r kon bơngai thoi yơ? Bơ̆n chă tơdrong kiơ wă pơtih gia kơ tơdrong noh? 19Lu bơngai 'Bok Kei-Dei pơgơ̆r thoi lĕ găr sơ'bei iĕ ioch đe pơtăm tơ pơgar. Na lăp sư chăt boih, sư jing tih thoi lĕ minh tơnơm tơm 'long, na sem gơh pơm tơpu tơ dơng sư.”
Pơtih gia kơ 'buih pông
20Na Yêsu khan dơ̆ng: “Bơ̆n chă tơdrong kiơ dơ̆ng wă pơtih gia kơ 'Bok Kei-Dei pơgơ̆r kon bơngai? 21Tơdrong 'Bok Kei-Dei pơgơ̆r kon bơngai thoi lĕ kơ 'buih pông. Minh 'nu drŏ-kăn iŏk 'buih pông tŏ sĕt đĕch, bơlŭ păng tơpŭng mi minh kơthŭng, na tơpŭng noh kư̆m pông pơđĭ kơ minh kơthŭng noh mơ̆n.”
'Măng iĕ
22Yêsu năm tơ Pơlei Jêrusalem, Sư drong bơtho rah pơlei đe kiơ̆ trong Sư yak tơ ei. 23Đei bơngai jet Sư: “Ơ 'Bok, bơngai gơh klaih đơ̆ng tơdrong yoch lăp tŏ sĕt đĕch dah kiơ?”
Na Yêsu khan kơ lu sư: 24“Iĕm athei adrin mơ̆t trong 'măng iĕ bĕ yua kơ đei lơ bơngai nŏng wă mơ̆t ră ưh kơ gơh. 25Pơtih gia Inh mă 'Bok tơ'ngla hnam gô tang lê̆ 'măng, na lăp iĕm dơ̆ng dơdŭ 'măng 'bơ̆t 'ngoaih khan: ‘Ơ 'Bok, pơih ăn kơ nhôn 'măng,’ na Inh khan: ‘Inh ưh kơ băt iĕm đơ̆ng yơ.’ 26Na iĕm khan tơwih kơ Inh dơ̆ng: ‘Nhôn bơngai đơ̆ng đêl sŏng sa păng Ih lah. Ih kư̆m bơtho tơ pơlei nhôn.’ 27Na Inh tơl tơwih dơ̆ng: ‘Inh khan kơ iĕm tơpă, Inh ưh kơ băt kơ lu iĕm ôh. Weh tơ nai năm, iĕm bơngai kơnê̆ ngăl.’ 28Na lu iĕm gô hmoi tơkăp hơnĕnh pơmat-tat, yua kơ iĕm gô 'bôh Abraham, Isăk, Jakôp păng đĭ-đăng lu bơngai pơtruh nơ̆r 'Bok Kei-Dei sơ̆ tơ dêh char 'Bok Kei-Dei ning-mônh, mă-lei iĕm ưh kơ gơh năm tơ ei ôh. 29Kơplah ei ning-mônh gô đei lơ bơngai ưh kơ sĭ khŭl iĕm Juđê đơ̆ng jơ̆p-jang teh đak, đơ̆ng hơlĕch, đơ̆ng bơmơ̆t, đơ̆ng yă-nơ̆m, đơ̆ng gơal, na lu sư oei sŏng sa hơdai tơ dêh char 'Bok Kei-Dei. 30Thoi noh na đei lu bơngai mơ'nah pơm iĕ kơ đe dang ei, sư jing tih hloh kơ đe 'bơ̆t ei ning-mônh. Đei lu bơngai mơ'nah pơm tih hloh kơ đe dang ei, sư gô jing lŭch hloh kơ đe ning-mônh.”
Yêsu 'mêm mơnat kơ lu bơngai Pơlei Jêrusalem
31Kơplah Yêsu oei bơtho 'bơ̆t ei đei lu bơngai Pharisi năm tơ Sư păng khan: “Ih athei weh tơ nai yua kơ Hêrôt wă chă pơlôch Ih.”
32Na Yêsu khan: “Iĕm jah năm tơ 'bok hơlĕnh pơdăr noh khan kơ sư thoi âu: ‘Năr âu păng dơning Inh chă pơpuh yang kơnê̆ păng chă pơklaih đe jĭ jăn. Na năr dơmônh Inh đang tơdrong jang Inh boih.’
33“Mă năr âu, năr dơning, năr dơmônh Inh khŏm năm tơ Pơlei Jêrusalem 'mơ̆i. Lu nhôn bơngai pơtruh nơ̆r 'Bok Kei-Dei khŏm lôch kơ bơngai Pơlei Jêrusalem pơlôch ngăl.
34“Ơ lu bơngai Pơlei Jêrusalem, iĕm pơlôch kơ kiơ lu bơngai 'Bok Kei-Dei wơh pơtruh nơ̆r Sư kơ iĕm, iĕm iŏk tơmo klơ̆m pơlôch lu sư? Inh lung iĕm năm akŭm tơ Inh lơ wơ̆t boih ră, dang iĕr krao kon sư wă krôp ră, mă-lei iĕm kuă kơ năm. 35Na dang ei 'Bok Kei-Dei wă achăng tŭk pơlei iĕm boih. Inh khan kơ iĕm tơpă, iĕm pă 'bôh muh măt Inh boih tơ̆p truh năr Inh jur dơ̆ng ning-mônh na iĕm khan: ‘Ư-ang kơ Yêsu đơ̆ng 'Bok Kei-Dei wơh jur tơ bơ̆n dơ̆ng.’ ”
Yêsu pơklaih bơngai jĭ jăn lăm năr pơdơh Sa'bat
હાલમાં પસંદ કરેલ:
Luk 13: bdq
Highlight
શેર કરો
નકલ કરો
Want to have your highlights saved across all your devices? Sign up or sign in
©Bahnar Bible Association. All rights reserved.
