Luk 14
14
1Năr pơdơh Sa'bat ei Yêsu năm sŏng sa tơ hnam minh 'nu bơngai pơm kră kơ lu bơngai khŭl Pharisi. Na đe lăng Yêsu hnhong. 2Pă 'biơ̆ kơ 'nei 'bôh blư kơ minh 'nu bơngai jĭ pơpông năm tơ Yêsu. 3Na Yêsu jet hloi lu thây bơtho tơdrong juăt đe Juđê păng lu bơngai Pharisi thoi âu: “Kiơ̆ kơ tơdrong juăt bơ̆n, bơ̆n hăm gơh pơklaih đe jĭ jăn lăm năr pơdơh Sa'bat ưh?”
4Mă-lei thĕng kơ lu sư. Na Yêsu pơklaih hloi bơngai jĭ ei, na athei sư brŏk. 5Đơ̆ng noh Yêsu khan kơ lu đe ei: “Dah iĕm đei kon iĕm dah rơmo iĕm huŏng tơ sơlŭng đak lăm năr pơdơh, iĕm jur iŏk sư lăm năr pơdơh hloi mơ̆n dah kiơ?”
6Na hreh kơ lu sư pă gơh drơ̆ng.
Bơngai bu pơm ưh kơ hơnhŏ, sư 'noh boih đe gô pôk pơư kơ sư
7Kơplah lu sư wă tơoei sŏng sa, Yêsu 'bôh lu bơngai tơmoi chă lăng anih wă tơoei, lu sư mơ'nah pơm chă anih 'lơ̆ng 'lơ̆ng 'biơ̆. Na Yêsu pơma pơtih gia kơ đĭ-đăng lu sư thoi âu: 8“Dah đe wơ̆n iĕm năm sŏng sa lăm năr đe et pơkong, iĕm 'nĕ kơ chă tơoei anih rŏ rŏ hŏ, hli kơ đe wơ̆n bơngai pơm tih hloh kơ iĕm, 9na tơ'ngla mă wơ̆n iĕm noh hei năm khan kơ iĕm thoi âu: ‘Iĕm ăn kơ 'bok âu oei 'bơ̆t âu 'biơ̆.’ Na đơ̆ng noh iĕm mơlâu tơpă na iĕm oei oăi anih lŭch dơ̆ng kơ đe.
10“Dah đe wơ̆n iĕm sŏng sa, iĕm athei chă anih mă lŭch kơ đe hŏ, na tơ'ngla wơ̆n iĕm noh sư gô năm tơ iĕm păng khan: ‘Ơ ma, ih năm oei anih 'lơ̆ng to bĕ.’ Thoi noh na lu đe tơmoi nai kư̆m gô bơnê kơ iĕm mơ̆n. 11Yua kơ bơngai bu pơang akâu kơdih, sư gô mơlâu. Bơngai bu ưh kơ hơnhŏ, sư 'noh boih đe gô pôk pơư kơ sư.”
12Đơ̆ng noh Yêsu khan kơ bơngai wơ̆n sư ei: “Dah ih chă wơ̆n đe năm sŏng sa tơ hnam ih, ih 'nĕ kơ wơ̆n lu 'nhŏng oh, lu bôl juăt ih, lu bôl ih bơngai mơdrŏng hŏ, yua kơ lu sư gô wơ̆n plơ̆ ih dơ̆ng, na ih dang lĕ ưh kơ đei huach tơmam kiơ ôh. 13Dah ih chă wơ̆n đe năm sŏng sa tơ hnam ih, lei ih athei wơ̆n lu bơngai dơnuh hin, lu bơngai jơ̆ng jo go kơdŭ, lu bơngai măt tol. 14Na ih gô hiôk yua kơ lu sư ưh kơ gơh wơ̆n hơlơ̆k kơ ih dơ̆ng ôh. Na 'Bok Kei-Dei gô apah ih lăm năr lu bơngai 'lơ̆ng iung arih dơ̆ng ning-mônh.”
Pơtih gia kơ et sa tih
15Lăm minh 'nu mă oei sŏng sa hơdai Yêsu kơtơ̆ng thoi noh na khan kơ Yêsu: “Dôm lu bơ̆n mă sŏng sa tơ dêh char 'Bok Kei-Dei ning-mônh, hiôk dêh yơh.”
16Mă-lei Yêsu khan kơ sư thoi âu: “Đei minh 'nu bơngai wơ̆n đe sŏng sa tih tơ hnam sư. Sư wơ̆n lơ bơngai tơpă. 17Lăp hơmet wă jê̆ đang boih, na tơ'ngla sư 'nei wơh đam sư chă pơtruh kơ lu bơngai mă sư wơ̆n noh hei khan: ‘Năm bĕ lu iĕm, tơmam sa hơmet đĭ đang boih.’ 18Mă-lei đĭ-đăng lu sư pơm ưh kơ wăn ngăl. Bơngai blŭng-a sư khan tơwih kơ đam tơ'ngla tơm sŏng sa 'nei thoi âu: ‘Inh ưh kơ gơh năm yua kơ inh 'nao răt mir, na inh wă năm lăng mir inh 'nei 'mơ̆i. Inh dang ưh kơ chu ih ho.’ 19Đei bơngai nai dơ̆ng khan: ‘Inh 'nao răt pơđăm agrop rơmo, dang ei inh wă rơuơ lăng 'mơ̆i. Ih 'nĕ kơ jô̆ yo kơ inh ưh kơ wăn ho.’ 20Đei bơngai nai dơ̆ng khan: ‘Inh 'nao đei akăn na inh ưh kơ wăn.’
21“Đam 'nei brŏk brăi tơ hnam na sư roi kơ tơ'ngla sư dôm tơdrong 'nei. Na tơ'ngla sư kơtơ̆ng thoi ei, sư 'blut tơpă, na sư khan hloi kơ đam sư: ‘Ih dah chă năm rim kơ trong jơ̆p lăm pơlei âu chă krao wơ̆n lu bơngai dơnuh hin, lu bơngai jơ̆ng jo go kơdŭ, lu bơngai măt tol, tĕnh.’ 22Na đam 'nei hơloh yak chă krao đe hloi. Lăp chă krao đe đang boih na sư wih tơ hnam khan kơ tơ'ngla sư 'nei: ‘Ơ 'bok, inh chă krao lu đe noh hei boih, đĭ-đăng lu sư năm boih ră, mă-lei anih oei rơhơi 'mơ̆i.’ 23Na tơ'ngla sư 'nei khan kơ đam sư thoi âu dơ̆ng: ‘Ih lĕch đơ̆ng pơlei âu, ih chă năm jơ̆p kơ trong mă tơ yơ yơ, ih tơ'bơ̆p bu bu, ih dui pơđĭ kơ lu sư tơ âu tơ̆p mă 'bĕnh kơ hnam inh 'mơ̆i. 24Inh khan kơ iĕm tơpă, dôm lu bơngai mă inh wă wơ̆n hơdrol hei ră, lu sư ưh kơ đei bu gơh sa tơmam inh ôh.’ ”
Bơngai bu wă kiơ̆ Yêsu sư athei pơwao 'mơ̆i
25Đei tơpôl lơ tơpă yak kiơ̆ Yêsu. Na Yêsu hue tơ lu sư păng khan: 26“Bơngai bu wă kiơ̆ Inh, mă-lei sư 'mêm kơ mĕ 'bă sư, kon akăn sư, 'nhŏng oh sư hloh kơ sư 'mêm kơ Inh păng sư 'mêm kơ akâu sư kơdih, lei sư ưh kơ gơh jing bơngai kiơ̆ Inh ôh. 27Bơngai bu ưh kơ chu tôi 'long pơglang sư kơdih lôch kiơ̆ Inh, bơngai ei ưh kơ gơh jing bơngai kiơ̆ Inh ôh.
28“Pơtih gia dah iĕm wă pơm hnam tih kơjung, lei iĕm athei tơchĕng lăng hơdrol 'mơ̆i wă kơ băt huach dôm yơ, hli kơ jên iĕm ưh kơ mah kơ wă pơm. 29Dah iĕm ưh kơ đei tơchĕng hơdrol kơ pơm, na iĕm kư̆ kơ mă pơm đĕch, lei hli kơ iĕm kư̆ kơ tơiung đĕch, mă-lei ưh kơ pơkeh, na đĭ-đăng bơngai lu mă 'bôh hnam iĕm noh gô hiĕk achơ̆ kơ iĕm khan: 30‘Bơngai âu kư̆ kơ mă tơiung hnam sư đĕch, mă-lei ưh kơ đei tơmam wă pơkeh.’
31“Pơtih gia dơ̆ng, dah đei minh 'nu 'bok pơtao anhăk ba mơjĭt-rơbâu 'nu linh sư wă năm blah păng pơtao đe ayăt, na gah đe ayăt wă năm blah sư mơ̆n, lu linh đe ayăt dang 'bar-jĭt rơbâu, na 'bok pơtao ei athei tơchĕng hơdrol 'mơ̆i lu linh sư hăm kĕ ưh. 32Dah sư tơchĕng ưh kơ kĕ ôh, lei lăp linh đe ayăt oei ataih, sư gô wơh linh sư năm tơ'bơ̆p pơtao đe ayăt, lung sư wă huay kơ tơblah. 33Kư̆m thoi noh mơ̆n, iĕm athei tơchĕng hơdrol 'mơ̆i, yua kơ bơngai bu ưh kơ tŭk dôm tơdrong sư kơdih, bơngai ei ưh kơ gơh jing bơngai kiơ̆ Inh ôh.
Bơngai ưh kơ adrin kiơ̆ Yêsu sư thoi 'boh jing sap
34“'Boh boih tơmam 'lơ̆ng dêh, mă-lei dah 'boh jing sap, lei bơ̆n ưh kơ đei kiơ wă pơm kơ sư 'băt dơ̆ng. 35Thoi noh bơ̆n ưh pă gơh yua sư boih, mă tơ mir mă yua wă bơlŭ kơ ĭch rơmo. Na bơ̆n jing hŭt lê̆ đĕch. Dah iĕm đei đon, pơwao wăi.”
Triu hiong
હાલમાં પસંદ કરેલ:
Luk 14: bdq
Highlight
શેર કરો
નકલ કરો
Want to have your highlights saved across all your devices? Sign up or sign in
©Bahnar Bible Association. All rights reserved.
