Popular Bible Verses from Luk 14

શેર કરો

“Bơngai bu wă kiơ̆ Inh, mă-lei sư 'mêm kơ mĕ 'bă sư, kon akăn sư, 'nhŏng oh sư hloh kơ sư 'mêm kơ Inh păng sư 'mêm kơ akâu sư kơdih, lei sư ưh kơ gơh jing bơngai kiơ̆ Inh ôh.

Bơngai bu ưh kơ chu tôi 'long pơglang sư kơdih lôch kiơ̆ Inh, bơngai ei ưh kơ gơh jing bơngai kiơ̆ Inh ôh.

Yua kơ bơngai bu pơang akâu kơdih, sư gô mơlâu. Bơngai bu ưh kơ hơnhŏ, sư 'noh boih đe gô pôk pơư kơ sư.”

Kư̆m thoi noh mơ̆n, iĕm athei tơchĕng hơdrol 'mơ̆i, yua kơ bơngai bu ưh kơ tŭk dôm tơdrong sư kơdih, bơngai ei ưh kơ gơh jing bơngai kiơ̆ Inh ôh.

“Pơtih gia dah iĕm wă pơm hnam tih kơjung, lei iĕm athei tơchĕng lăng hơdrol 'mơ̆i wă kơ băt huach dôm yơ, hli kơ jên iĕm ưh kơ mah kơ wă pơm. Dah iĕm ưh kơ đei tơchĕng hơdrol kơ pơm, na iĕm kư̆ kơ mă pơm đĕch, lei hli kơ iĕm kư̆ kơ tơiung đĕch, mă-lei ưh kơ pơkeh, na đĭ-đăng bơngai lu mă 'bôh hnam iĕm noh gô hiĕk achơ̆ kơ iĕm khan: ‘Bơngai âu kư̆ kơ mă tơiung hnam sư đĕch, mă-lei ưh kơ đei tơmam wă pơkeh.’

Dah ih chă wơ̆n đe năm sŏng sa tơ hnam ih, lei ih athei wơ̆n lu bơngai dơnuh hin, lu bơngai jơ̆ng jo go kơdŭ, lu bơngai măt tol. Na ih gô hiôk yua kơ lu sư ưh kơ gơh wơ̆n hơlơ̆k kơ ih dơ̆ng ôh. Na 'Bok Kei-Dei gô apah ih lăm năr lu bơngai 'lơ̆ng iung arih dơ̆ng ning-mônh.”

“'Boh boih tơmam 'lơ̆ng dêh, mă-lei dah 'boh jing sap, lei bơ̆n ưh kơ đei kiơ wă pơm kơ sư 'băt dơ̆ng. Thoi noh bơ̆n ưh pă gơh yua sư boih, mă tơ mir mă yua wă bơlŭ kơ ĭch rơmo. Na bơ̆n jing hŭt lê̆ đĕch. Dah iĕm đei đon, pơwao wăi.”