Luk 15
15
1Đei lơ bơngai iŏk jên thuê̆ păng lơ bơngai yoch năm mơ̆ng Yêsu. 2Na lu bơngai Pharisi păng lu 'bok thây bơtho tơdrong juăt đe Juđê chă mơmơnh khan: “Bơngai âu pơm ăn kơ lu bơngai yoch mơ̆ng sư bơtho, kư̆m sŏng sa hơdai hăm sư mơ̆n.”
3Thoi noh na Yêsu pơma thoi âu:
4“Pơtih gia iĕm đei minh-hrĕng tŏ triu, na hiong minh pôm. Hăm trŏ kơ iĕm lê̆ tơsĭn-jĭt tơsĭn tŏ triu noh oei chă sa tơ tơmăn, na iĕm khŏm năm chă minh pôm hiong noh tơ̆p 'bôh 'mơ̆i? 5Na mưh iĕm chă 'bôh boih iĕm hiôk tơpă, iĕm tôi sư tơ sơngiĕng, 6brŏk tơ hnam. Đơ̆ng noh iĕm krao lu bôl buăl iĕm na khan: ‘Inh hiôk tơpă 'bôh triu inh mă đêl hiong boih ră.’ 7Kư̆m thoi noh mơ̆n, lu linh jang 'lơ̆ng tơ plĕnh, lu sư 'bôh minh 'nu bơngai yoch tơbral kơdih tơdrong yoch sư, lu sư hiôk hloh kơ 'bôh tơsĭn-jĭt tơsĭn 'nu bơngai 'lơ̆ng mă ưh kơ kăl kơ tơbral kơdih tơdrong yoch.
Jên hiong
8“Pơtih gia dơ̆ng, minh 'nu bơngai drŏ-kăn, sư đei mơjĭt hlak jên hu. Dah sư hiong minh hlak lăm hnam, hăm trŏ kơ sư tơ̆k ŭnh kơđeng na sơpuih chă khŏm khŏm tơ̆p mă 'bôh 'mơ̆i? 9Lăp sư 'bôh boih na sư krao lu bôl buăl sư na khan: ‘Inh hiôk tơpă, jên inh đêl hiong 'bôh boih.’ 10Kư̆m thoi noh mơ̆n lu linh jang 'lơ̆ng 'Bok Kei-Dei hiôk tơpă mă 'bôh minh 'nu bơngai yoch băt băi tơbral kơdih tơdrong yoch.”
Bơngai hiong
11Yêsu khan dơ̆ng: “Minh 'nu bơngai đei 'bar 'nu kon drŏ-nglo. 12Kon hơdruch apinh 'bă sư: ‘Klah asong mŭk tơmam kơ inh bĕ 'bă.’ Thoi noh 'bă sư klah asong mŭk tơmam kơ bre sư. 13Đơ̆ng rŏng kơ năr noh kon hơdruch sư iŏk dôm mŭk tơmam mă đêl 'bă sư ăn kơ sư, na jăk tơ dêh nai. Tơ ei sư pơm kư̆ kă, sư pơhuach đĭ mŭk tơmam sư. 14Truh mŭk tơmam sư đĭ boih, đei pơngot rơwĕt dêh truh tơ tơring 'nei. Sư jing bơngai dơnuh hin, 15na sư chă jang kơ đe. Minh 'nu bơngai lăm pơlei 'nei athei sư wei nhŭng tơ mir. 16Sư lăng nhŭng sa, sư 'ngeng hơdai 'maih sa mơ̆n, mă-lei kơbĭ bu mơnat kơ sư.
17“Thoi noh sư 'blŏk hơdơ̆r, na sư khan: ‘Lu bơngai jang kơ 'bă inh đei sŏng sa phĭ rơkah rơkai, mă-lei inh 'nâu wă lôch ngôi kơ rơwĕt. 18Dang ei inh wă iung brŏk, năm khan kơ 'bă inh 'mơ̆i: Ơ 'bă ah, inh pơm yoch hăm 'Bok Kei-Dei păng yoch hăm ih, 19ưh kơ trŏ ih krao kơ inh kon dơ̆ng boih. Apinh ih lăng inh thoi minh 'nu bơngai jang kơ ih đĕch.’
20“Klaih kơ noh sư iung brŏk hloi. Tam mă truh tơ hnam, oei ataih, mă-lei 'bă sư tơmang 'bôh sư boih. 'Bă sư lăng 'brơ̆k mơnat, na tơkan chŭm kuăr sư. 21Sư khan hloi kơ 'bă sư: ‘Ơ 'bă ah, inh pơm yoch hăm 'Bok Kei-Dei păng yoch hăm ih, ưh kơ trŏ ih krao kơ inh kon dơ̆ng boih.’ 22Mă-lei 'bă sư krao hloi lu bơngai jang kơ sư na sư khan: ‘Iŏk ao mă 'lơ̆ng bĕ, pơhrŭk ăn kơ sư. Iŏk tơkhiĕn tơ'bot ăn kơ sư păng pơtrô̆ ăn kơ sư chơkhŏ. 23Rôp kon rơmo bek bĕ, bơ̆n 'bet sa, wă kơ hiôk chơt, 24yua kơ kon inh nhen lĕ lôch boih, mă-lei arih dơ̆ng. Sư hiong boih, mă-lei dang ei 'bôh sư dơ̆ng.’ Thoi noh lu sư ngôi pơchơt băl hloi.
25“Mă-lei kon kơdră sư oei tơ mir. Truh sư brŏk wă jê̆ hnam sư boih, sư kơtơ̆ng đe hơri suang. 26Na sư krao minh 'nu bơngai jang kơ 'bă sư na jet: ‘Đei tơdrong kiơ?’ 27Bơngai noh tơl: ‘Oh ih brŏk tơ âu na 'bă ih 'bet kon rơmo bek yua kơ sư brŏk oei liĕm akâu 'lơ̆ng mơ̆n.’ 28Thoi noh 'nhŏng kơdră sư 'blut lăm jơhngơ̆m. Sư kuă kơ mơ̆t tơ hnam. 'Bă sư lĕch pơlung sư ră, 29mă-lei sư khan kơ 'bă sư: ‘Inh oei hơdai ih đunh boih, inh jang kơ ih păng ưh kơ pơjăng dôm nơ̆r ih athei inh ră. Mă-lei ih 'nhŏ mă đei ăn kơ inh minh pôm kon bơbe wă 'bet sa hơdai hăm lu buăl inh. 30Mă-lei tă tơ kon ih jăk tơ nai, pơhuach mŭk tơmam ih, ngôi kư̆ kă hăm lu drŏ-kăn đi, dang ei sư brŏk tơ âu, tă tơ sư dơ̆ng ih 'bet sa kon rơmo bek.
31“Mă-lei 'bă sư khan kơ sư: ‘Ơ dăm, e oei hơdai hăm inh ling-lang, dôm mŭk tơmam inh lê̆ đĭ kơ e. 32Trŏ mơ̆n ba ngôi păng oh e, yua kơ sư nhen lôch boih mă-lei dang ei sư arih dơ̆ng; sư hiong đơ̆ng ba, mă-lei dang ei ba 'bôh sư dơ̆ng.’ ”
Đam kơiĕng pơm ưh kơ tơpăt
હાલમાં પસંદ કરેલ:
Luk 15: bdq
Highlight
શેર કરો
નકલ કરો
Want to have your highlights saved across all your devices? Sign up or sign in
©Bahnar Bible Association. All rights reserved.
