Lik 18
18
Parabol En Ziz ek En Vev
1Zezi ti rakont zot en parabol pour montre ki fodre touzour priye e pa perdi kouraz. 2I ti dir, “Ti annan dan en lavil, en ziz ki pa ti ni annan respe pour Bondye, ni pran ka pour personn.
3Dan sa lavil, ti osi annan en vev ki pa ti aret vin dir li: Ziz! Donn mwan zizman kont mon ladverser! 4Pour en bon pe letan, sa ziz ti refize. Me apre i ti dir dan li menm: I vre ki mon napa respe pour Bondye e ki mon pa pran ka pour personn. 5Me akoz sa vev pe fatig mwan tro bokou, mon ava rann lazistis pour ki finalman i aret fatig mwan.”
6Senyer ti azoute, “Ekout byen sa ki sa move ziz ti dir. 7Eski Bondye pa pou rann lazistis bann ki i'n swazir e ki priy li lizour koman aswar? Eski i pou fer zot espere? 8Mon dir zot, i pou rann zot lazistis deswit.
Me kan Fis-de-Lonm pou vini, eski i pou trouv lafwa lo later?”
Parabol Farizyen ek Kolekter Taks
9Zezi ti dir ankor sa parabol pour en bann dimoun ki ti krwar zot zis devan Bondye e ki ti mepriz lezot, 10“De zonm ti mont dan Tanp pour priye. Enn ti en Farizyen e lot ti en kolekter taks. 11Sa Farizyen ti debout e priy dan li menm: Mon Bondye! Mon remersye ou ki mon pa parey leres bann zonm ki voler, enzis, adilter. Mon remersye ou osi akoz mon pa parey sa kolekter taks. 12Mon fer zenn de fwa par semenn, mon donn en dizyenm parti lo tou mon reveni.
13Sa kolekter taks ti reste lwen deryer. I pa ti menm oze lev lizye pour get lesyel, me i ti tap son lestoma e dir: Mon Bondye! Pran pitye pour mwan ki en peser!
14Mon dir zot, sa kolekter taks ti retourn kot li son pese pardonnen, me pa sa Farizyen. Annefe, tou dimoun ki esey pas pour pli enportan, pou ganny abese e bann ki abes zot, pou vin pli enportan.”
Zezi I Beni bann Pti Zanfan
(Mat 19.13-15; Mrk 10.13-16)
15Dimoun ti pe anmenn bann pti baba kot Zezi pour li tous zot. Me kan bann disip ti war sa, zot ti reprimann sa bann dimoun. 16Me Zezi ti fer vin sa bann zanfan kot li. I ti dir, “Les bann zanfan vin kot mwan; pa bezwen anpes zot. Annefe, Rwayonm Bondye i pour sa ki parey bann pti zanfan. 17Mon dir zot, sa i laverite: Sa enn ki pa akey Rwayonm Bondye parey en zanfan, pa pou zanmen antre.”
Zezi ek En Zonm Ris
(Mat 19.16-30; Mrk 10.17-31)
18En sef Zwif ti demann Zezi, “Bon Met! Ki fodre mon fer pour mwan erit lavi eternel?”
19Zezi ti dir li, “Akoz ou apel mwan bon? Personn pa bon. Zis Bondye ki bon. 20Ou konn bann komannman: Pa komet adilter, pa fer krim, pa vole, pa vin donn fo temwannyaz, respekte ou papa ek ou manman#18.20 War Egz 20.12-16; Det 5.16-20..”
21Sa zonm ti reponn li, “Tousala mon'n obzerve depi mon zenes.”
22Kan Zezi ti antann sa, i ti dir li, “Alor, i mank ou en sel keksoz: Vann tou sa ki ou posede e partaz sa larzan avek bann pov. Alor ou ava ganny en trezor dan lesyel. Apre vini, swiv mwan.”
23Kan sa zonm ti antann sa, i ti paret byen tris, akoz i ti tre ris.
24Zezi ti get li e i ti dir, “Koman i difisil pour bann ki annan bokou larises pour antre dan Rwayonm Bondye! 25Annefe, i pli fasil pour en samo pas par trou en zegwir, ki pour en dimoun ris antre dan Rwayonm Bondye.”
26Bann ki ti'n antann sa, ti demande, “Alor, lekel ki kapab ganny sove?”
27Zezi ti dir, “Sa ki pa posib pour zonm, i posib pour Bondye.”
28Alor, Pyer ti dir, “Nou, nou'n kit tou sa ki nou ti annan pour swiv ou.”
29Zezi ti dir zot, “Mon dir zot, sa i laverite: Sa enn ki'n kit lakaz, fanm, frer, paran oubyen zanfan, pour lakoz Rwayonm Bondye, 30pou ganny bokou plis an retour dan sa lepok prezan. E dan lemonn fitir, i pou resevwar lavi eternel.”
Zezi I Koz pour Trwazyenm Fwa lo Son Lanmor
(Mat 20.17-19; Mrk 10.32-34)
31Zezi ti anmenn son 12 disip alekar. I ti dir zot, “Ekout byen! Nou pe mont Zerizalenm, e tou sa ki bann profet in ekri lo Fis-de-Lonm pour ganny akonpli. 32Zot pou livre li avek bann non-Zwif ki pou monk li, maltret li e kras lo li. 33Zot pou fwet li e touy li, me trwazyenm zour i pou resisite.”
34Me son bann disip pa ti konpran nanryen lo tousala; sinifikasyon parol Zezi ti'n kasyet pour zot, e zot pa ti konpran sa ki Zezi ti oule dir.
Zezi I Geri En Aveg
(Mat 20.29-34; Mrk 10.46-52)
35Ler Zezi ti pe apros Zeriko, en aveg ti pe asize obor semen pe demann lomonn. 36I ti antann en lafoul pe pase e i ti demande ki pe arive.
37Zot ti dir li, “Zezi ki sorti Nazaret ki pe pase.”
38Alor i ti kriye, “Zezi, Garson David, pran pitye pour mwan!”
39Dimoun ki ti devan sa aveg ti reprimann li e dir li reste trankil. Me i ti kriy pli for ankor, “Garson David, pran pitye pour mwan.”
40Zezi ti arete e donn lord pour anmenn sa aveg kot li. Kan sa aveg ti devan li, Zezi ti demann li, 41“Ki ou ti ava kontan mon fer pour ou?”
I ti reponn, “Senyer, fer mwan war kler.”
42Zezi ti dir li, “Mon oule ki ou war kler. Ou lafwa in geri ou.”
43Deswit, i ti war kler, e i ti swiv Zezi e loue Bondye. Kan lafoul ti war sa, zot osi, zot ti loue Bondye.
હાલમાં પસંદ કરેલ:
Lik 18: BSK
Highlight
શેર કરો
નકલ કરો
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
