Lik 19

Zezi ek Zase

1Zezi ti antre dan Zeriko e travers lavil. 2La, ti annan en zonm ki ti apel Zase. I ti en sef kolekter taks e i ti ris. 3I ti pe rod en mannyer pour li war Zezi. Me akoz lafoul, i pa ti kapab, akoz i ti ptipti. 4Alor, i ti tay devan e mont lo en pye sikomor pour li kapab war Zezi ki ti pou pas par sa semen. 5Kan Zezi ti ariv dan sa landrwa, i ti get anler. I ti dir, “Zase! Desann deswit, akoz mon pe vin reste kot ou, ozordi.”

6Zase ti depese pour li desann, e i ti resevwar Zezi avek lazwa. 7Ler dimoun ti war sa, zot ti konmans mirmire, “I'n antre dan lakaz en zonm ki fer pese.”

8Me Zase ti debout e i ti dir avek Zezi, “Senyer! Mon pou donn bann pov lanmwatye mon larises. Si mon'n tronp okenn dimoun dan nenport mannyer, mon pou rann li kat fwa plis.”

9Zezi ti dir li, “Ozordi, delivrans in ariv dan sa lakaz, akoz sa zonm osi, i en zanfan Abrahanm. 10Annefe, Fis-de-Lonm in vin pour li rod e sov sa enn ki ti'n perdi.”

Parabol Larzan

(Mat 25.14-30)

11Letan dimoun ti pe ekout li, Zezi ti rakont zot en lot parabol. Annefe, i ti pre avek Zerizalenm, e dimoun ti krwar ki Rwayonm Bondye ti pou ariv deswit. 12Alor, Zezi ti rakonte, “En zonm, sorti dan en fanmir nob, ti al dan en pei lwen pour li ganny kouronnen koman lerwa; i ti devre answit retournen. 13I ti apel dis son bann serviter, e donn sakenn en pyes lor. I ti dir zot: Fer komers avek sa larzan, ziska ki mon retournen.

14Me bann sitwayen ti deteste li. Zot ti anvoy en delegasyon deryer li pour dir: Nou pa oule sa zonm koman nou lerwa.

15Apre ki sa zonm ti'n ganny kouronnen lerwa, i ti retournen. I ti ordonn bann serviter ki i ti'n donn larzan, pour vin devan li, pour li konnen ki benefis zot ti'n fer. 16Premye ti vin devan li. I ti dir: Senyer! Mon'n fer dis fwa plis avek sa pyes lor ki ou ti'n donn mwan.

17Lerwa ti dir li: Ou'n byen fer; ou en bon serviter! Akoz ou'n fidel dan en pti keksoz, mon pou met ou ansarz dis lavil.

18Dezyenm ti vini. I ti dir li: Senyer! Mon'n fer senk fwa plis avek sa pyes lor ki ou ti donn mwan.

19Lerwa ti dir li: Ou, mon pou met ou ansarz senk lavil.

20En lot serviter ti vin dir li: Senyer! La ou pyes lor ki mon ti'n kasyet dan en lenz. 21Mon ti per ou akoz ou en zonm sever; ou pran sa ki pa pour ou, e rekolte sa ki ou pa'n senmen.

22Lerwa ti dir li: Ou move serviter! Mon pou ziz ou par ou prop parol! Ou ti konnen ki mon en zonm sever, ki mon pran sa ki pa pour mwan, e rekolte sa ki mon pa'n senmen. 23Alor, akoz ou pa ti met mon larzan dan en labank? Konmsa, kan mon ti ava retournen, mon ti ava ganny sa larzan avek son lentere?”

24Zezi ti dir avek bann dimoun ki ti la, “Pran sa pyes lor avek li e donn avek sa enn ki annan dis.”

25Zot ti dir li, “Senyer! I deza annan dis pyes!”

26Zezi ti reponn, “Mon dir zot, sa enn ki annan, pou ganny plis ankor. Me sa enn ki napa, i pou ganny arase sa pti gin ki i annan. 27Kanta mon bann lennmi ki pa ti oule mwan koman zot lerwa, anmenn zot isi e touy zot devan mwan.”

Zezi I Antre Zerizalenm

(Mat 21.1-11; Mrk 11.1-11; Zn 12.12-19)

28Kan Zezi ti'n fini koze, i ti al devan lafoul e pran semen ki mont Zerizalenm.

29Kan i ti ariv pre Betfaze ek Betani, pre montanny Zolivye#19.29 War Mrk 11.1., Zezi ti anvoy de son bann disip. 30I ti dir zot, “Al dan sa vilaz ki devan zot. Koman zot ava antre, zot ava war en pti bourik anmare, ki personn pa'n deza monte. Delarg li e anmenn li isi. 31Si en dimoun i demann zot akoz zot pe delarg li, zot ava reponn: Senyer i bezwen li.”

32Bann ki ti ganny anvoye, ti war tou parey Zezi ti'n dir zot. 33Kan zot ti pe delarg sa pti bourik, son bann met ti demann zot, “Akoz zot pe delarg sa bourik?”

34Zot ti reponn, “Senyer i bezwen li.”

35Zot ti anmenn sa bourik kot Zezi. Zot ti met zot lenz lo sa pti bourik e fer Zezi mont lo li. 36Letan i ti pe ale, dimoun ti tal zot lenz lo semen.

37Kan Zezi ti pe apros Zerizalenm, an desandan montanny Zolivye, lafoul disip ti ranpli avek lazwa e zot ti loue Bondye avek tou zot lafors pour tou sa bann mervey ki zot ti'n war. 38Zot ti dir, “I ganny beni sa Lerwa ki vin lo non Senyer! Lape dan lesyel e laglwar dan pli o lesyel!”

39Detrwa Farizyen dan lafoul ti dir avek Zezi, “Met! Fer ou bann disip reste trankil.”

40Zezi ti reponn, “Mon dir zot, si bann disip i reste trankil, bann ros ki pou kriye.”

Zezi I Plere lo Zerizalenm

41Kan Zezi ti apros Zerizalenm, i ti get sa lavil e i ti plere. 42I ti dir, “Si ozordi ou ti konnen ou osi, ki mannyer pour trouv lape! Me aprezan in ganny kasyet pour ou! 43Annefe, bann zour pou arive pour ou, kan ou bann lennmi pou barikad ou e anserkle ou lo tou kote. 44Zot pou kraz ou ek tou ou bann zanfan. Pa en sel ou bann ros pou reste an plas, akoz ou pa ti rekonnet letan Bondye ti vini, pour li sekour ou.”

Zezi dan Tanp

(Mat 21.12-17; Mrk 11.15-19; Zn 2.13-22)

45Zezi ti antre dan Tanp e konmans sas bann marsan. 46I ti dir zot, “I'n ekri: Mon lakaz i ava en lakaz lapriyer. Me zot, zot in fer li vin en kavern voler.”

47Tou le zour, Zezi ti vin ansennyen dan Tanp. Bann gran-pret, profeser Lalwa ek bann sef parmi lepep, ti rod mannyer pour touy Zezi. 48Me zot pa ti war okenn fason fer li, akoz tou dimoun ti ekout Zezi avek bokou latansyon.

હાલમાં પસંદ કરેલ:

Lik 19: BSK

Highlight

શેર કરો

નકલ કરો