Lik 17
17
Lansennyman Zezi lo Tantasyon
(Mat 18.6-7, 21-22; Mrk 9.42)
1Zezi ti dir avek son bann disip, “San okenn dout, dimoun pou touzour ganny tante. Me, maler pour sa enn ki fer son kanmarad tonbe! 2I ti ava preferab pour li si en gro ros ti ganny anmare otour son likou e ganny zete dan lanmer, plito ki fer enn parmi sa bann zanfan tonm dan pese.
3Fer byen atansyon: Si ou frer in ofans ou, reprimann li, e si i regrete, pardonn li. 4Si i fer ou ditor set fwa dan en lazournen e set fwa i vin dir ou: Mon regrete. Ou bezwen pardonn li.”
Lafwa
5Bann zapot ti dir avek Zezi, “Ogmant nou lafwa!”
6Zezi ti dir zot, “Si zot lafwa ti groser en lagrenn moutard, zot ti ava kapab dir avek sa pye dibwa: Derasin ou e al plant ou dan lanmer! I ti ava obei zot.
7Lekel parmi zot, si i ti annan en serviter ki ti travay dan son plantasyon, oubyen vey son mouton, ki ti ava dir li, kan i sorti travay dan plantasyon: Depese vin atab pour manze? 8Pa i ava plito dir li: Prepar mon manze; apre sanze e vin servi mwan. Kan mon ava'n fini manze e bwar, apre, ou ava manze e bwar.
9Ou pa remersye ou serviter akoz i'n fer sa ki i'n ganny ordonnen pour fer. 10Alor, zot osi, kan zot in fini fer sa ki zot ti'n ganny ordonnen pour fer, dir dan zot menm: Nou senpleman en bann serviter initil; nou'n zis fer nou devwar.”
Zezi I Geri Dis Lepre
11Kan Zezi ti pe al Zerizalenm, i ti pas ant Samari ek Galile. 12I ti pe antre dan en vilaz, kan dis zonm ki ti annan en maladi ki parey lalep ti vin zwenn li. Zot ti debout en distans#17.12 War Lev 13.45-46. avek li, 13lev zot lavwa e kriye, “Zezi, Met! Pran pitye pour nou.”
14Kan Zezi ti war zot, i ti dir zot, “Al montre zot avek bann pret#17.14 War Lev 14.2-3..”
Pandan ki zot ti pe ale, zot ti ganny geri.
15Kan enn parmi zot ti war ki i ti'n geri, i ti retournen e loue Bondye avek en lavwa for. 16I ti tonm lafas ater kot lipye Zezi e i ti remersye li. Sa zonm ti en Samariten.
17Zezi ti demann li, “Eski tou le dis pa'n ganny geri? Oli lezot nef? 18Personn pa'n retournen pour vin remersye Bondye apar sa etranze?”
19Alor, Zezi ti dir li, “Leve, ale! Ou lafwa in sov ou.”
Letablisman Rwayonm Bondye
(Mat 24.23-28, 37-41)
20Bann Farizyen ti demann Zezi kan Rwayonm Bondye pou vini. I ti reponn zot, “Rwayonm Bondye pa pou vini par bann siny ki ou kapab war. 21Personn pa pou kapab dir: Gete! La i isi. Oubyen: La i laba.
Annefe, Rwayonm Bondye i parmi zot.”
22Zezi ti dir ankor avek son bann disip, “Ler pou arive kan zot pou anvi war Fis-de-Lonm zis en zour parmi zot; me zot pa pou war li. 23Dimoun pou dir zot: La i laba! Oubyen: La i isi!
Pa bezwen ale; pa swiv zot. 24Parey zekler i klate e i ekler lesyel depi en bout ziska lot, zour Fis-de-Lonm pou arive, i pou parey. 25Me avan, i pou soufer en kantite e ganny rezete par sa zenerasyon.
26Sa ki ti arive dan lepok Noe, i pou osi arive dan lepok Fis-de-Lonm. 27Dimoun ti manze, bwar, marye e donn an maryaz ziska zour ki Noe ti antre dan lars e deliz ti arive e detri zot tou#17.27 War Zen 6.5-12; 7.6-23..
28I pou parey i ti ete dan lepok Lot: Dimoun ti pe manze, bwar, aste, vann, plante, konstri. 29Me zour Lot ti kit lavil Sodonm, dife ek souf ti sorti dan lesyel e tonbe parey lapli, e tou dimoun ti ganny detri#17.29 War Zen 18.9—19.25.. 30I pou parey, zour ki Fis-de-Lonm pou aparet.
31Sa zour, sa enn ki lo twa son lakaz, pa desann pour vin pran son bann zafer dan son lakaz. Demenm, sa enn ki dan son plantasyon pa retourn kot li. 32Rapel zot byen fanm Lot#17.32 War Zen 19.26.!
33Sa enn ki fer fason sov son prop lavi, pou perdi li, me sa enn ki perdi son lavi, pou prezerv li. 34Mon dir zot, sa swar pou annan de dimoun ki pe dormi lo menm lili; enn pou ganny pran, e lot kite. 35Pou annan de fanm ki pe travay ansanm lo moulen, enn pou ganny pran e lot kite. 36Pou annan de zonm ki pe travay dan plantasyon, enn pou ganny anmennen e lot pou ganny kite#17.36 Napa sa verse dan plizyer ansyen maniskri. War Mat 24.40..”
37Bann disip ti demann li, “Senyer, kote sa pou arive?”
I ti dir zot, “Votour pou rasanble la kot i annan kadav.”
હાલમાં પસંદ કરેલ:
Lik 17: BSK
Highlight
શેર કરો
નકલ કરો
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
