Lik 16
16
Parabol Administrater Malen
1Zezi ti osi dir son bann disip sa parabol, “Ti annan en zonm ris. Dimoun ti vin raporte ki son administrater ti pe gaspiy son byen. 2I ti fer apel li e dir li: Ki sa bann rapor ki mon pe gannyen lo ou? Donn mwan en kont lo ou administrasyon, akoz ou pa pou kapab kontinyen koman administrater.
3Sa administrater ti dir dan li menm: Ki mon pou fer? Mon bourzwa pe al met mwan deor. Mon pa ase for pour travay labourer e mon onte pour mwan al mandyan. 4Mon konnen ki mon pou fer, pour dimoun byen resevwar mwan kot zot, kan mon ava'n perdi mon travay.
5Alor, i ti apel enn par enn, tou sa bann ki ti dwa son bourzwa. I ti demann avek premye: Konbyen ou dwa mon bourzwa?
6I ti reponn: 100 barik delwil. Sa administrater ti dir li: Pran ou kont, asize, deswit ekri 50.
7Apre i ti demann avek en lot: Ou, konbyen ou dwa?
Sa enn ti reponn, 100 sak dible.
I ti dir li: Pran ou kont, ekri 80.
8Bourzwa sa administrater malonnet ti felisit li pour fason malen ki i ti'n azir. Annefe, bann zanfan lemonn, zot pli malen dan zot zafer, ki bann zanfan lalimyer.”
9Alor Zezi ti azoute, “Mon dir zot, servi larzan malaki pour fer zanmi. Konmsa, kan pou nepli annan larzan, sa bann zanmi ava resevwar ou dan zot demer eternel.
10Sa enn ki onnet dan pti keksoz, i osi onnet dan zafer pli enportan. Sa enn ki malonnet dan pti keksoz i osi malonnet dan sa ki pli enportan. 11Alor, si ou pa'n onnet dan sa ki konsern byen malaki, lekel ki pou konfye ou bann vre larises?
12Si ou pa'n kapab rann kont byen lezot, lekel ki pou fer ou konfyans avek ou prop byen?
13En serviter pa kapab servi de met; swa i pou ay enn e kontan lot, swa i pou devoue anver enn e mepriz lot. Ou pa kapab servi Bondye ek larzan anmenmtan.”
Zezi I Averti bann Farizyen
(Mat 11.12-13; 5.31-32; Mrk 10.11-12)
14Bann Farizyen ki ti kontan larzan, ti gognard Zezi kan zot ti antann tousala. 15Me Zezi ti dir zot, “Zot parmi bann dimoun ki fer zot pas pour zis, me Bondye i konn zot leker. Annefe, i deteste sa ki zonm i konsider gran.
16Sa ki'n ekri dan Lalwa e dan liv bann profet ti valab ziska lepok Zan. Depi sa, Bonn Nouvel konsernan Rwayonm Bondye in ganny anonse e tou dimoun i bezwen fer gro zefor pour antre. 17I pli fasil pour lesyel ek later disparet, ki pour en sel pti pwen Lalwa ganny aboli.
18En zonm ki divors son fanm e ki marye avek en lot i komet adilter, e en zonm ki marye avek en fanm divorse, li osi, i komet adilter.”
Parabol Zonm Ris ek Lazar
19“En fwa, ti annan en zonm ris ki ti touzour abiy dan bann zoli lenz ser, fer avek pli zoli latwal linenn fen. I ti pe fer lafet tou le zour.
20En zonm pov, ki ti apel Lazar, kouver avek boubou, ti pe dormi devan son laport. 21Lazar ti ava kontan ganny en pe sa manze ki ti tonm depi latab sa zonm ris. Me lisyen ki ti vin lis son bann boubou.
22En zour, sa pov zonm ti mor e bann lanz ti anmenn li kot Abrahanm. Sa zonm ris osi ti mor e zot ti anter li. 23Dan lemonn lanmor kot i ti ete, i ti pe soufer bokou. I ti lev lizye e i ti war Abrahanm dan lwen ek Lazar obor li. 24I ti kriy for: Per Abrahanm! Pran pitye pour mwan! Anvoy Lazar tranp son bout ledwa dan delo pour vin rafresir mon lalang, akoz mon pe soufer bokou dan sa laflanm.
25Abrahanm ti reponn li: Mon garson! Rapel ou byen ki pandan ou lavi, ou ti ganny toudsort bon keksoz, tandis ki Lazar ti ganny bokou maler. Aprezan, i pe ganny son konsolasyon, e ou, ou pe soufer. 26An plis ki sa, en gran labim i separ nou avek ou. Personn pa kapab traverse pour vin kot ou, ni sorti kot ou pour vin kot nou.
27Sa zonm ris ti dir: Alor, Papa Abrahanm, mon sipliy ou! Anvoy Lazar dan lakour, kot mon papa, 28kot mon annan senk frer. Dir li averti zot, pangar zot osi, zot ava vin dan sa landrwa soufrans.
29Me Abrahanm ti reponn: Zot annan Moiz ek bann profet pour zot ekoute.
30Sa zonm ris ti reponn: Non, Papa Abrahanm. Me si en dimoun ki'n mor, i al kot zot, zot ava sanz zot lavi.
31Abrahanm ti reponn: Si zot pa oule ekout Moiz ek bann profet, zot pa pou krwar menm si en mor i resisite.”
હાલમાં પસંદ કરેલ:
Lik 16: BSK
Highlight
શેર કરો
નકલ કરો
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
