Lik 15
15
Parabol Mouton Perdi
(Mat 18.12-14)
1Bann kolekter taks ek bann dimoun move repitasyon ti pe apros kot Zezi pour ekout li. 2Bann Farizyen ek bann profeser Lalwa ti mirmire, “Sa zonm i frekant bann zans move repitasyon, e i manz avek zot.”
3Alor Zezi ti dir zot sa parabol, 4“Lekel parmi zot si i annan 100 mouton e i perdi enn, pa pou kit sa 99 dan laplenn, pour al rod sa enn ki'n perdi, ziska ki i retrouv li? 5Kan i'n retrouv sa mouton, avek kontantman, i met li lo son zepol. 6Kan i ariv se li, i apel son bann zanmi ek bann vwazen. I dir zot: Annou fete, mon'n retrouv mon mouton ki ti'n perdi.
7Mon dir zot: Dan menm fason, i pou annan plis lazwa dan lesyel pour en sel peser ki sanz son lavi, ki pour 99 dimoun zis ki pa bezwen sanz zot lavi.”
Larzan Perdi
8“Lekel sa fanm ki annan dis pyes larzan ki, si i perdi enn, pa alim lalanp, balye lakaz e rod avek swen, ziska ki i retrouv li? 9Kan i'n retrouv son larzan, i apel son bann zanmi ek vwazen e i dir zot: Annou fete, akoz mon'n retrouv mon larzan ki mon ti'n perdi.
10Mon dir zot, i parey dan lesyel: Bann lanz Bondye i kontan kan en sel peser i sanz son lavi.”
Parabol Garson Perdi e Retrouve
11Zezi ti dir ankor, “En zonm ti annan de garson. 12Sa enn pli zenn ti dir avek son papa: Papa, donn mwan mon par bann byen ki devre vin pour mwan.
Alor, sa papa ti partaz son byen ant son de garson.
13Detrwa zour apre, sa zenn garson ti vann tou sa ki i ti'n gannyen e antreprann en vwayaz pour en pei byen lwen. Laba, i ti goberz tou son larzan dan en lavi dezordonnen. 14Kan i ti'n depans tou sa ki i ti annan, en lafanmin terib ti arive dan sa pei, e pa ti reste li nanryen. 15Alor, i ti al rod travay kot enn bann zabitan sa pei, ki ti anvoy li lo son laferm pour vey koson. 16I ti ava byen kontan manz sa bann gous ki koson ti pe manze, me personn pa ti donn li nanryen.
17En zour i ti dir dan li menm: Konbyen travayer kot mon papa ki annan plis ki dekwa manze, e mwan, mon pe mor lafen isi! 18Mon pou leve, mon pou al kot mon papa e mon pou dir li: Papa, mon'n mal azir kont Bondye e kont ou. 19Mon pa merite pour ganny apele ou garson. Tret mwan parey enn ou bann travayer.
20Alor, i ti leve e retourn kot son papa.
I ti ankor ase lwen avek lakour, kan son papa ti war li. Son leker ti touse avek konpasyon. I ti taye, ser son garson dan son lebra e anbras li. 21Son garson ti dir li: Papa, mon'n mal azir kont Bondye e kont ou. Mon pa merite pour ganny apele ou garson.
22Me son papa ti dir bann serviter: Depese, anmenn pli zoli rob pour met li. Met en bag dan son ledwa e met li son sandal dan son lipye. 23Anmenn sa zenn bef ki nou'n angrese, e touy li. Annou manze, annou fete! 24Mon garson ki ti'n mor, i vivan; i ti'n perdi, mon'n retrouv li. E lafet ti konmanse.
25Pandan sa letan, lene garson ti dan plantasyon. Kan i ti retournen e ariv pre avek lakour, i ti antann tapaz lanmizik ek ladans. 26I ti apel enn bann serviter pour demann en leksplikasyon lo sa ki ti pe pase. 27Sa serviter ti reponn li: Ou frer i'n retournen e ou papa in fer touy sa zenn bef ki zot ti'n angrese, akoz i'n retrouv li sen e sof.
28Lene garson ti byen ankoler. I ti refize antre. Son papa ti sorti e sipliy li pour antre. 29Alor, i ti reponn son papa: Tou sa bann lannen ki mon'n travay pour ou, zanmen mon'n dezobei ou lord. Ou pa'n zanmen donn mwan ni menm en kabri pour mwan fete avek mon bann zanmi. 30Me kan li, ou garson ki'n goberz tou ou byen avek bann prostitye i retournen, pour li, ou touy sa zenn bef ki nou'n angrese!
31Son papa ti dir li: Mon garson! Ou touzour isi avek mwan, e tou sa ki mon posede i pour ou. 32I tou zis ki nou fete e kontan, akoz ou frer ki ti'n mor i'n reganny lavi, i ti'n perdi e i'n ganny retrouve.”
હાલમાં પસંદ કરેલ:
Lik 15: BSK
Highlight
શેર કરો
નકલ કરો
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
