Luke 4

Sa dauveretaki Jisu na tevoro, 1-13. Sa vakatekivu ko Jisu me vunau, 14-32. Sa vakabulai ira e lewe vuqa era sa tauvi-mate, 33-44.

1IA ni sa sinai ko Jisu e na Yalo Tabu, sa lesu tale mai na Joritani, a sa kauti koya na Yalo ki na loma ni veikau, 2a sa dauveretaki koya ko na tevoro ka bogi vasagavulu. A sa sega na ka e kania ko koya e na veisiga ko ya: ia ni sa oti sa qai viakana. 3A sa kaya na tevoro vei koya, Kevaka ko sa Luve ni Kalou, mo kaya mada me tubu mei buli madrai na vatu o qo. 4A sa vosa vua ko Jisu, ka kaya, Sa volai, Ena sega ni bula na tamata e na madrai duaduaga, a ya e na ka kecega sa lesia ko na Kalou.

5A sa kauti koya ko na tevoro ki na dua na ulu-ni-vanua cecere, a sa vakaraitaka vei koya vakasauri sara na veimatanitu kecega e vuravura. 6Sa qai kaya na tevoro vei koya, A lewa ni ka kecega o qori kaʼu na solia vei iko, kei na kedrai ukuuku talega, ni sa soli vei au, ia kaʼu sa solia vei koya yadua kaʼu sa via solia kina: 7ia kevaka ko na soro vei au, ena nomu kecega. 8A sa vosa vua ko Jisu, ka kaya, Mo lakani ki dakuqu, Satani: ni sa volai, Mo soro vei Jiova na nomu Kalou, ia mo qaravi koya duaduaga.

9A sa kauti koya ki Jerusalemi, ka vakatikora e na taba ni vale ni soro, a sa kaya vua, Kevaka ko sa Luve ni Kalou, mo rika sobu eke; 10ni sa volai, Ena vakarota ko koya vei ira na nona agilose e na vukumu, me ra maroroi iko: 11ia era na keveti iko e na ligadra, de dua na siga ko tavutu beka kina na yavamu e na vatu. 12A sa vosa ko Jisu, ka kaya vua, Sa kainaki, Mo kakua ni vakatovolei Jiova vakaca na nomu Kalou.

13Ia ni sa vakaotia kecega na dauvere ko na tevoro, sa lako tani vua ka yacova e dua na gauna.

14A SA lesu tale ko Jisu e na kaukauwa ni Yalo ki Kalili; a sa kuruvaki na kenai rogorogo ki na vanua taucoko sa vakavolivolita. 15A sa vakatavuvuli tiko e na nodra veivale ni lotu, a ra sa dokai koya ko ira kecega.

16A sa yaco ki Nasareci, a koro ka susugi kina: ia me vaka na nonai valavala, sa curu ki na vale ni lotu e na siga ni vakacecegu, a sa tu cake me wili vola. 17A sa soli vua nai vola nei Isaia na parofita. Ia ni sa tevuka nai vola, sa kunea na tikina sa volai kina, 18Sa tu vei au na Yalo i Jiova, e na vuku ni sa lumuti au ko koya meʼu vunautaka nai tukutuku-vinaka vei ira era sa dravudravua; sa talai au mai meʼu vakabulai ira sa kavoro na yalodra, meʼu vunautaka ua sereki vei ira na bobula, kei na rai tale vei ira era sa mataboko, meʼu vakalala-gataki ira era sa mavoa, 19meʼu vunautaka na yabaki vinaka i Jiova. 20A sa viviga nai vola, a sa solia tale vua nai talatala, a sa tiko sobu; a sa vakaraici koya matua na matadra kecega era tiko e na vale ni lotu.

21A sa vakatekivu ko koya me kaya vei ira, E na siga o qo sa vakayacori e na daligamudou nai vola o qo. 22A ra sa vakadinadina vua ko ira kecega, a ra sa kidacala e na vuku ni vosa vinaka sa lako mai na gusuna. A ra sa kaya, Sa sega li ni luve i Josefa ko koya o qo? 23A sa kaya vei ira ko koya, E dina ga dou na vosataka vei au nai bole o qo, Vu-ni-wai, mo mani vakabulai iko: a ka kecega eda sa rogoca sa caka mai Kaperinaumi, kitaka talega e na nomu vanua o qo. 24Sa kaya talega ko koya, Au sa kaya vakaidina vei kemudou, Sa sega e dua na parofita sa vinakati e na nona vanua. 25Ia kaʼu sa vosa dina vei kemudou, Era lewe vuqa na yada e Isireli e na gauna i Ilija, ni sa sogoti ko lomalagi ka yabaki tolu kei na vula e ono, ni sa dausiga vakalevu na vanua taucoko; 26a sa sega ni talai ko Ilija vua e dua vei ira, vua ga e dua na yada mai Sarepita, e na yasayasa vaka-Saitoni. 27A sa lewe vuqa talega na vukavuka e Isireli e na gauna i Ilisa na parofita; a sa sega e dua vei ira sa vakasavasavataki, o Neemani ga na kai Siria.

28Ia ko ira kecega e na vale ni lotu, ni ra sa rogoca na veika o qo, era sa sinai e na cudru, 29a ra sa tu cake, ka vakasavi koya ki nai bili ni koro, a ra sa kauta ki na bati ni ulu-ni-vanua sa tara tu kina na nodra koro, me ra biliga mai na bati-ni-savu. 30A sa lako ko koya e na kedra maliwa, ka lako tani yani.

31A sa lako sobu ki Kaperinaumi, a koro mai Kalili, a sa vakatavuvuli e na veisiga ni vakacecegu. 32A ra sa kidacala e na nonai vakavuvuli, ni sa vosa ko koya e na kaukauwa vakai koya.

33A sa tiko e na vale ni lotu e dua na tamata, ka curumi koya na yalo ni dua na tevoro tawa-savasava, a sa qoqolou e na domo levu, 34ka kaya, Ule! a cava vei kedatou, i Jisu na kai Nasareci? o sa lako beka mai me rawai keitou? au sa kila se ko cei ko iko, na Yalosavasava ni Kalou. 35A sa vunauci koya ko Jisu, ka kaya, Mo galu ga, ka lako tani mai vua. Ia ni sa vakabalei koya oti na tevoro e na kedra maliwa, sa qai lako tani mai vua, a sa sega ni vakama-voataka. 36A ra sa kidacala kecega, a ra sa veivosaki vakai ira, ka kaya, A cava beka na vosa o qo! ni sa vosa vakaturaga ka vakaukauwa ko koya vei ira na yalo tawa-savasava, a ra sa lako tani mai. 37A sa kuruvaki yani na kenai rogorogo ki na veiyasana kecega ni vanua sa vakavolivolita.

38A sa cavu mai na vale ni lotu ko koya, ka curu ki na vale i Saimoni. A sa tauvi tu ko na tina ni wati i Saimoni e na dua na katakata levu; a ra sa masuti koya e na vukuna. 39A sa tu ko koya e tikina, ka vunauca na katakata: a sa takali vua; a sa tu cake sara ko koya, ka qaravi iratou. 40Ia ni sa dromu tiko na siga, o ira kecega sa so na nodra era sa tauvi e na mate e vuqa, era sa kauti ira mai vei koya: a sa tabaki ira yadua ko koya e na ligana, ka vakabulai ira. 41Ia era sa lewe vuqa sa lako tani maikina e so na tevoro, ni sa qoqolou tiko, ka kaya, O iko na Karisito na Luve ni Kalou. A sa vunauci ira ko koya, ka sega ni laiva me ra vosa, ni ra sa kila ni sa Karisito ko koya.

42Ia ni sa siga mai sa lako tani ko koya, ka lako ki na dua na yasana lala: a ra sa vakasaqarai koya ko ira na tamata, a ra sa lako mai vua, ka tarovi koya me kakua ni lako tani vei ira. 43A sa kaya vei ira ko koya, Sa dodonu meʼu lako me tukuna nai tukutuku-vinaka ni matanitu ni Kalou e na Veikoro tani talega: ni sa ka ga o qo kaʼu sa talai mai kina. 44A sa dauvunau ko koya e na veivale ni lotu mai Kalili.

Sélection en cours:

Luke 4: FIJ1864

Surbrillance

Copier