Luke 5
5
E so na caka-mana sa cakava ko Jisu, 1-26. Sa kacivi Maciu na daukumuna nai vakacavacava me nonai talatala, 27-32. Sa vakavulici ira na tamata, 33-39.
1A SA yaco, ni sa drigiti koya ko ira na tamata me ra rogoca na vosa ni Kalou, sa tu ko koya e na bati ni drano mai Kenisareti, 2a sa raica na waqa e rua sa no ga e na drano; ia eratou sa lako tani oti kina na gonedau, a sa derea na lawa. 3A sa vodoka e dua vei rau na waqa, a nei Saimoni, a sa masuta me lako tani vakalailai ki wai. A sa tiko sobu ko koya e na waqa, ka vakavulici ira na lewe vuqa.
4Ia ni sa tinia na nona vosa ko koya, sa kaya vei Saimoni, Lako yani ki na wai titobu, ka dou viritaka sobu na nomudou lawa me rawa mai e so. 5A sa vosa ko Saimoni, ka kaya vua, Turaga, keitou sa kitaka tiko e na bogi ka sigavaka, ka keitou sa sega ni rawata e dua na ka; ia e na vuku ni nomu vosa, kaʼu na viritaka sobu na lawa. 6Ia ni ratou sa kitaka vakakina, sa vuqa sara na ika eratou sa kovuta: a sa bote kina na nodratou lawa. 7A ratou sa yalovi iratou na nodratoui tokani eratou sa tiko e na waqa kadua, me ratou mai vukei iratou. A ratou sa lako mai, a ratou sa vakasinaita ruarua na waqa, a rau sa voleka ni luvu. 8Ia ni sa raica ko Saimoni Petero, sa bale sobu ki na duru i Jisu, ka kaya, Lako tani vei au, Turaga; niʼu sa tamatai valavala ca. 9Ni sa kidacala ko koya, kei ira kecega era sa tiko vata kaya, e na vuku ni qele ni ika era a rawata: 10a sa vaka talega kina ko Jemesi kei Joni, koi rau na luve i Sepeteo, eratou sa veitokani kei Saimoni. A sa kaya vei Saimoni ko Jisu, Kakua ni rere; e na veisiga emuri ko na rawai ira na tamata. 11Ia ni ratou sa kauti rau na waqa ki vanua, eratou sa biuta na ka kecega, ka muri koya.
12A sa yaco, ni sa tiko e na dua na koro ko koya, raica, sa dua na tamata sa roboti koya na vukavuka: ia ni sa raici Jisu, sa bale vakatobocu, ka masuta, ka kaya, Turaga, kevaka ko sa vinakata, ko sa vakasavasavataki au rawa. 13A sa dodoka na ligana ko koya, ka tarai koya, ka kaya, Au sa vinakata: mo savasava mai. A sa takali sara vua na vukavuka. 14A sa vakarota vua ko koya me kakua ni tukuna vua e dua: ia mo laʼki vakarairaitaki iko vua na bete, ka vakacabora na nomui vakasavasavataki, me vaka na vosa i Mosese, mei vakatakilakila vei ira. 15Ia na kenai rogo sa kuruvaki vakalevu sara kina; a ra sa lewe vuqa sara era sa soqoni vata mai me ra vakarogoca, me ra sa vakabulai talega vua mai na nodra malumalumu.
16A sa lako tani yani ko koya ki na veikau, ka masu.
17A sa yaco e na dua na siga, ni sa vakatavuvuli tiko ko koya, sa tiko voleka kina e so na Farisi kei na vu-ni-vunau, era sa lako mai na koro lalai kecega mai Kalili, kei Jutia, mai Jerusalemi talega: a sa tu na kaukauwa ni Turaga me vakabulai ira. 18Ia ka raica, e so na tamata eratou sa kauta mai e nai mocemoce e dua na tamata sa tauvi-paralasi; a ratou sa vakatovolea me ratou kauta ki loma, me ratou vakadavora e na mata i koya. 19Ia ni ratou sa sega ni kauti koya rawa ki loma e na vukudra na lewe vuqa, eratou sa cabe cake ki na dela ni vale, ka tukuca sobu e na tibitibi e nai mocemoce ki na kedra maliwa e na mata i Jisu. 20Ia ni sa raica na nodratou vakabauta ko koya, sa kaya vua, Tamata, sa bokoci na nomui valavala ca. 21A ra sa vakatekivu ko ira na vu-ni-vola kei ira na Farisi me ra veinanuyaka, ka kaya, O cei o qo sa vosavakacacataka na Kalou? o cei tale sa bokoca rawa nai valavala ca, a Kalou duaduaga? 22Ia ni sa kila ko Jisu na nodra veinanuyaka, sa vosa, ka kaya vei ira, A cava dou sa veinanuyaka e na lomamudou? 23a cava vei rau e rawarawa cake, me kaya, Sa bokoci na nomui valavala ca; se me kaya, Mo tu cake, ka lako voli? 24ia mo dou kila kina ni sa rawata na Luve ni tamata e vuravura me bokoca nai valavala ca, (sa qai kaya ko koya vua sa tauvi-paralasi,) Au sa kaya vei iko, Mo tu cake, ka kauta na nomui mocemoce, ka lako ki na nomu vale. 25A sa tu cake vakasauri ko koya e matadra, a sa kauta na ka sa davo kina, ka lako ki na nona vale, ka vakarokorokotaka na Kalou.
26A ra sa kidacala kecega, a ra sa vakarokorokotaka na Kalou; a ra sa sinai e na rere, ka kaya, Eda sa kunea edaidai na veika e veivakidacalataki.
27A sa oti na veika o qo, sa lako yani ko koya, a sa raica e dua sa kumuna nai vakacavacava, ko Levi na yacana, sa tiko e na vale ni vakacavacava: a sa kaya vua, Muri au. 28A sa biuta na ka kecega ko koya, ka tu cake, ka muri koya.
29A sa cakava vua e dua na magiti levu ko Levi e na nona vale: a ra sa lewe vuqa sara na kumuna nai vakacavacava kei ira tale e so era sa tiko vata kei ira me kana. 30Ia ko ira na nodra vu-ni-vola kei ira na Farisi era sa vosa ca vei iratou na nona tisaipeli, ka kaya, A cava dou sa kana vata ka gunu vata kina kei ira sa kumuna nai vakacavacava kei ira na tamatai valavala ca? 31A sa vosa ko Jisu, ka kaya vei ira, Sa sega ni yaga na vu-ni-wai vei ira sa bula vinaka; vei ira ga era sa tauvi-mate: 32au sa sega ni lako mai me kacivi ira na yalododonu, o ira ga nai valavala ca, me ra veivutuni.
33A ra sa kaya vua, A cava sa lolo vakavuqa tiko kina ka daumasu kina ko ira na tisaipeli i Joni, kei na nodra talega na Farisi; ia na nomu era sa kana ka gunu? 34A sa kaya vei ira ko koya, Dou sa lewai ira rawa li na weka ni watina-tagane me lolo, ni sa tiko vata kei ira ko na watina-tagane? 35Ia ena yaco mai na siga, ena kau tani kina vei ira na watina-tagane; era na qai lolo e na gauna ko ya.
36A sa vosataka talega vei ira e dua na vosa vakatautauvata: Sa sega na tamata sa cula vata na tiki ni sulu vou ki nai sulu madra; ke sa vakakina, ke sa dresuka na tikina vou, a sa sega ni veikabiti vata na tikina vou sa cula kaya na kena madra. 37A sa sega na tamata sa vakataloca na waini vou ki na tavaya kuli-ni-manumanu madra; ke sa vaka, ena vakacabotetaka na tavaya na waini vou, a sa dave yani, ka rusa talega na tavaya. 38Ia ka vinaka me vakataloci na waini vou ki na tavaya vou, a sa maroroi ruarua kina. 39Sa sega talega na tamata, ni sa gunuva oti na waini makawa, me qai vinakata na kena sa vou; ni sa kaya, E vinaka vei rau na ka makawa.
Sélection en cours:
Luke 5: FIJ1864
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
First full Bible in the Fijian language © British and Foreign Bible Society, 1864.
