HECHOS 9

Saulo shuti runa, Jesucristota crishcami

(Hech. 22:6-16; 26:12-18)

1Apunchi Jesusta crishpa catijcunataca, ninanda na ricunayachishpami, Saulo shuti runaca huañuchingapaj yariajurca. Shina cashpami, curacunata mandajpajman shamurca. 2Damasco shuti pueblopi tiaj tandanajuna huasicunaman yaicungapajmi, cartacunata mañarca. Shina mañashpaca, ali Ñanguta catijcunataca, jaricuna cajpipash, huarmicuna cajpipash, Jerusalenman prezu apamungapajmi shina mañarca. 3Ashtahuangarin Damasco puebloman Saulo ña chayagrijujpimi, cashna tucurca: Ñapash cungashcapimi, jahua pachamandaca paipaj muyundipi michashna punchapamba shitarca. 4Shina punchapamba shitajpi, Saulo alpaman urmashpaca:

—Saulo, Saulo, ¿imashpata catiriashpa llaquichihuangui?— nijtami uyarca.

5Shina nijta uyashpami, Sauloca:

—¿Pita capangui, Taitalla?— nishpa tapurca.

Shina tapujpimi:

—Can catiriashpa llaquichijuj Jesusmi cani. Canllatami, huagra tujsina buyapi tujsirishpa chugrinshna, llaquita japijungui— nircami.

6Shina nijpimi Saulo runaca, ninanda manllarishpa chujchurishpa, cashna nirca:

—Apunchi Jesús, ¿imatata rurachun munangui?— nirca.

Shina nijpimi Apunchi Jesusca, cashna nirca:

—Cunanga, jatarishpa chai puebloman rilla. Chaipimi, can imata rurachumbash villanga— nircami.

7Saulota cumbashpa rij runacunaca, rimajlla uyarishpa pipash na ricurijpimi, ninandapacha manllarirca. 8Saulo alpamanda jatarishpa ñavita pascashpapica, pitapash na ricui usharcachu. Shina cajpimi, paita cumbashpa rij runacunaca, maquimanda aisashpa, Damasco puebloman pushanajurca. 9Chaipimi, quimsa punllacaman ñausa tiajushpa, imatapash na micushpa, imatapash na ufiashpa tiajurca.

10Chai Damasco pueblopimi, Jesusta crishpa catij Ananías shuti runa causajurca. Paimanmi, Apunchi Jesusca muscuipishna ricurishpa:

—Ananías— nirca.

Shina nijpimi, Ananías runaca:

—Caipimi capani, Apunchi Jesús— nirca.

11Shina nijpimi Apunchi Jesusca, cashna nirca:

—Jatarishpa, Derecho shuti ñanman ri. Chaimandaca, Judas shuti runagupaj huasiman rishpa, Tarso shuti pueblomanda Saulo shuti runa nachu caipi nishpa tapugri. Paica, chaipimi Diosta mañajun. 12Can yaicujujtaca, muscuipishna Saulo runaguca ña ricushcami. Paipaj ñavi cutin ricuchun, cambaj maquita paipaj uma jahuapi churajtapash, ña ricushcami— nircami.

13Shina nijpimi Ananías runaca, cashna nishpa tigrachirca:

—Apunchi Jesús, chai runaca cambajlla causajcunatami, Jerusalenbi ninanda llaquichijujta ashtacacuna villaj shamuhuarca. 14Chai runaca, cambaj shutipi mañajcunata tucuilla apangapajmi, caiman shamushca. Chaita rurai ushachunga, curacunata mandajcunami ushaita cushca— nircami.

15Shina nijpimi Apunchi Jesusca, cashna nirca:

—Rilla. Paitaca, ñami ñuca mandashcata rurachun agllarcani. Paimi, na israelcunapaj ñaupajpi, jatun mandajcunapaj ñaupajpi, israelcunapaj ñaupajpi, ñuca shutipi villajunga. 16Ñucamanda pai imashna llaquita apanatapash ricuchishami— nircami.

17Shina nijpimi Ananías runaca, chai huasiman rishpa, Saulo runapaj uma jahuapi maquita churashpa, cashna nirca:

—Huauqui Saulo, ñanda can shamujujpimi Apunchi Jesusca, canman ricurishca. Paillatami, cambaj ñavi cutin ricuchun canga, Diospaj jucha illaj Espíritu junda cachun, ñucata cachamuhuan— nircami.

18Shina nijhuanmi, Saulopaj ñavimandaca piji carashna urmajpi, cutin ñapash ali ricurca. Ña jatarishpaca, bautizai tucurcallami. 19Chai jipami micushpa, cutin shinlli tucurca. Sauloca tauca punllacunatami, Damasco pueblopi causanajuj crijcunahuan quedarca.

Saulo runaguca, Damasco pueblopimi villai callarishca

20Chai punllamandapachami, tandanajuna huasicunapi yaicushpa: “Cristoca, Taita Diospaj Churimi” nishpa, Sauloca villajurca.

21Pai villajujta uyajcunaca, tucuilla ninanda manllarishpami, cashna ninajurca:

—¿Nachu cai runaca, Jesuspaj shutipi mañajcunata Jerusalenbi llaquichin carca? Cunambash, curacunata mandajcunapajman prezu apangapajmi, caiman shamujushca— ninajurcami.

22Shina ninajujpipash, na manllashpami Sauloca, ashtahuan ashtahuan villajurca. Damasco pueblopi causanajuj israelcuna ama imata nichunmi: “Jesusca, Quishpichij Cristomi” nishpa, aliguta villajurca.

Huañuchingapaj munajpimi, Sauloca pacajushca

23Tauca punllacuna jipami, Saulota huañuchingapaj nishpa, Judea llactapi causajcunaca parlaringapaj tandanajurca. 24Huañuchishun nishpami tutapash, punllapash chai pueblomanda llujshina pungucunapi chapanajurca. Shina huañuchingapaj chapanajujtaca, Saulopash yacharcami. 25Shinamandami yachajujcunaca, Saulota canastapi churashpa, jatun pirca jahuata, tuta uriajuchishpa cacharca.

Jerusalenmanmi Sauloca tigrashca

26Jerusalenman Saulo runagu tigrashpaca, yachajujcunahuanmi tandanajungapaj munarca. Ashtahuangarin paitaca, Jesusta nara catijchu canga yashpami, tucui crijcuna manllanajurca. 27Shinamandami Bernabé shuti runaguca, Saulota japishpa villachun cachashcacunapajman pusharca. Shina pushashpaca Sauloman, Apunchi Jesús ñambi imashna ricurishpa, paihuan rimashcatami parlarca. Shinallata Damasco pueblopi na manllashpa, Jesuspaj shutipi Saulo villashcatapashmi parlarca. 28Shina parlajpimi, Jerusalenbi crijcunahuan Sauloca, tandanajushpa purijurca. 29Chaipipash na manllashpami, Apunchi Jesuspaj shutipi villajurca. Griego nishca shimita rimajcunahuambash, chimbapurashpami rimajurca. Chaimandami Saulotaca, huañuchingapaj munanajurca. 30Chaita yachashpami crijcunaca, Cesarea shuti pueblocaman pushashpa, Tarso shuti puebloman Saulotaca cachanajurca.

31Judea, Galilea, Samaria llactacunapi tandanajuj crijcunaca, casilla ali causaita charishpami, cushijushpa shinlli tucunajurca. Jatun Diosta manllashpa causanajushpami, Diospaj jucha illaj Espíritu ushaita carajpi ashtahuan miranajurca.

Eneas shuti runatami, Pedroca alichishca

32Tucui crijcunata Pedro ricushpa purijujpimi, cashna tucurca: Paica, Lida shuti pueblopi Diospajlla causajcunatapash ricungapajmi shamurca. 33Chaipi cashpami, Eneas shuti runatapash ricugrirca. Paica, ña pusaj huatatami ung:ui japijpi, na cuyuri ushashca sirijurca. 34Chashna sirijujpimi Pedroca, cashna nirca:

—Eneas, candaca Jesucristomi alichin. Cunanga jatarishpa, jatanacunata tandachilla— nijhuanmi, ñapash jatarirca.

35Pai ali tucushcataca, Lida shuti, Sarón shuti pueblocunapi causajcunaca, tucuillami ricurca. Shina ricushpaca, nali causaita saquishpami, Apunchi Jesusta crishpa catinajurca.

Dorcas shuti huarmitami, Pedroca causachishca

36Jope shuti pueblopipash, Jesusta crishpa catij Tabita shuti huarmimi causajurca. Chai shutitaca, griego nishca rimaipica, Dorcas ninmi. Chai huarmica, imagupash illajcunata llaquishpami, aliguta rurashpa causajurca. 37Chai punllacunapimi, chai huarmiguca ungushpa huañurca. Paita armachishpaca, altibajo ucupimi churanajurca. 38Lida shuti puebloca, Jope shuti pueblo ladolla cajpimi, Pedro chaipi purijujtaca, Jesusta crishpa catijcuna yacharca. Shina yachashpami: “Jope shuti puebloman ucha shamupai” nigrichun, ishcai runacunata cacharca.

39Paicuna ripashun nijpica, Pedroca jatarishpa rircallami. Pai chayagrijpica, huañushca sirijuj ucuman pushajpi, Dorcas shuti huarmigu causajushpa rurashca jahualla churajunatapash, shuj churajunatapash, Pedroman ricuchishpa, sapalla huarmicunaca muyundi shayarishpami ninanda huacanajurca. 40Pedroca, tucuicunata llujchishpami, cungurishpa Diosta mañarca. Shina mañashpaca, chai huañushca huarmita tigrarishpa ricushpaca:

—Tabita, jatari— nircami.

Shina nijpimi paica, ñavita pascashcandi Pedrota ricushpa tiarirca. 41Shina tiarijpimi Pedroca, maquimanda aisashpa shayachirca. Shina shayachishpaca, Diospajlla causajcunata, sapalla huarmigucunata cayashpami, chai huarmitaca causajta Pedroca ricuchirca. 42Chashna causachishcata, Jope shuti pueblopi tucuicuna yachashpaca, ashtaca gentecunami Apunchi Jesusta crinajurca. 43Jope shuti pueblopica, carata jacushpa chaquichij Simonbaj huasipimi Pedroca, tauca punllacunata mingarishpa causajurca.

Sélection en cours:

HECHOS 9: QUII

Surbrillance

Copier