HECHOS 10
10
Pedromamdapash, Corneliomandapashmi villajun
1Cesarea shuti pueblopica, Cornelio shuti runami causajurca. Paica, Italia llactamanda patsaj soldadocunata mandajmi carca. 2Chai runaca, paipaj tucui huasi ucu puracunandimi, Taita Diosta yariashpa, manllashpa causajurca. Shinallata gentecunata llaquishpami, imagutapash ninanda caran carca. Paica, Taita Diosta punllandi mañashpami causajurca. 3Ña punlla chishashpa, quimsa horas tucujujpimi, Taita Dios cachamujpi shuj angelca, pai maipi tiajushca ucuman yaicushpa, muscuipishna paiman shutilla ricurishpa:
—Cornelio— nirca.
4Shina nijpimi, angeltalla ricushpa ninanda manllarishpa:
—¿Imatata nihuangui, Taitalla?— nishpa tapurca.
Shina tapujpimi angelca, cashna nirca:
—Can mañajushcapash, shujcunata llaquishpa can imaguta carajushcapash, Taita Diosca yarichunmi, jahuaman chayamushca. 5Cunanga, Pedro nishca Simonda pushamuchun, Jope shuti puebloman runacunata cachangui. 6Paica, carata jacushpa chaquichij Simonbaj huasipimi, mama cucha manñapi mingarishpa tiajun. Pedro shamushpami, imatalla can ruranataca villanga— nircami.
7Shina nishpa ángel rijpimi Cornelio runaguca, paita servij ishcai runacunata, paita cumbashpa purij, Diosta yarij soldadotapash cayarca. 8Paiman shina ricurishcata tucuita parlashca jipami, chai quimsandi runacunata Jope shuti puebloman cacharca.
9Chai cayandi punllapica, paicuna rishpa chai puebloman ña chayagrijujpimi, chaupi punlla tucujurca. Chai horaspimi Pedroca, pai mingarishca tiajuj huasi jahuaman, Diosta mañangapaj vitsiarca. 10Chai jahuapi tiajushpaca, ninandami yarjachirca. Micunata paiman yanungacamanmi, muscuipishnapacha Pedroca ricujurca. 11Jahua pacha pascariajtami ricujurca. Chaimandaca, chuscundi pundapi huatashca jatun fachatashnami, cai pachaman urai shamujujta ricurca. 12Chai huatashcapica, chuscu chaquita charij tucui animalcuna, alpata llucashpa purij animalcuna, jahuata purij alasyu animalcunapashmi ricurirca. 13Chaicunata ricujujpillatami, jahua pachamanda rimamuj uyarishpa:
—Pedro, jatari. Caicunata huañuchishpa micui— nirca.
14Shina nijpimi Pedroca, cashna nirca:
—Apunchi Jesuslla, na micuna imapash mapa micunataca, ima horallapash napacha micushcanichu— nircami.
15Shina nijpimi, chai rimajllata cutin tigrachishpa cashna nirca:
—Taita Dios micunalla nishcataca, canga ama yangapi churaichu— nircami.
16Chai jatun fachashna, quimsa viajecaman ricuchishpaca, cutinmi jahua pachaman apai tucurca. 17Shina muscuipishna ricushcata Pedro na yachai ushashpami, imata nishpata, cashna ricuchihuan yashpa tiajurca. Shina tiajujpimi, Cornelio cachamushca runacunaca, tapui tapui rishpa, Simonbaj huasiman chayagrirca. 18Paicuna chayashpaca:
—Pedro nishca Simón shuti runaguca, ¿caipichu capan?— nishpami tapunajurca.
19Pedroca, muscuipishna ricushcata yarishca tiajujpimi, Diospaj Espirituca cashna nirca:
—Ricui, quimsa runacunami candaca mascanajun. 20Jatarishpa uriajui. Paicunahuan rinataca, ama ishcai shungu tucunguichu. Ñucami, paicunataca caiman cachamurcani— nircami.
21Shina nijpi Pedro uriajushpaca, Cornelio cachamushca runacunataca cashnami nirca:
—Canguna mascajuj runaca, ñucami capani. ¿Imata ningapajta shamupanguichi?— nircami.
22Shina nijpimi, paicunaca cashna ninajurca:
—Patsaj soldadocunata mandaj Cornelio cachamujpimi shamupanchi. Paica, Taita Diosta manllashpa, imatapash cashcatapacha rurashpa causajpimi, Judea llactapi tucui causajcunapash alicachin. Jucha illaj ángel, paiman ricurishpami cashna nishca: ‘Pedrotaca, cambaj huasiman shamuchun cayashpa, pai villajujta uyangui’ nishcami— ninajurcami.
23Pedroca, pai mingarishca tiajuj huasipillatami, paicunatapash mingachirca. Cayandi punlla Pedro jatarishpa paicunahuan rijujpica, Jope shuti pueblomanda shuj crijcunapashmi cumbashpa rinajurca.
24Chai cayandi punllami, Cesarea shuti puebloman chayagrirca. Chaipimi Cornelio runaguca, paipaj familiacunatapash, paipaj ashtahuan ali cumbacunatapash cayashpa shuyajurca. 25Pedro chaiman chayajpimi, Cornelio runaguca tuparingapaj llujshimushpa, Pedrota alicachingapaj cungurirca. 26Ashtahuangarin Pedroca, paita shayachishpami:
—Shayari, ñucapash canshnallata runallami cani— nirca.
27Paihuan parlashpandi, ucuman yaicushpaca, ashtaca gentecuna tandanajushca tianajujtami ricurca. 28Pedroca, paicunataca cashnami nijurca:
—Judea llactamanda runahuan, caru llactamanda runahuan tandanajunapash, na cashpaca paicunapaj huasiman chayanapash millanayai cajtaca, cangunallata yachanguichimi. Ashtahuangarin Taita Dios ñucaman ricuchishpami: ‘Pitapash, ama yangapi churashpa mapami ninguichu’ nihuarca. 29Shinamandami cayajpica, imatapash na nishpa shamunilla. Chaimandami: ‘¿Imagupajta cayahuanguichi?’ nishpa tapuni— nijurcami.
30Shina nijpimi Cornelioca, cashna nirca:
—Cunanshna chishipimi, cai ñuca huasipi micuitapash na micushpa, Diostaca mañajurcani. Shina tiajujpimi, punchapamba churajushca runagu ñuca ñaupajpi shayarijta ricurcani. Chaica, ña chuscu punllami tucupan. 31Paimi, cashna nihuarca: ‘Cornelio, can mañajujtaca, Taita Dios uyashcami. Shujcunata llaquishpa can imaguta carajujtapash yariajunmi. 32Cunanga, Jope shuti pueblopi tiajuj Pedro nishca Simonda pushamuchun cachangui. Paica, carata jacushpa chaquichij Simonbaj huasipimi, mama cucha manñapi mingarishpa tiajun. Pedro shamushpami, can imata ruranatapash villanga’ nihuarcami. 33Shina nijpimi, cambajman cachamuparcani. Alita shamuparcangui. Cunanga, tucuicunami Taita Diospaj ñaupajpi can villajta uyangapaj caipi capanchi. Taita Dios canman tucui mandashcacunata uyangapajmi munapanchi— nijurcami.
34Pedro villai callarishpaca, cashnami nijurca:
—Taita Diosca, na pitapash ñavita ricushpalla chasquinllu. Chaitaca, cunanga alipachami yachani. 35Maijan llactapi cashpapash, paita manllashpa, imatapash cashcatapacha rurajtami, Diosca alicachin. 36Taita Diosca shuj villanatami, israelcunaman villachun cachamurca. Jesucristomanda casilla ali causai tianatami, ali villaita villajurca. Jesucristoca tucuicunata Mandajmi. 37Galilea llactamanda callarishpa, Judea llactacaman bautizarichi nishpa Juan villajushca jipamanda ima tucushcatapash, cangunallata yachanguichimi. 38Nazaret pueblomanda Jesús ushaita charichunga, Taita Diosmi jucha illaj paipaj Espirituta cararca. Taita Dios paihuan cajpimi Jesusca, tucui imata cashpapash, aliguta rurashpa purijurca. Shinallata diablo llaquichishpa charijuj nanaicunahuan huañunajuj gentecunatapashmi alichijurca. 39Judea llactapipash, Jerusalenbipash, Jesús imatalla rurashcata ricushcatami, ñucanchica villanajunchi. Paitaca, caspipi huarcushpami huañuchinajurca. 40Ashtahuangarin Taita Diosca, quimsa punlla chayajpi causachishpami, ñucanchiman ricurichun saquirca. 41Na tucui gentecunaman ricurircachu. Ashtahuangarin pundamandapacha Taita Dios agllashcacuna cajpimi, ñucanchimanlla ricurirca. Huañushcacunapaj chaupimanda causarimujpimi, ñucanchica paihuan micushpa, ufiashpa tianajurcanchi. 42Causajcunatapash, huañushcacunatapash ricushpa llaquichijuchunga, Taita Diosca Jesustami churashca. Chashna nishpa tucuicunaman villagringuichi nishpami, Jesusca ñucanchita mandarca. 43‘Paita crijpica, tucuicunapaj juchacunatami Diosca anchuchinga’ nishpami, Dios ima nishcata villajcunaca, tucuicuna Jesusmanda villanajushca— nijurcami.
44Cai shimicunata Pedro villajujpillatami, chai villashcata tucui uyajcunapajman Diospaj jucha illaj Espíritu shamurca. 45Pedrohuan shamushcacuna, circuncisión nishcata rurashca crijcunaca, Diosca na israelcunamambash, paipaj Espirituta talinshna cachamujta ricushpami, ninanda manllarinajurca. 46Shuj shuj rimaicunata rimashpa, Taita Diostapash juyaillagupachami cangui nijta uyashpami, chashna manllarinajurca. 47Chaimandami Pedroca, cashna nirca:
—Diospaj jucha illaj Espiritutaca, paicunapash ñucanchishnallatami chasquirca. Paicunata yacupi bautizarinataca, pipash na jarcai ushanllu— nircami.
48“Paicunataca, Apunchi Jesuspaj shutipi bautizaichi” nishpami mandarca. Chai jipami, Pedrotaca: “Huaquin punllagullatapash shuyapaira” ninajurca.
Sélection en cours:
HECHOS 10: QUII
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Quichua Imbabura Bible © United Bible Societies, 1994.
