HECHOS 11
11
Jerusalenbi tandanajuj crijcunamanmi, Pedroca villashca
1Na israelcunapash, Diospaj Shimita chasquishcatami villachun cachashcacunapash, Judea llactapi causanajuj crijcunapash uyarca. 2Jerusalenman Pedro vichai rijpica, circuncisión nishcata ruraj israelcunami ninanda nalicachishpa, cashna ninajurca:
3—¿Imashpata circuncisionda na rurashcacunapaj huasiman yaicushpa, canga paicunahuan micurcangui?— ninajurcami.
4Shina nijpimi, imata rurashcatapash callarishpa Pedroca, cashna nishpa villajurca:
5—Jope shuti pueblopi cashpa, Diosta mañajushpami, muscuipishna cashnata ricurcani: Chuscundi manñapi huatashca fachashna, jahua pachamanda ñucapajman urai shamujujtami ricurcani. 6Chai huatashcapi tiajujta ali ricujushpaca, chuscu chaquita charij animalcunatapash, sacha animalcunatapash, llucashpa purij animalcunatapash, jahuata rij alasyu animalcunatapashmi ricurcani. 7Chaita ricujujpimi, jahua pachamanda rimaj uyarishpa cashna nihuarca: ‘Pedro, jatarishpa caicunata huañuchishpa micui’ nihuarcami. 8Shina nijpimi: ‘Na micuna imapash mapa micunataca, ima horapash na micushcanichu, Apunchi Jesús’ nircani. 9Shina nijpimi, jahua pachamanda cutin rimashpaca: ‘Taita Dios micunallami nishcataca, canga ama yangapi churaichu’ nihuarca. 10Chai jatun fachatashna, quimsacaman ricuchimushpaca, jahua pachaman cutin aparcallami. 11Shuj huasipimi mingarishpa tiajurcani. Chaimanmi, ñucata pushachun cachamushca quimsa runacunaca, Cesarea shuti pueblomanda ñapash chayamurca. 12Paicuna chayamujpimi, Diospaj Espirituca: ‘Ama ishcai shungu tucushpa, paicunahuan ringuilla’ nihuarca. Shina nijpimi, cai suctandi huauquicunahuan shuj runapaj huasiman chayarcanchi. 13Chai runaca, paipaj huasipi ángel paiman ricurishcatami, ñucanchiman parlarca. Chai angelmi, chai runaman cashna nishca carca: ‘Pedro nishca Simonda, Jope shuti pueblomanda pushamuchun runacunata cachai. 14Paimi, cambash, cambaj tucui huasi ucu purandi, imashna quishpirinataca villanga’ nishpami parlashca carca. 15Diospaj jucha illaj Espíritu ñucanchipajman punda shamushcashnallatami, ñuca villai callarijhuan, paicunapajmambash shamurca. 16Chaipimi, Apunchi Jesús cashna nishcata yarircani: ‘Juanga, yacupillami bautizajurca. Ashtahuangarin cangunaca, Diospaj jucha illaj Espirituhuanmi bautizai tucunguichi’ nishcatami yarircani. 17Apunchi Jesucristota crijpimi, Taita Diosca paipaj Espirituta ñucanchiman cararca. Chashnallatami crijpica, paicunamambash cararca. Taita Dios chashna carajujta ñuca jarcangapaca ñucaca, ¿pita cani?— nijurcami.
18Pedro chashna nijta uyanajushpami, imatapash na nishpa, Taita Diostaca punchapambagumi cangui nishpa cashna ninajurca:
—¡Na israelcunapash llaquirishpami, Taita Diospajman tigrarishca! Shina cajpimi, causaita causagrinata paicunamambash carashca— ninajurcami.
Antioquía shuti pueblopi tandanajuj crijcunamandami villajun
19Esteban runaguta huañuchishpaca, shuj crijcunatapash ninandami catiriashpa llaquichinajurca. Chaimandami Fenicia shuti, Chipre shuti llactacunaman, Antioquía shuti puebloman, caita chaita pacajushpa rinajurca. Paicunaca, shujcunaman na villashpami, Judea llactapilla Diospaj Shimitaca villanajurca. 20Ashtahuangarin paicuna purapimi, Chipre llactamanda, Cirene shuti pueblomanda huaquin crijcuna tiarca. Paicunami, Antioquía puebloman shamushpa, griego nishca gentecunamambash, Apunchi Jesusmanda ali villaita villanajurca. 21Apunchi Jesús paicunaman ushaita carajpimi, nali causanajushcata saquishpa, ashtacacuna Apunchi Jesusta crinajurca.
22Chashna crinajujta Jerusalenbi tandanajuj crijcuna uyashpami, Bernabé shuti runagutaca, Antioquía puebloman cachanajurca. 23Pai chaiman chayashpaca, Taita Dios ninanda juyashpa quishpichijujta ricushpami, ninanda cushijurca. Paica: “Apunchi Jesusta catijushcata na saquishpami, tucui shunguhuan aligutapacha catina canguichi” nishpa, tucuicunaman aliguta yachachijurca.
24Bernabé runaguca, Diospaj jucha illaj Espíritu junda, alipacha crij, ali shungutapash charij runagumi carca. Pai aliguta villajujpimi, ashtaca gentecuna Apunchi Jesusta crinajurca. 25Chai jipami Bernabé runaguca, Tarso shuti puebloman Saulota mascangapaj rirca. Paita tuparishpaca, Antioquía pueblomanmi pushamurca. 26Chaipica, tandanajuj crijcunahuan shuj huatata causanajushpami, ashtaca gentecunaman yachachinajurca. Antioquía pueblopimi crijcunataca, “Cristota catijcunami” nishpa, punda shutichi callarirca.
27Chai punllacunapimi, Dios ima nishcata villaj huaquingunaca, Jerusalenmanda Antioquía puebloman urai shamunajurca. 28Paicuna puramanda Agabo shuti runa shayarishpami, Diospaj Espíritu yarichijpi: “Cai pachapica, ninan yarjaimi tiagrin” nishpa villarca. Claudio shuti runa mandajui punllacunapimi, chashna ninan yarjai japirca. 29Shina tucujpimi yachajujcunaca, paicuna carai ushanagutalla, Judea llactapi causanajuj crijcunaman, culquiguta carashpa cachangapaj yarinajurca. 30Paicuna carashcataca, Judea llactapi causanajuj crijcunata mandaj rucucunaman cuchunmi Bernabeman, Sauloman mingashpa cacharca.
Sélection en cours:
HECHOS 11: QUII
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Quichua Imbabura Bible © United Bible Societies, 1994.
