HECHOS 12
12
Jacobotaca huañuchishpami, Pedrotaca prezuna huasipi churashca
1Chai punllacunapimi, jatun mandaj Herodesca, tandanajuj crij puracunata huaquingunataca, ninanda llaquichingapaj japichi callarirca. 2Chashna rurashpami, Juanbaj huauqui Jacobotaca, espadahuan huañuchirca. 3Chashna huañuchijpica, Judea llactapi causajcuna ninanda cushijujta Herodes ricushpami, Pedrotapash japichirca. Chai punllacunaca, levadura illaj tandata micuna fiesta punllacunami carca. 4Pedrota, Herodes japichishpaca, prezuna huasipimi vichachirca. Paita cuidachunmi, chunga sucta soldadocunata churarca. Paicunaca, punllapi chuscu viajetami, chuscu chuscu cuidana carca. Pedrotaca, pascua fiesta yalijpimi, tucuicunapaj ñaupajman llujchingapaj Herodesca munarca. 5Shinamandami, Pedrota prezuna huasipi churashpaca, ninanda cuidanajurca. Ashtahuangarin tandanajuj crijcunaca, Pedromandaca ninandami Diosta mañanajurcalla.
Angelmi Pedrotaca, prezuna huasimanda llujchishca
6Pedrotaca, cayandi punlla llujchishpa tucuicunapaj ñaupajpi tapuchingapajmi, Herodesca yajurca. Chai tutaca, Pedroca cadenacunahuan huatashcami, ishcai soldadocunapaj chaupipi puñujurca. Huaquin soldadocunaca, pungupi cuidashpami shayanajurca. 7Ashtahuangarin angelta, Jatun Dios cachamujpimi, ñapash chai ucuca, punchapamba tucurca. Chai angelca: “Ucha jatari” nishpami Pedrotaca, costillaspi tacarishpa rijchachirca. Shina nijpimi, paipaj maquipi huatashca cadenacunapash urmarca. 8Chai angelca: “Aliguta chumbiliri, cambaj chaquipi churajunata churajushpa huatari” nircami.
Shina nijpimi, Pedroca chashna rurajurca. Angelca, cutinmi cashna nirca: “Jahualla churajunata churajushpa, ñucata catihuai” nircami. 9Shina nijpica, angelta catishpa llujshircallami. Chashna llujchijpica, muscujunimi yashpami Pedroca, chashnapacha tucujujtaca na ucha yachai usharca. 10Paicuna llujshishpaca, ishcaipi cuidanajuj soldadocunata yalishpami, puebloman llujshina jatun jirru punguman chayarca. Chai punguca, paillata pascarijpimi paicunaca llujshirca. Ñanda chimbashpa rishca jipaca, chai angelca paipaj ladomanda ñapash anchurircallami. 11Chai jipami Pedroca, juizu japishpa cashna yajurca: “Herodespash, Judea llactapi causajcunapash, ñucataca huañuchingapajmi munarca. Paicunapaj maquimanda cacharichunmi Jatun Diosca, angeltapacha cachamushca” yajurcami.
12Shina llujchishcata yarishpandimi Pedroca, Marcos nishca Juanbaj mama Mariapaj huasiman chayagrirca. Chai huasipica, ashtaca crijcunami Diosta mañashpa tianajushca carca. 13Canlla punguta Pedro huactachijpica, Rode shuti cuitsagumi: “¿Pita capangui?” ningapaj rirca. 14Chai cuitsaguca, Pedropaj shimita rijsishpami, ninanda cushijurca. Shinamandami punguta nara pascashpallata, ucumanra calpashpa:
—Pedromari pungupi shayajun— nishpa, tucuicunaman villagrirca.
15Shina villajpimi, chai cuitsagutaca:
—¿Juizu illajchu cangui, imata?— ninajurca.
Ashtahuangarin paica:
—Shamushcapachami— nircami.
Shina nijpica:
—Paita cuidaj angelmari canga— ninajurcami.
16Ashtahuangarin Pedroca, punguta huactachijurcallami. Paicuna ña punguta pascashpaca, Pedrota ricushpami ninanda manllarirca. 17Shina manllarijpimi Pedroca, maquihuan ricuchishpa upallaichi nirca. Shina nijpi upalla tucujpimi, prezuna huasimanda Apunchi Jesús llujchishcataca, paicunaman villarca. Shina villashpami:
—Cai villashcataca Jacobomambash, caishuj crijcunamambash villanguichi— nirca.
Shina nishpallami, shuj llactaman llujshishpa rirca.
18Chai cayandi tutamandaca, soldado puracuna ninanda manllarishpami:
—¿Pedroca imashi tucurca?— nishpa, caishuj chaishuj tapurinajurca.
19Ashtahuangarin Herodes mascachun cachajpipash, Pedrotaca na tarircachu. Shinamandami, cuidaj soldadocunataca ali tapuchishpalla: “Cai soldadocunata huañuchinguichi” nishpa mandarca. Chai jipami, Judea llactamanda urai rishpa, Cesarea pueblopi Herodesca causagrirca.
Herodes runa huañushcatami villajun
20Jatun mandaj Herodesca, Tiro shuti, Sidón shuti pueblocunapi causajcunahuan ninanda fiñarishcami carca. Chashna cajpimi, chai pueblocunapi causajcunaca, shujllashnalla yarishpa, chai mandajpajman shamurca. Paicunaca, Herodes churashca Blasto shuti mandajman culquita pacalla cushca jipami, Herodes runahuan casilla ali causaita charingapaj nishpa shamunajurca. Chai llactapica, jatun mandaj cachajpillatami, micuna tian carca. 21Herodesca, pai munashca punllapi shamuchunmi cayarca. Paica, jatun mandaj churajunata churajushpami, mandashpa tiarinapi tiarishpa, paicunahuan parlajurca: 22Chaipimi gentecunaca, cashna nishpa caparinajurca:
—¡Taita Dios rimachijpimari rimajun, na runaca rimajunllu!— ninajurcami.
23Taita Diostaca, punchapambagumi cangui nishpa na alicachishcamandami, Jatun Dios cachamushca angelca, ninan ung:uita Herodesman curca. Shina cashpami jurucuna micujpi huañurca.
24Ashtahuangarin Diospaj Shimita villanajujta uyashpami, ashtacacuna crishpa miranajurca.
25Bernabepash, Saulopash, paicunaman rurachun mingashcata pactachishpami, Marcos shutipi rijsishca Jerusalenmanda Juandapash pushamushpa, Antioquía puebloman cutin muyumurca.
Sélection en cours:
HECHOS 12: QUII
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Quichua Imbabura Bible © United Bible Societies, 1994.
