HECHOS 8
8
Crijcunata Saulo shuti runa llaquichishcami
1Esteban runaguta huañuchijpica, Saulo shuti runaca alitami ruranajun yajurcami. Chai punllapica, Jerusalenbi tandanajuj crijcunataca, catiriashpami llaquichijurca. Chaimandami tandanajuj crijcunaca, Judea, Samaria shuti llactacunaman caiman, chaiman tucuilla pacajushpa rinajurca. Villachun cachashcacunallami, Jerusalenbi quedanajurca. 2Diosta yarij runacunaca, Esteban runaguta ninanda llaquishpa huacashpami pambangapaj rinajurca. 3Ashtahuangarin Saulo shuti runaca, tandanajushca crijcunata llaquinayaita tucuchishpami, huasin huasin yaicujurca. Chashna yaicushpami jaricunatapash, huarmicunatapash aisashpa, prezuna huasiman apajurca.
Samaria llactapimi, ali villaita villanajushca
4Jerusalenmanda caita chaita pacajushpa rishcacunaca, tucui ladocunapimi ali villaita villashpandi rinajurca. 5Felipepash, Samaria puebloman urai rishpami, Quishpichij Cristomanda villajurca. 6Felipe shina villajujpimi, tucuicuna tandanajushpa aliguta uyanajurca. Shinallata imatalla rurashpa ricuchishcatapashmi ricunajurca. 7Ashtaca gentecunamanda nali ayacunata llujchijpimi, ninanda caparishpa ayacunaca llujshirca. Na cuyuri ushajcunatapash, suchucunatapashmi ashtacacunata alichijurca. 8Shinamandami chai pueblopi causajcunaca, ninanda cushijunajurca. 9Ashtahuangarin Samaria shuti pueblopica, Simón shuti runami causajurca. Paica, pundaca alipacha brujuj cashpami, chai llactapi causajcunataca, ninanda umachin carca. 10Chashna umachijpimi uchillacunapash, jatungunapash paitaca tucuicuna ninanda alicachishpa: “Caica, Taita Diospaj ninan ushaimi” nishpa uyanajun carca.
11Unai huatacunata ña chashna brujiashpa umachishpa causajpimi, tucuicuna paitaca aliguta uyanajun carca. 12Ashtahuangarin Taita Dios mandajujmandapash, Jesucristopaj shutimandapash Felipe villajujpimi jaricunapash, huarmicunapash crishpa bautizarinajurca. 13Simón shuti runapash crircami. Pai bautizarishpaca, Felipeta cumbashpami purijurca. Felipeca, imapash ricuchinacunata, pipash na rurai ushashcata rurajujta ricushpami Simonga, ninandapacha manllarijurca.
14Villachun cachashcacuna Jerusalenbi causanajushpami, Samaria pueblopi causajcunataca, Diospaj Shimita aliguta chasquishcata uyarca. Shina uyashpami Pedrotapash, Juandapash chaiman cachanajurca. 15Paicuna chaiman chayamushpami, chai crijcunapash, Diospaj jucha illaj Espirituta chasquichun, Diosta mañanajurca. 16Diospaj Espirituca, paicuna purapica, pipajmambash nara shamushcachu carca. Jesuspaj shutipillami bautizarishca carca. 17Pedropash, Juanbash chai crijcunapaj uma jahuapi maquita churashpa mañajpimi, Diospaj jucha illaj Espirituta chasquinajurca.
18Villachun cachashcacuna, crijcunapaj umapi maquita churashpa, Diospaj jucha illaj Espirituta cujta Simón shuti runa ricushpami, paicunaman culquita cungapaj munarca. 19Chaimandami cashna nirca:
—Pipajpi cashpapash uma jahuapi ñuca maquita churajpi, Diospaj jucha illaj Espirituta chasquichun, ñucamambash chai ushaita cuhuaichi— nircami.
20Shina nijpimi Pedroca, cashna nirca:
—Taita Dios juyailla ushaita caramujujtaca, culquihuan randingapajmi munashcangui. Shina cashcamanda cambaj culquica, canhuan chingaita chingagrichunlla. 21Cambaj shunguca, Taita Dioshuan nali cashpami, ñucanchihuan cashna ruraitaca, napacha ushana cangui. 22Cashna jatun nalita yarijushcamanda llaquiriyari. Cambaj shungu chashna jatun nalita yarijujta, Taita Dios anchuchingapashchari paita mañangui. 23Cambaj shunguca, jayajshna cashcamandami, huaglitalla yarijujta ricuni. Candaca, juchami huatashcashna charijun— nircami.
24Shina nijpimi, Simón runaca:
—Canguna nijunshnaca ama llaquichihuachun, ñucamanda Jatun Diosta mañapaichi— nirca.
25Paicunaca, imata rurashcatapash tucuita parlashpa, Diospaj Shimitapash villashca jipami, Jerusalenman cutin tigranajurca. Paicunaca, Samaria llactapi tiaj tauca pueblocunapimi, ali villaita villashpandi rinajurca.
Etiopía shuti llactamanda runamanmi, Felipeca villashca
26Chai jipami, Jatun Dios cachamushca angelca, Felipeman cashna nirca: “Jerusalenmanda llujshishpa, Gaza shuti puebloman rina ñanda japishpa, urai ringuilla” nircami. Chai ñanga, jichushca pambatami yalijun. 27Shina nijpica Felipeca, jatarishpa rircallami. Pai rijushpaca, Etiopía shuti llactamanda eunuco nishca runahuanmi tuparirca. Paica, Etiopía llactata jatun mandaj Candace shuti huarmi tucui imalla charishcatapash alichishpa cuidajmi carca. Paica, Jerusalenbi Diosta ninanda alicachingapajmi shamushca carca. 28Chai runaca, Dios ima nishcata villaj Isaías escribishcata leyishpandimi, carretapi tiarishca tigrajurca. 29Shina rijujpimi Felipetaca, Diospaj Espíritu yuyaita cushpa:
—Chai carretapi rijujta cumbangapaj ri— nirca.
30Chaiman rishpaca, Dios ima nishcata villaj Isaías escribishcata leyijujta uyashpami:
—¿Can leyijushca imata nijujtapash yachai ushanguichu?— nishpa tapurca.
31Shina nijpimi chai runaca, cashna nirca:
—Pipash na yachachijpica, ¿imashnata yachashayari?— nircami.
Chai jipami Felipetaca, carretaman vitsiashpa paihuan tiarichun ninanda mañarca.
32Paica, Dios escribichishca Shimitami leyijurca. Chai Shimipica, cashnami nijurca:
“Llamagutashna huañuchingapajmi, paitaca apanajurca.
Paica, rutujcunapaj ñaupajpi, maltun llama upalla sirijunshna,
imata ningapajllapash na shimita pascarcachu.
33Na ricunayachishpa llaquichijujpipash,
imatapash cashcatapachami rurana canchi nishpaca, pipash na nircachu.
Cai pachapi huañuchi tucujpimi,
paipaj miraicuna tianmi nishpaca,
pipash na parlanga” nijurcami.
34Chai eunuco runaca, Felipeta cashna nishpami tapurca:
—Dios ima nishcata villaj chai runaguca, ¿paimandallatachu cashna villajupan, na cashpaca shuj runamandachu villajupan? Maijanmanda chashna nijujtapash villahuai— nircami.
35Shina nijpimi, chai escribishcamanda callarishpa Felipeca, Jesusmanda ali villaita villajurca. 36Ñanda shina rinajushpallatami yacu pataman chayashpaca, chai eunuco runaca cashna nirca:
—Ricui, caipi yacu tiashcami. ¿Ñuca bautizaringapaca, imapash jarcahuangachu?— nircami.
37Shina nijpimi, Felipeca:
—Tucui shunguhuan crishpaca, bautizari ushanguimi— nirca.
Shina nijpimi, chai runaca:
—Ari, Apunchi Jesucristotaca, Taita Diospaj Churi cajta crinipachami— nishpami tigrachirca.
38Shina nishpaca, carretata shayachishpa Felipendi, eunuco runandi uriajushpami, yacuman urai yaicugrirca. Chaipimi paitaca bautizarca. 39Chai yacumanda llujshijpimi Felipetaca, Jatun Diospaj Espíritu aparca. Chai eunuco runaca, Felipetaca na ashtahuan ricushpapash, ninanda cushijushpa rircallami. 40Ashtahuangarin Azoto shuti pueblopimi, Felipeca ricurirca. Chai pueblomanda callarishpa, tucui pueblocunapimi ali villaita villashpandi, Cesarea shuti puebloman chayangacaman rijurca.
Sélection en cours:
HECHOS 8: QUII
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Quichua Imbabura Bible © United Bible Societies, 1994.
