Čơdơ̆ng Phŭn 12
12
Yêhôwa Iâu Abram
1Yêhôwa laĭ kơ Abram: “Tơbiă bĕ mơ̆ng plei pla ih, kơnŭng djuai ih laih anŭn sang ama ih kiăng kơ nao pơ lŏn čar Kâo či črâo brơi kơ ih.#Bruă 7:2-3; Hêb 11:8.
2Kâo či ngă brơi ih jing hĭ sa kơnŭng djuai prŏng,
Kâo či brơi tơlơi mơyun hiam kơ Ih,
Ngă hing ang kơ anăn ih,
Laih anŭn ih či jing phŭn kơ tơlơi mơyun.
3Kâo či brơi tơlơi mơyun hiam kơ ƀing hlơi hơơč mơyun kơ ih,#Gal 3:8.
Kâo hơtơ̆m pah kơ ƀing hlơi hơtơ̆m pah ih;
Abih bang mơnuih ƀơi lŏn tơnah
Yua mơ̆ng ih gơñu či hmâo tơlơi mơyun hiam.”#12:3 Dưi pơblang dơ̆ng mơ̆n: Abih mơnuih ƀơi lŏn tơnah či rơkâo kơ Kâo pha brơi tơlơi mơyun hiam kơ ƀing gơñu kar hăng Kâo hmâo pha brơi laih tơlơi mơyun hiam kơ ih.
Abram truh pơ Kanaan
4Abram tơbiă nao kar hăng tơlơi Yêhôwa hmâo pơtă laih; Lot nao hrŏm hơbĭt hăng ñu. Tơdang tơbiă mơ̆ng Čaran, Abram hmâo tơjuh pluh rơma thŭn laih. 5Abram djă ba HʼSarai, bơnai ñu, Lot, amon ñu, abih bang dram gơnam ñu hmâo pơkom pioh mơ̆ng hlâo, laih anŭn ƀing hlŭn gơñu hmâo amăng Čaran, nao pơ Kanaan. Tơ gơñu truh laih pơ Kanaan, 6Abram nao djŏp tring, truh pơ phŭn kơyâo mơyang Môrê ƀơi Sičem. Hlăk anŭn, ƀing Kanaan ăt hlăk dŏ amăng tring anŭn. 7Yêhôwa pơdah rai kơ Abram laih anŭn laĭ: “Kâo či brơi lŏn čar anai kơ kơnŭng djuai ih.” Ƀơi anai, Abram ngă sa boh kơƀang ngă yang brơi kơ Yêhôwa, jing Pô hmâo pơrơđah rai kơ ñu.#Bruă 7:5; Gal 3:16. 8Mơ̆ng anŭn, ñu đuaĭ nao dŏ pơ gah khul bol čư̆ gah ngŏ kơ Bêthel, laih anŭn pơdơ̆ng sang khăn tơ̆ng krah Bêthel pơ gah yŭ, laih anŭn Ahi pơ gah ngŏ. Ñu ăt pơdơ̆ng pơ anŭn sa boh kơƀang ngă yang brơi kơ Yêhôwa laih anŭn rơkâo kơwưh kơ anăn Ñu. 9Giơ̆ng anŭn Abram đuaĭ nao ƀrư̆ ƀrư̆ truh pơ Nêgep.#12:9 Dưi pơblang dơ̆ng mơ̆n: gah dơnŭng.
Abram trŭn nao pơ Êjip
10Hlăk anŭn hmâo tơlơi ư̆ rơpa prŏng truh amăng tring Kanaan. Abram trŭn nao pơ Êjip kiăng dŏ pơ anŭn amăng ƀiă thŭn, yua kơ hmâo tơlơi rơpa prŏng biă mă pơ anŭn. 11Tơ gơñu čơdơ̆ng mŭt amăng čar Êjip, Abram laĭ hăng HʼSarai, bơnai ñu tui anai: “Kâo thâo ih jing sa čô đah kơmơi hiam rŏ. 12Tơ ƀing mơnuih Êjip ƀuh ih, gơñu či laĭ: ‘Anŭn jing bơnai ñu’; giơ̆ng anŭn gơñu či pơdjai hĭ kâo, samơ̆ lui ih dŏ hơdip. 13Tui anŭn, brơi ih laĭ ih jing adơi kâo, kiăng kơ yua mơ̆ng ih gơñu či brơi kâo dŏ hơdip laih anŭn jum kâo hăng tơlơi mơak.”#Čơd 20:2; 26:7. 14Tơ Abram mŭt amăng čar Êjip, ƀing mơnuih Êjip ƀuh pô đah kơmơi anai hiam rŏ biă mă. 15Ƀing khua mă bruă kơ Pharaôn ƀuh ñu, gơñu pơ-ư ƀơi anăp pơtao, tui anŭn arăng mă ba đah kơmơi anai mŭt amăng sang pơtao Pharaôn. 16Yua kơ HʼSarai yơh Pharaôn hmâo jum mă Abram hăng tơlơi hiam, laih anŭn Abram hmâo mă tŭ lu triu, rơmo, aseh kle tơno, aseh kle ania, aseh samô, ƀing hlŭn đah rơkơi đah kơmơi.
17Samơ̆ ăt yua kơ HʼSarai mơ̆n, bơnai Abram, Yêhôwa hmâo brơi trŭn tơlơi ruă tơnap prŏng kơ Pharaôn hăng kơ ƀing mơnuih amăng sang anŏ ñu. 18Pharaôn iâu rai Abram laih anŭn tơña: “Hơgĕt tơlơi ih hmâo ngă laih kơ kâo? Yua hơgĕt ih ƀu brơi kâo thâo ñu jing bơnai ih lĕ? 19Yua hơgĕt ih laĭ: ‘Ñu jing adơi kâo’ laih anŭn brơi kâo mă ñu ngă bơnai? Ră anai, hĕ bơnai ih, mă glaĭ ñu hăng đuaĭ bĕ.” 20Pharaôn pơđar kơ ƀing tơhan ñu ba Abram hăng bơnai ñu tơbiă đuaĭ hrŏm hăng abih bang gơnam ñu hmâo.
Sélection en cours:
Čơdơ̆ng Phŭn 12: JRA2016
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2016 United Bible Societies. All rights reserved.
