Čơdơ̆ng Phŭn 11
11
Rơñan Babel
1Hlăk anŭn abih bang lŏn tơnah anai hmâo kơnơ̆ng sa tơlơi pơhiăp đôč laih anŭn yua hrŏm hơbĭt khul boh pơhiăp. 2Mơ̆ng gah Ngŏ, gơñu tơbiă nao laih anŭn bưp sa boh anih lŏn daŏ ƀơi Sinar. Gơñu dŏ pơ anŭn. 3Gơñu pơlaĭ hăng tơdruă gơñu: “Ră anai, brơi ƀing ta ngă bĕ lŏn čeh laih anŭn čuh ñu sui amăng apui.” Tui anŭn gơñu hmâo lŏn čeh pioh kơ bruă man laih anŭn ia ƀlit Ƀitumen ngă mơnơ̆ng pơklep glaĭ tơdruă. 4Gơñu laĭ: “Bơ ta, brơi ƀing ta pơdơ̆ng bĕ kơ ƀing ta pô sa boh plei prŏng laih anŭn pơdơ̆ng sa boh rơñan hmâo jŭng glong truh pơ adai kiăng kơ ƀing ta dưi hmâo tơlơi hing ang laih anŭn ƀu čơlah čơlap amăng djŏp lŏn tơnah ôh.”
5Yêhôwa trŭn rai kiăng lăng plei prŏng hăng rơñan ƀing ană tơčo ană mơnuih hlăk dŏ pơdơ̆ng. 6Yêhôwa laĭ: “Anai nê, abih bang ƀing gơñu jing sa djuai mơnuih, pơhiăp amăng sa tơlơi pơhiăp. Gơñu phrâo pơphŭn pơdơ̆ng đôč samơ̆ jing kar hăng anŭn laih, tơdơi adih gơñu či dưi ngă yơh abih bang bruă gơñu pơmĭn kiăng ngă. 7Bĕ ƀing ta trŭn, ngă pơlŭk pơlăk hĭ boh pơhiăp gơñu, kiăng kơ ƀing gơñu ƀu thâo hluh tơlơi pơhiăp kơ tơdruă gơñu ôh.” 8Tui anŭn mơ̆ng anih anŭn, Yêhôwa pơčơlah hĭ ană mơnuih amăng djŏp djang lŏn tơnah, laih anŭn bruă pơdơ̆ng plei prŏng dơ̆ng glaĭ hĭ. 9Yua kơ anŭn, arăng iâu anih anŭn jing Babel,#11:9 Babel: Amăng boh pơhiăp ƀing Babilôn boh hră anai kiăng laĭ “Amăng jang kơ ƀing yang”; Amăng tơlơi Hêbrơ, boh hră anai hmâo dơnai pơđok hrup hăng boh hră hmâo tơlơi kiăng pia “pơlŭk pơlăk”. yua kơ ƀơi anih anŭn Yêhôwa ngă pơlŭk pơlăk hĭ boh pơhiăp kơ abih lŏn tơnah, laih anŭn mơ̆ng anih anŭn Ñu ngă brơi ană mơnuih bra hyu pơ djŏp anih.
Ơi Adon ƀing Israel mơ̆ng Apbraham truh pơ Yôsep
(11:10 – 50:26)
Kơnŭng djuai Abram
10Anai jing kơnŭng djuai Sem.
Dua thŭn tơdơi kơ ia lip, hlăk Sem sa rơtuh thŭn, ñu hmâo sa čô ană đah rơkơi, anăn gơ̆ Arpaksat. 11Tơdơi kơ tơkeng Arpaksat, Sem dŏ hơdip rơma rơtuh thŭn dơ̆ng, tơkeng ană đah rơkơi ană đah kơmơi dơ̆ng.
12Hlăk Arpaksat klâo pluh rơma thŭn, ñu hmâo sa čô ană đah rơkơi, anăn gơ̆ Sêla. 13Tơdơi kơ tơkeng Sêla, Arpaksat dŏ hơdip pă rơtuh klâo thŭn dơ̆ng, tơkeng ană đah rơkơi ană đah kơmơi.
14Hlăk Sêla klâo pluh thŭn, ñu hmâo sa čô ană đah rơkơi, anăn gơ̆ Êber. 15Tơdơi kơ tơkeng Êber, Sêla dŏ hơdip pă rơtuh klâo thŭn dơ̆ng, tơkeng ană đah rơkơi ană đah kơmơi.
16Hlăk Êber klâo pluh pă thŭn, ñu hmâo sa čô ană đah rơkơi, anăn gơ̆ Pêlek. 17Tơdơi kơ tơkeng Pêlek, Êber dŏ hơdip pă rơtuh klâo pluh thŭn dơ̆ng. Tơkeng ană đah rơkơi ană đah kơmơi.
18Hlăk Pêlek klâo pluh thŭn, ñu hmâo sa čô ană đah rơkơi, anăn gơ̆ Rêu. 19Tơdơi kơ tơkeng Rêu, Pêlek dŏ hơdip dua rơtuh dua rơpăn thŭn dơ̆ng, tơkeng ană đah rơkơi ană đah kơmơi.
20Hlăk Rêu klâo pluh dua thŭn, ñu hmâo sa čô ană đah rơkơi, anăn gơ̆ Sêruk. 21Tơdơi kơ tơkeng Sêruk, Rêu dŏ hơdip dua rơtuh tơjuh thŭn dơ̆ng, tơkeng ană đah rơkơi ană đah kơmơi.
22Hlăk Sêruk klâo pluh thŭn, ñu hmâo sa čô ană đah rơkơi, anăn gơ̆ Nahôr. 23Tơdơi kơ tơkeng Nahôr, Sêruk dŏ hơdip dua rơtuh thŭn dơ̆ng, tơkeng ană đah rơkơi ană đah kơmơi.
24Hlăk Nahôr dua pluh dua rơpăn thŭn, ñu hmâo sa čô ană đah rơkơi, anăn gơ̆ Têra. 25Tơdơi kơ tơkeng Têra, Nahôr dŏ hơdip sa rơtuh pluh dua rơpăn thŭn dơ̆ng, tơkeng ană đah rơkơi ană đah kơmơi.
26Hlăk Têra tơjuh pluh thŭn, ñu jing ama kơ Abram, Nahôr, Haran.
Kơnŭng Djuai Têra
27Anai jing kơnŭng djuai Têra: Têra jing ama kơ Abram, Nahôr, laih anŭn Haran. Haran jing ama Lot. 28Haran djai amăng plei ñu pô, jing plei Ur, čar Kaldê, tơdang ama ñu Têra ăt dŏ hơdip. 29Abram laih anŭn Nahôr dŏ bơnai; bơnai Apbram anăn gơ̆ HʼSarai; bơnai Nahôr anăn gơ̆ HʼMilka. HʼMilka hăng HʼIska jing ƀing ană Haran. 30HʼSarai jing đah kơmơi plao; ñu ƀu hmâo ană ôh.
31Têra djă ba Apbram, ană đah rơkơi ñu, Lot, ană đah rơkơi Haran, amon ñu, laih anŭn HʼSarai, bơnai Abram, jing hơđŭ ñu, laih anŭn gơñu tơbiă mơ̆ng plei Ur, čar Kaldê, rơbat nao pơ Kanaan. Samơ̆ tơ truh pơ Čaran, gơñu dŏ hĭ pơ anŭn. 32Têra hmâo hơdip dua rơtuh rơma thŭn, laih anŭn ñu djai pơ Čaran.
Sélection en cours:
Čơdơ̆ng Phŭn 11: JRA2016
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2016 United Bible Societies. All rights reserved.
