LOS HECHOS 4

Pedro najan Juan napatavo apquilyimtalhnamo

1Apquiltimnam alhta mocjam Pedro najan Juan. Yejemoc alhta apquilvaa sacerdotes najan apvisqui apquiltamilquiscama tingma apponquinomap najan saduceos. 2Apquillovquic alhta apquilvita actemaclha apquillhicmoscama Pedro najan Juan. Apquillhicmosquic alhta actemaclha apnalhaticjangviyam apquilmasquingvaycmo acno aplhaticjangviyam alhta Jesús. 3Yejemoc alhta apquilmacpo Pedro najan Juan. Apquilnescacmec alhta singilpilhtetomaclha acvocmo ayitsaca, ayinyemaclha intalhnacmoc alhta. 4Am alhta elyascacmoc apquillinga tasic amyaa. Apvocmec alhta cinco mil enlhitaoc aptimem melyasquiyam.

5Alhtooc alhta apcaneclho tingma Jerusalén apquilviscaa najan apquilvanyam najan apquilyascamco apquiltemaclha. 6Anás alhta najan aptomja apquimja apmamyi sacerdote najan Caifás najan Juan najan Alejandro najan apquilanacpo apmolhama apquimja apmamyi sacerdote. 7Yejemoc alhta apquiltimnasacpo Pedro najan Juan. Apquilnesquic alhta nipyesicsa apquilmalhnamcaa:

—¿Soc ayinyema acmovan apquillanay as asoc? ¿Soc acvisay apquillhanma quellhip? —alhta apquiltomjac.

8Inlanoc alhta apvalhoc Espíritu Santo Pedro. Aptomjac alhta apquilanya:

—Quellhip apquilviscaa najan apquilvanyam Israel. 9Ningillhenalhqui inyicje ningiltamilquisquiyam enlhit meyimnatem. Apquililtamjoc elyasamcojo ayinyemaclha actemaclha aptamalviyam as enlhit. 10Elyasamcojo anco quellhip najan aplhamoclhojo Israel. Ayinyema apmopvan apanco Jesucristo co Nazaret. Apquilyipitquiscama alhta quellhip asoc timyescama. Dios Ingyapam alhta aplhaticjascacmoc nipyesicsa apquilmasquingvaycmo. Eyca maa ayinyema apvisay aptamalviyam as enlhit apquinmamcaa nac lha. 11Eyca as Jesús aptomja mataymong apquilyamasma alhta quellhip apquillaneycaoc tingma. Inpiquenalhquic alhta tingma apvojac actajescamaclha.#Sal 118.22. 12Paj poc singvomquiscama tap.#Jn 14.6. Paj najan moc apvisay ninlhanma as nalhpop nipyesicsa enlhitaoc actemaclha singvomquiscama tap.

13Pilapcasquic alhta apquilyimtalhnamo apquillinga apquiltimnaycam Pedro najan Juan. Apyicpilcangvocmec alhta mesovjongvaycmo actemaclha aptalhesaycaoc enlhitaoc. Apyicpilcangvocmec alhta aptema alhta mataa apquillhalhmaa Jesús. 14Apquilvitamcoc alhta aptamalvocmo aptomja apquinmaycamo lhama. Am alhta elatingmavo. 15Lhama alhta apquilapajasa elanteypoc apcaneyquiclhilha. Apquililtamjoc alhta elpamejitsacpoc siclho. 16Apquiltomjac alhta:

—¿Co sat ontimesquisic as enlhitaoc? —alhta apquiltomjac. Apquilyasamcoc najan aplhamoclhojo enlhitaoc co Jerusalén actemaclha apquillanay asoc monquinatquiscama. Mongvanquejec ongyilhasquisojo. 17Pac ongilanic elvatsamcoc apquillhanma apvisay Jesús nipyesicsa enlhitaoc. Yoyam copayjingvomeje mocjam as amyaa nipyesicsa enlhitaoc —alhta apquiltomjac apquilpamesma.

18Yejemoc alhta acna altimnasqueclho mocjam Pedro najan Juan. Apcasacpec alhta esovam mocjam apvisay Jesús actemaclha mataa apquiltimnascama najan apquillhicmoscama. 19Yejemoc alhta apcatingmavoc Pedro najan Juan:

—¿Soc lha asoc actomja acpeyvomo napato Dios? ¿Pa ya ongilaylhojo quellhip, inlhoyqui laa ongilaylhojo Dios Ingyapam? Elyicpilcojo sat quellhip lha. 20Mongvanquejec nincoo ongilvatsamcoc ongiltimnam asoc ningvitay najan ninlingay —alhta apquiltomjac.

21Apquilasacpec alhta mocjam Pedro najan Juan eliltimnam amyaa. Yejemoc alhta apquilapajasacpo. Am alhta elvitac apquilyimtalhnamo aptemaclha acmasom, yoyam elyanmongsiclha. Apnaymacoc alhta ayinyemaclha. Apquilacoc alhta mataa apmopvan aptamjaycam Dios. 22Apyeycaac alhta cuarenta años enlhit aptamalviyam actema aptamjaycam sinpilapquiscama.

Cristianos apquililmalhnancama

23Lhama alhta apquilapajasacpo Pedro najan Juan, yoyam eltajiclha. Apquilyoclhec alhta apnaymacoc. Apquililtimnasam alhta actemaclha apquillhanma apquilimja apmamyi sacerdotes najan apquilvanyam. 24Lhama alhta aclingalhco apquiltimnascama. Apnasoc alhta moc actomjaclha apquilpamejitquiscama Dios Ingyapam:

—Dios Ingyapam Visqui ingac. Lhip aptomja apquillanay netin najan nalhpop najan yingmin acvanyam najan aclhamoclhojo asoc acnamco maa.#Ex 20.11; Neh 9.6; Sal 146.6. 25Apnec nic nat lhip apquilancam David. Apquiltimnam nic nat actemaclha lhip appayvam ayinyema Espíritu Santo:

¿So actema apquilloma nac enlhitaoc lhalhma anco?

¿So actema ayajemo alquitamsama apquilvalhoc asoc?

26Apcanaycamo lhama apquilviscaa as nalhpop actemaclha alinmelhaycam apquilvalhoc.

Apcaneclhec najan yatapquilviscaa.

Apquilinmelhma Visqui ingac najan Visqui Apponquinomap.#Sal 2.1-2.

27Naso, apquicjingvactamo alhta as tingma Herodes,#Lc 23.7-11. najan Poncio Pilato,#Mt 27.1-2; Mr 15.1; Lc 23.1; Jn 18.28-29. najan enlhit lhalhma anco najan enlhitaoc Israel. Apquilinmelham alhta lhip Apquitca apponquinomap Jesús.#Is 52.13; Fil 2.7. 28Alhta apquiltomjac as enlhitaoc actemaclha aclhanma apvalhoc lhip nano yoyam cotnejic. 29Visqui ingac, quip ilanojo apquiltemaclha singilyamneycam. Iyimnaticsojo ingilvalhoc ningiltomja lhip apquilancam. Yoyam onlingacsic lhip appayvam mepqui ningay. 30Ipayes sat lhip apmic. Apmopvan yoyam eltamalvocmoc acmasca apyimpeoc. Ingyane sat cotnejic asoc monquinatquiscama najan tamjaycam sinpilapquiscama ayinyema apvisay Jesús, lhip Apquitca apponquinomap —alhta intomjac apquilmalhnancama.

31Lhama alhta apquilpenesa apquililmalhnancama. Apyovjam alhta tingma apcaneyquiclhilha. Apnangvocmec alhta apquilvalhoc Espíritu Santo apquilanomacpo. Apquililtimnam alhta Dios appayvam mepqui apquilay.

Apquilpasmeycam apquilnatam cristianos

32Am alhta coyeycajalhcac moc apquilvalhoc aplhamoclhojo enlhit aptimem melyasquiyam (tasic amyaa). Am alhta eltamjoc etnejic lhapcoc apanco apquilnatam, eyca apquilpasmeycam aclhamoclhojo asoc.#Hch 2.44-45. 33Yiplovcoc alhta apquilmopvan apóstoles apquilapajasomap naysicsa apquillingascama actemaclha aplhaticjangviyam Visqui Jesús. Appasmec alhta aplhamoclhojo Dios Ingyapam. 34Am alhta etacpoc enlhit ayaymomalhca lhama asoc. Apquilhaquic alhta moclhama apquilcaycaoc najan tingma apancaoc. Apquilsantac alhta mataa solyayem acyanmongam asoc apquilhacjam. 35Apquilmasquic alhta mataa solyayem apóstoles apquilapajasomap. Moclhama alhta apquillhovamcoc actomja ayaymomalhca asoc. 36Apnec alhta lhama enlhit apvisay José. Levita alhta co Chipre acyayem inquilhe. Apquiltomjacpec alhta nipyesicsa apóstoles apquilapajasomap apvisay Bernabé, ningiltimem Aptamilquisquiyam Ingvalhoc. 37Apyinyovquic alhta apquilcacjam as enlhit. Apsantac alhta solyayem acyanmongam. Apquilmasquic alhta solyayem apóstoles apquilapajasomap.

Sélection en cours:

LOS HECHOS 4: ENHL

Surbrillance

Copier