LOS HECHOS 5

Macsilhnanoncama Ananías najan aptava Safira

1Apnec alhta poc enlhit apvisay Ananías najan aptava Safira. Apyinyovquic alhta apquilcacjam pac. 2Apmiyovquic alhta nicja solyayem pac. Inyasamcoc alhta najan aptava. Apsaclhesquic alhta nicja solyayem. Apquilmasquic alhta solyayem apóstoles apquilapajasomap.

3Aptomjac alhta apcanya Pedro:

—Ananías, ¿soctomja actalhna nac apvalhoc yavey Satanás? Apquiltamjoc lhip eyinimsam Espíritu Santo. Apmiyovquic lhip nicja solyayem acyanmongam apquilcacjam pac. 4Lhip apancaoc inyicje apquilcacjam. Apvanqui inyicje emyoc acyovoclhojo acyanmongam. ¿Soctomja aclhena nac apvalhoc emyoc nicja solyayem? Am elyinimcasam lhip enlhitaoc. Apyinimcasqui nac lhip Dios Ingyapam —alhta aptomjac.

5Lhama alhta aplinga appayvam Ananías. Yejemoc alhta apquilpolintamo apquitsepa. Apquilacac alhta aplhamoclhojo enlhitaoc apquillinga amyaa. 6Yejemoc alhta apquilpilhqueta apjapac quilyimnanic. Apquilsaclhec alhta yoyam elatongnic.

7Malha tres horas alhta intomjac najan actalhningvactamo aptava niptamin. Am alhta coyasamcoc apquitsepa atava. 8Yejemoc alhta aptomjac apcanya Pedro:

—Jeltimnas siclho. ¿Acvamlha ya acyanmongam apquilcacjam apyamasma atava? —alhta aptomjac.

Intomjac alhta quilvana:

—Eje, vamlha alhta acyanmongam lha —alhta intomjac.

9Yejemoc alhta apcatingmavo Pedro:

—¿Soctomja acvajaneclho nac atava, yoyam coyipconic Espíritu apanco Visqui ingac? Ca incolanojo, apquilvoctac apatong tingma quilyimnanic apquilatongna lhac atava. Quilhvoc sat colhic acyasquisa lhiya lha —alhta aptomjac.

10Yejemoc alhta alpolintamo apquinmamcaclha Pedro ayitsepa. Yejemoc alhta apquilantalhningvactamo quilyimnanic. Apquilvitangvoctac alhta ayitsepa. Apquilsaclhec alhta. Apquilatongvoclho acpayjo apquilatongnaclha atava. 11Apquilacac alhta aplhamoclhojo Jesucristo apmolhama najan aplhamoclhojo aptomja apquillingay amyaa.

Asoc sinpilapquiscama najan asoc monquinatquiscama

12Invitalhquic alhta nipyesicsa enlhitaoc aclhamoclhojo asoc monquinatquiscama najan asoc sinpilapquiscama ayinyema alhta apóstoles apquilapajasomap. Apcaneclhec alhta mataa apquilanomacpo congne tingma apvisay Salomón. 13Am alhta elyipitcangveclho apnaymacoc. Apquilacpec alhta apmopvan apquiltamjaycam. 14Aplhamaclhec alhta aptomja melyasquiyam Visqui ingac aplhamoclhojo enlhit najan quilvanaa. 15Apnincanveclhec alhta almasca apyimpeoc avalhoc amay acyiplomo apquilyitnamaclha netin. Apquiltamjoc alhta cajapvomoc pisquisca pac Pedro naysicsa apyeycajay. 16Apquicjingvoctac alhta aplhamoclhojo enlhit tingma Jerusalén. Apquilinyectac alhta lhalhma anco nipyava tingma. Apquilpatmentac alhta aplhamoclhojo almasca apyimpeoc najan somquic quilyicjamo actovascama. Apquiltamilquiscacmec alhta aplhamoclhojo.

Apmomap Pedro najan Juan

17Yejemoc alhta aplova apquimja apmamyi sacerdote najan apquillhalhmaa saduceos. Avanjec alhta apquilyasipquiscama. 18Yejemoc alhta apquilmacpo apóstoles apquilapajasomap. Apquilnesquic alhta singilpilhtetomaclha. 19Alhtaa alhta intomjac apvaa ángel Visqui ingac. apcasinancama. Aplicasquic alhta atong singilpilhtetomaclha apquilantipsa. Aptomjac alhta apquilanya:

20—Elmiyaclha sat quellhip tingma apponquinomap. Eliltimnasam sat enlhitaoc actemaclha acyimnatem ingnenyic alhnancoc —alhta aptomjac.#Jn 11.25; 14.6; Ro 6.4.

21Natamin apquillingay alhta apquilantalhningvayclho tingma apponquinomap. Alhtooc alhta apquillhicmosa amyaa.

Yejemoc alhta apvactamo apquimja apmamyi sacerdote najan apquillhalhmaa. Apcansaclhec alhta apquilviscaa apquilpamejitsomap najan apquilanomacpo apquilvanyam Israel. Apquilapajasquic alhta singilpilhtetomaclha, yoyam enalantac apóstoles apquilapajasomap. 22Yejemoc alhta apquilvoclho singilpilhtetomaclha apquilancam. Am alhta elvitac apnaycam congne. Yejemoc alhta apquiltajavo apquiltimnascactamo amyaa:

23—Coleyjac lhac atnaoc singilpilhtetomaclha. Ningvitac lhac apquiltamilquiscama atong apcanamcaa payjoc atong. Lhama lhac ninlica atong. Am lhac ongilvitac apnaycam congne —alhta apquiltomjac.

24Lhama alhta aplinga amyaa apquimja apmamyi singilpilhtetemo apquilancam najan apquilimja apmamyi sacerdotes. Pilapcasquic alhta apquillinga. Am alhta elyasamcoc actomjaclha. 25Yejemoc alhta apvaa lhama enlhit apquiltimnasamcaa amyaa:

—Quip elanojo. Apquilvoclhec lhac tingma apponquinomap enlhit aplhatmomap singilpilhtetomaclha. Apquillhicmosquic maa enlhitaoc —alhta aptomjac.

26Yejemoc alhta aplhinga apquimja apmamyi singilpilhtetemo apquilancam najan apquillhalhmaa. Aptamilcasoc alhta apnalantamo apóstoles apquilapajasomap. Apquilacpec alhta apnaymacoc. Apquiltamjoc alhta inyicje elyicna mataymong. 27Lhama alhta apquilviscactamo. Apquilnescacmec alhta napatavo apquilviscaa apquilpamejitsomap. Aptomjac alhta apquilanya apquimja apmamyi sacerdotes:

28—Nincoo alhta ninganem elvatsamcoc quellhip apquillhicmoscama actemaclha apvisay Jesús. Quip elanojo, apsovjoquic quellhip apquillhicmoscama aplhamoclhojo co Jerusalén. Apquililtamjoc quellhip jingilpejescac ningajem as enlhit —alhta apquiltomjac.#Mt 27.25.

29Apquilatingmavoc alhta Pedro najan apnaymacoc apóstoles apquilapajasomap:

—Ingvanquic nincoo mongilyejiclhojo enlhit. Eyca Dios mongvanquic mongilyejiclhojo. 30Ningilyeyjamcaa apvisqui apancaoc Dios aptomja aplhaticjasquiyam Jesús. Quellhip alhta apquilajem, apquilyipitquiscama asoc timyescama. 31Dios Ingyapam aptimesquiscama alhta apyimtalhnamo, aptomja Apvisqui najan Singvomquiscama tap. Apquiltamjoc yoyam elyanmongsic apquilvalhoc enlhitaoc Israel, yoyam colmascosalhca melyascalhma. 32Ninlingasquic nincoo actomja ningvitaycamco as asoc najan lha Espíritu Santo. Dios Ingyapam alhta apnescama Espíritu Santo apquilvalhoc aptomja apquilyajayquiclho.

33Apquillovquic alhta natamin apquillingay. Apquililtamjoc alhta elajic. 34Apnec alhta nipyesicsa apquilyimtalhnamo lhama fariseo apvisay Gamaliel, aptomja apyascamco apquiltemaclha. Aptomjac alhta apquilayo apnaymacoc. Apquinmaclhec alhta netin. Apcanayquic alhta elantipsic siclho apóstoles apquilapajasomap. 35Yejemoc alhta apquiltimnasamcaa:

—Quellhip enlhitaoc Israel. Elavojo yoyam eltimesquiscomjoc as enlhitaoc. 36Am colvoncacmoc mocjam quellhip amyaa Teudas. Apyimtalhnesacpec alhta apanco as enlhit. Malha cuatrociento enlhitaoc alhta apquilyiplomo. Eyca apmatnec alhta. Apquilhpanec alhta aptomja apquilyiplomo. Nelha alhta intamongvocmoc. 37Niptamin as enlhit apvaa Judas co Galilea, naysicsa apquilyipsatomap lhalhma anco enlhitaoc. Aplhamoc alhta enlhitaoc aptomja apquilyiplomo. Apmatnec alhta najan. Apquilhpanec alhta aptomja apquilyiplomo. 38Actomjac coo siyanya quellhip: Elyamyiclha as enlhitaoc. Elvatsaoc sat. Intimec ancoc enlhit ayinyema aptemaclha, comasquingvomoc sat. 39Intimec anco Dios ayinyema aptemaclha, colapvanquejec quellhip eltovacsic. Elavojo sat quellhip. Noeltime nasa apquilinmelhaycam Dios Ingyapam —alhta aptomjac.

40Apquilvajanamquic alhta actomjaclha appayvam. Yejemoc alhta apquilevamcaa apóstoles apquilapajasomap. Apquilyicpilhquetamquic alhta elvatsamcoc apquillhanma apvisay Jesús. Yejemoc alhta apquilyamyeclho.

41Yejemoc alhta apquilantepa apóstoles apquilapajasomap napatavo apquilviscaa apquilpamejitsomap. Payjeclhec alhta apquilvalhoc mayasquiscama apyimpeoc acyanmongam apquillhanma apvisay Jesús. 42Am alhta elvatsamcoc apquillhicmoscama aclhamoclhojo acnim congne tingma apponquinomap najan moclhama tingma. Apquililtimnasamcaa alhta tasic amyaa Jesús aptomja nac Apponquinomap.

Sélection en cours:

LOS HECHOS 5: ENHL

Surbrillance

Copier